Jẹnẹsis 33
33
Jekọp vẹ Isọ Rhuẹrẹ kugbe
1Jekọp vwọ kpare opharo, nighe, Isọ ra yan cha, ọ vẹ ihwo uri ivẹ ri nene. Etiyin ọ da ghare emọ na kẹ Leah vi Rachel kugbe emetẹ rayen ivẹ na. 2O de phi eyaobọ na vẹ emọ rayen phihọ obaro, Leah vẹ emọ rọye da vwọ kpahe ayen, Rachel vi Josẹf da ka obuko. 3Okpuyovwi rọye da ka obaro kẹ ayen, o de diguẹ vwẹ uyovwi te otọ asieghwrẹ, bẹsiẹ o rhi vwo te asan rẹ oniọvo rọye epha.
4Ẹkẹvuọvo Isọ da djẹ ra vwa, ọ da gbanọ, ọ da vwẹ uyovwi kpahọ ohọre ọ da fiọnfiọn unu, ayen da viẹ. 5Ọke rẹ Isọ vwọ kparo mrẹ eya vẹ emọ, ọ da ta, Ena amono ri nene uwe na? Jekọp da ta, Emọ rẹ Ọghẹnẹ vwo ru ẹse kẹ odibo wẹn. 6Etiyin eyaobọ na de si kerẹ, te ayen te emọ rayen, ayen de diguẹ kẹ, 7Leah vẹ emọ rọye de si kẹrẹ ayen de diguẹ, ukuko rọye Josẹf vi Rachel de si kẹrẹ, ayen de diguẹ. 8Isọ da ta, Kidie a vwẹ usun nana ejobi na re Me vware na vwo ru? Jekọp da kpahe, Re Me vwọ mrẹ aroesiri vwẹ obaro rẹ ọrovwovwe. 9Ẹkẹvuọvo Isọ da ta, Mi vwori buebu, oniọvo mẹ, sẹro rayen vwọ kẹ oma wẹn. 10Jekọp da ta, Ẹjo, Me rẹ wẹ, ọ da dianẹ ivun mẹ vwerhe owẹ, gba reyọ ọghọ na mie vwe, vwẹ uyota a da mrẹ opharo wẹn, kọ họhọ ohwo rọ mrẹ opharo rẹ Ọghẹnẹ, gba vwẹ ẹguọnọ ro jẹrhẹriẹ tiọye na reyọ ovwẹ. 11Reyọ, Me rẹ wẹ, ọko nana re Me phare rhe we na, kidie Ọghẹnẹ ru ẹse kẹ vwẹ gangan, fikiridie ọ ri mi vwori na te kẹ vwẹ. Ọtiọna kọye ọ rẹrẹ, ọ da reyọ.
12Etiyin Isọ da ta, Gbe jẹ a yanran, ke Me ka obaro kẹ wẹ. 13Ẹkẹvuọvo Jekọp da ta, kẹ, Ọrovwovwe riẹnre nẹ emọ na pha mwẹmwẹ, kugbe uchuru na ri vievie na e ro vwẹ ẹwan, a da djẹ ayen kpata kpata nọ ẹdẹ ọvo, uchuru na ejobi ki ghwu. 14Jẹn ọrovwovwe ka obaro kẹ odibo rọye, rere Me jomaotọ sun ayen rhe, rere Me tẹtẹ ayen rhe kirobo rẹ uchuru na sa yan te, kirobo rẹ emọ na sa yan te, bẹsiẹ Me cha vwọ yan mu ọrovwovwe vwẹ obi Seir.
15Etiyin Isọ da ta, Gbe ju vwe yan jẹn ihwo mẹ ẹvo vwo kẹ wẹ. Ẹkẹvuọvo ọ da ta, Kidie Me vwẹ ayen ru? Ju vwe mrẹ ivuavwerhe vwẹ obaro rẹ ọrovwovwe. 16Kọye Isọ de rhivwi ẹdẹ yena kpo obi Seir. 17Ẹkẹvuọvo Jekọp de mu oyan vwo kpo Sukọt, ọ da bọn uwevwi kẹ oma rọye, ọ da rha bọn itughẹ kẹ uchuru rọye; fiki rẹ ọtiọye na e de se odẹ rẹ asan na Sukọt.
18Jekọp de rhi te orere ri Shikẹm gberhẹnẹdẹ, rọ otọ ri Kenan, vwẹ idjerhe ra wan ni Padanaram cha, o de mu erhọn phihọ ughere rẹ orere na. 19Vwẹ obọ rẹ emọ ri Hamọr, ọsẹ ri Shikẹm, ọ da dẹ otọ na ebo rẹ igho ujori kẹ Etiyin ọ bọn utughẹ rọye phihọ. 20Ọ da so agbada phihọ Etiyin o de se odẹ rọye El-Elohe Izrẹl.
Currently Selected:
Jẹnẹsis 33: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.
