Jẹnẹsis 23

Ughwu ri Sera. Ebraham dẹ otọ re Shiro phihọ

1Sera tọnre ọ da dia akpọ ikpe ujosa gbẹ ighwrẹ, ena kọye ikpe ri Sera. 2Sera de ghwu vwi Kiriatharba (kọye Hebrọn) vwẹ otọ ri Kenan. Ebraham de vweri Sera ọ da viẹ kẹ. 3Ebraham de vrẹn nẹ asan orivwi na, o da ta kẹ ihwo ri Hẹt na, 4Mẹvwẹ ọrharha ro won ovwan, wa kẹ vwẹ otọ vwẹ ọgbẹ rẹ ovwan na, rere mi shi orivwi mẹ phihọ. 5Ihwo ri Hẹt na da kpahe kẹ Ebraham, 6Nyo avwanre, ọrovwavwanre; wẹ ọgba kugbe ovwiodje vwẹ ohri rẹ avwanre. Shi orivwi wẹn vwẹ ushi ro Me yovwi vwẹ ọgbọ na, ohwo rọ se kẹ wẹ herọ-ọ eyẹ ohwo sa kpọ wẹ unu-u. 7Ebraham de vrẹn o de diguẹ kẹ ihwo ri Hẹt na, re dia ihwo rẹ otọ na. 8Ọ da ta kẹ ayen, Ovwan da rhọvwe nẹ mi shi orivwi mẹ na nẹ obaro mẹ, wa gba kerhọ, re ovwan rẹ Efrọn rẹ ọmọ ri Zohar, 9rere ọ kẹ vwẹ ẹmwa ri Mak-pela ro rhere na; ọ he obo oba rẹ otọ na. Uchunu ro muru ejobi e jo se vwẹ irharo rẹ ovwan re Me hwa, rọ dia ẹkẹn rẹ ogbe. 10Ọke yena yi Efrọn tidia vwẹ ohri rẹ ihwo ri Hẹt na, Efrọn rẹ ohwo ri Hẹt na da kpahe kẹ Ebraham vwẹ irharo rẹ ihwo ri Hẹt ejobi, vwẹ obọ rẹ ihwo ri kpo ughere rẹ orere na, 11Ẹjo, ọrovwovwe, kerhọ mọ; Me kẹ wẹ otọ na, Me je kẹ wẹ ẹmwa rọ herọ, vwẹ irharo rẹ emọ rẹ ihwo mẹ mi de siobọ no kẹ wẹ, shi orivwi wẹn phihọ. 12Etiyin Ebraham de shiguẹ otọ kẹ ihwo rẹ otọ na. 13Ebraham da ta kẹ Efrọn vwẹ irharo rẹ ihwo rẹ otọ na, Ẹkẹvuọvo odẹ je we, gba kerhọ mẹ, Me hwa unu rẹ igho rẹ otọ na muru kẹ wẹ; reyọ mie vwe, rere mi shi orivwi mẹ vwọ Etiyin. 14Efrọn da kpahe kẹ Ebraham, 15Ọrovwovwe, kerhọ mẹ, ubrotọ ra shẹre shẹkẹl uri ivẹ rẹ idọnọ efuanfon, kidie ọyena firi vwẹ uvwre mẹ vẹ owẹ? Shi orivwi wẹn phihọ 16Ebraham vẹ Efrọn da rhọvwe kugbe; Ebraham da vwavwe idọnọ efuanfon na kẹ Efrọn uchunu ro seri na vwẹ irharo rẹ ihwo ri Hẹt na, shẹkẹl uri ivẹ rẹ idọnọ efuanfon, kiri unu rẹ ineki vwanvwa ọke yena.

17Ọtiọye na otọ ri Efrọn rọ i Mak-pela, rọ obọrhe ri Mamre, otọ na kugbe ẹmwa rọ herọ, kugbe irhe rẹ otọ na ejobi, o de siobọ no, 18kẹ Ebraham rọ dia ẹkẹn rọye vwẹ irharo rẹ ihwo ri Hẹt na, kugbe ihwo rẹ orere na re rhe ughere na ejobi. 19Re enana ejobi vwọ wan nu, Ebraham de shi Sera rẹ aye rọye phihọ ẹmwa rọ otọ ri Mak-pela, vwẹ obọrhe ri Mamre (kọye Hebrọn) vwẹ otọ ri Kenan. 20Te otọ na kugbe ẹmwa rọ herọ ke siobọ no kẹ Ebraham rọ dia ẹkẹn rẹ ogbẹ, re ihwo ri Hẹt vwọ kẹ.

Currently Selected:

Jẹnẹsis 23: UBV77

Highlight

Copy