Jẹnẹsis 31

Jekọp dje ne asan ri Laban

1Vwẹ ọke yena Jekọp de nyo rẹ emọ ri Laban vwọ tanẹ, Jekọp ghwe eyere rẹ ọsẹ rẹ avwanre reyọ, eyere rẹ ọsẹ rẹ avwanre na kọye o vwo fe na. 2Jekọp ke rha mrẹ vughe nẹ ivun rọye gbe rha vwerhe Laban kiri ọke rẹ ẹsosuọ-ọ. 3Ọrovwohwo da ta ki Jekọp, Rhivwi kpo otọ rẹ ọsẹ wẹn bru uvwiẹ wẹn, ki mi nene uwe dia. 4Jekọp de ji ikọ re se Rachel vi Leah rhe obo ẹghwa ro de churu eranvwe na, 5ọ da ta kẹ ayen, Ivun mẹ gbe sa vwerhe ọsẹ rẹ ovwan kirobo ri jovwo-o. Ẹkẹvuọvo Ọghẹnẹ rẹ ọsẹ mẹ na vẹ ovwẹ herọ. 6Wa riẹnre nẹ ogangan mẹ ejobi Me vwọ ga ọsẹ wẹn, 7yẹ ẹkẹvuọvo ọsẹ wẹn ghwa vwẹ re o de wene osa mẹ asiehwe; yẹ Ọghẹnẹ rhọvwere nẹ ọwavwẹ oma-a. 8Ọ da dianẹ ọ tare nẹ, Igodẹ ri kerẹ ipe eye osa wẹn, igodẹ na ejobi mi vwiẹ iri kere ipe; ọ da rha tanẹ, Iri vẹ irhiẹ eye dia osa wẹn; igodẹ na ejobi mi rhe vwiẹ iri vẹ irhiẹ. 9Etiọye na Ọghẹnẹ vwọ reyọ uchuru rẹ ọsẹ wẹn ọ da vwẹ ayen kẹ vwẹ. 10Ọke rẹ uchuru vwọ gba Me da vwerhẹ evwerhẹ mi vwo ni, Me da mrẹ ẹkpro rọ ruọ uchuru na, ẹvo vẹ irhiẹ, ẹvo vẹ ipe ẹvo pha bule bule. 11Etiyin amakashe rẹ Ọghẹnẹ da ta kẹ vwẹ vwẹ evwerhẹ na, Jekọp, mi de nyo nẹ, Mẹvwẹ na. 12Ọ da ta, Kpare opharo rere wo ni, ẹkpro na ejobi re ruọ uchuru na e bẹrẹ irhiẹ, i kere ipe, ẹvo bule bule, kidie Me mrẹ obo ri Laban ru we. 13Mẹvwẹ Ọghẹnẹ ri Bẹtẹl, asan wọ da vwẹ evwri ghworo oragha re vwo vi na kugbe asan ri wo de vẹ ive kẹ vwẹ na. Gbe vrẹn vwẹ ọke na, ri wo rhivwi kpo nẹ otọ na, re wo kpo otọ re de vwiẹ wẹn. 14Etiyin Rachel vi Leah da kpahe kẹ, Ẹkẹn ọfa eyẹ uku ji chekọ kẹ avwanre vwẹ uwevwi rẹ ọsẹ rẹ avwanre? 15Ọ dianẹ avwanre họhọ ọrharha vwọ kẹ? Fikiridie ọ shẹ avwanre nure ọ ke je re igho rẹ avwanre nure. 16Ekuakua ejobi rẹ Ọghẹnẹ reyọ mie ọsẹ rẹ avwanre kẹ e rẹ avwanre vẹ emọ rẹ avwanre, Asakiephana kemu kemu rẹ Ọghẹnẹ ta kẹ wẹ, ọye wo ru.

17Etiyin Jekọp de vrẹn, o de mu emọ rọye kugbe eya rọye phihọ enu rẹ iyesi; 18ọ da djẹ uchuru rọye phihọ obaro, kugbe eranvwe ro vwori ejobi, uchuru ro vwori vwi Padanaram, rere o kpo otọ ri Kenan bru Aizik rẹ ọsẹ rọye ra. 19Laban yanran kpo ẹghwa ra bọrọ ẹto rẹ igegede, Rachel de cho oma rọ umukpe rẹ ọsẹ rọye. 20Jekọp de reghe Laban rẹ ohwo rẹ Aram, kidie ọ ta kẹ nẹ ọye cha djẹ-ẹ. 21Ọ da bẹbẹ djẹ vi kemu kemu ro vwori ejobi, o de vrẹn ọ da sa urhie ri Yufratis mu, ọ da tọn opharo vi ugbenu rẹ orere ri Giliad.

Laban vwọ tua Jekọp

22Ọke ra vwọ vuẹ Laban vwẹ ẹdẹ rẹ erha nẹ Jekọp djẹre, 23ọ da reyọ imoni rọye ọ da vwọ tua ẹdẹ ighwrẹ soso kpata kpata ra ro orere rẹ igbenu ri Giliad. 24Ẹkẹvuọvo Ọghẹnẹ de bru Laban ohwo rẹ Aram na rhe vwẹ evwerhẹ vwẹ ason, ọ da ta kẹ, Jomaotọ, wo biko kpahe ota ki Jekọp rẹẹ, oyovwiri eyẹ omiovwiri. 25Laban da yan mu Jekọp. Ọke yena Jekọp chivwi aphiana phihọ enu rẹ ugbenu, Laban vẹ imoni rọye de muerhọ phihọ enu rẹ ugbenu ri Giliad.

26Laban de ta ki Jekọp, Didi emu wo ruru na, ru wọ vwọ ghwa vwẹ re, ru wo vwo mu emetẹ mẹ kpo kiri ighuvwu re mu vwẹ ofovwi? 27Die wọ vwọ bẹbẹ djẹ, wọ vwọ ghwa vwẹ re, ru wo vwo ju vwe ẹvuẹ, rere Me heha kẹ wẹ vẹ ekpata kugbe isoroguun? 28Kidie wo gbi ju vwe fiọnfiọn emọ mẹ unu rere mi yere ayen kẹdẹfa-a? Wo ru emu rẹ ẹkpa gangan. 29Ogangan rhe vwe mi vwo ru we ghwaghwa; ẹkẹvuọvo Ọghẹnẹ rẹ ọsẹ wẹn ọye vuẹ vwẹ vwẹ ason na, nẹ, Jomaotọ wọ ta ota oyoyovwi eyẹ ọbrabra ki Jekọpu-u. 30Asakiephana wo ro kpo fikiridie urhuru rẹ uwevwi rẹ ọsẹ wẹn si we, ẹkẹvuọvo kidie wo rhe vwo cho ẹdjọ mẹ? 31Jekọp da kpahe ki Laban, Kidie oshọ mu vwe, ki mi rori nẹ wọ cha vwẹ ẹgba reyọ emetẹ wẹn mie vwe. 32Obọ ri kohwo kohwo ru wọ da mrẹ ẹdjọ wẹn na ko ghwu phihọ. Irharo rẹ imoni wẹn na vwẹ obọ te emu wo rori nẹ ọwẹn, rere wọ reyọ. Vwẹ ọke yena Jekọp riẹnre nẹ Rachel choro-o.

33Etiyin Laban da ro utughẹ ri Jekọp, ọ da ro utughẹ ri Leah, kugbe utughẹ rẹ ayeobọ ivẹ na, ẹkẹvuọvo ọ mrẹ aye-en. O de vrẹn nẹ utughẹ ri Leah ọ da ro utughẹ ri Rachel. 34Yi Rachel ghine, reyọ oma rọ umukpe rẹ ọsẹ rọye o de sionu vwẹ ekoso rẹ iyesi rọye o de tidia botọ Laban da vwẹ obọ gbe ekuakua rẹ uwevwi na ejobi, jọ mrẹrẹ-ẹ. 35Ọ da ta kẹ ọsẹ rọye nẹ, Wo jẹ ivun miovwo ọrovwovwe ri mi vwo je vrẹ-ẹn, kidie idjerhe rẹ eya na ra nyẹ vwẹ. Kọye ọ da guọnọ, ẹkẹvuọvo ọ sa mrẹ oma rọ umukpe rọye na-a.

36Etiyin ivun de rhi miovwo Jekọp, ọ da ghwo ku Laban, Jekọp da ta ki Laban, Didi ogbeku wọ mrẹ vwẹ obọ mẹ? Ọ rhọ umwemwu mẹ, ru wọ vwọ tua vwẹ? 37Dede na wọ hra uwevwi mẹ ejobi re, ki didi ekuakua wẹn wọ mrẹre vwẹ uwevwi mẹ? Gba vwọ phia kẹ imoni wẹn kugbe imoni mẹ rere ayen brorhiẹ mẹ vẹ ọwẹn. 38Ikpe uje soso Me vẹ ọwẹn vwọ herọ re, ogodẹ wẹn eyẹ ẹvwe wẹn ji vwiẹ chọra-a, mi ji hwe egbo rẹ uchuru wẹn ree. 39Ogodẹ rẹ eranvwe hweri mi vwo rhe we-e, Me hwa osa rọye kẹ wẹn, eranvwe re chori ason eyẹ uvo obọ mẹ wọ da nọ ekpẹn rọye. 40Kẹ ọtiọye mi epha, uvo mu vwe kẹdẹ kẹdẹ, ekpae kason kason, ovwerhẹ rẹ obọ mẹ da mrẹ vwẹ djẹ 41Ikpe uje soso nana Me dia uwevwi wẹn, Me ga wẹn ikpe ihwẹne fiki rẹ emetẹ wẹn ivẹ; ikpe esan fiki rẹ uchuru wẹn, wo de wene osa mẹ abọ ihwe soso. 42Ọ dianẹ kẹ Ọghẹnẹ rẹ ọsẹ mẹ, Ọghẹnẹ rẹ Ebraham kugbe oshọ rẹ Aizik nene uvwe dia vwo-o, yo muẹro nẹ abọ ofefe wa vwọ djẹ vwẹ kpọ, Ọghẹnẹ mrẹ oma elaghọ mẹ kugbe owian rẹ abọ mẹ, ọ da ghwọ ku we ason rọ wanre na.

Jekọp vẹ Laban rhi Kuoma gbe

43Laban de nyo ọ da kpahe ki Jekọp; Emetẹ na emọmẹọ, emọ rayen na emọ mẹ, uchuru na ji emẹ rhe, emu ejobi ru wọ mrẹ na emẹ. Ẹkẹvuọvo kidie mi se ru nonẹ na vwọ kẹ emetẹ mẹ na, eyẹ vwọ kẹ emọ rayen vwiẹri? 44Yanrhe, rere Me vẹ owẹ rẹ ọphọ, mẹvwẹ kugbe owẹ, rere ọ dia iseri kẹ vwẹ vẹ owẹ 45Etiyin Jekọp da reyọ ubioragha o de muo vi goro. 46Jekọp da ta ke ihwo rọye, Wa ghwẹ ibieragha, ayen da ghwẹ ibieragha na, ayen da ma ayen osusu na. 47Laban de se Jegarsahadutha. ẹkẹvuọvo Jekọp de rhe se Galeed. 48Laban da ta, Osusu nana ri goro na ọye iseri kẹ vwẹ vẹ owẹ nonẹ na. Fiki rẹ ọtiọye na o de se Galeed, 49Osusu na ki Mizpah, kidie ọ tare nẹ, Ọrovwohwo rhẹrẹ owẹ vẹ ovwẹ, ọke rẹ avwanre da hẹriẹ oma nẹ ohwohwo. 50Wo de miovwo emetẹ mẹ na ẹyọrọ, eyẹ wọ da rọvwọ eya efa ba emọ mẹ na, dede na ohwo ọfa etinẹ na, karophihọ nẹ Ọghẹnẹ iseri mẹ vẹ owẹ.

51Etiyin Laban da ta ki Jekọp, Ni osusu nana vẹ ekru nana, ri mi mu vi vwẹ uvwre mẹ vẹ ọwẹn na. 52Ekru nana iseri, osusu nana ji iseri rhe, nẹ Me sa shariẹ ekru nana bru we rhe-e, eyẹ ekpuyovwi wẹn sa shariẹ ekru na bru vwe rhe ri ru emu-u. 53Ọghẹnẹ rẹ Ebraham kugbe Ọghẹnẹ ri Nahọr, Ọghẹnẹ rẹ esẹ rayen, brorhiẹ rẹ avwanre. Etiyin Jekọp da vwẹ Oshọ rẹ ọsẹ rọye Aizik vwo duvwu iyori. 54Jekọp de ze izobo vwẹ enu rẹ ugbenu na o de se ihwo rọye nẹ iri re emu, ayen da re ayen da vwerhẹ enu rẹ ugbenu na. 55Irhiọke ride Laban de vrẹn, ọ da fiọnfiọn ivwrọmọ rọye kugbe emetẹ rọye unu ọ da nẹ ẹrhovwo kẹ ayen, o de kuoma rhẹriẹ o de rhivwi kpo.

Currently Selected:

Jẹnẹsis 31: UBV77

Highlight

Copy