Matthew 13
13
KETH WOANGLËRAH, XIII.
1PALL ë bull Jesus fun ko killeh nu chall ko behleh ntrehnt.
2Runiah bomu ngha bony ko ko woa, u ka koh ko womeh nu chall ka, runiah tre ngha sem ko cheh.
3Nu ka foh ndërick mbir kë mbuntha nghaleh, nlehly sangno tre u kon hallë sang yicky.
4Yeh u ka sang, yicky mpoom tre ma looll ko nah beh sëvaysë tre ngha moi ngha sum ma.
5Poom ma looll ko kë paytë tre ko loa lehly tre leh ballëahn kull; ma foke paman yehpeh lehly tre ngho chehn ëgbirr.
6Yeh pall ë tre la pung la chehdy tookul ma vehlah.
7Mpoom ma looll kë tëluh ayaing, luhtë tre ta poss, ta dyë ma.
8Kereh poom ma looll kë lehly keleng ma kum ëgbimang nkeleng,, mpoom ma kum kemeh bull, mpoom ma kum toangrah, mpoom ma kum toang bull nu woang.
9Nghono tënui hallë tui taleh tui.
10Ahperren ah woa tre ngha hundy ko ko woa ngha nghaleh, la wumleh moa ngha fohm kë mbuntha ah?
11U yoom nghaleh, peh ka kah no la hallë shëë dyah soyë hallë upock u foy tre; kereh ko ko ngha peh ka kah lan.
12Wonno bë, peh woa kah woa bë ëgbir; kereh wonno bëan yeo peh woa ngha kui.
13Ah fohm ngha kë mbuntha yehpeh ngha bë tëfoll ngha boaehn kyo, ngha bë tënui ngha boaehn tui; kereh ngha shëë lan.
14Peh kissyeh la ko ko ngha Isaiah lanah ka foh yeo nghaleh, ngha tui kë tënui ngha, ngha, boaehn tui; ngha kyo kë tëfoll të ngha ngha boaehn kyo.
15Aniah to ugbol u katui, nuitë ngha ta bangen, ngha boaehn tui; ngha nyum folltë ngha, lehyeh trim poom ngha na keh kë tëfoll të ngha yeo, nu ngha tui kë tënui të ngha, nu ngha shëë kë ugboll u ngha tre, nu ngha pinkin leh yah ngha nghah shunky.
16Peh rubah kë tëfoll të no, tanah kyo, nu tënui të no ngha tui.
17Urongdong yah no fohm, ahprophet ah tre nu aniah keleng ah ëgbir ngha yehmah lehly nyërick n tre pehneh no lehly oh, ngha lehlyehn; ngha yehmah tui nyërick n tre manah no tui oh, ngha tuiehn.
18Mbah; ntui mbuntha sangno tre.
19Lo no ntui lumtë Foy nu shee landeh, pomul u bang ah tre u hun nu kussy yempy tre pehneh peh sang yeo kë ugbolleh. Yicky tre manaky peh sang ko nah beh.
20Yicky tre manah peh sang kë paytë tre aniah nghanaky nghana tui lumtë Foy ngha pamah la yetty.
21Kereh ubëan ntunk n will ma sem laviehn, yehpeh lo peh tun ngha hallë hallë lumtë Foy ngha shillin.
22Yicky n tre manah peh sang ko tëluh ayaing ma maiky, lo no bull tui lumtë tre ngha utrennin tre kë upock u to, nu nanlah yamfah ngha shinny lum tre nu choe ballëalin.
23Yicky n tre manah peh sang ko lehly keleng ma maiky, lo no bull tui lum tre nu shëë la, u kum ëgbimang nkeleng; poom kemeh bull; poom toangrah; mpoom toang nu woang.
24Jesus u fohm buntha chillang, nghaleh upock u Foy tre ngho cheh kë manleh nopokan nghono sangah yicky nkeleng kë cheh woa.
25Kereh yeh aniah tre ngha lull no lëbang n tre u hun nu sang bëël u tre kë yicky nkeleng n tre ayaing nu kon.
26Këreh yeh ko fohe ko shull ko fuh, aniah tre ngha kyo bëël u tre.
27Ahboy ah nopokan tre ngha hun, ngha nghaleh ko ko woa, papah, n ka sang ë nyicky n keleng ë? labëla bëël u tre ko choe ko loa hehl ah?
28U nghaleh ko ko ngha no lëbang u tre nghah la; ahboy ah tre nghaleh, hë koh hunkurr ë?
29U nghaleh, beh; lo ngha hunkur ngha soory ntoah nkeleng tre uborr ubull.
30Nghah ma shully mbull kë lokoh surock; kë lokoh surock u tre ah fohm ahrock ah tre, ngha pehnkeh n kui bëël u tre ngha pant ta tëdick hallë tui ta; kereh ngha kui ntoah nkeleng ngha sutteh ko ko më fungheh.
31U foh mbuntha chillang peh, nghaleh upock u foy tre ngho cheh kë manleh ukollung m mustar bull nghono nopokan tre kui oh ka sang ko woa hehl.
32Kollung u tre woa chang gbo toon, nkollung n tre buleing; kereh lo ko poldin ngho cheh kin rum, vaysë tre ngha hun nu yuck tëtraa të ngha kë lehtë tre.
33U ka foh mbuntha chillang nghaleh upock u foy tre ngho cheh kin egboh ë looll ë tre ngheneh nolakan tre u kui oh nu beh kë ëtoah gbereh lërah, mendeh ëgboh ë tre buleing ngho choe looll.
34Nyërick n tre buleing Jesus u ka foh ko ko runiah tre kë mbuntha, lo peh ka fohmehn mbuntha, u fohn din o din.
35Peh na kissyeh lanah peh ka foh yeo kë prophet ah tre nghaleh ay yëëry nyeng më hallë mbuntha; ah foh ndërick n tre lanah peh ka tongul kë utrip upock u tre.
36Jesus nghaleh runiah tre ngha kon, nu loi ko killeh: ahperren ah woa tre ngha hun ko ko woa nghaleh, ndimdah nkeleng hallë bëël u tre ko loa hëhl.
37U yoom nghaleh ko ko ngha, wonno sangah yicky nkeleng traak nopokan tre woiky.
38Ah hehl a tre upock u tre koilah; nyicky nkeleng tre ahpomah upock u tre nghanaky; kereh bëël u tre ahpomah lëbang lë tre nghanaky.
39No lëbang nghono sang ngha, pomul u bang woilah; lokoh surock ukissy upock u tre koiky; ahrook ah tre ahangel ah tre ngbanaky.
40Kë manleh peh kui beel u tre nu tui ta kë dyomly tre, ngho peh chong choe kë upock ukissy tre pehreh.
41Traak nopokan tre woa wum ahangel ah woa tre, ngha dery ndërick n tre buleing manah shilly yeo, nu nghana nghah yeh mbang yeo.
42Nu pong ngha kë tuntuh bomu u bë rë dyom, ko loa cheh utrang u bomu nu kilin tëkott.
43Trim tre aniah keleng tre ngha gbentha kë manleh ëpall ë tre kë baily papah ngha tre. Wonno bë tënui woa tui.
44Mbah; upock u foy tre ngho cheh kë manleh feh nghono loi kë traalab, yeh nopokan u ka keh ngho u cheh hvoy nu wungul nyërick n woa buleing nu pin traal tre nghoneh.
45Upock u foy tre ngho cheh kë manleh gberikehno wonno tun kurass nkeleng.
46Yeh u ka kyo kurass nkeleng bull moa loa nkatul, u ka koh nu wungul nyërick n woa tre buleing nu pin kurass u tre koneh.
47Mbah; upock u foy tre ngho choe kë manleh upell u tre, peh pong ko heleh hallë konth soosë tre.
48Yeh ka pay kë, peh nan ko cheh, ngha chall, ngha hettyeh soosë keleng tre ngha peh beh ko womeh, kereh peh pong soosë bang n tre.
49Kë manleh peh chong choe rë upock ukissy: angel ah tre ngha chong hun ngha poh aniah bang ah tre oh aniah keleng ah tre oh buleing.
50Peh chong pong aniah bang ah tre kë tuntuh bomu tre u bë rë dyom, ko loa cheh utrang u bomu nu kilin tëkott.
51Jesus yëë ngha nghaleh, ngha tuieh ndërick n tre manaky buleing ë? ngha nghaleh, oh; yeome.
52Mbah ah shëë ah yah tre buleing nghana peh ka menghë hallë baily foy tre, u choe kë manleh ahwain furr, nghono foke kë ayin ah tongulloh nyërick mben oh nyërick nsannah oh.
53Yeh Jesus kung kissy mbuntha n tre manaky u hink ko lon.
54Yeh u moirë kë upock u woa n tre, u menghë ngha ko killtë karang ngha, ngha kabah lan nghaleh ko loa nopokan tre chëëkeh cherryeh tre nu mpant mbomung n tre ah?
55Chehn woa traak u karpenter woiky e? chehn ilillë yah woa Mary, ilillë pintre woa tre ngheleh Jemy, Joses, Simon oh Judas oh?
56Wantreh woa buleing chehn ngha cheh hin uborr ubull ë? loa nopokan tre chëëkeh ndërick n tre manah buleing ah?
57Ngha shillyeh won; kereh Jesus nghaleh ko ko ngha, prophet ah tre peh kulloh woa rë upock o upock, behleh ko upock u woa tre, nu ko woa killeh.
58U nghah mpant mbomung ëgbir ka kë, yehpeh peh kulloh won.
Currently Selected:
Matthew 13: BUY1816
Highlight
Share
Copy
Want to have your highlights saved across all your devices? Sign up or sign in
First published by the Church Missionary Society in 1816.
