LUKE 23

Eda Jesus Eka Ke Iso Pilate

(Mt 27.1-2,11-14; Mk 15.1-5; Jn 18.28-38)

1EKEM mmɔ kpukpru edaha, eda Enye eka ke iso Pilate. 2Mmɔ enyuŋ etɔŋɔ ndidori Enye ikɔ, ete, Nnyin imokut owo emi nte abiatde mbio-obio ibuot, akpan ete ekunɔ Caesar utomo, onyuŋ ɔdɔhɔ ete, Imo ke Idem Imɔ idi Christ Edidem. 3Edi Pilate obup Enye ete, Nte Afo edi Edidem mme Jew? Jesus ɔbɔrɔ enye ete, Ndi Enye. 4Pilate ɔdɔhɔ ikpɔ oku ye mme otu owo, ete, Ŋkwe idiɔk ke idem owo emi. 5Edi mmɔ edɔdiɔŋ esɔŋɔ eyire ete, Enye obubere mbio-obio, ekpep mmɔ ŋkpɔ ke ofuri Judaea, ɔtɔŋɔ ke Galilee osim ebiet emi. 6Ke adaŋemi Pilate okopde emi, obup mme owo oro edi eyen Galilee. 7Ndien ke adaŋemi enye ɔfiɔkde ete Enye odu ke idak erikara Herod, ɔnɔ Enye esɔk Herod; emi nde odude ke Jerusalem ke mme usen oro. 8Ke adaŋemi Herod okutde Jesus esit adat enye eti-eti; koro enye okoyoyom anyan ini ndikut Enye, koro okokopde abaŋa Enye: onyuŋ odori enyin ete iyekut Enye anamde utibe ŋkpɔ kiet. 9Enye obup Jesus ediwak mbume; edi Jesus ibɔrɔke baba ikɔ kiet. 10Ndien ikpɔ oku ye mme scribe eda do, edori Enye ikɔ adaŋa nte mmɔ ekekeme. 11Herod ye mbon-ekɔŋ esie enyuŋ esak Enye nsahi, enyuŋ ebiaŋa Enye; ndien esine Enye ɔfɔŋidem edidem, ɔnɔ Enye efiak esɔk Pilate. 12Edi Herod ye Pilate ekabare mme ufan kpa usen oro, koro mmɔ ekedide usua ke mbemiso.

13Ndien Pilate, ke okotde ikpɔ oku ye mbon esop ye mbio-obio obon ɔtɔ kiet, ɔdɔhɔ mmɔ ete, 14Mbufo ekeda owo emi esɔk mi nte owo eke abiatde mbio-obio ibuot: ndien sese, ŋkodomo Enye ke iso mbufo, edi ŋkwe baba idiɔk-ŋkpɔ kiet ke idem esie mbaŋa mme ikɔ eke mbufo edoride Enye. 15Herod inyuŋ ikwe: koro ɔnɔ Enye efiak esɔk nnyin; ndien sese, Enye inamke baba ŋkpɔ kiet eke odotde mkpa. 16Mmɔdo nyemia Enye, nnyuŋ nsana Enye nyak. 17-18Edi kpukpru mmɔ efiori ete, Men owo emi fep; sana Barabbas yak nɔ nnyin: 19Barabbas edi owo emi ekesinde ke ufɔk-ŋkpɔkɔbi kabaŋa ndutime emi enye okobuberede ke obio, owot owo. 20Edi Pilate ɔtɔŋɔ ntak ekpe ye mmɔ, sia ɔdɔŋde enye ndisana Jesus nyak: 21edi mmɔ esio mkpo, wot, wot Enye ke cross. 22Ndien enye ekpe ye mmɔ ɔyɔhɔ utim ikata, ete Ntak-e? Owo emi akanam nso idiɔk ŋkwe baba ŋkpɔ kiet emi odotde mkpa ke Enye: ntre nyemia Enye, nsana Enye nyak. 23Edi mmɔ esɔŋ uyo eyire ete, Ewot Enye ke cross. 24Ndien uyo mmɔ akan. Pilate ɔnɔ uyo ete enam nte mmɔ ebeŋede. 25Ntre ke enye asana owo emi ebeŋede ayak, kpa owo emi ekesinde ke ufɔk-ŋkpɔkɔbi ebaŋa ndutime ye obom, onyuŋ ayak Jesus ɔnɔ mmɔ ete enam ye Enye nte mmɔ emade.

26Ndien nte mmɔ edade Enye edaha, mmɔ emum simon, owo Cyrene, emi otode ke iŋwaŋ, emen cross edori enye ke edem, ete ada etiene Jesus.

27Ndien ata ediwak owo etiene Enye, ye ata ediwak iban emi etuaŋade enyuŋ esemede Enye. 28Edi Jesus ɔwɔŋɔre ese mmɔ, onyuŋ ɔdɔhɔ mmɔ ete, Nditɔ-iban Jerusalem, ekutua Mi; etua idem mbufo ye nditɔ mbufo. 29Koro sese, mme usen ke edi eke edidɔhɔde ete, Ɔfɔfɔn ye mme ada, ye mme idibi eke akanam mimanke eyen, ye mme eba eke akanam nditɔ miwapke. 30Adaŋoro mmɔ eyetɔŋɔ ndidɔhɔ ikpɔ obot ete, Eduɔ etɔ nnyin: eyenyuŋ edɔhɔ ŋkpri obot ete, Efuk nnyin. 31Koro edieke enamde ŋkpɔ emi ye nsehe eto, edinam didie ye nsat eto? 32Mmɔ enyuŋ eda mme anam-idiɔk iba eŋwen, esaŋa ye Enye eka ndiwot.

33Ke adaŋemi mmɔ esimde ebiet emi ekotde Calvary (mkpɔkpɔrɔ), mmɔ ekɔŋ Enye do ke cross, ye mme anam-idiɔk oro, owo kiet ke ubɔk nnasia, enye eken ke ufien. 34Edi Jesus ete, Ete, dahado nɔ mmɔ koro mmɔ mifiɔkke se mmɔ enamde. Mmɔ esin afia edeme edisine-ŋkpɔ Esie ke otu idem mmɔ. 35Mbio-obio edada ese. Mbɔŋ enyuŋ esak Enye nsahi ete, Akanyaŋa owo efen; yak Enye anyaŋa Idem Esie edieke Enye edide Christ Abasi, emi Abasi ekemekde. 36Mbonekɔŋ enyuŋ ebiaŋa Enye, esaŋa ekpere Enye, enɔ Enye vinegar, ete, 37Edieke Afo edide Edidem mme Jew, nyaŋa Idem Fo. 38Enyuŋ ewet ŋwed edian ke enyɔŋ ibuot Esie, ete, EMI EDI EDIDEM MME JEW.

39Ndien anam-idiɔk kiet emi ɔkɔŋɔde ke cross ɔtɔk Enye ete, Nte Afo udige Christ? nyaŋa Idem Fo ye nnyin. 40Edi anam-idiɔk eken ɔbɔrɔ, asua ɔnɔ enye, ete, Nte afo ufeheke Abasi, emi afo odude kpa ke ubiom-ikpe oro? 41Ndien ke akpanikɔ nnyin ikut ufen eke enende: koro nnyin ibɔ utip eke odotde ke erinam nnyin: edi owo emi iduehe baba ŋkpɔ kiet. 42Enye onyuŋ ɔdɔhɔ Jesus ete, Ɔbɔŋ, ti mi ke adaŋemi Afo edide ndida ubɔŋ. 43Ndien Jesus ɔbɔrɔ enye ete, Ke akpanikɔ ke ndɔhɔ fi, mfin emi afo eyedu ye Ami ke Paradise.

44Ekpere ufɔt uwemeyo ke emi, ndien ekim ofuk ofuri isɔŋ tutu osim ɔyɔhɔ hour ita ke uwemeyo; koro uŋwana utin onimede: 45ukara temple onyuŋ asiaha ke ufɔt. 46Ndien Jesus ofiori ke ɔkpɔsɔŋ uyo, ete, Ete, mmayak spirit Mi nsin Fi ke ubɔk; ndien ke Enye amaɔkɔdɔhɔ ntem, Enye ayak Spirit Esie. 47Ndien ke ini centurion okutde se itibede, enye ɔnɔ Abasi itoro ete, ke akpanikɔ owo emi ekedi edinen owo. 48Ke ini ofuri otu owo, emi ekedide ndise ŋkpɔ emi, ekutde mme ŋkpɔ eke etibede, mmɔ eyibi ubɔk ke ikpanesit, efiak enyɔŋɔ. 49Ndien kpukpru mme idiɔŋɔ Esie, ye iban emi eketode ke Galilee esaŋa ye Enye, eda do nsan-nsan ese mme ŋkpɔ emi.

50Ndien sese, owo kiet odu, emi ekerede Joseph, emi edide owo akwa esop, onyuŋ edide eti ye edinen owo (enye ikasaŋake do ke uduak ye erinam mmɔ) 51enye edi eyen Arimathaea, obio mme Jew kiet, emi onyuŋ etiede ebet Ubɔŋ Abasi: 52owo emi oduk etiene Pilate ekebeŋe okpo Jesus. 53Ndien enye ɔkɔŋɔre okpo, ada ɔfɔŋ linen ɔbɔp enye, onim ke udi emi eketuŋde ke itiat, eke akanam minimke owo ke esit. 54Ekedi usen mbeŋe-idem, sabbath ke onyuŋ ekpere ndisiere. 55Ndien iban, emi eketode ke Galilee esaŋa ye Jesus, etiene ke edem, enyuŋ ekut udi, ye adaŋa nte enimde okpo Esie. 56Ndien mmɔ efiak enyɔŋɔ eketim ufuɔ ŋkpɔ ye myrrh.

Ndien ke sabbath mmɔ eduɔk odudu nte ibet etemede.

Currently Selected:

LUKE 23: ENA

Highlight

Copy