Duk 16
16
Ñke akamautom anieeghe mbufiọk
1Yisọs amaabo mme ibed ate, “Imọ awo keed amaaba e-ekedidọkkọke anye ebo ke akamautom amọ atahade inie amọ. 2Eteufọk amaakood akamautom ate, ‘Nso-o ke ñkop ami ubaña fiin? Nam ibad sia ukemeke ido akamautom mmi aba.’
3 “Akamautom amaabo idem amọ ate, ‘Nso-o ke mbo nnam idahado? Eteufọk mmi ayaambịn ke utom. Nnieeghe inweek ñkem se ñkekịm isọñ; mmenyʌñ ñkop buud adika ubeeñe ebeeñe. 4Afọn, mmediọọñọ se mbo nnam nọ ato do emaembịn ke utom ami, mme awo eyak ñwakka ufọk ammọ.’
5 “Ndin anye amaakood afịd awo se ikikama eteufọk amọ isʌñ. Anye amaabịp akpa awo ate, ‘Nso-o ke akama eteufọk mmi?’
6 “Anye abọọrọ, ‘Ñkama tian adan ikie usʌkkeed.’
“Akamautom ate anye, ‘Sọp idem, dat ñwed isʌñ mfo, kpịkke wet tian adan ikie inaañ.’
7 “Akamautom amaabịp ayọhọ awo iba, ‘Nso-o ke akama?’
“Anye ado abọọrọ, ‘Ñkama akpasa akpakpa tọsịn keed.’
“Akamautom ate anye, ‘Sọp idem, dat ñwed isʌñ mfo, kpịkke wet akpasa akpakpa ikie itiaita.’
8 “Eteufọk amọ amaatooro adinam idiọọk akamautom ami sia anye amaanie mbufiọk. Sia mbon ederimbod a-mmiidiọọñọke Abasi enie mbufiọk ke emaebiinam ñkpọ ye emọ-emọ awo ekan mbon e-ediọọñọke Abasi enyʌññọ esaña ke unwana. 9Ami ibo ndufo, ikama inie ederimbod ikọ mme ufan inọ idem ndufo, mbaak inie ado amaakweeñe ma ebọ ndufo esịn ke nsi-nsi itie idʌñ.
10 “Sia awo ake adodo a-akemeke adinam akpanikọ ke etək ñkpọ, akeme adinam akpanikọ ke ekamba ñkpọ. Awo ake adodo a-mmiinamma akpanikọ ke etək ñkpọ ikemeke inam akpanikọ ke ekamba ñkpọ. 11Ndin adieke afo mmuukunama akpanikọ ke inie ederimbod, anie adinịm ke amekeme inam akpanikọ ke ekpunọ ataa akpan inie? 12Ndin adieke mmuunamma akpanikọ ye inie awo mfen, anie aduunọ fiin inie ake mfo?
13 “Ayịnufọk ndomokeed ikemeke inam ñkpọ inọ eteufọk iba. Anye anaasua eteufọk keed anyʌñ ama anye ako. Miidooho ntodo, anye ayaama keed ndin amiom anye ako. Ukemeke adikpono Abasi ye inie.”
14Mme Farisi e-ekemaaha akʌk, emaekop afịd ami enyʌñ etuun Yisọs inua. 15Ami anam Yisọs abo ammọ, “Ndufo edo mbon e-eyemme adido nti awo ke iso awo, ado Abasi adiọọñọ esịd ndufo. Se mme awo edat nte akpan ñkpọ adondek ke anyen Abasi.
Mme ukpeebñkpọ mfen
16 “Emaekwọrọ enyʌñ ekpeeb mme Ibed ye mme Brọfed tutu ediwuọ ini Yọọn. Tọọñọ ke idahado, edikwọrọ eti etob abio ubọọñ Abasi, ndin afịd awo eyem usʌñ adinwana ndʌk ke esịd. 17Ado ata mmem-mmem ñkpọ anyọñ ye isọñ adiboiyo mfep ñkan ntọi ikọ keed adiwuọ ke ñwed Ibed.
18 “Awo ake adodo a-akesịnne anwaan amọ akedọ awonwaan mfen asịn efịbe, ndin awodeen a-adọọhọ awonwaan e-ebe amaakesịn asịn efịbe.
Awo inie ye Dasarọs
19 “Imọ awo keed amaaba a-akesisịneke nsọñudua afọñ anyʌñ akop akpọsọñ inem uwem. 20Ndin ke inuaatob amọ, Dasarọs, atak inia abeeñeebeeñe amaakesitie ke ndo, 21aditañ mbeñe ndidia se ito akpokoro imọ awo ado iduọññọ ndia. Mme ewa emaesididai inia ke idem Dasarọs.
22 “Akekem ko, abeeñeebeeñe ami amaadikpa, ndin mme enyere emaeben anye ekenịm ke ñkañ Ebraham. Imọ awo amaanyʌñ adikpa, enyʌñ ebuuk anye. 23Anye amaaka ke nsi-nsi ñkpọdiọghọ ikañ, adịppe anyen ada akịt Ebraham ke anyanusʌñ anyʌñ akịt Dasarọs ado ke ñkañ amọ. 24Anye amaabọọñ ate, ‘Ete Ebraham, ntua miin mbọm nyʌñ dọñ Dasarọs adeeb mmọọñ ke nnuun ubọk amọ adindeññe edeme, sia mba ke akpọsọñ ufen ke ikañ ami.’
25 “Ado Ebraham amaabọọrọ anye ate, ‘Ayịn mmi, toiyo ke ayo uwem mfo amaanie nti ñkpọ ke ini Dasarọs akekịtte ukuud, ado idahami anye abọ idọñesịd mi, ado afo aba ke ndutʌkkọ. 26Ke adidian do, ekamba ukpe abakka ñnyịn ye afo, a-anamma mbon se iyem ito umi ñka udo ikanna, mbon se inyʌñ iyem ito udo ndi umi ikanna.’
27 “Imọ awo amaabọọrọ ate, ‘Mmukpeiye fiin ete mmi, dọñ Dasarọs aka ke ufọk ete mmi, 28sia mmenie nditọeka ideen ition. Yak akedʌt ammọ utọñ mbaak ammọ edidisịm utọ itie ndutʌkkọ ami.’
29 “Ebraham amaabọọrọ, ‘Ammọ enie Moses ye mme Brọfed; yak ammọ ekpañ utọñ enọ mbon ndo.’
30 “Awo inie amaabo ate, ‘Iyo, Ete Ebraham, awo akpeto abioekpo akedọkkọ amọ, eyaekappa esịd.’
31 “Ebraham amaabọọrọ, ‘Adieke ammọ mmiikpañña utọñ inọ Moses ye mme Brọfed, ammọ idiinịmme, akpọkọm awo abʌkkọ ke udi adika.’ ”
Currently Selected:
Duk 16: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
