Genese 34
34
1KE ame he but Dina nöku Lea a hlu, wale hnen hna hnokoâ nöku Jekob, he ka wâ ta je hluiny hnyei. 2Ke ame wâ e hnö Sekema, nöku Hamora at Hivi, ke thaniny hnyei, me e ame hom e, me tha laba më, me okongoâ. 3Kʼ ame kece but hnyekon kö Dina nöku Jekob, ke e ame betenge ka hlu, me fuc menyik ka hlu. 4Ke Sekema ame ha kö Hamora a kamen, ka habe, He thö ka hom hlu e me öiök. 5Ke Jekob ame löng a ga okongu Dina but a nokon hnen e; ke tiga e je lakon hnyi hnyei me meno; ke Jekob ame laba hnyibû ke ne o but ödrin e o. 6Ke ame he but Hamora kamö Sekema kö Jekob me me ûhnenamö me. 7Ke ame o but ta je laku Jekob ûnyi hnyi hnyei hnyi ûen ödrin e löng e: ke a vec ut hnyekudrin, ke gan hmâ anyidrin hmönyin anyin a e ame ânyâ monu hnyi Isaraela, waleji ame tha laba me nöku Jekob; ke wale ûnyi ae kap he ka ânyâ. 8Ke Hamora ame ûhnenamö mödrin, ka habe, Haba Sekema a nökuk ame hnyok gan hmâ ka nökubun hlu: ö u ham but e me âiân. 9Ke so ötin e he ka ihok lakon, ham but köhmun lakubun je hia, ke hom ju öbun lakuhmun je hlu. 10Ke öbun e he ka tha laba möhmun: ke köuöbun kânâ hnyi hnyimaköbun; laba ju me ûcû hnyin, me me ve hu ibun eang. 11Ke haingö Sekema ka kamen hlu me je lahaniny, ka habe, E so öbun e betenge gak, ke haba ûnyi öbun e he ka ha könya, oge me he ka ham. 12Ha gânâ ju könya sâniny me omjeû, kʼ oge me he ka ham helâ me hnöbun hna he ka ha könya: ke so öbun e ham but könya hlu me âiân. 13Ke ame thu iyawöâ hnen je laku Jekob kö Sekema me Hamora a kamen, anyin a e ame okongu Dina a hanidrin, 14ke haingödrin ködru, ka habe, E ca khanʼ öhmun he ka ânyâ ûnyi e, wale he ka ham hanihmun ka at adre ca peritomonâ; anyin a wale hnân haikongu öhmun: 15walang öhmun e he ka ogʼ öbun, ka habe, Hamöbun he ka helâ möhmun, wale he ka peritomoni öbun hia obaga; 16me öhmun e he ka ham köbun lakuhmun a je hlu, kʼ öhmun e he bi ka hom lakubun je hlu, mʼ öhmun e he ka tha laba unyibun me me khaca itin hnyei 17Ke öbun e ne ca ling öhmun he ka hnyi peritomonâ, awe öhmun e he ka hom nökuhmun hlu me he but. 18Ke so kö Hamora me Sekema nöku Hamora bodrin hofuc. 19Ke ca bec bi hidröu he ka ânyâ ûnyi e, anyin a e ame sënyin ge nöku Jekob; kʼ adre oganâ e hon lap hia anyin kamen. 20Ke Hamora me Sekema a nokon, ödru me he ka hnyi homagöuleny taun, me ûhnenamö me tavat aten idruhnyei, ka habe, 21Ödra menyik köta tavat eang; anyin a wale e so adre me laba hnyei me ûcû hnyin; ke, wâ bi, e lau hnyei me ûcû ödra; e so ate me hom lakudra je hlu me me laöiöta, kʼ ate me he ka ham bi ködra lakuta je hlu. 22Ke walang ang ame he tavat ka ogʼ ota he ka tha laba möta me me khaca hnyei, ka habe, adre me he ka peritomoni ota hia obaga helâ me hna peritomoni ödra. 23Hawa, ame ca he anyidra ta je ûnyi, me tang omjehedra, me haledra ta je meno hia ka anyitin î E so ate me he ka ogʼ ödra, kʼ adre me he ka tha laba möta. 24Ke ame löng hotu Hamora me Sekema a nokon hnen tavat hia adre me didrut ka hnyi homagöuleny taun, kʼ adre me peritomonâ ta je baga hia, tavat adre me didrut ka hnyi homagöuleny taun. 25Ke habe hnyi bong a kuniny, mʼ adre me tiga vec, haba ke li laku Jekob, jia Simeona me Levi, lahani Dina, ödru me ve hom anyidru li hele vat, me utut ka hnyi hnyei, me hlingâ ta je baga hia. 26Ke ödru me hlingö Hamora me Sekema a nokon hnen homakan hele vat, me hum Dina ûnyi hnyi hnyin uma umo Sekema, me he but. 27Kʼ ame o but laku Jekob ka ta je komok, me söh taun, can hnödra hna okongoâ hanidrin. 28Ke ödrin e hûgûnâ haledra ta je mamoe, me haledra ta je kâu, me haledra ta je asina, me ta je ûnyi hnyi! taun, me ta je ûnyi hnyi hnyei; 29me tang omjehedra hia, me lakudra ta je wanakat hia, me je laöiödra, adre hom bâ me i hûgûnâ, me ta je ûnyi hia hnyi hnyaba. 30Ke Jekob ame ha kö Simeona me Levi, ka habe, Öbe ohmaki nya, he ka obokongi nya ka aten hnyei, wale at Kanana me Perizi: ke ötin wakhalet, kʼ adre me he ka ukhacaköu könya me kun nya; mʼ adre me he ka hiö nya me anyik lap. 31Ke ödru me thu, ka habe, Hawa, hamen he ka ânyâ ka hanihmum helâ me momo hnyi gethen.
Currently Selected:
Genese 34: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
