Ioane 1

1HABA hnyi can, me waleji Logo, e unyin Khong Logo, haba Logo, me Khong. 2E unyin Khong hnyi can. 3Adre me op ta je ûnyi hia thithö a deny e; ke ba ûnyi adre hia but op, a gʼ adre ca op gan. 4E hu möt unyin; ke haba möt, me melaminy at. 5Ke ame umumelam melam hnyi lit; kʼ ame ca kap bi e hnen lit. 6Ame o ke at, a kunâ hnen Khong, Ioane ien. 7E ame o but hnân ohnathoâ, mʼ adre me he ka ohnathoâ melam, me me labageju tavat hia thithö ûnyi gan bi. 8Haba at e, me ca melam bi eling, ke so bi hnân ohnathoâ melam. 9Haba melam hnathu, me wale at ame omelamâ tavat hia adre me o ka hnyi hmeledrany. 10A mwi but e eang hmeledrany, ke e at a op hmeledrany, ke a ca wâ e hnen hmeledrany, 11E ame o but ka hnyi hing hwajekhon, kʼ ame ca kap e hnen lakeiny. 12Ke haba tavat adre me kap e, wale hnyat adre me labageju ka hnyi ien, me e ame ham kodra man, me adre me lakon dut Khong: 13ke adre me ca hnöku ödra ûnyi hnyi dra, ke ca ûnyi minya bi ge weny unyin, ke ca ûnyi ge weny at, ke ûnyi bi ge Khong. 14Adre me bi unyin Logo bi, kʼ ame laba unyita (ke ohmun e wâ but anyin hmanenang, wale helâke me hmanenanginy Nokon a khaca a hnokoâ hnen Kamen), a unöngöt do ge ibetengiö bâu me hnathu. 15Haba Ioane ame ohnathoâ e, me hongot, ka habe, Walang at, waleji oge me ha gan, ka habe, Ame he hotuk at ke wale hnyi hnyimakök: anyin a bân, ka bilik bi. 16Eke, ate me hia but ve kap jekhoû ûnyi hnyi anyin unöngöt, wale betenge bâu ke betenge bâu. 17Anyin adre ham hnanyibu a deny Mose; ke ibetengiö bâu me hnathu a deny Iesu Keriso. 18E ba at ame wâ Khong; kʼ ame omanenâ e hnen Nokon a khaca thibi, wale at hnyi ûlainy Kamen.

19Ke walang hna ohnathoâ hnö Ioane hnyi ûen adre me kunâ tavat bihut me at Levi hnen at Juda ûhedra Jerusalema he ka hnö e, ka habe, U ia? 20Me e ame haimemenâ, kʼ ame ca ivinö bi; e ame haimemenâ, ka habe, Iny ca Keriso bi nya. 21Me adre me hnö e, ka habe, Ke ieû bi? U Elia? Haingen ka habe, Ohe. U perofeta? E ame thu, ka habe, E ba. 22Anyin a wale adre me ha kâu, ka habe, Kʼ u ia bi? mʼ ohmun e he ka ha ka tavat adre kunʼ ohmun. Ieû hwâm gam bi? 23Haingen, ka habe, Inya ang ifucin at ame hongot hnyi hnyebuba, ka habe, Owisa thö gethen deny Than, helâji me hna ha ga Isaia perofeta. 24Ke adre hia but kunʼ ödra hnen ta je Faresaio. 25Ke adre me hnö e me ha kâu, ka habe, Ieû gam u me bapataiso, kʼ u ca Keriso bi, ke ca Elia bi, ke u ca perofeta minya bi eling? 26Haba Ioane ame thu kodra, ka habe, Inya oge me bapataiso ge köiö: ke ame tot hnyi wanböbun ke at ae ca khanʼ öbun, 27wale at ame biliny hotuk, iny ca ûcû he ka thang hna hûkâlâ taben li hnyeûcan. 28Adre ânyâ ta je ûnyi e hnyi Bethania hoton Joridano, wale dok ame bapataiso hnyin Ioane.

29Nyi e ame ō Iesu ame he kâu, me haingen, ka habe, Wâ bi Arenio anyin Khong at ame hijen monu anyin hmeledrany! 30Wale at waleji oge me ha, ka habe, Ame he ka he hotuk at, ke e hnyi hnyimakök; anyin a bân, ka bilik bi. 31Ke oge me ca wâhmakhmeto e, ke so bi a e ame he ka manen ka at Isaraela, can thibi e oge me o but he ka bapataiso ge köiö. 32Haba Ioane ame ohnathoâ me ha, ka habe, Oge hia but wâ Hanu ame gâ but ûheny hnyi drany helâ me biny; me ame o hnyi hon. 33Ke oge me ca wâhmakhmeto e: ke haba at a kunö nya he ka bapataiso ge köiö, e ame ha könya, ka habe, Haba hnâm hna he ka wâ Hanu ame gâ ka hnyi hon, me laba hon, wale at ame bapataiso ge Hanu Kap. 34Ke oge hia but wâ me ohnatho, a e thibi Nokon Khong. 35Hmetu nyi, Ioane ame tot me ke li laten; 36ke e ame ö Iesu ame he, me haingen, ka habe, Wâ bi Arenio anyin Khong! 37Ke a long ut li laten hnen hna ha, me ödru me he hotu Iesu. 38Haba Iesu ame hwio thö me ö dru ödru me he hoton, me e ame ha ködru, ka habe, Ieû öbu me elâm? Haingödru kâu, ka habe, Kabi (bongon At ûne), ewa dok u ma laba hnyin? 39Haingen ködru, ka habe, Ai öbu mʼ öbu me he ka wâ. Me ödru me he me wâ hnyaban; me ödru me tha laba mē hnyi bong eling, anyin a helâke awa a teniny. 40Haba ke at hnyi li at ödru me Jöng ifuci Ioane, kʼ ödru he hotu Iesu, me Anederea, a liamekeiny me Simona Peteru. 41E ame bân ka elâm liamekeiny mē a Simona me ha kâu, ka habe, Ohmun e wâ but Mesia, (bongon, Keriso). 42Ke e ame hom e kö Iesu. Haba Iesu ame wâ e, ke haingen, ka habe, U Simona a nöku Iona: adre me he ka hwenyi u, me Kefa, (bongon, Peteru).

43Nyi e ame behe Galilaia ai, ke e ame ö Filipo: ke haingö Iesu kâu, ka habe, He hotuk. 44Haba Filipo, me at Bethesaida, wale taun ga Anederea me Peteru. 45Filipo ame ō Nathaniela, me e ame ha kâu, ka habe, Ohmun e wâ but hna sihnalimen hnö Mose hnyi hnanyibu me ta je perofeta minya, wale Iesu at Nazareta, nöku Josefa. 46Ke haba Nathaniela ame ha kâu, ka habe, Hawa, e khana ûnyi ae so he ka o ûnyi hnyi Nazareta? Haingö Filipo kâu, ka habe, Aiö u, u ma wâ. 47Haba Iesu ame ö Nathaniela ame he kâu, me e ame ha gan, ka habe, Wâ bi at Isaraela ae hnathu, e ba tang iyawâ gan! 48Haba Nathaniela ame thu kâu, ka habe, U je wâhmakhmetu nya ua? Iesu ame thu, me ha kâu, ka habe, Oge me ō u hnyi hmelen imeta ke tiga ca hawo u Filipo. 49Haba Nathaniela ame thu kâu, ka habe, Kabi, u thibi Nokon Khong; u thibi Than Isaraela. 50Haba Iesu ame thu me ha kâu, ka habe, U me labageju anyin a oge me ha köu, ka habe, Oge me ö u hnyi hmelen imeta? u me he bi ka wâ ta je ûnyi ae gan hon e. 51Ke e ame ha kâu, ka habe, E hnathu, e hnathu, inya oge me ha köbun, ka habe, Öbun e he bi ka wâ drany adre khong, me ta je angela anyin Khong adre me he ka ölö thö me utut hon Nokon at.

Currently Selected:

Ioane 1: IAAI

Highlight

Copy