Zabúr 81
81
IKKÁSÍWÍṈ ZABÚR.
Ag̣jab hai ki yih zabúr Ị́d i Fasah ke gáne ke liye likhí gaí ho. Aur is meṉ Dáúd ká Sardár Mug̣anní Ásaf targ̣íb detá hai ki Ḳhudá kí hamd o shukrguzárí karen, is liye ki us ne apní Isráílí ummat ko Misr se rihái baḳhshí (1—7), aur Isráíl kí náshukrí par faryád kartá hai (8—12), aur kalam i dil-áwez ke sáth bayán kartá hai ki agar wuh ímándáro farmáṉbardár rahtá, to us kí ḳhushhálí har tarah se kámil o qáim rahtí (13—16).
Sardár Mug̣anní ke liye, Gittít par;#Zabúr 8 ke sarnáme ko dekho. Ásaf kí Zabúr.
1Ḳhudá ke liye, jo hamárá zor hai, tarannum karo, Yạqúb ke Ḳhudá kí taraf ḳhushi se lalkáro! 2Gít uṭháo, aur tabla bajáo, barbat i shíríṉ bín samet. 3Máh i ị́d meṉ, púranmásí meṉ, aur hamárí ị́d ke din meṉ turhí phúnko. 4Kyúṉki yih Isráíl ke liye hukm, aur Yạqúb ke Ḳhudá ká haqq hai. 5Us ne use Yúsuf meṉ gawáhí ke liye muqarrar kiyá, jab wuh zamín i Misr par se hoke niklá, jaháṉ maiṉ ne ek aisí zabán suní, jo nahíṉ jántá thá.#81:5 Yạne, Isráíl Misr meṉ kahtá thá, ki “ek aisí zabán jo main ne kabhí nahíṉ jání, maiṉ yaháṉ suntá hún.” 6Maiṉ ne us ke kándhe par se bojh utárá; us ke háth ṭokrí se ázád hote haiṉ. 7Tú ne tangí meṉ pukárá aur maiṉ ne tujhe chhuṛáyá hai; maiṉ garaj ke parde meṉ hokar tujhe jawab dúṉgá; Maríbah ke pání par tujhe ázmáúṉgá. Siláh.
8Ai merí ummat, sun, aur maiṉ tere ḳhiláf gawáhí dúṉgá; Ai Isráíl, maiṉ kalám karúṉgá, agar tú merí sunegá. 9Tere darmiyán dúsrá Qádir i Mutlaq na ho, aur tú ajnabí Qádir i Mutlaq kí parastish na kar. 10Maiṉ hí Yahowáh, tera Ḳhudá húṉ, jo tujhe zamín i Misr se nikál láyá; apná muṉh phailá, aur maiṉ use bhar dúṉgá. 11Par merí ummat merí áwáz kí shinawá na húí, aur Isráíl ne mujhe na máná. 12Aur maiṉ ne unheṉ un ke dil kí saḳhtí par chhoṛ diyá; wuh apní hí mashwaratoṉ par chalte haiṉ.
13Kásh ki merí ummat merí shinawá ho, aur Isráíl merí ráhoṉ par chaleṉ; 14to maiṉ jald un ke dushmanoṉ ko jhukáúṉgá, aur un ke satánewáloṉ par apná háth pherúṉgá. 15Yahowáh ke kína rakhnewále us se dab jáenge,#Zabúr 18:44, 66:3 ko dekho. aur un#81:15 Yạne, ummat i ḳháss ká. ká waqt abad tak rahegá. 16Aur wuh use bihtar se bihtar gehúṉ#81:16 Ịbrí meṉ gehúṉ kí chiknáí. khiláegá, aur patthar ke shahd se maiṉ tujhe ser karúṉgá.
Currently Selected:
Zabúr 81: URDRPS
Highlight
Share
Copy
Want to have your highlights saved across all your devices? Sign up or sign in
Historical text first published in 1863, and maintained by the British and Foreign Bible Society.