Апостолэнгири Буты́ 1
1
Свэнтонэ́-Апостолэ́нгири Буты́
1Дро пэ́рво лылвари́ кэ ту, Феофи́ле (Теофи́ле), мэ чхиндём пал саро́, со Ису́со кэрдя́ самонэ англыпна́стыр, и пал со Ёв сыклякирдя́, 2кэ/жы́ко дова́ дывэ́с, дро саво́ Ёв ґаздыя́пэ пэ болыбэ́н и дыя́ припхэныбэ́н пир Свэ́нто Ду́хо (Фа́но) одолэ́ Апостолэнгэ, савэ́н Ёв Кокоро́ выкэдыя́, 3и кэ савэ́ адя́кэ-паць палэ пал Пэ́скирэ мэ́ньки, савэ́ Ёв пирилыджия и отдживдя мэрибна́стыр, явэ́лас Ису́со кэ ёнэ чачунэ́ допхэныбнаса, и Ёв штардэша́ дывэса́ псирдя́ кэ ёнэ и ракирдя́ лэ́нгэ пал Дэвлэ́скиро Кралипэ́н. 4Екхвар, ке́ли Ису́со хая кхэтанэ́ Лэскирэ сыкляибнытконэ́нца, Ёв припхэндя́ лэ́нгэ: “Тэ на джа́н тумэ́ Ерусалимо́стыр, а тэ ужакирэн, ке́ли явэ́ла Свэ́нто Ду́хо (Фа́но), пал саво́ дыя́ лав тумэ́нгэ Дад, и пал саво́ тумэ́ шундлэ́ Ма́ндыр; 5пал-дова́ со Иа́но болдя тумэн пане́са, нэ коригэды́р (позжэды́р) далэ́стыр пир вари-кицы́ часо Свэ́нто Ду́хо (Фа́но) явэ́ла тэ болэл тумэн.” 6Палдава́, ке́ли сыкляибны́тка скэдынэ́пэ кхэтанэ́, ёнэ пхучнэ́ Лэ́стыр: “Ра́ё Дэ́вла! Ци на яця́ дава́ часо, соб (кай) Ту тэ кэрэ́с нэвэ́стыр Израилёскиро Кралипэ́н?” 7И Ёв отпхэндя́ лэ́нгэ: “На тумаро́ рэ́ндо (де́ло) тэ джинэ́н часо ци дывэса́, савэ́ Дад выкэдыя́ Лэскирэ правоса; 8нэ тумэ́ндэ явэ́ла зор, ке́ли Свэ́нто Ду́хо (Фа́но) джал тэлэ́ пэ тумэ́ндэ, и тумэ́ явэ́на Мирэ́ якхи́тка (свидетели) дро Ерусалимо и пэ сари́ Юдэ́я и Сама́рия и адя́кэ-паць пир сари́ пхув.”
Ису́со ґаздэ́лапэ пэ Болыбэ́н
9И ке́ли Ёв пхэндя́ дава́, Ёв ґаздыя́пэ пэ болыбэ́н анги́л лэ́нгирэ якха́, и о́блоко чхакирдя Лэс лэ́нгирэ якхэ́ндыр. 10И ке́ли сыкляибны́тка ишчо (инкэ́) дыкхнэ́ пэ болыбэ́н, сыр Ису́со ґаздэласпэ, акэ, вари-каты́р анги́л лэ́ндэ тэрдинэ́ дуй мануша́, савэ́ сыс уридэ́ дро парныпэн, 11и савэ́ пхэндлэ́: “Ѓалилеякирэ Мануша́лэ! Со тумэ́ сан тэрдэ́ и дыкхэ́на пэ болыбэ́н? Кадава́ Ису́со, Саво́ сыс ґаздыно́ тумэ́ндыр пэ болыбэ́н, адя́кэ-паць и явэ́ла, сыр тумэ́ дыкхнэ́, сыр Ёв ґаздэласпэ пэ болыбэ́н.”
Матфеё Заме́ст (Пашы́л) Юда́стэ
12Пало́ дава́ Апо́столы явнэ́ палэ дро Ерусалимо, сыр гинэ́ тэлэ́ Оливитконэ (Елеоноскирэ) бэрга́тыр; дромэ́са долэ́ бэрга́тыр сашты́ (можна) тэ доджас кэ Ерусалимо пал са́вато (субо́та). 13И ке́ли ёнэ явнэ́ дро фо́ро, ёнэ скэдынэ́пэ дрэ бари шту́ба (комната), кай сыс: Пэ́три (Пётр) и Яково, Варфаламеё и Матфеё, Иа́но и Ендри (Андреё), Филипо и Фама, Яково Алфеёскиро и Си́моно Зилото, и пшал Яково́скиро, Юда. 14Ёнэ кхэтанэ́ скэдэнаспэ тэ мангэ́нпэ Дэвлэ́скэ; сыс лэ́нца вари-кицы́ джувля́ и Мари́я, Исусо́скири Дай, и Лэ́скирэ пша́ла. 15И дрэ долэ́ дывэса́ о Пэ́три, тэрдия́ машки́р сыкляибнытконэндэ (сыс скэдыибэ́н, пэ саво́ явнэ́ пашы́л шэл тэ биш мануша́) и пхэндя́: 16“Мануша́лэ – Пшала́лэ! Трэиндя́ тэ сполнинэ́лпэ дова́, со сыс анги́л пхэндло́ дро Свэ́нто Чхиныбэ́н, дро саво́ Свэ́нто Ду́хо (Фа́но) ангилпхэндя пир Давидо́стэ пал Юда́стэ, саво́ сыс лыджаибнаскиро (вождё) одолэ́нгэ, савэ́ бикиндлэ Исусо́с. 17Ёв сыс гиндло кхэтанэ́ амэ́нца, и адя́кэ-паць пхэнэлас дова́, со и амэ. 18Ёв киндя пэ́скэ пхув пал ловэ́, савэ́ ёв дорэсця́ пал Исусо́скиро здыибэн, пэ дая́ пхув кокоро́ и хасия́, и лэ́скиро тру́по латхнэ́ роскушнэ пэрэ́са и выпынэ́ виндырье́нца. 19И пал дава́ сарэ́ мануша́, савэ́ дживдэ́ кэ Ерусалимо, джиндлэ́, со доя́ пхув кхардэ́ пэ лэ́нгири чиб Акелдама, ци “ратвалы пхув.” 20Пал-дава́ со исын чхиндло́ дрэ Псалмы: “Мэк тэ явэ́л дава́ кхэр чхучо́, и мэк нико́н одо́й тэ на дживэ́л, и мэк тэ кэрэ́л лэ́скири буты́ яви́р.” 21Палдава́ амэ́нгэ трэй тэ выкэдас пэ лэ́скиро штэ́то манушэ́с, саво́ псирдя́ кхэтанэ́ амэ́нца саро́ часо, ке́ли дживдя́ машки́р амэ́ндэ Рай Дэвэ́л Ису́со, 22гины Ианоскирэ болдэипнастыр кэ/жы́ко дова́ дывэ́с, ке́ли Ису́со сыс ґаздыно́ амэ́ндыр, адалэ́ манушэ́скэ трэиндя́ тэ явэ́л кхэтанэ́ амэ́нца сыр якхи́тко пал Исусо́скиро отджидыибэн мэрибна́стыр, 23И ёнэ выкэдынэ́ дуе́н: Ёзас (Иосифос), савэ́с кхардэ́ Варсава, и прокхардэ Иустоса, и Матфеёс. 24И ёнэ мангнэпэ Дэвлэ́скэ и пхэндлэ́: “Дэ́вла! Ту джинэ́са сарэнгиро ило́, сыка́в екхэ́с кадалэ́ дуендыр, савэ́с Ту выкэдыян, 25соб (кай) тэ залэл штэ́то, сыр Апостоло тэ дынаринэ́л заме́ст Юдастэ, саво́ гия́ одори́к, карик лэ́скэ трэиндя́ тэ джал пэ́скэ.” 26И ёнэ чхурдынэ́ жре́биё, и жре́биё пыя́ пэ Матфеёстэ; и ёв сыс прилыно кэ дэшуекх Апо́столы.
Currently Selected:
Апостолэнгири Буты́ 1: ROMBALT
Highlight
Share
Copy
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
