Lukas 8

1IS wat ti pan itac nitai iji eigki, is apan aien irai iji uari-pece alupas asega, im niji uari-pece haklin, um efehtas, um asuptecnaig intas-upene va nelcau o Atua: eris ahced yin natimi is twelv, 2im lep nahaiji ilpu takata iji ehki, is ahlo ilpu agelo has ehele ra aien, um atipagki nemehe ira ra, Mere nupu Mactala, eris ahlo ilpu agelo has is seven ehelen, 3im Joana ehgai Kusa naheca aminjinai itai o Herot, im Susana, im hal ra is ahinag, eris alupai yin niji itai ura ara. 4Eris asjapicnaig pan ehelen natimi is ahinag eris ahes irai iji uari-pece asega ara, is ecsipece aien, um ika; 5Is apan natimi ahapol is ethi par ahoaig upsi itai: is wat ahoaig aien, is um elel nahaiji upsi itai an nahaijin nefalaig; eris atga iran atimi, eris um hegaig inman. 6Is um lep elel nahaijin an nij; is um edel, um imlai; is eti opoh nobohtan. 7Is um lep elel nahaijin irai efelelicai has; is um ededel nefelelicai has, um atgei. 8Is um lep elel nahaijin an nobohtan upene; is um edel, um oho, um eteuc nohoan is wun huntret iran. Is asaig nitai iji eigki aien, ja par ahlaig, um ika, Aien et eteuc intikgan aien par ahgei itai, etmu atahaijeg aien. 9Eris ahodai yin a ilpu atimi atahaijeg yin, um ika, Intas ecsipece vanhe ineigki? 10Is ika aien, Eh mun alupai caua mika aki ato aijaua niji itai adenaig an nelcau o Atua: ja eh tas ehele tak atimi irai tas ecsipece; mika eri alum itai, jam eti almoi; um atahaijeg itai, jam eti ahaijeg. 11Nesgan tas ecsipece ineigki neigki:

Et upsi itai intas o Atua. 12Ara, era idivaig nupsi itai an nahaijin nefalaig ara, ara aigki era atahaijeg intas ara, et um apan a Tiapolo, um atipagki intas anliinmopura, eri jim imyiisjis ninivaijec ara, um umumoh. 13Ara era idivaig nupsi itai an nij ara, ara aigki era atahaijeg intas ara, um leh, um imyiacitak; et eti eteuc necvan tas ira ra, era eti elvimyiisjis ninivaijec ara, eh wat ago nedo oop vai ra era adumoij ara. 14Nupsi itai ineig is elel irai efelelicai has et idivai ra, era atahaijeg intas ara, um atga ura, ja et atgei ra naktaktai inpadiaig ura im nedo imyiacitak an naopan ineig, era eti ohoai itai upene ara. 15Nupsi itai an nobohtan upene et idivai ra era atahaijeg intas ara, um apos anliinmopura inivaijec um upene, era ohoai itai ara, um eti auatialidi.

16Et wat atni incop alahala tah natimi, et eti adahpoi aien an nipjinitai, um eti atise ithan tinan; et atijai aien an nitai ati incop alahala iran, mika yi lah vai ra era apan anliin neom ara. 17Uhpu ecetai niji itai asega eris adenaig; um lep ato um almoi niji itai asega eris adahpoi. 18Va nedo ineigki, akumu atahaijeg aijaua um aktaktai upene: aien et o un itai, uhpu alupai yin; aien et eti o un itai, uhpu atipagki ehelen niji itai o un et ika aien o un.

19Eris han ehelen a risin im ilpu etoan, is ehka vai ra napanvaig ehelen va atimi is ahinag. 20Eris asuptecnaig ehelen atimi, um ika, Era aiji ijo a risum im ilpu etoam, um merit nalum euc vaig. 21Is tas aien, um ika ehele ra, Risik im ilpu etoak iji eigki era atahaijeg intas o Atua ara um imyiaiji.

22AN nadiat is ethi is aridjai an nelcau aien im ilpu atimi atahaijeg yin: is ika ehele ra aien, Ti apan akaija an jop, um apahai an nahaijin eahki. Eris atceijaig pok nelcau ara. 23Eris wat apan ara, is umjeg aien: is um ucjum pam neihio an jop; is um ahwaijai nelcau; eris ika ara, Etmu ete. 24Eris apan ehelen ara, um ahugni yin, um ika, Ak Natimi alupas, ak Natimi alupas, intumu emesmas akaija. Is atidai aien, um acaiji nimtinjop im nalupas u injop: is um esjaig, um eigpa. 25Is ika ehele ra aien, Nimyiisjis ninivaijec unyimia yek ed? Eris imtitaig ara, um imyiali, um tas jipe ehele ra, um ika, Et echamecha natimi ineigki! et tas aien, et um imyiaiji intas o un nimtinjop im injop.

26ERIS apahai ara an pece Catara et iblan pece Calili. 27Is wat apahai aien, is aubillid yin natimi is ethi is up an nuarin-pece iyehki aien, eris amen iran a ilpu agelo has itu acen, is eti aso yin aien, um eti amen anliin neom, jam amen irai mai ij eris ikni atimi emesmas iran. 28Is wat ecet Iesu aien, is aunyauwaig aien, um atpuse an nuhup o un, um ahlaig ijinies, um ika, Nai merit aiek vanhe ehelek, ak Iesu, Inhal o Atua esjilid? Ek ugni euc ainyak, mika an jim abli nyak aiek. 29(Is tas ehele nagelo has aien mika yi atceijai natimi iyehki aien. Is ehcahinag asjirai yin aien: eris arore yin irai jaula, im lep atau hat; is um atgeig yamud jaula aien, is lep imyiapan yin an namasacen a nagelo has.) 30Is ahodai yin a Iesu, um ika, Nidam di? Is um ika aien, Lijon: eris amen iran nagelo has is ahinag. 31Eris ugni yin ara, mika yi jim abrai ra aien mika eri apan umatmas ara. 32Is amen eahki picad is ahinag, um hag an lolan nedoon: eris ugni yin ara mika yi abrai ra eri mk ahei picad ara. Is um abrai ra aien. 33Eris atceijai natimi iyehki a ilpu agelo has, um ahei picad: eris athut emda picad an nohmun isas, um ehlelelse an jop, um atpoijej. 34Eris wat almoi nedo ineigki a ilpu atimi aminjinaig picad, eris aha ara, um apan, um asuptecnaig an nuarin-pece im lep an pece iyehki asega. 35Eris apan natimi mika eri almoi nedo ineigki; eris apan ehele Iesu ara, um ecet natimi iyehki eris atceijai yin a ilpu agelo has, is ateuc aien u neduei Iesu, is amen iran napelumai, is mun eteuc lelen aien: eris um imtitaig ara. 36Ara eris almoi ara, eris asuptecnaig ehele ra ara nedo ineigki is umoh vaig aien is amen iran a ilpu agelo has. 37Eris ugni yin a nupu Catara asega mika yi atga o un aien, um ude ra; eris imtitaig alupas ara: is aridjai an nelcau aien, um adumoij pan. 38Is ugni yin a natimi iyehki, eris atceijai yin a ilpu agelo has, mika yi ahced yin aien: ja is adceijai yin a Iesu, um ika, 39Namu lep apan aiek an neom unyum, um asuptecnaig nedo emda ineig et mun ago iram a Atua. Is atga o un aien um apan, um asuptecnaig an nuarin-pece asega o un nedo emda is ago a Iesu iran. 40Is wat lep adumoij a Iesu, eris leh yin natimi um imyiacitak, eris idim aitgai yin ara asega.

41IS apan natimi is ethi nidan Jerus, natimi alupas an neom alaigaheni; um atpuse u neduei Iesu aien, um ugni yin mika yi apan aien an neom o un: 42is eteuc inhalav atahaig o un is ethi ache, is twelv mesese iran, is ubutpotet o unmas o un aien.

Is wat apan aien, eris atamerit ehelen atimi. 43Im lep ineig, intakata is ethi, is emehe aien va nahlamerai u inja an mesese is twelv, is ahtai ehni inpadiaig o un aien imi atimi atipagki nemehe, ja is ehka vai ra nago cehcehe yin vaig; 44is apan aien an cehen, um atcei pan intid an napelumai iran; is auroauro um umot nahlamerai u inja iran. 45Is ika a Iesu, Et atcei pam nyak a di? Eris ateri ara asega, ja is ika a Pitrus im lep ra ehelen, Ak Natimi alupas, era atamerit ehelum atimi asega, um euchaijehgaig, na auri aiek par ika, Et atcei pam nyak a di? 46Is ika a Iesu, Et idim atcei pam nyak tah; ek mun ato ainyak, nikavaig, et mun ahes irak nemda. 47Is wat ato intakata iyehki mika eris ato yin, is ucjucjucaij aien, um apan ehelen, um atpuse an nuhup o un, um asuptecnaig ehelen an nuhup o atimi asega nitai ineigki is atcei pan yin vaig aien, im lep neti laulau o un um cehcehe. 48Is um ika ehelen aien, Ak intakata ineigki, namu imyiacitak aiek: na mun cehcehe aiek va nimyiisjis ninivaijec unyum; atga unyum aiek an neigpa.

49Is wat tas aien, is ahes tah an nimnim o natimi alupas an neom alaigaheni, um apan, um ika ehelen, Et mun mas inhal unyum, jim imyidohalav Natimi esege aiek. 50Is wat atahaijeg a Iesu, is tas ehelen aien, um ika, Jim imtitaig aiek: namu imyiisjis ninivaijec aiek, etpu lep umoh aien. 51Is wat apan aien an neom, is acaiji atimi asega aien mika eri jim apan anliin neom, Pitrus ache, im Jakobus, im Joanes, im lep etmai natahaig im risin. 52Eris imyitaig yin ara asega, um taig tas: is ika aien, Akumu atinau aijaua; et eti mas aien, et umjeg aien. 53Eris imyilav yin ara, eris ato ara, nikavaig, is mas aien. 54Is abraig pok ijo ra asega aien, um arapse va nikman, um ahlaig, um ika, Ak natahaig ineigki, namu atidai aiek. 55Is um nusjai aien, um auroauro um atidai: is um ika aien eri alaan tah nitai caig. 56Erus imyiali ahwat atmil o un: is acaiji rau aien mika eru jim asuptecnaig nedo ineigki arau ehelen tah.

Currently Selected:

Lukas 8: ATY1863

Highlight

Copy