LUKE 18

Jesus Otop Ŋke Abaŋa Ebe Akpa Ye Ebierikpe

1EKEM Enye otop ŋke ɔnɔ mmɔ, ndikpep ete mme owo ekpebɔŋ akam kpukpru ini, ekunyuŋ ekpa mba. 2Ebierikpe okodu ke obio kiet emi mibakke Abasi, minyuŋ ikereke owo: ebe-akpa onyuŋ odu ke obio oro; 3ndien enye etiene ebierikpe ediwak ini, ete, Sio owo-utɔk mi usiene nɔ mi. 4Edi enye inyimeke ke ndusuk ini: edi ekem enye ɔdɔhɔ ke esit esie ete, okposuk edi nte mmembakke Abasi, mmonyuŋ ŋkereke owo, 5sia ebe-akpa emi efefen mi eyɔ, nyesio usiene esie, mbak enye edifina mi ke eriyɔrɔ esie kpukpru ini. 6Edi Ɔbɔŋ ɔdɔhɔ ete, ekop se ukwaŋ ebierikpe ɔdɔhɔde. 7Nte Abasi idinyuŋ isioho usiene inɔ ndimek ikɔt Esie, emi esemede enɔ Enye uwem-eyo ye okoneyo, okposuk edi nte Enye emede anyan ime ke ikɔ mmɔ? 8Ndɔhɔ mbufo nte, Enye eyewara osio usiene ɔnɔ mmɔ. Edi ke adaŋemi Eyen Owo edidide, nte Enye eyekut mbuɔtidem ke isɔŋ?

Jesus Otop Otop Ŋke Abaŋa Pharisee ye Publican

9Enye onyuŋ otop ŋke emi ɔnɔ ndusuk owo, emi eburede idem mmɔ efiɔk ete mimɔ idi ndinen owo, enyuŋ esinde mmɔ efen ke ndek: 10ete, Owo iba ekɔdɔk ke temple ndibɔŋ akam: kiet edi Pharisee, enye eken edi publican. 11Pharisee ada ɔbɔŋ akam ye idem esie, ete, Abasi, mmɔkɔm Fi, koro mmentiehe nte owo eŋwen, mbon nnama, mme anam ukwaŋido, mme esin-efibe, kpa ye nte publican emi. 12Ntre udia utim ikaba ke urua; nsosio ubak kiet ke itie duop ke kpukpru se nnyenede nnɔ Abasi. 13Edi publican ada nsan-nsan, inyuŋ inyimeke ndimenere kpa enyin esie nse enyɔŋ, edi amia ubɔk ke ikpanesit esie, ete, Abasi, tua mi, idiɔk owo, mbɔm. 14Ndɔhɔ mbufo nte, owo emi ɔsuhɔre ɔnyɔŋ ufɔk enyene utebe-ikpe akan enye eken: koro kpukpru owo eke emenerede idem esie, ke eyesuhɔre enye enim; edi owo eke ɔsuhɔrede idem esie, ke eyemenere enye.

Jesus Ɔdiɔŋ Nsek Nditɔ

(Mt 19.13-15; Mk 10.13-16)

15Edi eda nsek-nditɔ esɔk Enye ŋko, ete Enye otuk mmɔ ubɔk: edi ke ini mbet ekutde, esua enɔ mmɔ emi edade mmɔ edi. 16Edi Jesus okot mmɔ edi, ete, Eyak ŋkpri nditɔ etiene Mi, ekukpan mmɔ; koro Obio Ubɔŋ Abasi edide eke oruk emi. 17Ke akpanikɔ ke ndɔhɔ mbufo nte, Owo ekededi eke midibɔhɔ Obio Ubɔŋ Abasi nte ekpri eyen ididukke duk ke esit.

Owo Inyene Kiet

(Mt 19.16-30; Mk 10.17-31)

18Ekem ɔbɔŋ kiet obup Enye ete, Eti Andikpep, ndinam nso, man nnyene nsinsi uwem? 19Edi Jesus ɔdɔhɔ enye ete, Nsinam okotde Mi eti? Enye emi edide eti iduhe, ke mibɔhɔke Kiet, kpa Abasi. 20Ɔmɔfiɔk mbet: Kusin efibe, Kuwot owo, Kuyip inɔ, Kudi ntiense nsu, Kpono usɔ ye uka. 21Ɔbɔŋ oro ɔdɔhɔ ete, Mma nnonim kpukpru emi toto ke uyen mi. 22Edi ke ini Jesus okopde emi, ɔdɔhɔ enye ete, Ŋkpɔ kiet ke osuk anana fi kaŋa; nyam kpukpru se enyenede, deme nɔ mme ubuene, ndien enyenyene inyene ke heaven: nyuŋ di disaŋa ye Ami. 23Edi ke ini enye okopde ikɔ emi, enye akabare ɔfuhɔ eti-eti, koro enye enyenede ediwak inyene.

24Edi ke ini Jesus okutde enye, ɔdɔhɔ ete, Ɔsɔŋ adaŋa didie ye mbon inyene ndiduk ke Obio Ubɔŋ Abasi! 25Koro edi mmem-mmem ŋkpɔ ye camel ndibe ke odudu abiabon, akan owo inyene ndiduk ke Obio Ubɔŋ Abasi. 26Edi mmɔ emi ekopde edɔhɔ ete, Anie ndien ekeme ndibɔhɔ? 27Edi Jesus ɔdɔhɔ ete, Se isɔŋde ikan owo ikanke Abasi. 28Edi Peter ɔdɔhɔ ete, Sese, nnyin ikɔkpɔŋ kpukpru se ikenyenede nnyin itiene Fi. 29Edi Jesus ɔdɔhɔ mmɔ ete, ke akpanikɔ ke ndɔhɔ mbufo baba owo kiet iduhe, emi ɔkɔkpɔŋde ufɔk, mme ŋwan, mme nditɔ-eka, 30mme ete, mme eka, mme nditɔ, kabaŋa Obio Ubɔŋ Abasi, emi midibɔhɔ se iwakde ikan oro ke emi, ye nsinsi uwem ke eyo eke edidide.

Jesus Afiak Etiŋ Abaŋa Mkpa Esie

(Mt 20.17-19; Mk 10.32-34)

31Ekem Enye ada mbet duopeba esihere ada ŋkaŋ kiet, onyuŋ ɔdɔhɔ mmɔ ete, Sese, nnyin imɔŋ idɔk ika Jerusalem, ndien kpukpru se mme prophet ekewetde eyewɔrɔ enɔ Eyen Owo. 32Koro eyeyak Enye enɔ mme Gentile eyeyuŋ esak Enye nsahi, enyuŋ enam Enye but, enyuŋ efiari Enye etap: 33ndien ke ini ekemiade Enye ema, eyewot Enye: ndien ke ɔyɔhɔ usen ita Enye eyeset ke mkpa. 34Edi mmɔ ifiɔkke baba ŋkpɔ emi kiet, ikɔ emi onyuŋ odibe mmɔ, mmɔ inyuŋ ifiɔkke se Enye etiŋde.

Jesus Ɔkɔk Owo Nnan Ebeŋe-Ebeŋe

35Ekem nte Enye asaŋade ekpere Jericho, nnan kiet etie ke mben-usuŋ ebeŋe-ebeŋe: 36ndien ke ini owo oro okopde nte otu esaŋade ebe, obup mmɔ mme nsitibe. 37Edɔhɔ enye ete, Jesus eyen Nazareth ke ebebe. 38Ndien enye ofiori ete, Jesus, Eyen David, tua mi mbɔm. 39Edi mmɔ emi ebede iso esua enɔ enye, ete, okibi inua: edi enye ɔdɔdiɔŋ ofiori akan ete, Eyen David, tua mi mbɔm. 40Jesus atuak ada, ɔnɔ uyo ete eda enye esɔk Imɔ: ndien ke ini enye asaŋade ekpere, 41Jesus obup enye ete, Oyom nnam nso nnɔ fi? Enye ete, Ɔbɔŋ, nyom nditɔŋɔ ntak ŋkut usuŋ. 42Jesus ete enye, Kut usuŋ; mbuɔtidem fo ama anyaŋa fi. 43Ndo-ndo oro enye okut usuŋ, onyuŋ etiene Jesus otoro Abasi: kpukpru mbio enyuŋ enɔ Abasi itoro, ke ini mmɔ ekutde ŋkpɔ emi.

Currently Selected:

LUKE 18: ENA

Highlight

Copy