Genesis 25
25
Abraham ilweyel
1-2Abraham ra anew ingwer-anem ikngwek itnan Keturah. Ampernem atnyenek 6-pel. ...
5Abraham iteth-antey anenhel, ra ampwal ingkerrenh anthek, Hagar-atherr, Keturah-atherr. 6Ra alerikw ikwerenh-rnem thwenek, akngerrakw-antey, arleng innga, alerikw ikwerenh Isaac-kety. Abraham ilwey-alentyel ra ampwal ingkerrenh Isaac anthek.
7Abraham aherrety 175 ampwa innganem anenh. 8Kel ra ilwek-anem. 9-10Alerikw ikwerenhel atherr renh intey-itwek akwernek, Hebron-angkwarr akngerrakw, rarl Hitt-kenh-rnem-itwek payemelek intey renh. Isaac-el atherr Ishmael-el atherr Abraham renh anew ikwerenh-itwek-antey akwernek. 11Abraham ilwek-penhan Akngeyel Isaac renh arntarnt-arenh. Isaac ra alpek apmer Beer Lahai Roi-warl. ...
Jacob-then Esau-then
19Nhenh angka Abraham-kenh alerikw-then Isaac-penh Isaac alerikw anenh Abraham-kenhan. 20Isaac aherrety 40 anenh ra itengirrek Rebekah-itwek, Bethuel-kenh alerikw-itwek. Bethuel ra apmer Aram-areny anenh. Laban Rebekah-kenh awayikw apmer Aram-areny anenh arrpemarl.
21Rebekah ra ampek arrangkw anenh. Isaac-el INGKART ayernek renh-atherr ampa anthetyek. INGKARTel Isaac renh awek, rarl ayernek ampek, renh-atherr ra anthetyek. 22Rebekah ra atyewenheng-atherr-akert awelhek, ratherrarl atwerrek. Ran Akngey ayernek, “Ilekek atyewenheng-atherr atwerreyel?” Rebekah ywarn iterrek nthakenharl ratherr atwerrenh.
23INGKARTel renh ilek, “Aler ngkwenh amentant-atherr ratherr atyetyart aneyenh, ingwer apmer ingwer-ampenyekan, ingwer apmer ingwer-ampenyek. Awayikwan ayteyikwek awelh-ayntem, ayteyikw rarlap atyetyartan anayntem. Amentant atherr ikwerek-atherr anaynteman.” 24Rebekah ra ampa akely renh-atherr-anem atnyenek. 25“Arrwekeleny alta rnter-rnterarl anek, atha renh itnewem Esau.” 26Ra awayikw ikwerenh atnererrk-they anterrkwek. Rernem renh itnan Jacob renh itnewek.
27-28Awayenheng-atherr ratherr ilkwerrek-anem. Esau ran awangk-awarrarl anenh, Jacob ra arteny-areny anenh. Isaac Esau-ek arlkwentenh, rarl akerel renh wantenhek. Amikw ikwer-atherrenh Jacob anyentekant arlkwentenh. Isaac aherrety 60 anenh.
29Arlta anyentel, Jacob ra ltya ampernenh, Esau ra angayakw irrek. 30Esau ra ayteyikw ikwerenh ltyek ayernek, “Ltya ayenh anthay, ayeng angayakwirrek, atnert ayeng akelhek, angayakw innga irrek.”
31Jacob angkek, “Ngenh ampwal ingkerrenh antheyenh, nga arrwekelenyarl. Ntwa ayenh ampwal ingkerrenh antha, atha ngenh aker ltyarl anthey-akenh.”
32Esau angkek, “Ayeng ilwetyekan arrer-anem. Kel menty ampwal-rnem atnyeney-angenh ilwetyekan arrer-anem.”
33Jacob angkek, “Ampwal ayenh anthay, akngeyelarl ngenh alhelek.” Esau mwerr angkek ikwer, ra ampwal-rnem menty anthetyek.
34Jacob-el amern-then aker ltyethen Esau renh anthek. Esau ra aker arlkwek-penh ra anperl-alhek apmer-warl alpek, ampwal-rnem menty iwerl-alhek.
Currently Selected:
Genesis 25: aly
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
