Mark 15

Jisus dʼo̩gba Pailat

1Oñ ababale̩ odudu-wñ amagboji amatama kpʼabogijo kpʼamako̩takada kpʼabo̩hiala du fʼojuju nyi; taku ma fu Jisus ji, oñ ma nʼe̩ alo adʼu ñwu Pailat. 2Pailat tʼowñ ene kakini, Uwe̩ chʼOnu amaJu? I dohi ñw u kakini, Uwe̩ aka-i. 3Oñ amagboji amatama gwʼajo̩ wewe nʼo. 4Pailat ño̩ tʼowñ ene ge̩, kakini, E̩ dohi du n? Go alu kʼe̩wñ chewewe ku ma gwunʼe̩. 5Jisus muda dohi du ge̩ n; Todabe̩le̩ Pailat kwoyaye.

6E̩gba ujeju-ucholo i te̩tatʼe̩ne̩ unyi-ugaʼka ku ma bi ugbo-wñ no̩ tane̩ ñwu ma. 7Oñ e̩ne̩ʼka do̩mo̩ kʼodu-wñ ko̩ Barabas, ma fʼu ji te̩ manyʼabo ku ma dʼane̩ utu le̩, ma chʼabo ku ma kpone̩ ef ane̩ ku ma dutu le̩. 8Tak o̩wo̩ amone̩ le̩ mute̩gu nyʼugbo-wñ, ma chane̩ ebi kʼi che alu kʼi te̩tache ñwu ma. 9Oñ Pailat dohi ñwu ma kakini, I dʼume̩ e̩do̩ kʼu natʼOnu amaJu no̩ tane̩ ñwu me̩? 10Todu i chema ka kʼi chʼutodabu ku ma lie̩na-wñ oñ amagboji amatama mʼowñ du ñw u i. 11Ama amagboji amatama ko̩nyʼo̩wo̩ amone̩ le̩ efu todu ku ma ka kʼi tu Barabas no̩ tane̩ ñwu ma. 12Taku Pailat ño̩ dohi ñwu ma kakini, Mak e̩wñ nache e̩ne̩ ku me̩ do̩ kʼOnu amaJu le̩ ke? 13Ma ño̩ kwukwa ge̩ kakini, Mʼu du kabamoli. 14Pailat muda ka ñwu ma kakini, E̩bie̩ne̩ e̩wñ i che ke̩? Ama ma ro̩wo̩ ekwa tule kakini, Mʼu du kabamoli. 15Tak abu ku Pailat neku eche e̩wñ ki nyʼo̩wo̩ amone̩ le̩ eju, i tu Barabas no̩ tane̩ ñwu ma, oñ i fu Jisus gwo, tak i mʼu du ñwu ma ku ma mʼu du kabamoli.

Amisoja che Jisus uke̩

16Oñ amisoja dʼowñ alo tef anuku, owñ che Praitorio̩n; ma fʼabudala-ma chaka do̩ wa. 17Taku ma nyi owñ otogbo odufa ekpikpa, ma la fʼikeke ta ugugu uloko, oñ ma mʼu du dʼo oji. 18Taku ma chane̩ egwʼo̩ ugwa kakini, Agba-o, Onu amaJu! 19Ma la du elikpo fiʼo̩ oji, oñ ma fito̩rʼowñ o̩la, taku ma kekunyane̩ adojikane̩ ñw u. 20Oñ e̩gba ku ma chʼo uke̩ kpa, ma mʼotogbo odufa ekpikpa le̩ gwo̩ kwʼo̩la-wñ, oñ ma mʼe̩wñ o̩la e-wñ ko nyʼo̩la-wñ. Taku ma mʼu du dufu ku ma dʼu kabamoli.

Ma du Jisus kaba mʼoli le̩

21Oñ ma gwo̩nyʼe̩ne̩ʼka kʼi kwʼoko awa lale o̩mo̩ todu kʼi ne̩ oli uku-wñ. Odu e̩ne̩ le̩ ko Saimo̩n, abo Sairini, ata Ale̩ksanda kpai Rufo̩s. 22Taku ma mʼu du wʼugbo ku ma do̩ ko̩ Go̩lgo̩ta, ku ma jʼomudechi-wñ ko̩ Uña Akokoloji. 23Oñ ma mʼomi achiwebe̩te̩ma ku mur gwe̩gwanyʼu du ñw u, i muda gba n. 24Taku ma mʼowñ du kamoli; ma la fʼe̩wñ o̩la-wñ kpe̩ ñw o̩la-ma, ma mʼu ko ato̩ko̩ ku ma ma e̩wñ kʼe̩ne̩ne̩ne̩ne̩ adu. 25Auwa e̩ke̩ta i la che, oñ ma mʼu du kamoli. 26O̩la e̩wñ ki chi ku ma dʼu kamoli ku ma ko̩ tʼugbo oji-wñ che, ONU AMAJU. 27Ma la kʼamadinya meji kamoli manyʼowñ, oka dʼo̩wo̩ awoto-wñ, oka la dʼo̩wo̩ awohi-wñ. [ 28Abe̩le̩ o̩la ki dʼef o̩takada O̩jo̩ kʼi kakini, Ma fʼu choli tʼef ame̩nugbite̩re̩ che̩.] 29Abo ku ma lale chʼakpabie̩-wñ, ma mi oji-ma ejo, ma kakini, E̩he̩! Uwe̩ ki agu unyi O̩jo̩ lo̩ kʼe̩ ñʼadabi ko̩ o̩jo̩ me̩ta, 30fʼo̩la-we̩ jadu, kwʼoj oli tane̩! 31Abe̩le̩ ge̩, amagboji amatama manyʼamako̩takada mʼowñ du tʼachʼo uke̩, ma ka ñw o̩la-ma kakini, I fʼabo ki bo̩ jadu, i neke jadu o̩la-wñ n. 32Kraist Onu Israe̩l-i ki kwʼoj oli tane̩ fa-i, todu kʼa li kʼa ke̩do̩no. Abo ku ma ko kamoli kpai owñ ño̩ kicha ñw u ge̩.

Jisus mʼiñmi da

33Oñ e̩gba kʼauwa e̩ke̩fa jo̩, ane̩ chubi chaka gbogbo tʼauwa e̩ke̩la. 34Tak e̩gba kʼauwa e̩ke̩la jo̩, Jisus dʼomu dago kwa, kakini, E̩loi, E̩loi, lama sabaktani? e-ku ma jʼomudechi-wñ kakini, O̩jo̩-mi, O̩jo̩-mi, e̩wñ chi kʼe̩ tʼumi no̩ tinyo̩-i? 35Oñ e̩gba kʼabo iche̩ka efabo ku ma dago o̩mo̩ gbʼo̩, ma kakini, Me̩ go, i ado̩ E̩laija. 36Tak e̩ne̩ʼka fule adʼugbo̩che̩ tunyʼomi achiwebe̩te̩ma e̩ka ki ñmo̩ nyʼo̩la, tak i mudu tunyʼoli ikpo, oñ i dʼu ñw u kʼi ñmo̩ kakini, To̩no̩, kʼa li abe̩k E̩laija awa kʼi dʼowñ tane̩. 37Taku Jisus fʼogu kpa, oñ i mʼiñmi da. 38Oñ ukpo ugbo̩na unyi O̩jo̩ ejefu mukpana meji kwʼate̩ gbogbowa tʼane̩. 39E̩gba kʼagboji amisoja ogume̩lu kʼi dago akpejurʼu li ka kʼi mʼiñmi da abe̩le̩, i kakini, Ochochi, e̩ne̩-i chʼO̩ma O̩jo̩.

40Abobule̩ ño̩ jʼo̩najiji ago ge̩; Me̩ri Magdalini kpai Me̩ri iye Jeme̩s kekele kpai Jose̩s kpai Salome jʼef uma, 41ama le̩ tʼowñ ubi achʼe̩wñ ñw u, e̩gba kʼi de̩ Galili; kpai abobule̩ omune̩ wewe kʼama kpai owñ kpe̩re̩ wa Je̩rusale̩m.

Ma dʼoku Jisus tef oji

42Oñ e̩gba kʼane̩ lo̩, todabu kʼi chʼO̩jo̩ Emo̩latane̩, owñ chʼo̩jo̩ kʼo̩na-wñ bo̩ o̩jo̩ uñmi, 43Jose̩f e-Arimatia lewa, kʼowñ chʼe̩ne̩ o̩hialaʼka ku ma diba ñw u, kʼowñ onugo aneju ojane̩ O̩jo̩; i fʼe̩do̩ ji anyʼugbo Pailat, oñ i bi oku Jisus. 44Awuwu-wñ la je̩ ñwu Pailat n, i neke leku e̩gba-i me̩? oñ i do̩ agboji amisoja le̩ wʼugbo-wñ, i tʼowñ ene ka kʼi leku kpo̩kpe̩ me̩? 45Tak abu kʼi ma ugbo agboji amisoja le̩, i mʼoku-wñ du ñwu Jose̩f. 46Tak i fʼukpo line̩n la, oñ i mʼowñ du wane̩, i la fʼukpo line̩n le̩ wenyʼu, tak i mʼu du dachi ef oji ku ma da ef apata; tak i fʼokuta li bʼalu oji le̩ ma. 47Oñ Me̩ri Magdalini kpai Me̩ri iye Jose̩s li ugbo ku ma dʼu dachi.

Currently Selected:

Mark 15: IGL70

Highlight

Copy