Luk 9

Oyan rẹ Ihwivẹ na

(Matiu 10.5-15; Mak 6.7-13)

1O de se ihwivẹ na koko ọ da vwẹ ogangan kugbe ẹgba kẹ ayen vwẹ enu rẹ idẹbono ejobi rere ayen ji sivwi emiavwe, 2o de ji ayen re ghwoghwo uvie rẹ Ọghẹnẹ rere ayen ji sivwi ihwo rẹ oma da. 3Ọ da ta kẹ ayen, Wa ghwa emnọvo kpo oyan na-a, wa ghwa ọkpọ-ọ, eyẹ ekpo, eyẹ ikara, eye igho; we vwo iwnn ivẹ-ẹ. 4Uwevwi kuwevwi rẹ ovwan roro, wa dia etiyin, kẹ ẹtiyin we nu kpo. 5Asan kasan rọ reyọ ovwa-an, we de nẹ orere na phorho ekpẹn rẹ awọ rẹ ovwan phihọ otọ rọ dia iseri kẹ ayen. 6Ayen da yanran ro eko na ejobi, ghwoghwo iyẹnre esiri na ayen de sivwi ihwo vwi kasan kasan.

Herọd rọ rhe dia Gedegede

(Matiu 14.1-12; Mak 6.14-29)

7Asakiephana Herọd osun de nyo obo ri ruru, kọ pha gedegede, fikiridie ihwo ẹvo rare nẹ Jọn vrẹn nẹ ughwu rhe, 8ẹvo nẹ Ilaija vwẹ oma phia, efa ta nẹ emraro rẹ awanre na ri vrẹn nẹ ushi. 9Herọd da ta, Mi bru uyovwi nẹ Jọn; ẹkẹvuọvo kono mi nyo ikun nana kpaha na? Ọ da guọnọ mrẹ.

Ẹghẹrẹ rẹ Ihwo Uriori Iyori na

(Matiu 14.13-21; Mak 6.30-44; Jọn 6.1-14)

10Rẹ ayen vwo rhivwi rhere iyinkọn de gbe ikun rẹ obo rẹ ayen ruru kẹ. Ọ da reyọ ayen o de sioma reyọ kpo orere re se Bẹtsaida. 11Rẹ otu na vwo nyo, ayen de nene; o de dede ayen reyọ o de gbe ikun rẹ uvie rẹ Ọghẹnẹ na kẹ ayen, o de sivwi ihwo re guọnọ esivwo ejobi. 12Asakiepbana ọke na kọ lọhọ oma yanran; ihwivẹ na de bro rhe e da ta kẹ, Siobọ nẹ ihwo na kpo, ri Kpo eko vẹ orho re riariẹ ayen phihọ na, re ayen re wo phihọ re guọnọ emu re; kidie etinẹ ma epha na asan obọ rọye san. 13Ẹkẹvuọvo ọ da ta kẹ ayen, Wa vwẹ emu kẹ ayen re. Ayen da ta, Avwanre vwo vrẹn ikara iyori kugbe iyeri ivẹ-ẹ jokpa nẹ a dẹ emu ọfa ro ki te ihwo nana ejobi re. 14Kidie ihwo na bu te uriori iyori. Ọ da ta kẹ idibo rọye, Vwẹ ayen tidia ẹkuẹko, ujuvẹ gbe ihwe vwẹ ẹko ọvuọvo. 15Ayen de ru ọtiọye, ayen ejobi de tidia te otọ. 16Rọ vwọ reyọ ikara iyori na kugbe iyeri ivẹ na o de ni odjuvwu, ọ da nẹ ẹrhovwo o de bru ayen, ọ da vwẹ ayen kẹ idibo na re muo vwọ kẹ otu na. 17Ayen ejobi da re evun da vọn ayen. Ayen da tọrọ i ri chekọ koko e da vọn ibere ihwivẹ.

Pita Rhọvwe Jesu

(Matiu 16.13-19; Mak 8.27-29)

18Asakiephana rẹ ọye ọvo vwọ nẹ ẹrhovwo vwẹ asan obọ rọye san yẹ idibo na vẹ ọye hẹ etiyin; ọ da nọ ayen, Ono ihwo vwẹ ovwẹ roro? 19Ayen da kpahe, Jọn ri Baptist; ẹkẹvuọvo efa nẹ, Ilaija; efa nẹ, ọvo vwẹ usun rẹ emraro rẹ awanre na re rhoma vrẹn. 20Ọ da ta kẹ ayen, Ẹkẹvuọvo kono ovwan tobọ ta ne mi epha? Pita da ta, Wẹ hẹ Kristi rẹ Ọghẹnẹ na.

Jesu ta Ota kpahe Ughwu kugbe Evrẹnushi Rọye

(Matiu 16.20-28; Mak 8.30–9.1)

21Ẹkẹvuọvo o de ji urhi kẹ ayen nẹ a ta ọnana kẹ ohwo ọvuọvo-o, 22tanẹ, Ọmọ rẹ ohwo cha re oja rẹ emu buebu, ekpako na vẹ ilori rẹ irherẹn vẹ isiẹbe na cha siọ, e che hwe ghwu, ẹdẹ rẹ erha ka kparọ vrẹn.

23Ọ da ta kẹ ayen ejobi, Ohwo da tanẹ ọye nene uvwe, e jẹn ọ sen oma rọye ro mu agbagba rọye kẹdẹ kẹdẹ ro nene uvwe. 24Ohwo kohwo ro sivwi arhọ rọye o che kuofia; ohwo kohwo ro ku arhọ rọye fia fiki mẹ, ko sivwo rhọ. 25Didi erere ri te ohwo ro de vwo emu rẹ akpọ na ejobi ro de ku erhi rọye fia? 26Kidie ohwo kohwo rọ vo oma mẹ kugbe iyẹnrẹ esiri mẹ, Ọmọ rẹ ohwo kọ je vo oma rọye vwẹ ọke ro de te uvie rọye kugbe uvie rẹ Ọsẹ na kugbe emakashe efuanfon na. 27Ẹkẹvuọvo uyota me ta kẹ ovwan, ẹvo herọ ri mudia vwẹ etinẹ na re cha davwe ughwu phiephie-c tavwe rẹ ayen kẹ mrẹ uvie rẹ Ọghẹnẹ.

Omaewene na

(Matiu 17.1-8; Mak 9.2-8)

28Asakiephana rẹ ẹdẹ ẹrenre vwọ wan nu, rọ vwọ ta eta nana ejobi nu, ọ da reyọ Pita kugbe Jọn kugbe Jems, o de yeri kpo enu rẹ ugbenu ra nẹ ẹrhovwo. 29Rọ vwọ nẹ ẹrhovwo re, opharo rọye da rhẹriẹ, iwun rọye ke fuan puepue, 30Nighe, eshare ivẹ ki nene gbe ikun, Mosis kugbe Ilaija; 31da vwẹ oma phia kẹ vwẹ urinrin ayen de gbe ikun rẹ ukpo rọye, re che ru gba vwẹ obi Jerusalẹm. 32Ovwerhẹ rode de mu Pita kugbe otu rọye ri chekọ ẹkẹvuọvo rẹ ayen vwo gheghe rhe, ayen da mrẹ urinrin rọye kugbe ihwo ivẹ ri mudia kẹrẹ. 33Rẹ eshare na vwọ yanran re, Pita da ta kẹ Jesu, Onini, oyoma re avwanre dia etinẹ; e jẹn avwanre bọn ọgarivi erha, ọvo owẹ ọvo ọ ri Mosis ọvo ọ re Ilaija–ọ riẹn obobo rọ ta na-a. 34Rọ vwọ ta ọ nana, egho de rhi rhurhu ayen; oshọ ko mu ayen rẹ ayen vwọ ruẹ evun rẹ egho na. 35Urhuru ọvo de nẹ evun rẹ egho na rhe, tanẹ, Ọnana Ọmọ mẹ, Ajẹreyọ mẹ; kerhọn rọye. 36Re urhuru na vwọ ta ota nu, Jesu ọvo kọye ri chekọ. Ayen da fọ gbiẹi ayen gbe ikun na rẹ obọ rẹ ayen mrẹre kẹ ohwo ọvuọvo vwẹ ọke yena-a.

Jesu Sivwi Ọmọshare ro vwo Erhi ro Jẹfuọn

(Matiu 17.14-21; Mak 9.14-27)

37Vwẹ ẹdẹ rivẹ, rẹ ayen vwo wotọ nẹ enu rẹ ugbenu na rhe, otu buebu da rhe vwa. 38Nighere, ọshare ọvo vwẹ ohri rẹ otu na de kperi, Oyono, me rẹ wẹ ni ọmọ mẹ na kẹ vwẹ, kidie ọye ọvo mi vwori; 39gbe nighe, erhi ọvo fro, ọ mia va viẹ; o mi sio bẹsiẹ rẹ unu rọye vwo gbe iphughẹ, o mi gbule vwẹ otọ, ọ fobọ jovwo-o. 40Me da rẹ idibo wẹn nẹ ayen djẹ no, ẹkẹvuọvo ayen se ruo-o. 41Jesu da kpahe, E uvwiẹ ri jesegbuyota evwo rọ vwa chachahe, bro ọke Me vẹ ovwan dia krite ri mi chirako rẹ ovwan te? Mu ọmọ wẹn na rhe etinẹ. 42Ọke rọ vwọ cha na, idẹbono na de sio ko gbule. Ẹkẹvuọvo Jesu da ghwo ku erhi ro jẹfuọn na, o de sivwi ọmọ na, o de muo kẹ ọsẹ rọye. 43Ọrho rẹ Ọghẹnẹ de gbe ayen ejobi unu.

Jesu Rhoma ta Ota rẹ Ughwu Rẹyo

(Matiu 17.22-23; Mak 9.30-32)

Ẹkẹvuọvo ọke rẹ imu nana ro ruru vwo gbe na ejobi unu, ọ da ta kẹ idibo na, 44Gbe jẹn eta nana kporo ro ovwan erhọn; kidie e che mu Ọmọ rẹ ohwo phihọ abọ rẹ ihwo. 45Ẹkẹvuọvo ota nana ro aye-en, e de sionu kẹ ayen, rere ayen vwo jẹ ẹriẹn; oshọ gbi jẹ ayen nọ-ọ.

Ono rẹ ma Rhọ?

(Matiu 18.1-5; Mak 9.33-37)

46Aphro da rhe phia vwẹ ohri rẹ ayen nẹ kono re ma rho vwẹ usun rẹ ayen. 47Ẹkẹvuọvo ri Jesu vwọ riẹn iroro rẹ udu rayen, o de mu omotete ọvo kẹrẹ oma rọye, 48ọ da ta kẹ ayen, Kohwo kohwo rọ reyọ omotete tiọna vwẹ odẹ mẹ yọ reyọ ovwẹ, kohwo kohwo rọ reyọ ovwẹ yọ reyọ ọ ro ji vwe rhe; kidie ohwo rọ ma havwe vwẹ ohri rẹ ovwan ejobi ọye re cha ma rho.

Ohwo rọ vwọ so owẹ-ẹ Yẹ Ọ vẹ Owẹ Obọ

(Mak 9.38-40)

49Jọn da kpahe, Onini, avwanre mrẹ ohwo ọvo rọ vwẹ odẹ wẹ djẹ idẹbono phia, avwanre da djẹ, fikiridie o nene avwanre-e. 50Ẹkẹvuọvo Jesu da ta kẹ, Wọ djẹ-ẹ, kidie ohwo rọ vwọ so avwanre-e yọ vẹ avwanre obọ.

Ighwre ri Sameria Ọvo re Reyọ Jesu-u

51Rẹ ọke vwo si kẹre ra cha vwọ reyọ kpenu, o da tọn opharo vi ro kpo Jerusalẹm. O de ji ikọn ka obaro kẹ, 52ayen da yanran ra vwẹriẹ ọko rẹ ihwo ri Sameria, ra rhuẹrẹ asan hẹrhẹ; 53ẹkẹvuọvo ihwo na rhọvwe reyọ-ọ, fikiridie ọ tọn opharo vi ro kpo Jerusalẹm. 54Ọke rẹ idibo rọye Jems kugbe Jọn vwọ mrẹ, ayen da ta, Ọrovwohwo, wọ rhọvwere nẹ avwanre se erhanre nẹ odjuvwu rhe rhe torhẹ ayen? 55Ẹkẹvuọvo o kuoma rhẹriẹ ọ da ghwọ ku ayen. 56Ayen da yanran kpo ọko ọfa.

Ihwo ri che nene Jesu

(Matiu 9.19-22)

57Rẹ ayen vwọ yanran vwẹ idjerhe, ọshare ọvo da ta kẹ, Mi nene uwe kpo asan kasan re wọ ra ejobi. 58Jesu da ta kẹ, Irhirako vwo unu, emephran rẹ obenu vwo ẹho; ẹkẹvuọvo Ọmọ rẹ ohwo vwo asan rọ vwẹ uyovwi hwa-a. 59Ọ da ta kẹ ọfa, Nene uvwe. Ẹkẹvuọvo ọ da ta, Ọrovwohwo, jẹn uvwe ke re shi ọsẹ mẹ tavwe. 60Ẹkẹvuọvo ọ da ta kẹ, Yan jẹ ihwo ri vwo orivwi vwo rere ayen re shi orivwi rayen; ẹkẹvuọvo vwọ kẹ wẹ, yanrau re ghwoghwo uvie rẹ Ọghẹnẹ na. 61Ọfa da rha ta, Mi nene uwe, Ọrovwohwo; ẹkẹvuọvo jẹn uvwe yere kẹdẹfa kẹ ayen ihwo re hẹ obo uwevwi mẹ. 62Jesu da ta kẹ, O vwo ohwo ọvo rọ ghwẹ abọ kpahe eghwro nu ro de ni obuko ro fo kẹ uvie rẹ Ọghẹnẹ na-a.

Currently Selected:

Luk 9: UBV77

Highlight

Copy