Яви́р Зако́но 1
1
Припхэныбэ́н тэ Заджа́н дро Ханаано
1Далэ́ исын лава́, савэ́ ракирдя́ Мо́йза (Моисеё) сарэ́ манушэ́нгэ Израилёстыр [Израильтянэнгэ-р.с.] пал Иорда́но пэ чхучи́ пхув пэ лошчы́на проти Суфо, машки́р Фарано и Тофело, и Лава́но, и Асирофо и Дизагаво, 2дава́ исын дром пэ дэшуекх дывэса́ тэ джас пэзал Хоривостыр, пир дром бэрга́тыр Сеир кэ Кадес-Варни. 3Дава́ сыс дро штардэшытко бэрш, дэшуекхэ – чхонэ́скиро, пэ пэ́рво чхонэ́скиро дывэ́с, сыр ракирдя́ Мо́йза Израилёскирэ чхавэ́нгэ саро́, со припхэндя́ лэ́скэ Рай Дэвэ́л пал лэ́ндэ. 4Пало́ (после) дова́, сыр ёв замардя́ (умардя) Сигонос, Аморее́нгирэ крали́с, саво́ дживдя́ кэ Есево́но, и Огос, Васаноскирэ крали́с, саво́ дживдя́ кэ Аштэрофа дрэ Едрея, 5пал Иорда́но, пэ Моавитоскири пхув, лыя́ Мо́йза тэ ракирэ́л анги́л сарэ́ндэ пал дава́ Зако́но, и пхэндя́: 6“О Раё Дэ́вла (Яхва́), Дэвэ́л амаро́, ракирдя́ амэ́нгэ дро Хориво и пхэндя́: ‘Ухты́лла (до́си) тумэ́нгэ тэ дживэ́н пэ дая́ бэ́рга! 7Скэдэ́нпэ, джа́н дро дром, и джа́н пэ Амореенгири бэ́рга и кэ сарэ́ лэ́нгирэ мануша́, савэ́ дживэ́на пашы́л, пэ лошчы́на, пэ бэ́рга, пэ тылякирдэ штэ́ты и пэ паш-дывэсы́тко (южно) риг, и кэ брэги морёскирэ (дэрьявэ́скирэ), пэ Ханаано́скири пхув и кэ Лива́но, адя́кэ-паць кэ бари рэка (лэнь) Евфрато. 8Ѓа́да, Мэ да́ва тумэ́нгэ дая́ пхув, джа́н, лэн дро маёнко пхув, сави́ совлахаса Рай Дэвэ́л дыя́ лав тэ дэл тумарэ́ дадэ́нгэ Авраамо́скэ, Исаако́скэ и Яково́скэ, лэ́нгэ и лэ́нгирэ родо́скэ.
Барыдыра́ пэ Ро́дыцы (Чанга́)
9И мэ пхэндём тумэ́нгэ дро дова́ часо (цы́ро): ‘Мэ нашты́ (на могина́ва) екхджино́ тэ лыджав тумэн; 10Рай Дэвэ́л, амаро́, создыя́ бут тумэн, и ґа́да, тумэ́ акана́ сан ада́кицы бут, сыр болыбна́скирэ чэргэня́; 11Рай Дэвэ́л, Дэвэ́л, тумарэ́-дадэ́нгиро, мэк тэ создэл тумэн бутэды́р дро тысёнцо мо́лы проти дава́, ци бут тумэн акана́, и мэк тэ бахтякирэ́л тумэн, сыр Ёв ракирдя́ тумэ́нгэ: 12сыр ма́нгэ екхджинэскэ тэ лыджав тумаро́ пхарипэ́н, кошыбэ́н тумаро́ и чинга́рд тумари́? 13Выкэдэн пэ́скэ пир тумаро́ ро́дыцо (чанг) муршэ́н мэндронэн, годьварэн, и пропатякирдэн, и мэ чхува́ва лэн тумарэ́ барыдырэ́нца.’ 14Тумэ́ отпхэндлэ́ ма́нгэ и пхэндлэ́: ‘Лачхо́ рэ́ндо (де́ло) ту ракирэ́са тэ кэра́с.’ 15И лыём мэ шэралэн тумарэ́ родыцэндыр (чангэндыр), муршэ́н мэндронэн и пропатякирдэн, и чхудём лэн барыдырэ́нца пэ тумэ́ндэ, тысёнцэнгирэ барыдырэ́нца, шэлэнгирэ барыдырэ́нца, пандждэшэнгирэ барыдырэ́нца, дэшэнгирэ барыдырэ́нца и дыкхибнаскирэнца пир тумаро́ ро́дыцо. 16И дыём мэ упхэныбэ́н тумарэ́ сэндарьенгэ дро дова́ часо, пхэни́: ‘Вышунэн тумарэ́ пшалэ́н и сэндинэ́н чачунэ́с лэн, сыр пшалэ́с пшалэса, адя́кэ и лэ́скирэ манушэ́с, саво́ явдя́ явирэ рига́тыр; 17на дыкхэ́н пэ муй пэ сэ́ндо, сыр тыкнэс, адя́кэ и барэс вышунэн, на дарэ́н манушэ́скирэ мо́стыр: пал-дова́ со сэ́ндо – рэ́ндо (де́ло) Дэвлэ́скиро. А рэ́ндо, саво́ ваш тумэ́нгэ исын пхаро́, лыджа́н лэс кэ мэ, и мэ вышунава лэс.’ 18И дыём мэ упхэныбэ́н тумэ́нгэ дро дова́ часо пал саро́, со трэй тумэ́нгэ тэ кэрэ́н.
Израилё Отпхэнэлапэ тэ Заджа́л пэ Упхэндлы Пхув
19И гиям амэ Хоривостыр, и гиям пир сари́ дая́ бари и дараны чхучи́ пхув, сави́ тумэ́ дыкхнэ́, пир дром кэ Амореенгири бэ́рга, сыр пхэндя́ Рай Дэвэ́л, амаро́ Дэвэ́л, и явдя́м дрэ Кадес-Варни. 20И пхэндём мэ тумэ́нгэ: ‘Тумэ́ явнэ́ кэ Амореенгири бэ́рга, сави́ Рай Дэвэ́л амаро́ Дэвэ́л дэ́ла амэ́нгэ; 21ґа́да, исын Рай Дэвэ́л, тыро́ Дэвэ́л дэ́ла ту́кэ дая́ пхув, джа́, лэ ла дро хулаибэн, сыр ракирдя́ ту́кэ Рай Дэвэ́л тырэ́-дадэ́нгиро, на дар и на страхадёв.’ 22Нэ тумэ́ сарэ́ явнэ́ пашылэды́р кэ мэ, и пхэндлэ́: ‘Амэ бичхаваса анги́л пэ́стэ манушэ́н, соб (кай) ёнэ амэ́нгэ тэ розґалён пхув, и тэ янэ́н амэ́нгэ джиныбэ́н пал дром, пир саво́ тэ джас амэ́нгэ, и пал фо́рья, дрэ савэ́ тэ джас амэ́нгэ.’ 23Дава́ лав ма́нгэ сыс пир ило́, и мэ лыём тумэ́ндыр дэшудуен манушэ́н, пэ екхэ манушэ́стэ кажнонэ́ родыцо́стыр. 24Ёнэ гинэ́, гинэ́ упрэ́ пэ бэ́рга, и догинэ́ кэ до́ло Есхол, и обдыкхнэ ла. 25И лынэ́ ёнэ дрэ пэ́скирэ васта́ пхувья́кирэ барьякирдэ́ (пло́ды), и яндлэ́ амэ́нгэ и яндлэ́ амэ́нгэ нэвипэн, и пхэндлэ́: ‘Лачхи́ исын пхув, сави́, Рай Дэвэ́л, амаро́ Дэвэ́л дэ́ла амэ́нгэ.’ 26Нэ тумэ́ на закамлэ тэ джа́н и на кандынэ́ Ра́скирэ-Дэвлэ́скиро, амарэ́ Дэвлэ́скиро упхэныбэ́н, 27и тангиндлэпэ (жалиндлэпэ) холя́са дрэ тумарэ́ ша́тры, и ракирдэ́: “О Рай Дэвэ́л, пир холы́ кэ амэ, вылыджия́ амэн Египто́скирэ пхувья́тыр, соб (кай) тэ отдэ́л амэн дрэ Аморее́нгирэ васта́ и тэ хасякирэ́л амэн; 28карик амэ джа́са? Амарэ́ пша́ла бизорьякирдэ амаро́ ило́, пхэни́: ‘Мануша́ одолэ́ исын буты́р и вучэды́р амэ́ндыр, фо́рья одо́й исын барэ́ и зоралэ́ тынэ́нца кэ болыбэ́н, и Енакоскирэ чхавэ́н дыкхцям амэ одо́й.’ 29И мэ пхэндём тумэ́нгэ тэ на дарэ́н и на страхадён лэ́ндыр; 30О Рай Дэвэ́л, тумаро́ Дэвэ́л джа́ла анги́л тумэ́ндэ, Ёв явэ́ла тэ затэрдёл пал тумэ́ндэ, сыр Ёв кэрдя́ тумэ́нца дрэ Еги́пто, анги́л тумарэ́ якха́, 31и пэ дая́ чхучи́ пхув, одо́й, кай, сыр ту дыкхця́н, Рай Дэвэ́л, тыро́ Дэвэ́л лыджия́ тут, сыр ману́ш лыджа́ла пэ́скирэ чхавэ́с, пир саро́ дром, савэ́са тумэ́ гинэ́, анги́л дова́, ке́ли тумэ́ явнэ́ пэ дава́ штэ́то. 32Нэ и усае́кх тумэ́ на патяндынэ́ Ра́скэ-Дэвлэ́скэ, тумарэ́ Дэвлэ́скэ. 33Саво́ гия́ анги́л тумэ́ндэ дромэ́са – тэ родэ́л тумэ́нгэ штэ́то, тэ тэрдён тумэ́нгэ, раты́ дрэ яг, соб (кай) тэ сыкавэ́л тумэ́нгэ дром, пир саво́ тэ джас, а дывэсэ́ дро о́блоко.
Ка́ра пэ Израилё
34И Рай Дэвэ́л шундя́ тумарэ́ лава́, и холя́сыя, и совлахадя́, и пхэндя́: 35“Нико́н адалэ́ манушэ́ндыр, далэ́-холынакирэ родо́стыр, на явэ́ла тэ дыкхэ́л лачхи́ пхув, сави́ Мэ совлахадём тэ дав тумарэ́ дадэ́нгэ; 36екх о Халево, Иефонияскиро чхаво́ [Эфунэскиро-ю.о.], удыкхэ́ла ла; лэ́скэ Мэ да́ва пхув, пир сави́ ёв гия́, и лэ́скирэ чхавэ́нгэ, пал дова́, со ёв кандыя́ Рас-Дэвлэ́с. 37И пэ ма́ндэ холя́сыя Рай Дэвэ́л пал тумэ́ндэ, и пхэндя́: ‘И ту на заджаса одори́к: 38о Ису́со (Ёхошуа́), Навиноскиро чхаво́, саво́ исын пашы́л ту́тэ, ёв заджа́ла одори́к; кэр лэс зоралэды́р, пал-дова́ со ёв залыджала Израилё пэ лэ́скири пхув, 39а чхавэ́ тумарэ́, пал савэ́ндэ тумэ́ ракирдэ́, со ёнэ доячэнапэ вэргэ́нгэ, и тумарэ́ чхавэ́, савэ́ на джинэ́на акана́ ни лачхипэ́н, ни чорипэ́н, ёнэ заджа́на одори́к, лэ́нгэ Мэ да́ва ла, и ёнэ явэ́на хулая́ ла́кэ; 40а тумэ́ тэ рисён и джа́н пэ чхучи́ пхув пир дром кэ Лоло́ мо́рё (дэрья́в).’ 41И тумэ́ отпхэндлэ́ тэды и пхэндлэ́ ма́нгэ: ‘Амэ кэрдя́м грэ́хо анги́л Растэ-Дэвлэ́стэ, джа́са и марасапэ, сыр припхэндя́ амэ́нгэ Рай Дэвэ́л, амаро́ Дэвэ́л.’ И пирипхандлэпэ тумэ́ кажно пэ́скирэ марибнытконэ́ мардытконэса (оружыёса), и надумины, скэдынэ́пэ тэ джа́н упрэ́ пэ бэ́рга. 42Нэ Рай Дэвэ́л пхэндя́ ма́нгэ: “Пхэн лэ́нгэ: ‘На джа́н упрэ́ и на марэ́нпэ, пал-дова́ со нанэ Ман машки́р тумэ́ндэ, соб (кай) тэ на замарэ́н тумэн тумарэ́ вэ́рги (вроги).’” 43И мэ тумэ́нгэ ракирдём, нэ тумэ́ на кандынэ́ и гинэ́ проти Ра́скирэ-Дэвлэ́скиро лав, и пир пэ́скиро ило́ гинэ́ упрэ́ пэ бэ́рга. 44И выгия́ проти тумэ́ндэ о Амореё, саво́ дживдя́ пэ доя́ бэ́рга, и традынэ тумэн адя́кэ, сыр кэрэ́на бырлиня (пчолы), и домардэ́ тумэн пэ Сеиро кэ Хорма. 45И рисинэ́ тумэ́, и рондлэ́ анги́л Растэ-Дэвлэ́стэ: нэ Рай Дэвэ́л на шундя́ тумари́ го́дла и на помогиндя тумэ́нгэ. 46И ячэнаспэ тумэ́ дро Кадесо ада́кицы бут часо, ци бут часо тумэ́ са́нас одо́й.
Currently Selected:
Яви́р Зако́но 1: ROMBALT
Highlight
Share
Compare
Copy
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission