Duk 21
21
Enọ ebekpa
1Yisọs akedịppe anyen ke anyọñ, anye akịt naña mme imọ awo enọ mme enọ ammọ ke tembịd. 2Anye amaanyʌñ akịt uwueene ebekpa keed naña asịn kọbọ iba. 3Anye ate, “Ke akpanikọ ke ibo ndufo, enọ ake ebekpa ami akan afịd ake mbon ñko. 4Afịd mbon ñko enọ ekeene naña ammọ enie ñkpọ etre; ado anye ke uwueene amọ, anọ afịd se anye akenie adidat ndu uwem.”
Adiwuud tembịd ye idiọọñọ utịd emana
5Usʌk mme mbed emaeneme ebaña naña ekebana tembịd ke Yerusedem nọ ayaiya; emaenyʌñ etañ ebaña mme nsọñudua enọ e-ekebonno do enọ Abasi. Ado Yisọs amaabo ammọ ate, 6“Ke afịd se ndufo ekịt ami, ayaaba ini itiad keed mmiidiidoroke ke itiad, eyaewuud afịd ado eduọọk ke isọñ.”
7Ammọ emaebịp anye ate, “Andikpeeb, idahake ke mme ñkpọ ami ediitịppe? Nso-o idiido idiọọñọ ke mme ñkpọ ami eyaetịppe?”
8Anye amaabọọrọ, “Ikpeme mbaak edibiaaña ndufo. Sia mme awo eyaedi ke anyịñ mmi, ete, ‘Ami ndo anye’ ye ‘Ini akpere.’ Ikiikeene ammọ. 9Imaikop ekọñ ye ntịme, ikiikop ndịk. Mme ñkpọ ami ana ebemiso etịppe, ado utịd idiidieeghe diin.”
10Anye amaadian abo ammọ, “Mme abio eyaenwana ye emọ-emọ abio; mme ubọọñ eyaenyʌñ enwana ye keed aken. 11Ikpọ unyeghe isọñ, akañ ye nsio-nsio udọñọ ke nsio-nsio itie, mme anie ndịk ñkpọntịbe ye ikpọ idiọọñọ e-etooho anyọñ eyaebañña.
12 “Ado mbemiso afịd ami atịppe, ammọ eyaimuum enyʌñ itʌkkọ ndufo. Eyaiyaak ndufo enọ ke sinakọk, isịn ke ñkpakọb enyʌñ iben ndufo eka iso mme ikpọ mbọọñ ye mme adaukara ke ntak mmi. 13Ndin ami ayaanam ndufo edọdiọñ edo mme ntiense mmi enọ ammọ. 14Ado ibiire ke esịd ndufo ke idiiduọọhọ esịd ibaña se ediitañ ifakka idem. 15Sia ami nyaitemme ikọ ñnyʌñ inọ aniọñ ake mme asua ndufo mmiidiikanna ifaaña. 16Mme ete, eka, nditọeka, ufan, aduuk ye imaan eyaitap ndufo, ndin eyaewot usʌk ndufo. 17Afịd-afịd awo eyaisua ndufo ke ntak mmi. 18Ado ided iwuod ndufo ba keed idiitakka. 19Imaisọọñọ ida eyaenie uwem.
20 “Imaikịt naña udịm ekọñ ekanna Yerusedem ekʌk, ndufo eyaediọọñọ ke ini nsobo amọ akpere. 21Ndin yak mbon e-ebaaha ke Yudia efeeñe ekaiya mme abod, mbon e-ebaaha ke abio ewuọọñọ, ñko mbon e-ebaaha ke esịd idʌñ keetịmme eka esịd abio. 22Sia ini ufen ado ami nọ afịd se ekewet adisu. 23Mbọm eti-eti anọ ibaan e-ediisaña ye idịb ye mbon e-ediikama nsekayịn! Akpọsọñ ukuud ayaaba ke isọñ abio ye iyadesịd ke abaña mme awo. 24Ammọ eyaekpañña ke eduad, eyaenyʌñ ekoono ammọ nte mbon ñkpakọb eka nsio-nsio idịd. Mme Yentaid eyaedat ukara ke Yerusedem tutu ini mme Yentaid anyʌñ oboiyo afep.
25 “Mme idiọọñọ eyaeba ke utịn, afiọñ ye ntantaafiọñ. Ke ederimbod, mme idịd eyaekịt ukuud enyʌñ ekop ñkpaidem ebaña mme ayobio ye ufuud ke akpa. 26Mme awo eyaesʌkkọ ke abaña mme anie ndịk ñkpọ se idiitịppe ke ederimbod sia mme adudu ke anyọñ eyaetịmede. 27Ke ini ado ammọ eyaekịt Ayịn Awo naña adi ke ntọñanyọñ ye adudu ye akwa ubọọñ. 28Ke ini mme ñkpọ ami etọọñọke aditịppe, idaaña ida, idịppe iwuod ke anyọñ sia adinyaaña ndufo akpere.”
29Anye amaatop ñke ami anọ ammọ: “Se eto fik ye afịd mme eto mfen. 30Mfañ emaetọọñọ iseghe emediọọñọ ke ini ndaayo akpere. 31Kpa ntodo, emaekịt naña mme ñkpọ ami etịppe, idiọọñọ ke abio ubọọñ Abasi akpere.
32 “Ke akpanikọ ke idọkkọ ndufo, emana ami idiiboiyoke ifep mbemiso afịd mme ñkpọ ami edat itie. 33Anyọñ ye isọñ eyaeboiyo efep, ado ikọ mmi idiiboiyoke ifep.
34 “Ikpeme mbaak ndufo idisịn esịd ke udiauwem, ukpa mmịn ye mme ñkpọ isọñ ami, ndin usen ado adibiọñọ ndufo adiwaad-adiwaad, ke una idodanyen nte afia. 35Sia usen ado anaasịm afịd awo se iba ke iso isọñ ami. 36Iba ke mbeeñeidem afịd-afịd ini; ibọñ akam nọ enie ukeme adibọkkọ afịd se idiitịppe, nọ enyʌñ ekan eda ke iso Ayịn Awo.”
37Kwa usen Yisọs akesịkwọrọ ikọ ke tembịd, ado amaado ndubreyo, anye akpọñ akeba ke abod e-ekekoodo Abod Ọdif tutu ubakusen, 38ndin ayo amaasieere, afịd awo ebak edi adikop ukwọrọ ikọ amọ ke tembịd.
Currently Selected:
Duk 21: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
