Jẹnẹsis 26

Aizik vwi Gẹra kugbe Bẹẹrsheba

1Asakiephana owẹvwe de rhi fi vwẹ otọ na, rọ rho nọ owẹvwe ro firi vwẹ ọke rẹ Ebraham. Aizik de kpo Gẹra, bru Abimẹlẹk ovie ri Filistia. 2Orvwohwo da vwẹ oma phia kẹ, ọ da ta, Wo kpo Ijipti-i; dia otọ re Me ta kẹ wẹ na. 3Dia ukane wẹn vwe otọ nana, ki mi nene uwe dia, ki mi bruba kẹ wẹ; kidie vwọ kẹ wẹ vẹ uvwiẹ wẹn Me cha vwẹ etọ nana kẹ, ki mi ru ive ri mi veri kẹ Ebraham rẹ ọsẹ wẹn gba. 4Ki mi ru uvwiẹ wẹn bu kiri isio ri obenu, ke Me vwẹ etọ nana ejobi na vwọ kẹ uvwiẹ wẹn; vwẹ oma rẹ uvwiẹ wẹn ọye ẹgborho rẹ akpọ na ejobi de vwo ebruphihọ kẹ oma rayen: 5fikiridie Ebraham mu ọghọ kẹ urhuru mẹ, iji mẹ, kugbe ẹgha mẹ, kugbe irhi Me.

6Kọye Aizik da dia Gẹra. 7Ọke rẹ ihwo rẹ asan na vwọ nọ ekpẹn rẹ aye rọye, ọ da ta, Oniọvo mẹ oruẹ; kidie oshọ muro rọ vwọ ta nẹ, Aye mẹ, ko roro nẹ ihwo rẹ asan na che hwe ọye fiki ri Rebeka, kidie oyovwiri gangan. 8Rọ vwọ dia Etiyin krekri re, Abimẹlẹk ovie ri Filistia vwo nẹ evakpo ọ da mrẹ Aizik rọ vẹ Rebeka bẹnẹ. 9Etiyin Abimẹlẹk de se Aizik, ọ da ta, Nighe, aye wẹn oruẹ, komavọ wọ rha vwọ tanẹ oniọvo mẹ? Aizik da ta kẹ, Kidie mi rori nẹ, e che hwe vwe fiki rọye. 10Abimẹlẹk da ta, Ọna didi emu wo ru avwanre na? Ọ dianẹ kẹ ọvo vwẹ usu rẹ avwanre na vwẹ oma te, yọ nẹrhẹ avwanre riabe. 11Kọye Abimẹlẹk da kpa okpa kẹ ihwo rọye, tanẹ, Kohwo kohwo rọ vwẹ obo te aye rọye ko ghwu.

12Aizik de voro udju ukpe yena vwẹ otọ na, o de vun ujori. Ọrovwohwo de bruphihọ kẹ, 13ohwo na de rhi fe, efe na kẹ ebuebuo bẹsiẹ rọ ke rhe dia ọdafe rode. 14O de vwo uchuru vẹ eranvwe buebu, kugbe ikru, ihwo ri Filistia na ke rioma kpahọ. 15(Vwẹ ọke nana ihwo ri Filistia de gbe erhare ejobi rẹ idibo rẹ ọsẹ rọye tọnre vwẹ ọke rẹ Ebraham ọsẹ rọye.) 16Abimẹlẹk da ta kẹ Aizik, Kpo nẹ orho rẹ avwanre, kidie wọ goma nọ avwanre.

17Etiyin Aizik de vrẹn nẹ Etiyin, o de mu erhọn phihọ ushekpotọ ri Gẹra kẹ Etiyin ọ diare. 18Aizik da rhoma tọn erhare ra tọnre vwẹ ọke rẹ Ebraham ọsẹ rọye, fikiridie ihwo ri Filistia gbe ayen vwẹ ọke rẹ Ebraham vwo ghwu nu, o de mu edẹ rẹ ọsẹ rọye mu kẹ ayen jovwo na kẹ ayen. 19Ẹkẹvuọvo ọke rẹ idibo rẹ Aizik vwọ tọn ushekpotọ na ayen da mrẹ orhare rẹ ogbugbu rẹ ame, 20isuigodẹ rẹ ihwo ri Gẹra vẹ erẹ Aizik ke ghwọ, tanẹ, Ame na ọ rẹ avwanre. Kọye o de se odẹ rẹ orhare na Esek, kidie ayen ghwọ gbe. 21Ayen da tọn ọfa ayen da je ghwọ gbe; Etiyin o de se odẹ Sitnah. 22O de vrẹn nẹ Etiyin ọ da ra tọn orhare ọfa, ayen gbe ghwọ vwẹ ọyena-a, Etiyin o de se odẹ rọye Rehobọth, tanẹ, Fikiridie Ọrovwohwo kẹ avwanre asan dia, otọ na ko yovwi kẹ avwanre.

23O vrẹn nẹ Etiyin ọ da yan kpo Bẹẹrsheba. 24Ọrovwohwo da vwẹ oma phia kẹ vwẹ ason yena ọ da ta, Mẹvwẹ Ọghẹnẹ rẹ Ebraham rẹ ọsẹ wẹn, wọ djoshọ-ọ, kidie Me vẹ owẹ herọ ki mi bruphihọ kẹ wẹ uvwiẹ wẹn ko bu phihọ fiki rẹ odibo mẹ Ebraham. 25Etiyin ọ da so agbada o de se odẹ rẹ Ọrovwohwo, ọ da ghwa fa ọko phihọ Etiyin. Idibo rẹ Aizik da tọn orhare vwọ asan na.

Aizik vẹ Abimẹlẹk kuoma gbe

26Abimẹlẹk da yan ni Gẹra bro ra ọ vẹ Ahuzath re ọbuiroro rọye kugbe Fikol rẹ onotu rẹ ofovwi rọye. 27Aizik da ta kẹ, Die wo rhe vwo bru rhire, yẹ ivun mẹ vwerha owẹ-ẹ, wọ ke rha djẹ vwẹ nẹ oma? 28Ayen da ta, Avwanre mrẹre phẹphẹ nẹ Ọrovwohwo vẹ owẹ herọ, kọye avwanre vwọ tanẹ, e jẹ avwanre duvwu iyori kẹ oma, rere avwanre vẹ owẹ re ọphọ, 29nẹ wo kpokpo avwanre-e, kirobo rẹ avwanre vwẹ obọ te we-e, Me ji ru we emuọvo-o jokpa rẹ uyoyovwi avwanre ki rhe siobọ nẹ uwe kpo egberhẹnẹdẹ. Asakiephana wẹ kẹ ohwo rẹ Ọrovwohwo bruphihọ kẹ. 30O de chere emu kẹ ayen, ayen da re ayen da da. 31Irhiọke ride ayen de vrẹn ayen da re ọphọ; Aizik de siobọ nẹ ayen, ayen de kpo egberhẹnẹdẹ. 32Ẹdẹ yena vuọvo na idibo rẹ Aizik da rhe vuẹ kpahe orhare rẹ ayen tọnre, ayen da ta ke, Avwanre mrẹ ame re. 33O de se Shibah, fiki rẹ ọtiọye na e de se odẹ rẹ orere na Bẹẹrsheba rhi te nonẹ na.

34Ọke rẹ Isọ vwo te ikpe ujuvẹ re, ọ da reyọ aye re se Judith rẹ ọmọ ri Beeri rẹ ohwo ri Hẹt vwọ rọvwọ, kugbe Basemath ọmọtẹ rẹ Elọn rẹ ohwo ri Hẹt, 35ayen da lagha Aizik kugbe Rebeka gangan.

Currently Selected:

Jẹnẹsis 26: UBV77

Highlight

Copy