Iruo rẹ Iyinkọn na 1
1
Ive rẹ Erhi Ọfuanfon na
1Vwẹ ọbe resosuọ E Tiofilọs, ri mi si kpahe obo ri Jesu ruru kugbe obo ro yonori. 2Rhi te ẹdẹ ra vwọ reyo vwo kpo obenu, ọke ro vwọ wan oma rẹ Erhi Ọfuanfon, de ji urhi kẹ otu rẹ iyinkọn rọ jẹreyọ. 3O da vwẹ oma rọye phia kẹ ayen kere ẹdẹ ujuvẹ, o de dje kẹ ayen emu buebu rọ reoja kẹ rere ovwo se mu ayen ẹro, ode yono ayen emu buebu kpahe uvie rẹ Ọghẹnẹ. 4Re ayen rhi vwo koko asan ọvo re ọ da ta kẹ ayen nẹ ayen jowọ nẹ Jerusalẹm na-a ẹkẹvuọvo ayen gba hẹrhẹ ive rẹ Ọsẹ na, rọ tare, rẹ ovwan nyo mie vwe na. 5Fikiridie Jọn ghine vwẹ ame kẹ ihwo ẹkẹvuọvo o rhe kri tavwe rọ ke cha vwẹ Erhi Ọfuanfon họ ovwa-an.
Eyere Kpenu ri Jesu
6Ọtiọye na ọke rẹ ayen rhi vwo koko, ayen da nọ nẹ, Ọrovwohwo, ke wọ sa vwẹ uvie rẹ Izrẹl na rhivwi rhe vwẹ ọke nana? 7Ọ da ta kẹ ayen nẹ, O fori rẹ ovwan vwọ riẹn ẹdẹ na-a eyẹ ọke na-a jokpa rẹ Ọsẹ na ọvo rọ vwẹ ogangan yena kẹ oma rọye.
8Ẹkẹvuọvo ovwan che vwo ẹgba siẹ rẹ Ẹrhi Ọfuanfon na de bru ovwan rhe nu; ovwan ke cha dia iseri mẹ vwi Jerusalẹm, vwi Judia, vẹ Sameria, rhiri re te oba rẹ akpọ na. 9Rọ vwọ ta eta nana nu, rẹ ayen vwọ tẹrovio a da reyọ kpenu, egho na de rhurho. 10Rẹ ayen vwo no rọ vwọ yanran kpenu, na, nighe, ihwo ivẹ vẹ emwa efuanfon de mudia kẹrẹ ayen. 11Ayen da ta, Ihwo ri Galili, die ovwan vwo ni obenu? Jesu ọvuọvo nana, ro kpo obo odjuvwu na, ọ je rhoma cha kirobo rẹ ovwan mrẹrẹ rọ vwọ yanran kpo odjuvwu na.
A sanẹ Ohwo rẹ Royọ Ẹdia ri Judas
12Etiyin ayen de rhivwi nẹ ugbenu re se nẹ Olivẹt rhe kpo Jerusalẹm rọ kẹrẹ Jerusalẹm kerẹ oyan rẹ edidjala. 13Rẹ ayen vwọ ro orere na nu, ayen de yeri egegede na kpo ubruwevwi rẹ obenu na, etiyin kọye Pita vẹ Jọn, Jems vẹ Andru, Phihp vẹ Tọmọs, Batalomio vẹ Matiu, Jems ọmọ rẹ Alfiọs vẹ Saimọn rẹ Zilọt vẹ Judas ọmọ rẹ Jems diare. 14Enana ejobi na de kuevun kugbe nẹ ẹrhovwo, vẹ eya na vẹ Meri rẹ oni ri Jesu, vẹ iniọvọ ri Jesu rẹ eshare. 15Vwẹ ẹdẹ yena Pita de mudia uherevie rẹ imoni na unu rẹ ihwo na da dia oma rẹ ujosan, ọ da ta, 16Imoni, ọbe ọfuanfon na gbare rẹ Erhi Ọfuanfon wan unu rẹ Devid ta jovwo, kpahe Judas, ohwo rọ dia osun kẹ ayen otu ri mu Jesu. 17Kidie ekeire vwọ ba avwanre, o ji vwo ẹkẹn vwẹ odibo egbe nana. 18Asakiephana ohwo nana vwẹ erere rẹ umwemwu rọye vwọ dẹ otọ; o de she vwẹ uyovwi kotọ; ivun rọye da sarhue. 19Ihwo re dia Jerusalẹm na ejobi da riẹn; e de mu odẹ kẹ otọ na vwe ephẹrẹ rayen nẹ, Akaldama, otọ rọye otọ rẹ Ọbara. 20Kidie e siro phihọ Une rẹ Ejiro.
E jẹn ẹdia rọye dia ofefe,
E jẹn ohwo ọvuọvo dia-a,
E jẹn ohwo ọfa reyọ ẹkẹn iruo rọye. 21Ọtiọye na vwẹ ohri rẹ ihwo nana re vẹ avwanre gba herọ notọrhe na nẹ ọke rẹ Ọrovwavwanre Jesu vẹ avwanre vwọ yacha yakpo, 22nẹ ẹtuohọ rẹ ame–ereyọ ri Jọn–bẹsiẹ ra vwọ reyọ kpo odjuvwu jẹ avwanre vwo na, re je herọ rhi te nonẹ na, a gba reyọ ohwo ọvo vwẹ usun rayen na rere o nene avwanre se oseri rẹ evrẹnushi rọye na. 23Ayen da reyọ ihwo ivẹ phihọ obaro, Josẹf re se Basahas, odẹ re ke se jovwo Jọstọs, kugbe Matayas. 24Ayen da nẹ ẹrhovwo ta nẹ Ọrovwohwo, ọ rọ riẹn udu rẹ ihwo ejobi na, gba jẹ ohwo ọvo reyọ vwẹ usun rẹ ihwo ivẹ nana, 25rere ọ reyọ ẹdia rẹ odibo kugbe irueru rẹ ọyinkọn na, ri Judas she nu na rere o kpo ẹdia rọye. 26Ayen de duvwu ite kẹ ayen, itẹ na de mu Matayas; e de vwo mu kugbe iyinkọn uhwọvo na.
Currently Selected:
Iruo rẹ Iyinkọn na 1: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
