LUCAS 14

Jesús shuc ungushca runata alliyachishcamanta

1Shuc samana punzhapimi Jesusca mandac fariseopac huasipi micungapac yaicurca. Chaipimi caishuc fariseocunaca Jesusta ima shinapish juchanchingapac chapacurca. 2Jesuspac ñaupapica, punguillichic runami chaipi carca. 3Chaimantami Jesús mandashcacunata yachachiccunatapish, fariseocunatapish tapushpaca:

—¿Samana punzhapi ungushcata alliyachinaca allichu canga? Mana cashpaca, ¿saquinallachu canga?— nirca.

4Paicuna imata mana nicpica, Jesusca chai ungushcataca alliyachishpami cacharca. 5Chashna ruhuashpaca fariseocunataca:

—Maijan cancunapac shuc huahua, mana cashpaca shuc huagra jutcupi ucuyacpica, ¿manachu samana punzha cacpipish llucchinguichicman?— nirca.

6Chashna nicpica, imata mana ni pudircacunachu.

Bodahuan chimbapurashcamanta

7Jesús micungapac cayashcacuna punta tiyarinata mashcashpa tiyaricucta ricushpaca: 8«Bodaman canta pi cayacpi rishpaca, ama punta tiyarinapi tiyaringuichu. Pacta canta atishpa ashtahuan alli nishca runa quipata chayamucpi, 9bodayuc shamushpa: “Caimanta anchuri, paitami caipica tiyachigrini” ninman. Chashna nicpica, pingaihuanmi yangalla tiyarinapi tiyaringui. 10Ashtahuanpish canta bodaman cayacpi rishpaca, yangalla tiyarinapi tiyaringui. Chashna tiyacucpi, bodayuc shamushpa: “Uyai, cai ñaupaman tiyari” nicpica, chaipi caccunapac alli nishcami cangui. 11Maijanpish “allimi cani” nictaca, “mana allichu cangui” ningami. Maijanpish “mana allichu cani” nictaca, “allimi cangui” ningami» nirca.

12Jesusca micuiman cayac runataca:

—Micungapac cayashpaca, ama cambac ricsishcacunallata, huauquicunallata, familiacunallata, chayuc vecinocunallata cayanguichu. Pacta paicunapish canta cayashpa, can carashcamantaca cutichinman. 13Ashtahuanpish jatun micuita ruhuashpaca, huacchacunatapish, ungushcacunatapish, suchucunatapish, ñahui mana ricuccunatapish cayangui. 14Chashna mana cutichipaccunaman carashcamantaca, cushicunguimi. Chaica, cashcata ruhuaccuna causarimui punzhapimi, Diosca canmanca cutichinga— nirca.

Jatun micuihuan chimbapurashcamanta

(Mt 22.1-10)

15Mizapi Jesus-huan tiyacuccunapuramanta shuc runa chashna nicta uyashpaca:

—Pipish Dios maipi mandacucpi micungapac chayacca cushicungami— nirca.

16Chashna nicpimi, Jesusca: «Shuc runami jatun micuita ruhuashpa, achcacunata cayarca. 17Micuna horas cacpimi, paita servic runataca: “Ñami tucui allichishca, shamuichic” nichun cacharca. 18Chashna cayachun cachacpica, caita chaita ninacushpami, mana shamushun nircacuna. Shucca: “Cunanllami allpata randircani. Chaitami ricungapac ricuni. Mana ri pudinichu” nirca. 19Cutin shucca: “Ñucaca pichca yuntatami randircani. Chaicunatami yugoshpa ricugricuni. Chaimantami mana shamui pudini, perdonai” nirca. 20Cutin shucca: “Ñucaca cunanllami cazararcani. Chaimantami mana ri pudinichu” nirca.

21Chaimantami chai amo cachashca runa cutimushpaca, amoman huillarca. Chashna huillacpi, amoca yallita piñarishpaca: “Shinashpaca, plazacunapi, ñancunapi puricuc huacchacunatapish, ungushcacunatapish, suchucunatapish, ñahui mana ricuccunatapish utca cayamugri” nishpa cacharca. 22Chai quipata servic runaca: “Amito, can mandashca shinami pushamushcani. Shina cacpipish, ucupica manarac jundanchu” nirca. 23Chashna nicpimi amoca: “Shinashpaca mai callecunamantapish, ñancunamantapish pushamushpa, ñuca huasipi jundachi. 24Cancunaman ninimi: Ñaupaman cayashcacunaca, shucllapish cai micuitaca mana micungachu” nirca» nircami.

Cristota catinamanta

(Mt 10.37-38)

25Jesusca paihuan ricuc achca gentecunata ricushpaca: 26«Maijanpish ñucata catingapac shamushpa, taita mamata, huarmita, huahuacunata, huauquicunata, panicunata, quiquin causaita llaquicca mana ñuca yachacuc cai pudinchu. 27Maijanpish ñucata catingapac shamushpapish, cruzpi chacatashca shina llaquita mana apasha nicca, mana ñuca yachacuc cai pudinchu. 28¿Manachu maijan cancuna huasita shayachingapacca cullqui pactanatarac ricunguichic? 29Pacta huasita ruhuangapac rumita churashpalla saquicpica, shuccuna burlashpa asinman. 30Shina burlashpaca: “Cai runaca manapish tucuchingapacmi huasitaca callarishca” ninman. 31Maijan jatun mandac shuctac jatun mandac-huan macanacungapac chunga huaranga soldadocunallahuan cashpaca, caishuc mandacca ishcai chunga huaranga soldadocunahuan shamucucpica, manarac macanacushpami yuyarinman. 32Mana macanacuipac cashpaca, caishuc mandac manarac chayamucpimi alli tucungapac huillaccunata cachanman. 33Chashnallatac maijanpish tucui charishcacunata mana saquishpaca, mana ñuca yachacuc cai pudinchu.

Jesús cachimanta parlashcamanta

(Mt 5.13; Mr 9.50)

34Cachica allimi. Chashna cashpapish gamuyashpaca, ¿imapactac alli canga? 35Allpapi shitangapacpish, huanupi churangapacpish mana valinmanchu. Ringrita chariccunaca, caita alli uyaichic» nirca.

Currently Selected:

LUCAS 14: QCA10

Highlight

Copy