Matiu 7
7
Adibiom awo ikpe
1 “Kuubiom awo ikpe, mmiidooho ntodo eyaubiom fiin ikpe ñko. 2Sia naña afo abiom awo ikpe, ntodo ke eduubiom fiin ikpe, ñko se adodo ndufo edomoke enọ awo, kpa ado ke ediidomo inọ ndufo.
3 “Ntak afo akịtte ñnyịn-ñnyịn nded ke anyen ayịneka mfo ado ukịtte eka isua nded u-usịneke fiin ke anyen-e? 4Akeme die ibo ayịneka mfo, ‘Yak usio etək ñnyịn-ñnyịn nded u-usịneke ke anyen’ ke ini adooho ata ekamba nded mmọ usịne fiin ke anyen? 5Afo awo ndubịk, bem iso sio ekandịk nded ke anyen mfo ndin ayaakanakịt mfọn-mfọn etək nded se isịne ke anyen ayịneka mfo.
6 “Kuunọ ewa se ido adisana ñkpọ: kuutop mme ñkpọuto mfo unọ edi. Adieke anamma ntodo, ammọ ekeme adifiik ke ukod ammọ eboiyo ndin ekanna eda uwai fiin mbai-mbai.
Bịp, yem, kọñ
7 “Bịp ke eyaunọ; yem ke ayaakịt; kọñ usʌñ ke eyaebeere unọ, 8Sia awo keed ake adodo a-abịppe ayaabọ; andiyem akịt; andikọñ usʌñ, eyaebeere enọ anye.
9 “Aba awo ndomokeed ke atu ndufo a-akpenọọhọ ayịn amọ itiad ke ini anye abịppe uyo? 10Me akpaanọ anye udʌkikọd ke ini akebịppe iyak? 11Adieke ndufo ndin edooho mme ndiọi awo ediọọñọke naña enọ nditọ ndufo nti ñkpọ, die ndin ke Ete ndufo ke anyọñ mmiidiinọọhọ mbio e-ebịppe anye nti ñkpọ. 12Ke ukeed ñkpọ nam nọ mbio mfen naña afo akpema ammọ enam unọ fiin, sia anye ami ado ata akpa Ibed Moses ye se mme Brọfed ekekpeeb.
Mfafaha ye ntatara usʌñ
13 “Isaña iboiyo ke mfafaha usʌñ. Sia usʌñ a-akaaha nsi-nsi ikañ nsobo akpon anyʌñ atara. 14Ado usʌñ uwem afafaha, ndin ibad-ibad awo ikpọọñ ekịt anye.
Nti ye mme brọfed abiaaña
15 “Itịñ anyen ise mme brọfed abiaaña. Ammọ edi nte edọñ ado ke esịd ammọ edoñño afai ekpe. 16Eyaediọọñọ ammọ eto mfịd ammọ. Nte ekeme adikịppe ntọm nto eto ñkukịm ke ikọd? Me fik nto tistịd? 17Ke ntodo afịd-afịd nti eto enwịm nti mfịd, ado idiọọk eto anwịm idiọọk mfịd. 18Eti eto ikemeke inwịm idiọọk mfịd, nko idiọọk eto ikemeke inwịm eti mfịd. 19Eto keed ake adodo a-ammiinwịmme eti mfịd, ekpịkke esio enyʌñ etop esịn ke ikañ. 20Ke ntom, ndufo eyaediọọñọ mme eto ekeene mfịd ammọ.
Nti ye mme ndiọi mbed
21 “Idooho afịd awo eñkoodo miin, ‘Abọọñ, Abọọñ’ ediidʌk abio ubọọñ Abasi, ado sʌk mme andinam uduak Ete mmi a-abaaha ke anyọñ. 22Uwak awo eyaembo ke usen ado, ‘Abọọñ, Abọọñ, nte ñnyịn ikidakka itañ se idiitịppe ke anyịñ mfo, ibịn ndiọi sịbidịd isiooño mme awo ke idem ke anyịñ mfo, inyʌñ inam utịbe ñkpọ?’ 23Ndin ami nyaadọkkọ ammọ ke iso ammọ nte: ‘Akenaanam ami idiọọñọke ndufo, indakka ke iso, ndufo mme anañña ndiọiñkpọ.’
Mbio ifiọk ye mme ndisịme abọbufọk
24 “Ndin afịd awo e-ekoppo ikọ mmi enyʌñ enam, ammọ ebit awo ifiọk a-akebọppọ ufọk amọ ke anyọñ itiad. 25Akem edịm adidep, mme idịm ediyọọhọ etọ anye, ayobio ñko adinyeeñe anye, ado anye iduọọhọ, sia idakisọñ amọ akedo itiad. 26Ado awo ake adodo a-akoppo ikọ mmi ami, ado inamma, atie nte ndisịme awo a-akebọppọ ufọk ke utatan. 27Edịm adidep atọ anye, mme idịm eyọọhọ editọ anye, ñko ayobio anyeeñe anye, ndin anye aduọ asuana.”
28Yisọs amaaketañ ikọ ami ima, idem amaakpa mme atu awo ato ke se anye aketañ, 29sia anye akekpeeb ammọ nte awo a-anieeghe adudu, idooho nte mme andikpeeb ibed ammọ.
Currently Selected:
Matiu 7: NAAM
Highlight
Share
Copy
Want to have your highlights saved across all your devices? Sign up or sign in
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
