Lukas 12
12
1AN naopan iyehki eris asjapicnaig natimi is ahinag acen, um atamerit, is atupun aien um tas ehele ilpu atimi atahaijeg yin, um ika, Akumu upyi hup aijaua um aminjinaig caua vai leven o ilpu Farisi, et itai efaifa ineigki. 2Uhpu asuptecnaig niji itai asega er adahpoi, um lep ato niji itai asega er adenaig. 3Va nedo ineigki, uhpu atahaijeg intas asega an lah, akis asaig aijaua an naupat; um asuptecnaig nijintin neom intas asega, akis tas ehlohol iran aijaua irai uarin adenaig. 4Ek asaig ehelemia ainyak, ak ilpu etoak, mika, Akumu jim imtitai ra aijaua era atgei ohu atimi ara, jam auatialidi par lep ago tah nitai. 5Ekpu uhup ainyak um asuptecnaig ehelemia natimi ineig aki imtitai yin aijaua: Akumu imtitai yin aijaua, et wit atgei nohumia aien, et emda aien par erekhaig pan nesgamia an pece has; ek mun idim asaig ehelemia ainyak mika, Akumu imtitai yin aijaua. 6Er ahtai hakli man et faiv vai fardig et ero, jam eti ahnag iran tah inyi ethi an nuhup o Atua. 7Er idim esvi numri idjinimia asega. Va nitai ineigki, akumu jim imtitaig aijaua: eka esjilid aijaua irai hakli man et ahinag. 8Ek lep asaig ehelemia ainyak mika, Aien inyi asuptecnaig nyak aien an nuhup o atimi, etpu lep asuptecnai yin a Inhal o natimi an nuhup o ilpu agelo o Atua: 9ja aien inyi ateri nyak aien an nuhup o atimi, uhpu ateri yin an nuhup o ilpu agelo o Atua. 10El et asan tas has tah vai Inhal o natimi, eri eti aru iran: ja el et asan tas has tah vai Nesgan Upene, uhpu idim aru iran. 11Eru wit imyiapan caua ara an nuhup o ilpu atimi asjapicnaig, im ilpu atimi alupas, im ilpu atimarid, akumu jim aktaktai aijaua mika, Inti auoh neveh tas akaija, um asanhe? 12Etpu esege imi caua a Nesgan Upene an nuarin-nadiat iyehki intas ineig akupu asaig aijaua,
13Is um ika ehelen a natimi is ethi ira ra, Ak natimi esege, tas aiek ehele etoak mika yi atiakoai niji itai u etmamrau aien. 14Is ika aien ehelen, Ak nat eigki, is ati nyak a di mika ki acaiji itai imi caua ainyak um ahai itai? 15Is ika aien ehele ra, Akumu almoi aijaua, um aminjinaig caua, um jim has iramia itai: inyi ti umoh tah natimi vai padiag alupas et ohuun aien.
16Is ecsipece ehele ra aien, um ika, Is ahinag nohoai itai irai ahapol o natimi ikni itai is ethi: 17is aktaktai inliinmopon aien, um ika, Inki ago inhe ainyak? et ti inuarin igca inki ikni nohoai itai unyak iran ainyak. 18Is ika aien, Ekpu ago nitai ineigki ainyak: ekpu alcapdicraig eom ikni itai unyak ainyak, um lep ago eom alupas, par ikni nohoai itai asega unyak iran im inpadiaig unyak: 19ekpu ika ainyak ehele nesgak, Ak nesgak, eris mun ikni niji itai et ahinag vai euc uri mesese inyi ahinag; eklim amen aiek, um hag, um umwig, um imyiacitak. 20Ja is ika ehelen a Atua, Ak natimi ahnag, uhpu atipagki nesgam iram an nepeig ineigki; etpu ohuun nitai iji eigki a di as asjapicnaig aiek? 21Et idim ucco natimi ineig et ikni padiaig vai yin aien, jam ihki natimi an nuhup o Atua.
22Is ika aien ehele ilpu atimi atahaijeg yin, Va nedo ineigki, ek asaig ehelemia ainyak mika, Akumu jim aktaktai numumoh unyimia aijaua, im nitai hegaig unyimia; um jim aktaktai nohumia, im nitai aso caua. 23Et esjilid numumoh unyimia aijaua irai itai hegaig, im nohumia irai itai aso caua. 24Aktaktai man aijaua: era eti ahoai itai ara, um eti asjapicnai itai; et ti nimai padiaig ura, ka neom ikni itai; ja et alaa ra nitai caig a Atua: ja eka idim esjilid irai man aijaua. 25Et eti emda tah iramia par ika yi lep yetpan an tah nadiat aien va naktaktai o un. 26El eka auatialidi aijaua nagovaig nitai ineig et tintin, eka auri aijaua par aktaktai niji itai et eche? 27Aktaktai tisiai cai aijaua im nedel iran: et eti auritai, um eti ahod itai; ja ek asaig ehelemia ainyak mika, Is eti yecrei yin a Solomon an natimi alupas o un um idivaig tah nitai iji eigki. 28El et ucce nedo o Atua va nefelelicai, et umoh an nobohtan inpeig, ja er erekhaigjai an cop an tak apnyin; etpu idim aso caua aien, et tintin nimyiisjis ninivaijec unyimia. 29Akumu jim ahilek aijaua nitai caig incamia, im inwai lumamia; etmu jim ehioehio inliinmopomia aijaua. 30Era ahilek nitai iji eigki asega a nup urai iji pece: ja et ato a Etmamia mika et upene vai caua nitai iji eigki. 31Akumu upyi hup aijaua um ahilek nelcau o Atua; uhpu lep alupai caua nitai iji eigki asega. 32Eka idim eti elpat aijaua, jam jim imtitaig; et idim merit a Etmamia mika yi alupai caua nelcau o un. 33Akumu ahtai niji itai unyimia aijaua, um alupai ilpu ihki atimi itai tup ahtai; akumu ago cat imi caua aijaua yi ti mutit, um ikni padiaig unyimia esjilid an nohatag yi pu amen, inyi eti apan eahki tah natimi ehneg itai, um eti ehcai itai nages. 34Etpu amen inliinmopomia aijaua an nuarin ineig, et amen inpadiaig unyimia iran. 35Akumu arore nijihgamia aijaua an nitai ahid, um lep ere incop alahala unyimia; 36akumu idivai atimi iji eigki aijaua era aitgai natimi alupas ura ara, et wit ahes u natmehgan aien, um adumoij pan ehele ra um etcetcei intapanes, mika eri auroauro um asalgei vai yin: 37era mun ahesmoij a ilpu aheca iji eigki, et wat han ehele ra natimi alupas ura, um ecet ra naitgai yin vaig: et inivaijec ineig ek asaig ehelemia ainyak mika, etpu arore nijihgan aien an nitai ahid, um ika ehele ra eri ateucse ara um hag, etpu han aien um aheca ura: 38el et han ehele ra aien an mutmutja nepeig, ka an nijihgan nepeig, um ecet ra inhiskivaig, erupu ahesmoij a ilpu aheca iji eigki. 39Eka ato aijaua, nikavaig, el is ato a natimi alupas an neom nuarin-nepeig ineig etpu han a natimi ehneg itai, el is aiji aien, va yi jim ataijhan neom o un aien. 40Va nedo ineigki akumu yecrei caua aijaua: etpu yetpam a Inhal o natimi an nuarin-nadiat ineig aki eti aktaktai aijaua.
41Is ika ehelen a Pitrus, Ak Natimarid, na asan tas ecsipece ineigki aiek ehelema ache, ka ehele atimi asega? 42Is ika a Natimarid, Naheca inivaijec ineig um arapakau yek eda, etpu ati yin a natimi alupas o un mika yi esjilid aien irai ilpu aheca o un, par alaa ra nitai caig incara an nadiat ineig yi alaa ra? 43et mun ahesmoij naheca iyehki, et wit ham a natimi alupas o un um ecet yin nagovaig nedo ineigki: 44et inivaijec ineig ek asaig ehelemia ainyak mika, Etpu ati yin aien mika yi esjilid aien irai iji itai asega o un. 45Ja el et ika inliinmopon naheca iyehki, Et eti fi auroauro um ham a natimi alupas unyak; um aredei ilpu aheca atamaig im ilpu aheca atahaig, um hag, um umwig, um ahnag iran; 46etpu ham natimi alupas o naheca iyehki an nadiat iyehki inyi ti aktaktai aien, im lep an nuarin-nadiat iyehki inyi ti ato aien, etpu ucsamud yin aien, um ati yin an nimtan imi ilpu atimi imyiisjis nahcil. 47Naheca iyehki is ato intas o natimi alupas o un aien, jam eti yecrei yin, um eti imyiaiji intas o un, uhpu ehcahinag aredei yin: 48ja aien is eti ato aien, jam ago nedo ineig er aredei yin vaig maru, eri eti ehcelpat aredei yin. Aien er alupai yin niji itai et ahinag, uhpu asaig ehelen mika yi lep aru alupas; aien era mun ikni ehelen niji itai et ahinag atimi, erupu lep ika ehelen ara yi ehcai ehni niji itai et ahinag aien.
49Ek mun ham ainyak mika ki atni incop an nobohtan; ek merit vanhe ainyak, el eh mun atni an naopan ineig? 50Uhpu baptiso irak an tah nabaptiso; ek ohocred alupas ainyak um yetpan u nagovaig irak. 51Jim ika aijaua, kis ham ainyak par ati neigpa an nobohtan: ek ika ehelemia ainyak, O’o; kis ham ainyak par etinohun nehti jipe atimi: 52an naopan ineig um yetpan itu erupu amen natimi inyi faiv anliin neom inyi ethi, etpu acheache jipe inliinmopura ara; erupu edemda natimi inyi eseij va natimi inyi ero, um lep edemda natimi inyi ero va natimi inyi eseij: 53etpu edemda a inhalav atamaig o un tah vai etman, im etman vai inhalav atamaig o un; im lep risin vai inhalav atahaig o un, im inhalav atahaig o un vai risin; im lep risin vai ehgai inhal o un, im ehgan vai risi natamnyu un.
54Is lep ika ehele atimi aien, Eka wat ecetai naupat aijaua nehcohosvaig an nete o un, eka idim ika aijaua, Etpu ehe; et um ucco: 55et wat uritoga atamaig, eka ika aijaua, Etpu ihlup; et um ucco: 56ak ilpu atimi efaifa, eka ato nesganimtan nohatag im nobohtan aijaua; eka auri aijaua par eti ato itai an naopan ineig? 57maiya, eka auri aijaua par eti tup aktaktai nedo ineig et upene? 58Na wit ahced natimi tak atimi iram aiek, um apan ehele natimi alupas, aru wit atga an nefalaig aijaurau, namu tas ehelen aiek va etpu atceijai euc aien; va yi jim imyiapan euc aien ehele natimi asuptecnaig nimtan nedo has, etpu alupai naheca o un euc a natimi asuptecnaig nimtan nedo has, etpu ati euc anliin neom ipjin a naheca o un. 59Ek asaig ehelum ainyak mika, Napu eti lep alau ijo aiek, um uhum pan naopan iyehki napu leh ehni nimtam aiek.
Currently Selected:
Lukas 12: ATY1863
Highlight
Share
Copy
Want to have your highlights saved across all your devices? Sign up or sign in
historic text maintained by the British and Foreign Bible Society
