Iruo rẹ Iyinkọn na 6
6
Ẹsano rẹ Ihwo Ighwrẹ na
1Asakiephana rẹ idibo na vwo buẹ phihọ re, etiyin omaẹfẹnẹ da hẹ ohri ri Ju re jẹ Grik kugbe ihwo ri Hibru, ayen ki guẹ ihwo ri Hibru na ẹdjọuyovwi fiki rẹ eyauku rayen ra ghara emuọre gbọ kẹdẹ kẹdẹ. 2Ihwivẹ na de se idibo na ẹguare e da ta, o rhe fo ra vwọ gharẹ emuọre jẹ eghwoghwo rẹ Ota rẹ Ọghẹnẹ vwo-o. 3Eriyin na imoni, ovwan sanọ ihwo vwẹ ohri rẹ ovwan na, emamọ rẹ eshare ighwrẹ, ri vwo Erhi na kugbe ọhọ rere a vwẹ ayen mu phihọ iruo nana. 4Rere avwanre ruiruo rẹ ẹrhovwo kugbe eghwoghwo rẹ ota na. 5Ota na rẹ ayen tare na da vwerhe ihwo na ejobi evun, etiyin ayen da jẹ Stivin, ohwo rọ vọnre vẹ esegbuyota kugbe Erhi Ọfuanfon, kugbe Filip, kugbe Prokorọs, kugbe Nikanọ, kugbe Tamọni, kugbe Pamenas, kugbe Nikolas, ohwo rẹ Antiọk ro kurhẹriẹ. 6Ayen da vwẹ ihwo na rhe obaro rẹ iyinkọn na, ayen da nẹ ẹrhovwo ghwẹ abọ rayen kpahe ihwo na.
7Ota rẹ Ọghẹnẹ na da hẹre phihọ, unu rẹ idibo na de rhi buphihọ vwi Jerusalẹm, irherẹn na buebu da rhọvwe esegbuyota na.
Emuo ri Stivin
8Ri Stivin, rhe vwọ vọn vẹ ẹserọphẹ vẹ ogangan, o de ruiruo rẹ eka kugbe igbunu ride vwẹ ohri rẹ ihwo na. 9Ẹkẹvuọvo otu evo rẹ sinegọg rẹ Egbomọphẹ (kerẹ odẹ re mu kẹ), kugbe ihwo rẹ Saerini, kugbe Alẹzanda, kugbe ayen otu ri nẹ Silisha vẹ Esha rhe, ayen de rhi nene Stivin phraphro. 10Ẹkẹvuọvo udu rẹ ayen sa gba aghwanre kugbe Erhi rọ vwọ ta ota na-a. 11Etiyin ayen da bẹdẹ riẹriẹ ihwo evo kpahọ re ta nẹ, Avwanre nyoro rọ vwọ ta ota rẹ ophọphọvwe kpahe Mosis kugbe Ọghẹnẹ. 12Eriyin na ayen da kpare ophu rẹ ihwo na kugbe ekpako na kugbe isiẹbe na, ayen de shabọ phihọ ayen de muo rhe ẹguare, 13ayen de se iseri rẹ efian hwe nẹ, kọke kọke ọye ohwo nana vwọ ta eta kpahe asan ọfuanfon nana kugbe urhi na. 14Kidie avwanre nyori rọ vwọ ta nẹ, Jesu ri Nazarẹt na cha guọghọ asan nana, o mi rhe wene uruemu ri Mosis vwọ kẹ avwanre na. 15Ọke rẹ ihwo na ejobi ri tidia ẹguare na vwọ tẹrovio, ayen ejobi ri tidia ẹguare na da mrẹ opharo rọye kerẹ opharo rẹ amakashe.
Currently Selected:
Iruo rẹ Iyinkọn na 6: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
