Иа́но 14

Пир Исусо́стэ исын Дром кэ Дэвэ́л Дад

1“Мэк ило́ тумаро́ тэ на страхадёл; патя́н дрэ Дэвлэ́стэ и патя́н дрэ Ма́ндэ. 2Дрэ Мирэ́-Дадэ́скиро кхэр исын бут штэ́ты; нэ ко́ли тэ на явэ́л адя́кэ, Мэ пхэнавас тумэ́нгэ: Мэ джа́ва тэ кэдав штэ́то тумэ́нгэ?” 3И ке́ли Мэ джа́ва и кэдава штэ́то тумэ́нгэ, Мэ ява́ва нэвэ́стыр и лава́ тумэн кэ Пэ; соб (кай) и тумэ́ тэ явэ́н одо́й, кай Мэ ява́ва. 4А карик Мэ джа́ва, тумэ́ джинэ́на и дром одори́к исын джиндло́ тумэ́нгэ.” 5Фама пхэндя́ Лэ́скэ: “Раё Дэ́вла! Амэ на джина́са, карик Ту джа́са; сыр амэ могинаса тэ джинас дром одори́к?” 6Ису́со пхэндя́ лэ́скэ: “Мэ сом дром и чачипэ́н и джиибэ́н; нико́н на явэ́ла кэ Дад, сыр екх пир Ма́ндэ. 7Ко́ли тумэ́ тэ джинэ́н Ман, тэды тумэ́ джинэнас и Мирэ́ Дадэ́с; и какана́ тумэ́ джинэ́на Лэс и дыкхнэ́ Лэс.” 8Филипо пхэндя́ Лэ́скэ: “Раё Дэ́вла! Сыка́в амэ́нгэ Дадэ́с, и буты́р амэ́нгэ нисо́ на трэй.” 9Ису́со пхэндя́ лэ́скэ: “Ци на ґара́” (длу́гэс) Мэ сом тумэ́нца, и ту на джинэ́са Ман, Филипо? Одова́, кон дыкхця́ Ман, дыкхця́ и Дадэ́с; сыр ту ракирэ́са: ‘Сыка́в амэ́нгэ Дадэ́с?’ 10Ци ту на патя́са, со Мэ сом дрэ Дадэ́стэ и Дад исын дрэ Ма́ндэ? Лава́, савэ́ Мэ ракира́ва тумэ́нгэ, Мэ ракира́ва на Пэ́стыр; адава́ Дад, Саво́ исын дрэ Ма́ндэ, Ёв кэрэ́ла Пэ́скирэ рэ́нды. 11Патя́н Ма́нгэ, со Мэ сом дрэ Дадэ́стэ и Дад исын дрэ Ма́ндэ; нэ ко́ли на патя́на Ма́нгэ, тэды патя́н пир кокорэ́ Мирэ́ рэ́нды. 12Чачэс, чачэс Мэ ракира́ва тумэ́нгэ: Одова́, кон патя́ла дрэ Ма́ндэ, явэ́ла тэ кэрэ́л дасавэ́-паць рэ́нды, со и Мэ кэра́ва и буты́р одолэ́ рэндэ́ндыр ёв кэрэ́ла; пал-дова́ со Мэ джа́ва кэ Миро Дад. 13И со тумэ́ тэ на помангэн Дадэ́стыр Мирэ́ лавэ́стыр, Мэ саро́ кэра́ва дова́, и Дад сыкавэ́ла Пэ́скири сла́ва пир Чхавэ́стэ. 14Ко́ли со тэ на́ мангэн Мирэ́ лавэ́стыр, Мэ дова́ кэра́ва.

Ису́со Дэ́ла Лав Лэ́нгэ тэ Бичхавэ́л Свэ́нто Ду́хо (Фа́но)

15Ко́ли тумэ́ рикирэ́на Ман сыр Дро́гима дро ило́, то кэрэ́н дова́, со Мэ припхэндём тумэ́нгэ. 16И Мэ помангава Дадэ́с, и Ёв дэ́ла тумэ́нгэ явирэ Обрадыпна́скирэс (Утешытелёс), саво́ ўса́ды (сак) явэ́ла тумэ́нца; 17дава́ исын Ду́хо (Фа́но) чачипна́скиро, Савэс свэ́то нашты́ тэ прилэл, пал-дова́ со ёв на дыкхэ́ла Лэс и на джинэ́ла; нэ тумэ́ Лэс джинэ́на, пал-дова́ со Ёв исын тумэ́нца и явэ́ла дрэ тумэ́ндэ. 18Мэ на ячкирава тумэн пиротэнца (сиротэнца), Мэ ява́ва кэ тумэ́. 19Сарэ́са на́бут, и свэ́то Ман на явэ́ла тэ дыкхэ́л, нэ тумэ́ дыкхэ́на Ман, пал-дова́ со Мэ джива́ва, и тумэ́ явэ́на тэ дживэ́н. 20Дрэ дова́ дывэ́с тумэ́ явэ́на тэ джинэ́н, со Мэ сом дрэ Мирэ́ Дадэ́стэ, и тумэ́ сан дрэ Ма́ндэ, и Мэ сом дрэ тумэ́ндэ. 21Одова́, конэ́стэ исын Мирэ́ припхэныбэна́, и кон ракхэ́ла лэн, одова́ рикирэ́ла Ман сыр Дро́гима дро ило́, и Дад Миро сыкавэ́ла паты́в лэ́скэ, и Мэ адя́кэ-паць ява́ва тэ сыкавав паты́в лэ́скэ, и Мэ сыкадёвава Кокоро́ Пэс лэ́скэ.” 22Юда, саво́ на сыс Искариото, ракирэ́ла Лэ́скэ: “Раё Дэ́вла! Сыр да Ту скэдэсапэ тэ сыкадёс амэ́нгэ, а на свэтоскэ?” 23Ису́со отпхэндя́ лэ́скэ: “Ко́ли вари-конэ́скэ сом дро́го Мэ, одова́ ману́ш зракхэ́ла Миро лав; и тэды Мирэ́ Дадэ́скэ явэ́ла дро́го ёв, и амэ ява́са кэ ёв и амэ ява́са тэ джива́с кэ ёв. 24Одова́, конэ́скэ на дро́го сом Мэ, одова́ ману́ш на ракхэ́ла Мирэ́ лава́; нэ лав, саво́ тумэ́ шунэ́на, дава́ исын на Миро, а Дадэ́скиро, Саво́ бичхадя́ Ман. 25Мэ пхэндём тумэ́нгэ дава́, ке́ли Мэ со́мас кхэтанэ́ тумэ́нца. 26Обрадыпнаскиро, Саво́ исын Ду́хо (Фа́но) Свэ́нто, Саво́ бичхавэ́ла Дад ваш Миро лав, высыклякирэла тумэн сарэскэ и саро́ чхувэ́ла дрэ тумари́ годы́, пал со Мэ ракирдём тумэ́нгэ. 27Мэ ячкирава рама́нё (миро) тумэ́нгэ, Миро рама́нё Мэ да́ва тумэ́нгэ: нэ на адя́кэ, сыр свэ́то дэ́ла, Мэ да́ва тумэ́нгэ, и мэк тэ на страхадёл тумаро́ ило́, и тэ на дарэл. 28Тумэ́ шундлэ́, со Мэ пхэндём тумэ́нгэ: ‘Мэ джа́ва криг тумэ́ндыр и ява́ва кэ тумэ́. Ко́ли тумэ́нгэ Мэ явавас дро́го, тумэ́ явэ́нас ра́да, со Мэ джа́ва кэ Дад; пал-дова́ со Миро Дад исын барэды́р Ма́ндыр’. 29И, ґа́да, Мэ пхэндём тумэ́нгэ саро́ англэды́р долэ́стыр, сыр дава́ кэрэ́лапэ ваш дова́, соб (кай) тумэ́ тэ патя́н, ке́ли дава́ кэрэ́лапэ. 30Мэ какана́ на ява́ва бут тэ ракира́в тумэ́нца, пал-дова́ со джа́ла далэ́-свэтоскиро хула́й, нэ ёв исын на хула́й пэ Ма́ндэ. 31Нэ, соб (кай) свэ́то тэ джинэ́л, со Ма́нгэ исын дро́го Дад и, сыр пхэндя́ Ма́нгэ Дад, адя́кэ Мэ саро́ кэра́ва: ‘Уштэ́н, джа́са адатхы́р.’”

Currently Selected:

Иа́но 14: ROMBALT

Highlight

Copy