Luka 14
14
1KE e ame didro ka hnyi uma umen ke taben ta je Faresaio hnyi sabath he ka han, ke adre me tuö e. 2Ke wâ bi, wale ke at hnyi hnyimakan ame mekiny thâköiö. 3Ke haba Iesu ame thu me ha ka tavat ûnö hnanyibu, me ta je Faresaio, ka habe, Hawa, e ûcû he ka osoâ at hnyi sabath, e ca ûcû? 4Ke adre me laba hnyibû. Me e ame hom e me osoâ, kʼ ame hna but e. 5Haingen kodra, ka habe, Ia gabun ae hu haleny asina, a ne bolok, ame kolu ka hnyi thop, me ame ca he ka ie lelö hmetu thö e hnyi sabath? 6Ke ca khanʼ ödra hmetu bi he ka thu je hofuc eling.
7Ke e ame wâ a gʼ adre me ûca je hna lap ae beönua, me e ame ha ûhöûcû ka tavat adre me hawâ; haingen ame ha ködrin, ka habe, 8E ka hawo u ke at ka hnyi faipoipo, ca he ka laba hnyi hna laba ae beönua, wâ e nye hu at ae beönua hom adre me hawâ, 9me ame o but at a tha hawʼ öbu, me ha köu, ka habe, Hna thö hobi kâu at ang; me u me he ka hwân hmehma me laba hnyi hna laba ae hnyikânâ. 10Ke e ka hawo u, he thö ka laba hnyi laba ae hnyikânâ hmonyin; ke ka o at a hawo u, me e ame he ka ha köu, ka habe, Hanok lö, he thö ka laba hnyi hna laba ae beönua: me u me he ka mec hnyi hnyimakan tavat adre me tha laba möu. 11Anyin adre me he ka oûhnyûkongoâ at ame ogânâ e bi; kʼ adre me he ka ogânâ at ame ka oûhnyûkongoâ e bi.
12Haingen minya ka at a hawa e, ka habe, U ka thu han jebigo ame ne han sahac, ca hawâ lahânâm, me je liamekeiny möu, me ânyâm lap, me tavat tren omjeû ae hakekeny köu; wâ adre nye he ka hawo u hmetu, me bi hwaban köu. 13Ke u ka he ka ânyâ bijeû, hawâ thö je theduoc, me ta je bâbu, me ta je mat, me ta je wadröu: 14ke adre me he ka ohnahici u; anyin ae ca hu gadra ûnyi he ka bi hwaban hmetu köu: anyin adre me he ka bi hwaban köu hnyi ûen möt hmetu a tavat ae wisa hwakecidra.
15Ame long ta je hofuc e hnen ke at ame tha laba mē, me e ame ha kâu, ka habe, Hnahic hnen at ame he ka hnyi han hnyi dokhu dokhon Khong. 16Me e ame ha kâu, ka habe, Ame ânyâ ke at bijeû ae gan hmâ; ke se hia tavat a hawâ: 17ke e ame kunâ athnyabainy hnyi ûen han he ka ha ka tavat adre me bödra ka hawâ, ka habe, Ai öbun; anyin adre hia but penapena ta je ûnyi. 18Ke ödrin hia thithö adre me hwân he ka ve ha vhelidra. Haingen ke at kâu, ka habe, Oge hia but ûco ke utkânâ, ke hamök he ka he ka wâ e: ö u hnö nya ju ang. 19Ke haingen ke at, ka habe, Oge hia but ûco je bolok a faiv je ûcon, ke oge me he but ka cubic ödrin: ö u hnö nya ju ang. 20Ke haingen ke at, Oge hia but faipoipo, anyin a wale e ca kbanö nya but he ka he. 21Me ame o but athnyaba, me omanenâ ta je ûnyi eling ka tuhan. Me ame hmonyin tuhan uma, me ha ka athnyabainy, ka habe, Ie he bi thö ka hnyi je gethen me je hna ngenu hnyi taun, ke hawâ thö jem ta je theduoc, me ta je bâbu, me ta je wadröu, me ta je mat. 22Ke haba athnyaba me ha, ka habe, Than lö, adre hia but ânyâ helâ me hnâm hna hûna, ke tiga hu hna lap. 23Ke haingen than ka athnyaba, ka habe, He thö ka hnyi je hna cit gethen, me hmelen je hak, me ûjengi ödra thö jem, me me unöngöt dö umök uma. 24Anyin a inya oge me ha köbun, ka habe, Ame ca he tavat adre bödra ka hawâ, ka hnyi drem anyik bijeû.
25Ke ame tha he me tavat ae se hia: ke e ame hwio thö me ha ködra, ka habe, 26A ne hu at ame he ka o könya, ke ame ca hociâ bi kamen, me hinyen, me âiân, me lakon, me je liamekeiny, me lahaniny, me anyin minya bi möt, e ca khana he ka bi hanen ta je latök. 27Haba at ame ca vadren anyin satauro me he hotuk, e ca khana bi he ka bi hanen latök. 28Anyin a ie at gabun ame beup tap, kʼ ame ca mē; laba ju he ka aû hwaban, hawa, e hu gan hnân he ka oumo î 29Wâ e nye hia but bi taben, ke ca khana bi he ka oumo, me ame he ka hluma e hnen tavat hia adre me wâ, 30adre me ha, ka habe, At ang ame hwân he ka op ke ca khana he ka umo. 31Ke ie ke than ame he ka vat me ke than, ke ame ca mē laba me bân ka ûnykûme, hawa, e khana e me tavat a ten thauzan he ka vat me at ae hu gan twente thauzan e ka he ka o kâu? 32Ke a ne ca khana bi, e ame kunâ ûthumetu ke tiga sâkâu bi at eji, he ka sumâtâ ûsoköu. 33Ke helâe, haba at gabun ame ca hna bi ta je ûnyi hia thithö ae hu gan, me ca khana he ka bi hanen latök. 34Eke, e so sâlt ke a ne ba but hinyin sâlt, ieû hnân ohinyâ e? 35E ca ûcû e hobi kâu kânâ me hna belök: kʼ ame degec ut e hnen at. Haba at ae hu li hnyikonyen ka long, long ju e.
Currently Selected:
Luka 14: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
