Jẹnẹsis 35

Ọghẹnẹ Bruba kẹ Jekọp vwi Bẹtẹl

1Ọghẹnẹ da ta ki Jekọp, Vrẹn, yanran kpo Bẹtẹl, re wọ dia Etiyin; rere wọ dia Etiyin so agbada kẹ Ọghẹnẹ rọ vwẹ oma phia kẹ wẹ na ọke wọ vwọ djẹ nẹ obọ rẹ oniọvo wẹn Isọ. 2Etiyin Jekọp da ta kẹ evwruwevwi rọye kugbe ekru re vẹ ọye gba herọ, Wa kpare ẹdjọ erhorha ri rhe ovwan ejobi kufia, re we phorho oma rẹ ovwan, re we ku iwun rẹ ovwan phihọ otọ, 3we jẹn avwanre vrẹn re e kpo Bẹtẹl, re Me dia oboyi so agbada kẹ Ọghẹnẹ ro nyo vwe vwẹ ọke rẹ ukpokpogho, rọ vẹ ovwẹ herọ vwẹ asan kasan Me rare ejobi. 4Etiyin ayen da vwẹ ẹdjọ, erhorha rẹ ayen vwori ejobi kẹ Jekọp, kugbe isa rẹ erhọn rẹ ayen ku phihọ, Jekọp de si ayen nu vwẹ otọ rẹ ọhahe rọ kẹrẹ Shikẹm.

5Ọke rẹ ayen vwọ yan re, uguegue ro nẹ obọ rẹ Ọghẹnẹ rhe de rhi mu irere re riariẹ ayen phihọ, oshọ gbi jẹ ayen vwọ tua emọ ri Jekọp na-a. 6Jekọp de rhi te Luz (kọye Bẹtẹl), rọ otọ ri Kenan, te ọye te ihwo re vẹ ọye gba herọ, 7ke Etiyin ọ da so agbada, o de se odẹ rẹ asan na El-Bẹtẹl, kidie Etiyin Ọghẹnẹ da vwẹ oma nẹ rọ vwọ djẹ nẹ obọ rẹ oniọvo rọye. 8Deborah, rẹ ọyọrọmọ ri Rebeka, de ghwu, e de sho vwọ otọ rẹ ọhahe rọ otọ ri Bẹtẹl; kọye o de se odẹ rẹ asan na Allan-bakuth.

9Ọghẹnẹ da rhoma vwẹ oma phia kẹ Jekọp, ro vwo nẹ Padanaram cha, ọ da nẹ ẹrhovwo kẹ. 10Ọghẹnẹ da ta kẹ, Odẹ wẹn Jekọp, e gbi se we Jekọpu-u, ẹkẹvuọvo Izrẹl kọye e se wẹ. Etiyin e de se odẹ rọye Izrẹl. 11Ọghẹnẹ da ta kẹ, Mẹvwẹ Ọghẹnẹ ro vwo Ẹgba, gbe vwiẹ rere wo bu; ẹgborho buebu kugbe ẹgborho buebu ki nẹ agada wẹn rhe, ivie ki nẹ oma wẹn rhe. 12Otọ re Me vwọ kẹ Ebraham, kugbe Aizik ke Me je vwẹ ayen kẹ wẹ, ke Me vwẹ otọ na kẹ emọ wẹn re cha vwẹ obuko wẹ. 13Etiyin Ọghẹnẹ de yeri kpenu jovwo nẹ asan ro de nene ta ota na. 14Jekọp da so agbada phihọ asan rọ vọye da ta ota na, agbada rẹ oragha, ọ da je udi kuo, o ki ji ku evwri kuo. 15Kọye Jekọp de se odẹ re asan rẹ Ọghẹnẹ da ta ota kẹ na, Bẹtẹl.

Ughwu ri Rachel

16Etiyin ayen de mu oyan ni Bẹtẹl, rẹ ayen vwo si kerẹ Efrat re, Rachel kọ chuẹ uvwiẹ, uvwiẹ na ganre gangan. 17Re uvwiẹ na vwọ ganre, orhere na da ta kẹ, Wọ djẹ oshọ-ọ, kidie wo che vwiẹ ọmọshare ọfa. 18Ro vwo sherua re (kidie o ghwuru), o de se odẹ rọye Ben-oni; ẹkẹvuọvo ọsẹ rọye de se Bẹnjamin. 19Etiyin Rachel de ghwu, e de sho vwẹ idjerhe rẹ Efrat (kọye Bẹtlẹhẹm), 20Jekọp da ma osusu phihọ enu rẹ ushi rọye; kọye osusu rọ enu rẹ ushi ri Rachel rhi te nonẹ na. 21Izrẹl de mu oyan, o de chivwi utughẹ rọye phihọ abọ oboyi rẹ ọgua-enu ri Eder.

Emọ ri Jekọp

(1 Ikun rẹ Ivie 2.1-2)

22Rẹ ayen vwọ otọ na re Rubẹn de nene Bilhah rẹ aye rẹ ọsẹ rọye mroma; Izrẹl de nyo. Emeshare rẹ Jekọp da dia ihwivẹ. 23Emọ ri Leah Rubẹn (owanra ri Jekọp), Simiọn, Livae, Juda, Isaka, kugbe Zẹbulọn. 24Emọ ri Rachel Josẹf kugbe Bẹnjamin. 25Emọ ri Bilhah, ọyọrọmọ ri Rachel: Dan Kugbe Naftali. 26Emọ ri Zilpah, ọyọrọmọ ri Leah, Gad kugbe Asha. Enana emọ ri Jekọp vwiẹri vwi Padanaram.

Ughwu rẹ Aizik

27Jekọp de rhi te otọ rẹ ọsẹ rọye Aizik vwi Mamre, eyẹ Kiriataba (kọye Hebrọn), asan rẹ Ebraham vẹ Aizik diare jovwo. 28Ẹdẹ rẹ akpọ rẹ Aizik ejobi da dia ikpe ujurhiri: 29Aizik de phi ẹnwẹn họ, o de ghwu e de sho kugbe esẹ rọye ọ ghworo hẹrẹ hẹrẹ; emọ rọye Isọ kugbe Jekọp de sho.

Currently Selected:

Jẹnẹsis 35: UBV77

Highlight

Copy