Zabúr 28
28
ATHÁÍSWIṈ ZABÚR.
Is meṉ aur sattáíswín zabúr meṉ mutábaqat páí játí hai. Us meṉ Yahowáh ke sádiq aur musíbatzada bande ne yih duạ́ kí, ki un sharíroṉ se na miláyá jáe jin se us kí ján nafrat rakhtí hai, aur is meṉ Yahowáh ká Masíh usí tarah kí duạ́ kartá hai. Wuh minnat kartá kai, ki Ḳhudá merí sune aur mujhe qabúl kare; nahín, to main jald halák húngá (1, 2). Aur yih darkhwást kartá hai, ki jab Ḳhudá apní adálateṉ sharíroṉ par názil kare, tab maiṉ un se alag hokar bach jáúṉ (3—5). Use yaqín hai ki Ḳhudá merí yih duạ́ mustajáb farmáegá, aur us ke liye shukrguzárí kartá hai (6—8), aur duạ́ kartá hai ki Ḳhudá apní ummat par apní barakateṉ baḳhúbí aur hamesha názil kiyá kare (9).
Dáúd kí Zabúr.
1Ai Yahowáh, maiṉ tujhe pukárúṉgá; Ai merí chaṭán, mujh se ḳhámosh na ho, mabáda tú mujh se chup ho rahe, aur maiṉ gaṛhe meṉ girnewáloṉ ke mánind ho jáúṉ. 2Jab maiṉ terí duháí dúṉ, aur apne háth terí muqaddas bárgáh kí taraf uṭháúṉ, tab merí minnatoṉ kí áwáz sun.
3Mujhe sharíroṉ ke sáth aur badkároṉ ke sáth na khainch, jo apne hamsáyoṉ ke sáth salámatí kí báteṉ karte haiṉ, par un ke dil meṉ badí hai. 4Un ke fịl ke muwáfiq aur un ke ạmál kí buráí ke mutábiq unheṉ de, un ke háthoṉ ke kám ke muwáfiq unheṉ de; un ká sulúk unhíṉ par ulaṭ de. 5Chúṉki wuh Yahowáh ke fịloṉ aur us ke háthoṉ ke kám par dhyán na karenge, wuh unheṉ ḍháegá aur unheṉ na banáegá.
6Yahowáh mubárak ho, kyúṉki us ne merí minnatoṉ kí áwáz suní hai. 7Yahowáh mera zor aur merí sipar hai. Mere dil ne us par tawakkul kiyá, aur maiṉ ne madad páí hai, aur mera dil bág̣ bág̣ hogá, aur maiṉ apní g̣azal meṉ us kí shukrguzárí karúṉgá. 8Yahowáh un ke liye qúwat hai, aur wahí apne Masíh ke liye najátoṉ ká qalạ hai.
9Apní ummat ko naját baḳhsh, aur apní mírás ko barakat de, aur unheṉ chará, aur unheṉ tá abad balandí baḳhsh!
Currently Selected:
Zabúr 28: URDRPS
Highlight
Share
Copy
Want to have your highlights saved across all your devices? Sign up or sign in
Historical text first published in 1863, and maintained by the British and Foreign Bible Society.
