Иа́но 16

Сыр Явэ́на тэ Традэ́н Дэвлытконэ́н

1Мэ пхэндём дава́ тумэ́нгэ, соб (кай) тумэ́ тэ на отпэрэн. 2Тумэн традэ́на яври́ кхангирьендыр; и явэ́ла дасаво часо (цы́ро), ке́ли одова́ ману́ш, саво́ замарэла тумэн, явэ́ла тэ думинэл, со ёв далэ́са дынаринэла Дэвлэ́скэ. 3Ёнэ явэ́на тэ кэрэ́н адя́кэ, пал-дова́ со адалэ́ мануша́ на джиндлэ́ ни Дадэ́с, ни Ман. 4Нэ Мэ пхэндём тумэ́нгэ дава́ ваш дова́, соб (кай) тумэ́, ке́ли явэ́ла одова́ часо, тэ рипирэ́н, со Мэ ракирдём тумэ́нгэ пал дава́; Мэ англэды́р на ракирдём тумэ́нгэ пал дава́, пал-дова́ со Мэ со́мас тумэ́нца.

Свэнтонэ́-Духо́скири Буты́

5Нэ какана́ Мэ джа́ва кэ Одова́, Кон бичхадя́ Ман, нэ нико́н тумэ́ндыр на пхучэла Ма́ндыр: ‘Карик Ту джа́са?’ 6Нэ долэ́стыр, со Мэ пхэндём дова́ тумэ́нгэ, тумаро́ ило́ яця́ тэ пиридживэл. 7Нэ Мэ, чачэс, ракира́ва тумэ́нгэ: фэды́р ваш тумэ́нгэ, соб (кай) Мэ тэ джав; ко́ли Мэ на джа́ва, тэды Обрадыпнаскиро на явэ́ла кэ тумэ́, нэ ко́ли Мэ джа́ва, тэды Мэ бичхава́ва Лэс кэ тумэ́. 8И, ке́ли Ёв явэ́ла, бангякирэла свэ́то пал грэ́хо, и пал чачипэ́н, и пал сэ́ндо: 9пал грэ́хо, саво́ исын дрэ дова́, со мануша́ на патя́на дрэ Ма́ндэ; 10пал чачипэ́н, со Мэ джа́ва кэ Миро Дад, и тумэ́ буты́р на дыкхэ́на Ман; 11пал сэ́ндо, со кадалэ́ свэтоскиро кра́ли явэ́ла сэндиндло. 12Какана́ бут со исын тэ пхэна́в тумэ́нгэ, нэ тумэ́ акана́ на могинэ́на тэ ґалён. 13Ке́ли явэ́ла Ёв, чачипна́скиро Ду́хо (Фа́но), тэды сыкавэ́ла тумэ́нгэ чачуно́ дром дро джиибэ́н; пал-дова́ со Ёв явэ́ла тэ ракирэ́л на Кокоро́ Пэ́стыр, нэ Ёв пхэнэ́ла тумэ́нгэ одова́, со шунэ́ла, и Ёв пхэнэ́ла, со явэ́ла анги́л. 14Ёв славинэла Ман, пал-дова́ со саро́, со Ёв пхэнэ́ла, Ёв уджинэла Ма́ндыр и роспхэнэ́ла тумэ́нгэ. 15Саро́, со исын Дадэ́стэ, исын Миро. Палдава́ Мэ пхэндём тумэ́нгэ, со Ёв Ма́ндыр уджинэла и роспхэнэ́ла тумэ́нгэ.

Смэ́тныма (Печаль) и Ра́дыма

16Сыг тумэ́ на дыкхэ́на Ман, нэ сыг тумэ́ нэвэ́стыр явэ́на тэ дыкхэ́н Ман; пал-дова́ со Мэ джа́ва кэ Дад.” 17Ада́й вари-савэ́ Лэ́скирэ сыкляибны́тка пхэндлэ́ екх екхэ́скэ: “Со дава́ Ёв ракирэ́ла амэ́нгэ: ‘Сыг тумэ́ на явэ́на тэ дыкхэ́н Ман’, а сыг тумэ́ нэвэ́с дыкхэ́на Ман, и: ‘Мэ джа́ва кэ Дад’?” 18И адя́кэ ёнэ ракирдэ́: “Со да дасаво Ёв ракирэ́ла: ‘Сыг?’ Амэ на ґалёваса, со Ёв ракирэ́ла.” 19Ису́со ґалыя́, пал со ёнэ камэ́на тэ пхучэ́н Лэ́стыр, и пхэндя́ лэ́нгэ: “Ци пал дова́ тумэ́ пхучэна екх екхэстыр, со Мэ пхэндём: ‘Со сыг тумэ́ на явэ́на тэ дыкхэ́н Ман, нэ нэвэ́стыр сыг тумэ́ дыкхэ́на Ман?’ 20Чачэс, чачэс ракира́ва Мэ тумэ́нгэ: тумэ́ явэ́на тэ ровэ́н и тэ пиридживэн, нэ свэ́то явэ́ла тэ радынэ́лпэ; тумэ́ явэ́на тэ смэнтнинэн (тэ тугинэн), нэ тумари́ смэнтныма ячэ́ла радыма́са. 21Джувлы́, ке́ли биянэ́ла, мэнчынэлапэ, пал-дова́ со явдя́ ла́киро мардо́ (шту́нда); нэ ке́ли ёй биянэ́ла тыкнорэс, бистрэла радыма́тыр пал мэ́ньки, пал-дова́ со бия́ндыя ману́ш пэ свэ́то. 22Адя́кэ-паць и тумэ́ какана́ сан смэнтна; нэ Мэ ява́ва тэ дыкха́в нэвэ́стыр тумэн, и ило́ тумаро́ явэ́ла пхэрдо́ радыма́са, дая́ ра́дыма тумэ́ндыр нико́н на отлэла. 23И дро одова́ дывэ́с тумэ́ на пхучэна Ма́ндыр ни пал со. Чачэс, чачэс Мэ ракира́ва тумэ́нгэ: пал со тумэ́ тэ на мангэ́н Дадэ́с Мирэ́ лавэ́стыр, Ёв дэ́ла тумэ́нгэ. 24Кэ дава́ часо тумэ́ нисо́ на мангнэ́ Мирэ́ лавэ́са, мангэ́н, и дорэсэ́на, соб (кай) ра́дыма дро тумаро́ ило́ тэ явэ́л пхэрды́.

Упралыпэ́н пэ Дава́ Свэ́то

25Кэ дава́ часо Мэ ракирдём тумэ́нгэ притчэнца, нэ сыг явэ́ла часо, ке́ли Мэ на ява́ва тэ ракира́в тумэ́нгэ притчы, нэ маму́й (прямэс) Мэ пхэна́ва тумэ́нгэ пал Дадэ́стэ. 26Дрэ одова́ дывэ́с тумэ́ явэ́на тэ мангэ́н Мирэ́ лавэ́стыр и Мэ на ракира́ва тумэ́нгэ, со Мэ ява́ва тэ мангав пал тумэ́ндэ Дадэ́с: 27пал-дова́ со Кокорэскэ Дадэ́скэ тумэ́ сан дро́га, пал тумари́ ла́ска кэ Мэ и пал патяибэ́н, со Мэ явдём Дэвлэ́стыр. 28Мэ явдём Дадэ́стыр дро дава́ свэ́то; и нэвэ́стыр Мэ мэкава свэ́то и джа́ва кэ Дад.” 29Лэ́скирэ сыкляибны́тка пхэндлэ́ Лэ́скэ: “Ѓа́да, какана́ Ту ракирэ́са маму́й, и Ту на ракирэ́са нисавэ притчы!” 30Какана́ амэ дыкхаса, со Ту саро́ джинэ́са англэды́р, и на трэй, соб (кай) вари-кон тэ пхучэл Ту́тыр; палдава́ амэ патя́са, со Ту явдя́н Дэвлэ́стыр.” 31Ису́со отпхэндя́ лэ́нгэ: “Какана́ тумэ́ патя́на? 32Ѓа́да, сыг подджа́ла мардо́ (шту́нда), и подги́я какана́, со тумэ́ роспрастанапэ кажно дрэ пэ́скири риг и Ман тумэ́ ячкирэна Екхэ́с; нэ Мэ на сом Екхджино́, пал-дова́ со Дад исын Ма́нца; 33ґа́да, Мэ пхэндём тумэ́нгэ, соб (кай) тумэ́ тэ явэ́н дро рама́нё Ма́нца. Дро свэ́то мэ́ньки тумэн ужакирэ́на; нэ рикирэнпэ муршканэ́с: Мэ збердындём (пиризорьякирдём) дава́ свэ́то”

Currently Selected:

Иа́но 16: ROMBALT

Highlight

Copy