2 Коринфянэнгэ 9
9
Дэ́н васт (Помогинэ́н) Пшалэ́нгэ пир Христосо́стэ
1Мэ думинава, со на трэй тэ чхинав пал дынарибэ́н (служэниё) тэ дэн васт свэнтонэнгэ; 2пал-дова́ со мэ джино́м тумаро́ хачкирибэ́н тэ помогинэн (тэ дэн васт), со́са мэ шардём тумэн манушэ́нгэ дрэ Македония, пал дова́, со Ахаия#9.2 Ахаия – основание сыс скэдыно́ бэрш палэ и тумаро́ илэ́скиро хачкирибэ́н тэ дэн васт сы́рбы ґаздыя́ бутэ́-манушэ́нгиро ило́. 3Нэ мэ бичхадём пшалэ́н кэ тумэ́, соб (кай) амаро́ шарибэ́н пал тумэ́ндэ тэ на явэ́л чхучо́ (пусто), соб (кай), сыр мэ пхэндём, тумэ́ тэ явэ́н скэдынэ́, 4а со, ке́ли мануша́ Македониятыр явэ́на ма́нца и дыкхэ́на, со тумэ́ на сан скэдынэ́, саво́ ж ладжаипэ́н явэ́ла амэ́нгэ (на ракири́ пал тумэ́ндэ) пал амаро́ твардо шарибэ́н. 5Палдава́ мэ придуминдём тэ мангав пшалэ́н, соб (кай) ёнэ тэ джа́н англэды́р кэ тумэ́ и тэ докончынэн тэ скэдэ́н ловэ́ ваш бахтякирдо́ да́ро, пал со сыс дыно́ лав, соб (кай) ёв тэ явэ́л бахтякирдо́ да́ро илэ́стыр, а на сы́рбы тырдэна зорья́са. 6Дава́ исын чачипэ́н, со, кон чхувэ́ла гив на́бут, одова́ и кэдэла аплодо на́бут, а кон чхувэ́ла гив бут, одова́ и кэдэла аплодо бут: 7мэк кажно ману́ш тэ дэл ада́кицы, кицы́ исын лэ́скэ пир ило́, а на пир зор; пал-дова́ со Дэвлэ́скэ исын дро́го кодова́ ману́ш, кон дэ́ла радыма́са. 8Палдова́ со Дэвэ́л могинэ́ла тэ бахтякирэ́л тумэн ада́кицы дро саро́, соб (кай) тумэ́ндэ тэ ухтылэл (тэ явэ́л до́си) саро́, со трэй тумэ́нгэ, и упрэдыр далэ́стыр, соб (кай) тумэ́ тэ явэ́н скэдынэ́ пэ кажно лачхо́ рэ́ндо: 9сыр исын чхиндло́: “Ёв роздыя саро́, дыя́ богэнгэ, Лэ́скиро чачипэ́н явэ́ла пэ сарэ́ бэрша́.” 10И Дэвэ́л, Саво́ дэ́ла зя́рки тэ чхувэ́н дрэ пхув и маро́ тэ хан, дэ́ла тумэ́нгэ саро́ и барьякирэ́ла саро́ и явэ́ла барвало́ аплодо тумарэ́ чачипнастыр: 11Дэвэ́л кэрэ́ла тумэн барвалэ́ илэ́нца пэ сарэ́ лачхэ́ рэ́нды, со бут мануша́ явэ́на тэ парикирэ́н Дэвлэ́скэ пал тумарэ́ да́ры, савэ́ ёнэ дорэсэ́на (долэна) амэ́ндыр. 12Пал-дова́ со дасаво лачхо́ дынарибэ́н на со фэ́ни помогинэла свэнтонэнгэ дрэ лэ́нгири трэ́бима, нэ ишчо (инкэ́) бутэды́р выкхарэла лэ́ндыр баро́ парикирибэн Дэвлэ́скэ; 13и ёнэ славинэна Дэвлэ́с, дыкхи́ пэ дасаво лачхо́ дынарибэ́н, пал-дова́ со, сыр тумэ́ приджинэна, адя́кэ-паць и тумэ́ кэрэ́на сарэ́ илэ́стыр пир Христососкири бахталы́ зан (звесь); и пал тумарэ́ илы́тка да́ры лэ́нгэ и явирэ́нгэ, 14и ёнэ дрэ пэ́скирэ патерья (молитвы) Дэвлэ́скэ тырдэнапэ илэ́са кэ тумэ́ пал барвало́ Дэвлэ́скиро бахталыпэ́н, саво́ Ёв сыкадя́ пир тумэ́ндэ. 15Парикираса Дэвлэ́скэ сарэ́ годятыр и илэ́стыр пал Лэ́скиро тала́но, саво́ нашты́ тэ выпхэнас.
Currently Selected:
2 Коринфянэнгэ 9: ROMBALT
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission