Hosie 9
9
Emia Isrel Ufen
1Isrel, kuunem esịd;
kuudaara nte mme idịd mfen.
Sia afo unamma akpanikọ ye Abasi mfo;
afo ama akʌk akpara
ke afịd afe ubeek abakpa.
2Mme afe ubeek abakpa ye mme afe utem ukọd idiinọọhọ mme awo ndidia;
ufa ukọd ayaakpu ammọ.
3Ammọ idiisʌhọke ke isọñ Abọọñ;
Ifrem ayaatịmme anyọñ Iyib,
anyʌñ adia ndedeghe ndidia ke Asiria.
4Ammọ idiiduọkkọ mme enọ ukọd inọ Abọọñ,
uwa ammọ idiinyʌññọ inem anye esịd.
Utọ mme uwa ado adiitie nte uyio mbon mfʌhọ anọ ammọ;
afịd mbon se idia ammọ ediido ndedeghe.
Ndidia ami adiido ake ammọ;
Awo idiibenne anye idʌk ke tembịd Abọọñ.
5Nsoo ke afo uduunam ke usen mme nsionnịm usọrọ mfo,
ke mme usen usọrọ Abọọñ?
6Akpesʌkado ammọ efegheke ebọkkọ nsobo,
Iyib ayaakoono ammọ abono,
Memfis ñko ayaabuuk ammọ.
Akpab ye mbaraekpe eyaefʌk mme ñkpọuto silfa ammọ,
mme ñkukịm eyaefʌk mme atayad ammọ.
7Mme usen umia ufen esʌk edi,
mme usen ikpe ekpere.
Yak Isrel adiọọñọ ami.
Sia ndiọiñkpọ mfo ewak eti-eti
ntịme mfo anekke akpon,
edat prọfed nte ndisịme,
edat akịdñkukịd nte idaad.
8Prọfed, kọrọ ye Abasi mmi,
ado andikpeme Ifrem,#9:8 Prọfed ado awoukpeme anọ Ifrem, mbon Abasi mmi
kpayeado mme afia esʌk ebebet anye ke afịd usʌñ amọ,
ye usua ke ufọk Abasi amọ.
9Ammọ e-eduọ enyịne ke abʌd-abʌd ido,
kpa naña akedo ke mme usen Kibie.
Abasi ayaatoiyo mme ibak ammọ,
anyʌñ amia ammọ ufen ke mme ndiọiñkpọ ammọ.
10“Ke ini ami ñkekịtte Isrel,
akeba nte awo akịt kreb ke akpautatan;
idaha ami ñkekịtte mme eteete ndufo,
akeba nte awo akịt akpa mfịd ke eto fik;
ado ke ini ammọ ekediighe Baal Pọọ,
ammọ emaenịm idem ammọ asaña-asaña enọ ubobodñkpọ asuenne ado
enyʌñ eforo mbubiam kpa nte ñkpọ se ammọ ekema.
11Ubọọñ Ifrem ayaafuuro nte inuen,
uman ayịn, usaña ye idịb, ye uyommo idịb idiibaaha.
12Akpekọm ammọ ekpebọọbọọk nditọ,
ami ñyaanam ammọ etua ebaña ñkpañña afịd nditọ ado.
Adọdiọọk anọ ammọ
ke ini ami ñwọññọke edem ñkpọñ ammọ!
13Ami mmekịt Ifrem, nte Tai,
e-etọọhọ ke eti itie.
Ado Ifrem ayaasio
nditọ ammọ anọ mme awodawo.”
14 Abọọñ, nọ ammọ,
nsoo ke afo adiinọ ammọ?
Nọ ammọ idịb a-nditọ awuọñọke
ye eba a-mmọọñeba asatta.
15“Ke ntak afịd ibak ammọ ke Kilkal,
ami mmaasua ammọ do.
Ke ntak ndiọi adinam ammọ,
ami ñyaabịn ammọ nsio ke ufọk mmi.
Ami ndiimaaha ammọ aba;
afịd mme adadusʌñ ammọ edo mbon nsọñiwuod.
16Ifrem akịt mbiara,
adʌñ ammọ ayeeme,
ammọ inwịmme mfịd.
Akpekọm ammọ eman nditọ,
ami ñyaawot mme ndima nditọ ammọ.”
17Abasi mmi ayaasịn ammọ,
sia ammọ ikoppo item inọ anye;
ammọ eyaeyooñ ke atu mme idịd.
Currently Selected:
Hosie 9: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.