Madius 19
19
1Is tas ehni irai tas iji eigki a Iesu, ja par ahes Calili um atga o un, um algaunyi nofowai Jortan um yetpan irai iji uari pece Jutaia; 2eris apitac yin natimi is ahinag; is ago cehcehe ra aien eahki.
3Eris lep ahtag pan ehelen a ilpu Farisi, um oop yin, um ika ehelen, Et itaup vaig tah natimi nabrai ehgan vaig va nedo asega, ka o’o? 4Is tas aien, um ika ehele ra, Akis esvi aijaua, ka o’o, nikavaig, aien is upyi ago natimi aien, is ago rau aien natamaig im intakata, 5um ika, “Etmu ude etman im risin natamaig, um amen aien im ehgan: etpu tup ethi ache nohurau arau”? 6Erau eti lep ero arau, ja et tup ethi ache nohurau arau. Et itaup inlep atiakoaivaig nitai ineigki is adgai iran a Atua. 7Eris um ika ehelen ara, Is auri a Moses par tas alep um ika yi alupai ehgan nitasvitai a natamnyu un va nabrai yin, um abrai yin? 8Is um ika ehele ra aien, Is eti acaiji caua a Moses mika aki jim abrai ehgamia aijaua, va nipjin u inliinmopomia: ja eris eti upyi hup um ago nedo ineigki. 9Ek asaig ehelemia ainyak mika, Aien et abrai ehgan aien el et eti ago ingaijid aien, um leh intaka takata, et ago ingaijid aien: aien et leh yin aien eris abrai yin, et ago ingaijid aien.
10Eris um ika ehelen a ilpu atimi atahaijeg yin, El et ucco nedo va natamaig im ehgan, et eti upene natmehgan. 11Ja is ika ehele ra aien, Et ehka va atimi asega nimyiaijivaig intas ineigki, ara ache eh mun alupai ra: 12eris eteuc a ilpu yunuka eris apos ra is ucce: era lep eteuc a ilpu yunuka era ilpu yunuka ara va nedo o atimi ira ra: era lep eteuc a ilpu yunuka era ilpu yunuka ara va nedo o atimi ira ra: era lep eteuc a ilpu yunuka eris ika eri ilpu yunuka ara va nelcau an nohatag. Aien et emda aien par imyiaiji intas ineigki, etmu imyiaiji aien.
13Eris imyiapan ehelen ilpu halav, mika yi atijai nikman aien ira ra, um alaigaheni: eris acaiji ra a ilpu atimi atahaijeg yin. 14Is um ika a Iesu, Ude ilpu halav aijaua, eri apam ehelek ara, um jim acaiji ra; era idivai ra ara era amen an nelcau an nohatag ara. 15Is atijai nikman aien ira ra, ja par ahes eahki um atga o un.
16Is apan ehelen natimi is ethi, um ika, Ak Natimi esege upene, inki ago nev edo upene ainyak, va ekpu leh nitai umoh iran ineig inyi ti lep ti? 17Is ika ehelen aien, Na auri aiek par aniv upene nyak? et eti upene tah, Atua ache: ja el et merit aiek napanvaig an nuarin umumoh iran, um imyiaiji niji tas alep o Atua. 18Is ika ehelen aien, Neveh tas alep? Is ika a Iesu, Jim atgei natmas, Jim ago ingaijid, Jim ehneg itai, Jim asan tas ahcil, 19Namu eccen vai etmam im risum aiek: um, Aiyu inliinmopom aiek va natimi eblaamnem unyum, et idivaig naiyu o inliinmopom vai euc. 20Is ika ehelen a intakuras iyehki, Kis imyiaiji nitai iji eigki asega ainyak an halav unyak um uhum pam naopan ineig: ek eti ago nevitai ainyak? 21Is ika ehelen a Iesu, El et merit aiek nesjilidvaig an nedo upene, apan aiek um ahtai niji itai unyum, um alupai ilpu ihki atimi; napu idim leh niji itai upene an nohatag aiek: um apam um apitac nyak. 22Is wat atahaijeg intas ineigki a intakuras iyehki, is taigtaig aien um atga o un: is ahinag inpadiaig o un aien. 23Is um ika ehele ilpu atimi atahaijeg yin a Iesu, Et inivaijec ineig ek asaig ehelemia ainyak mika, Et ehka vai natimi ikni itai napanvaig an nelcau an nohatag. 24Ek lep asaig ehelemia ainyak mika, Et tup upene vai kamela namiliekvaig an hed an nitel, jam ehka vai natimi ikni itai napanvaig an nelcau o Atua. 25Eris wat atahaijeg a ilpu atimi atahaijeg yin, eris um imyiali alupas ara, um ika, Uhpu imyiatamaig di? 26Is alum ra a Iesu, um ika ehele ra, Et ehka nitai ineigki va atimi; ja, et tup upene niji itai asega vai Atua.
27Is tas a Pitrus, um ika ehelen, Ecris idim ude niji itai asega unyima aijama, um ahced euc; ecrupu leh inhe aijama? 28Is um ika ehele ra a Iesu, Et inivaijec ineig ek asaig ehelemia ainyak mika, An naopan iyehki uhu wit lep ehteduo niji itai asega, et wit ateuc a Inhal o natimi a dorona esjilid o un, akupu lep ateuc aijaua akis ahced nyak irai dorona inyi twelv, um asuptecnaig nimtan imi ilpu mapoi ilpu hal o Isreel et twelv: 29ara asega eris ude eom ura, im ilpu etoara, im ilpu atahaig ira ra, im etmara, im risira, im ehgara, im ilpu hal ura, im umara, vai nyak, erupu leh neruvaig ara inyi wun huntret, im lep nitai umoh iran inyi ti lep ti: 30erupu esjilid natimi inyi ahinag, era apitac ara; ja erupu apitac natimi inyi ahinag, era uhup ara.
Currently Selected:
Madius 19: ATY1863
Highlight
Share
Copy
Want to have your highlights saved across all your devices? Sign up or sign in
historic text maintained by the British and Foreign Bible Society
