Genese 23
23
1KE khaca haded ke twente seven ta je hunai Sara: wale ta je hunainy anyin möt. 2Ke a mokcu Sara hnyi Kiriath-areba (wale Heberona) hnyi hnyei Kanana: ke ame o but Aberahama he ka hnyamok me tenge ga Sara. 3Kʼ ame todrö Aberahama unyin kokiny komok, me ha ka je laku Heth, ka habe, 4Iny atkanyua me at ame më laba unyibun: e so öbun e ham könya ke utkânâ hnân khön komok hnyin unyibun mʼ inye konâm kokik mʼ iny ca wâ but. 5Haba je laku Heth adre me thu kö Aberahama me ba kâu, ka habe, 6Than lö, löng ju köhmun: u than ae gan hmâ hmönyin unyihmun: konâm ju kokâm hnyi anyihmun erkemok u je ûca; ke ba at gahmun ame he ka behanö u ge anyin erkemok, mʼ u me he ka konâm kokâm. 7Me ame todrö Aberahama, me nom ju ka aten hnyei, wale je laku Heth. 8Ke e ame ûhnenamö mödra, ka habe, A ne webun a oge me he ka konâm kokik mʼ iny ca wâ bi, löng ju könya me tengiö nya kö Eferona nöku Zohara, 9me me ham könya op e Makepela, a obiny, hnyi haten iny hnyei; e so e ame he ka ham e könya hnân hwaban ae bekhöt hnyi wanböbun me me anyik dok hnân khön komok hnyin. 10Ke haba Eferona ame hnyi laba unyin lakon Heth: me Eferona at Heth ame thu kö Aberahama, ke ame löng lakon Heth, walʼ ödra hia adre me didrö ka hnyi homagöuleny taun, haingen, ka habe, 11E ba than lö, ling nya ju: haba utkânâ inya oge me ham but köu, me op eû hnyin oge me ham köu; oge me hna but köu hnyi hnyimakan lakon aten ik hnyei: konâm ju kokâm. 12Ke Aberahama ame nom ju hnyi hnyimakan aten hnyei. 13Me e ame ha kö Eferona kʼ ame löng aten hnyei, haingen, ka habe, U je ne wem, u na löng ju könya: oge me he bi nya ka ham hwaban utkânâ; hom dö ûnyi gak, mʼ oge me he ka konâm eling kokik. 14Ke Eferona ame thu kö Aberahama me ha kâu, ka habe, 15Ling nya ju, than lö, haba ong utkana ae ûcû hwaban me vak ta haded je sekeliny sileva, ke hnân eû e kötu? anyin a wale, konâm ju kokâm. 16Ke Aberahama ame löng kö Eferona; me Aberahama ame tuluto kö Eferona ta je sileva, waleji e ame ha hnyi hnyimakan je lakon Heth, a vak ta haded je sekeliny sileva, mone adre labö ûco ka at ûcû. 17Me haba utkânâ i Eferona, e Makepela, cicö Mamere, wale utkânâ me op eû hnyin, me ta je ûö hia hnyi utkânâ hnyi ta je hounyin igigilö, adre me ohmâ 18kö Aberahama me gan hnyi hnyimakan je lakon Heth a tavat hia adre me didrö ka hnyi homagöuleny anyin taun. 19Ke hwaban dö e Aberahama ame könim Sara âiân hnyi op hnyi utkânâ e Makepela cicö Mamere (wale Heberona), hnyi hnyei Kanana. 20Ke haba utkânâ me op eû hnyin, adre ohmâ kö Aberahama hnen je lakon Hethme anyin dok hnân khönkomok hnyin.
Currently Selected:
Genese 23: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
