Jẹnẹsis 29

Jekọp ga Ẹga ri Rachel kugbe Leah ke Laban

1Etiyin Jekọp de mu oyan rọye phihọ, o de rhi te otọ rẹ ihwo rẹ ọnre da vacha 2Rọ vwọ kpare opharo, ọ da mrẹ orhare vwẹ evun rẹ ẹghwa, o vwo ni, ekru rẹ igodẹ erha rhuẹn kẹrẹ; kidie ame rẹ orhare na ọye igodẹ na da. Oragha rọ unu rọye na pha rhuarho, 3ọke rẹ ekru rẹ uchuru na rhi vwo si koko, isuigodẹ na ki ghorie oragha na nẹ unu rẹ orhare na, igodẹ na ke da ame, ayen, Me rha vwẹ oragha na rhurhu unu rẹ orhare na.

4Jekọp da ta kẹ ayen, Iniọvo mẹ, tivọ we nurhe? Ayen da ta, Haran avwanre nurhe. 5Ọ da ta kẹ ayen, Ovwan riẹn Laban rẹ ọmọ ri Nahọr? Ayen da ta, Avwanre riẹnrẹ. 6Ọ da ta kẹ ayen, Oma rọye dori? Ayen da ta, O dori; nighere, Rachel rẹ ọmọtẹ rọye vẹ igodẹ re gba yan usun cha na; 7Ọ da ta, Nighe, ọke je herọ, o ji te ọke re vwo si eranvwe koko-o, jẹ igodẹ na da ame, rere wọ vwẹ ayen yanran ra re odi. 8Ẹkẹvuọvo ayen da ta, Avwanre sa yanran jokpa nẹ igodẹ na ejobi kokori, re de rhe ghorie ubioragha na nẹ unu rẹ orhare na; tavwe igodẹ na ke da ame.

9Rọ je vwọ ta ota na kẹ ayen na, Rachel vẹ igodẹ rẹ ọsẹ rọye da yan rhe, fikiridie ọye re sẹro rẹ ayen. 10Ọke ri Jekọp vwọ mrẹ Rachel rẹ ọmọtẹ ri Laban rẹ oniọvo rẹ oni rọye, kugbe igodẹ ri Laban rẹ oniọvo rẹ oni rọye, Jekọp da yanran re ghorie oragha na nẹ unu rẹ orhare na, ọ da vwẹ ame kẹ igodẹ ri Laban oniọvo rẹ oni rọye da. 11Etiyin Jekọp da fiọnfiọn unu ri Rachel, ọ da viẹ phia. 12Jekọp da ta ki Rachel nẹ ọye omoni rẹ ọsẹ rọye, nẹ ọye ọmọ ri Rebeka; o de ghwe vrẹn ra vuẹ ọsẹ rọye.

13Ọke ri Laban vwo nyo ikun ri Jekọp ọmọ rẹ oniọvo rọye, ọ da djẹ ra vwa, ọ da gbanọ, ọ da fiọnfiọn unu, ọ da reyọ kpo uwevwi rọye Jekọp de gbe ikun nana ejobi ki Laban. 14Laban da ta kẹ, Omuẹro wẹ ubeku rẹ oma mẹ kugbe uvwo rẹ oma mẹ; Ọ da dia uwevwi rọye emeravwe ọvo.

15Etiyin Laban da ta ki Jekọp, fikiridie wọ vwọ omoni mẹ na, ku wọ de ga vwẹ ọphọphẹ? Ta kẹ vwẹ, bro osa Me hwa kẹ wẹ? 16Vwẹ ọke yena Laban vwo emetẹ ivẹ, odẹ rẹ oro ọkpako Leah, odẹ rẹ ọro otete ki Rachel. 17Ibiẹro ri Leah pha rhukpu rhukpu, ẹkẹvuọvo ọ ri Rachel pha sasasa yoyovwi. 18Rachel kọye je Jekọp; ọ da ta, Me ga we ikpe ighwrẹ fiki ri Rachel rẹ ọmọtẹ wẹn rẹ otete na; 19Laban da ta, Ofori re Me vwọ kẹ wẹ nọ ọ re Me da vwọ kẹ ohwo ọfa; nene uvwe dia. 20Etiyin Jekọp da ga ẹga ikpe ighwrẹ fiki ri Rachel, e da họhọ ẹdẹ tutuno vwọ kẹ kidie o jere gangan.

21Etiyin Jekọp da ta ki Laban, Kẹ vwẹ aye mẹ rere Me vẹ ọye vwerhẹ, kidie ẹdẹ na gbare. 22Laban de se ihwo rẹ asan na koko, o de chere emu kẹ ayen. 23Ẹkẹvuọvo rẹ ovwọnvwọn vwo te ọ da reyọ Leah o de suo rhe Jekọp, o de bro kpo ovwerhẹ. 24(Laban da vwẹ ayeobọ rọye Milkah vwọ kẹ Leah ro nene dia). 25Vwẹ irhiọke, o vwo ni, ki Leah, Jekọp da ta kẹ Laban, Ọna didi emu wo ru kẹ vwẹ na? O dia fiki ri Rachel Me vwọ ga wẹ? Komavọ wọ rha vwọ phiẹn vwẹ? 26Laban da ta, E ruẹ ọtiọye vwẹ orho rẹ avwanre-e, a ka vwẹ omotete brọgọ je ọkpako otọ-ọ. 27Ru ẹdẹ rẹ ọna gba, avwanre kẹ vwẹ ọrivẹ na kẹ wẹ wọ da ga vwẹ ikpe ighwrẹ efa. 28Jekọp de ghine ru ọtiọye, o de ru ẹdẹ na gba, Etiyin Laban da vwi Rachel kẹ vwọ rọvwọ 29(Laban da vwẹ ayeobọ rọye Bilhah vwọ kẹ Rachel rẹ ọmọtẹ rọye). 30Kọye Jekọp de bru Rachel kpo ovwerhẹ, ivun ri Rachel da vwerhọ vwọ nọ Leah, ọ da rhoma ga Laban ikpe ighwrẹ efa.

Emọ ri Jekọp vwiẹri

31Ọke rẹ Ọrovwohwo vwọ mrẹ nẹ ivun ri Leah sa vwerhe Jekọp te-e, o de rhie urhoro rẹ emọ kẹ, ẹkẹvuọvo Rachel kẹ ẹga. 32Leah da mrevun o de vwiẹ ọmọshare o de se odẹ rọye Rubẹn kidie ọ tare nẹ, Ọrovwohwo mrẹ olagha mẹ, omuẹro ivun mẹ kọ vwerhe ọshare mẹ. 33Ọ da rhoma mrevun o de vwiẹ ọmọshare, ọ da ta, kidie Ọrovwohwo nyori ni mi tuoma, ọye ọ vwọ rhoma kẹ vwẹ ọmọshare; o de se odẹ rọye Simiọn. 34Ọ da rhoma mrevun ọfa o de vwiẹ ọmọshare, ọ da ta, Kẹ etinẹ yanran ọshare mẹ kọ vwẹ oma te vwe, kidie mi vwiẹ emeshare erha kẹ re, ọtiọye na o de se odẹ rọye Livae. 35Ọ rhoma mrevun o de vwiẹ ọmọshare, ọ da ta, Vwẹ ọke nana ki mi jiri Ọrovwohwo; fiki rẹ ọtiọye na o de se odẹ rọye Juda, o de bru uvwiẹ.

Currently Selected:

Jẹnẹsis 29: UBV77

Highlight

Copy