HECHOS 10
10
Pedropish Corneliopish
1Cesareapica, Cornelio shuti shuj runami tiyarca. Paica “Italiana” nishca soldadocunapurapi caj patsaj soldadocunata mandajmi carca. 2Paica paipaj familiandij Taita Diosta yuyarij, Taita Diosta manchaj, Taita Diosta mañaracujmi carca. Israelcunata llaquishpa achcata cujmi carca. 3Shuj punlla chaupi chishi shinatami, muscuipi shina Taita Diospaj ángel pai maipi canman yaicujta ricurca. Chai angelca:
–¡Cornelio!– nijpimi
4Cornelioca manchaihuan ricurashpa:
–Amito ¿imatataj nihuangui?– nijpi angelca:
–Can mañashcacunapish Taita Diospajman chayashcami, can cushcacunatapish Taita Diosca ricushcami. 5Cunanca Jopemanta Pedro nishca Simonta pushamuchun cambaj runacunata cachai. 6Paica carata ñutujllata ruraj Simonpaj huasipimi pozacun. Chai huasica mama cucha c'uchupimi. Pedro shamushpami can imallata rurana cashcataca huillanga– nircami.
7Chai rimacuj ángel ña rijpica, Cornelioca paipajta ruraj ishqui runacunatapish, Taita Diosta yuyarij pai alli nishca soldadotapishmi cayarca. 8Imalla tucushcata tucuita parlashca q'uipaca, paicunataca Jopemanmi cacharca.
9Cayandij punllaca chai cachashca runacuna ñanta rishpami Jope puebloman ñalla chayagricurcacuna. Chai horas shinallatajmi Pedroca, Taita Diosta mañangapaj huasi jahuaman huichiyarca. Chaica chaupi punlla shinami carca. 10Pedroca chaipi cashpami achcata yaricachirca. Micunata huasiyuj yanungacamaca muscuipi ricurij shinatami ricurca. 11Chaipica jahua pacha pascarijpi shuj jatun linso shinata chuscu puntapi huatashca cai pachaman uriyamucujtami ricurca. 12Chaipica chuscu chaquihuan purij animalcunata, huijsahuan purij animalcunata, jahuata purij pajarocunatapishmi ricurca. 13Chaita ricucujpica shuj rimashca uyarishpami:
–Pedro, jatari, huañuchishpa micui– nijpi,
14Pedroca:
–Mana, Mandaj Jesús, imapish mana micuna cashcata, mapami nishcacunataca manataj micushcanichu– nirca.
15Chaimi chai rimajllataj cutin rimashpaca:
–Taita Dios chuyayachishcataca, canca ama mapami nichu– nirca.
16Chashnataca quimsa cutin ricuchishpaca, chai linsotaca jahua pachallamantaj aparcallami. 17Chaita ricushpaca Pedroca, muscuipi shina ricushcaca imatashi nisha nin nishpami yuyacurca. Chaicamaca Cornelio cachashca runacunaca, tapui tapuimi Simonpaj huasiman chayarcacuna. 18Paicuna chayashpaca:
–¿Pedro nishca Simonca caipipishchari pozacun?– nishpami tapurcacuna.
19Chai ricushcata Pedro yuyaricujpirajmi Taita Diospaj Espirituca cashna nirca: “Cantaca quimsa runacunami mashcacun. 20Jatari, uriyai, paicunahuan rilla. Rishachu, manachu risha nishpaca ama yuyanguichu. Ñucami paicunataca caiman cachachun nircani” nircami.
21Chaimi Pedroca, Cornelio cachashca runacunapajman uriyashpaca:
–Ñucami cancuna mashcacunca cani. ¿Imapajchari cancunaca shamurcanguichij?– nijpi,
22paicunaca:
–Ñucanchijca patsaj soldadocunata mandaj Cornelio cachajpimi shamunchij. Paica Taita Diosta manchaj, cashcata rurajmi. Paica judiocuna alli nishcami causan. Paimanmi jucha illaj ángel ricurishpaca: “Pedrota cambaj huasiman pushanaman cachai, pai imalla huillashcata alli uyangui” nishcami– nircacunami.
23Chaimi Pedroca paicunata pai pozacun huasiman yaicuchishpaca chai tutaca chaipi pacarichirca. Cayandij punlla Pedro paicunahuan rijpica, Jope pueblopi causaj maijan crijcunapishmi paicunahuan rirca.
24Chai cayandij punllaca, Cesareamanmi chayarcacuna. Cornelioca paipaj familiacunata, amigocunatapish tandachishpami shuyacushca carca. 25Corneliopaj huasiman Pedro chayajpica, Cornelioca tupanaman llujshishpaca Pedrota adorangapaj, 26cungurijpimi Pedroca:
–Jatari, ñucapish can shinallataj runallami cani– nishpa jatarichirca.
27Shina nishpa parlanacuihuan huasi ucuman yaicushpaca, achcacuna tandanacushca cajtami ricurca. 28Chaimi Pedroca paicunataca:
–Judiocunaca, mana judiocunahuanca mapayanamanta mana tandanacuna, mana c'uchuyanallapish cashcataca cancunallataj yachanguichijmi. Ñucanchijca cancunataca yanga runacunalla cashcata yuyashpa causacujpimi Taita Diosca: “Canca pitapish millananmi, mapami nishpaca ama ningui” nishpa ricuchishpa huillarca. 29Chaimantami ñucaca can cachashca runacuna chayajpica, imata mana nishpa shamuni. Ñucataca ¿imapajtaj cayarcangui?– nijpimi,
30Cornelioca:
–Ñami chuscu punlla tucun. Ñucaca cunan shinallataj chishimi quimsa horas shinata manaraj micushpa ñuca huasipi Taita Diosta mañacurcani. Chaipimi achij nicuj churanata churashca runa ñuca ñaupajpi ricurishpa, 31cashna nirca: “Cornelio, can mañashcataca Taita Diosca uyashcami. Huajchacunaman can cushcacunatapish Taita Diosca ricushcami. 32Cunanca Pedro nishca Simonta Jope pueblomanta pushanaman cachai. Paica carata ñutujllata ruraj Simonpaj huasipimi pozacun. Chai huasica mama cucha c'uchupimi. Chai Pedro shamushpami can imalla rurana cashcataca huillanga” nircami. 33Chaimantami ñucaca canta pushanaman cacharcani. Allitajchari shamurcangui. Ñucanchijman Taita Dios imallata huillachun nishcata huillailla. Ñucanchijca chaita uyangapajmi Taita Diospaj ñaupajpi caipi canchij– nircami.
Corneliopaj huasipi Pedro huillashcami
34Chaipi Pedro huillai callarishpaca cashnami nirca:
–Pi cashpapish Taita Diospaj ñaupajpica tucuicuna chai shinallataj cashcatami cunantajca yachani. 35Maijan llajtapi causaj cashpapish Taita Diosta manchashpa allita rurajtami Taita Diosca alli nin. 36Taita Diosca shuj huillanatami israelcunamanca cacharca. Chaica Jesucristomanta sumaj causaita charina cashcata huillanami. Paica tucuicunata Mandajmi. 37Chai huillaica Juan bautizarinami nishpa huillashca q'uipa Galileamanta callarishpa, tucui Judeata ima shinalla huashan huashan yacharishcataca cancunallataj yachanguichijmi. 38Paica Nazaretmanta Jesusmi. Paitami Taita Diosca jucha illaj Espirituta cushpa, tucuita rurai tucuj cachun churarca. Taita Dios paihuan cajpimi, diablo llaquichicushcacunataca tucuicunata alliyachishpa, achca allicunata rurashpa purirca. 39Ñucanchijca Judea llajtapi, Jerusalenpipish Jesús tucui imalla rurashcacunata ricushcata huillajcunami canchij. Paitaca caspipi huarcushpami huañuchircacuna. 40Huañuchijpipish Taita Diosca paitaca quimsa punllapi causachishpami ñucanchijman ricurichun saquirca. 41Mana tucuicunaman ricurircachu. Tucui imallata ricushcata huillachun Taita Dios ñaupaman agllashca ñucanchijllamanmi ricurirca. Huañushcacunapaj chaupimanta causarishca q'uipaca, ñucanchijca paihuanmi micurcanchij, ubyarcanchij. 42Chaipimi Jesusca tucuicunaman huillachun mandarca. Causajcunapajpish huañushcacunapajpish Jesustaca juez cachunmi Taita Diosca churarca nishpa huillachunpishmi mandarca. 43Profetacunapish Jesusmanta huillashpaca, paita crijcunallatami juchacunata perdonanga nishpami tucuicunallataj huillarcacuna– nircami.
Mana israelcunapish jucha illaj Espirituta chasquishcami
44Pedro chashna huillacujpirajmi, jucha illaj Espirituca huillashcata tucui uyacujcunapaj jahuaman shamurca. 45Circuncisionta rurashca crijcunami Pedrohuanca shamushcacuna carca. Paicunaca mana judiocunapaj jahuamanpish, jucha illaj Espíritu shamujta ricushpaca yallitaj mancharircacuna. 46Shujtaj rimaicunapi rimashpa, Taita Diosta jatunyachicujta uyashpami mancharircacuna. 47Chaimi Pedroca:
–Paicunapish ñucanchij shinallatajmari jucha illaj Espirituta chasquincuna. Paicuna yacupi ama bautizarichunca ¿pitaj jarcangari?– nijpimi,
48Pedroca:
–Mandaj Jesuspaj shutipi paicunata bautizaichij– nishpa mandarca. Chaimantaca asha punllacunacama paicunahuan saquirichunmi Pedrotaca rogarcacuna.
Currently Selected:
HECHOS 10: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
HECHOS 10
10
Pedropish Corneliopish
1Cesareapica, Cornelio shuti shuj runami tiyarca. Paica “Italiana” nishca soldadocunapurapi caj patsaj soldadocunata mandajmi carca. 2Paica paipaj familiandij Taita Diosta yuyarij, Taita Diosta manchaj, Taita Diosta mañaracujmi carca. Israelcunata llaquishpa achcata cujmi carca. 3Shuj punlla chaupi chishi shinatami, muscuipi shina Taita Diospaj ángel pai maipi canman yaicujta ricurca. Chai angelca:
–¡Cornelio!– nijpimi
4Cornelioca manchaihuan ricurashpa:
–Amito ¿imatataj nihuangui?– nijpi angelca:
–Can mañashcacunapish Taita Diospajman chayashcami, can cushcacunatapish Taita Diosca ricushcami. 5Cunanca Jopemanta Pedro nishca Simonta pushamuchun cambaj runacunata cachai. 6Paica carata ñutujllata ruraj Simonpaj huasipimi pozacun. Chai huasica mama cucha c'uchupimi. Pedro shamushpami can imallata rurana cashcataca huillanga– nircami.
7Chai rimacuj ángel ña rijpica, Cornelioca paipajta ruraj ishqui runacunatapish, Taita Diosta yuyarij pai alli nishca soldadotapishmi cayarca. 8Imalla tucushcata tucuita parlashca q'uipaca, paicunataca Jopemanmi cacharca.
9Cayandij punllaca chai cachashca runacuna ñanta rishpami Jope puebloman ñalla chayagricurcacuna. Chai horas shinallatajmi Pedroca, Taita Diosta mañangapaj huasi jahuaman huichiyarca. Chaica chaupi punlla shinami carca. 10Pedroca chaipi cashpami achcata yaricachirca. Micunata huasiyuj yanungacamaca muscuipi ricurij shinatami ricurca. 11Chaipica jahua pacha pascarijpi shuj jatun linso shinata chuscu puntapi huatashca cai pachaman uriyamucujtami ricurca. 12Chaipica chuscu chaquihuan purij animalcunata, huijsahuan purij animalcunata, jahuata purij pajarocunatapishmi ricurca. 13Chaita ricucujpica shuj rimashca uyarishpami:
–Pedro, jatari, huañuchishpa micui– nijpi,
14Pedroca:
–Mana, Mandaj Jesús, imapish mana micuna cashcata, mapami nishcacunataca manataj micushcanichu– nirca.
15Chaimi chai rimajllataj cutin rimashpaca:
–Taita Dios chuyayachishcataca, canca ama mapami nichu– nirca.
16Chashnataca quimsa cutin ricuchishpaca, chai linsotaca jahua pachallamantaj aparcallami. 17Chaita ricushpaca Pedroca, muscuipi shina ricushcaca imatashi nisha nin nishpami yuyacurca. Chaicamaca Cornelio cachashca runacunaca, tapui tapuimi Simonpaj huasiman chayarcacuna. 18Paicuna chayashpaca:
–¿Pedro nishca Simonca caipipishchari pozacun?– nishpami tapurcacuna.
19Chai ricushcata Pedro yuyaricujpirajmi Taita Diospaj Espirituca cashna nirca: “Cantaca quimsa runacunami mashcacun. 20Jatari, uriyai, paicunahuan rilla. Rishachu, manachu risha nishpaca ama yuyanguichu. Ñucami paicunataca caiman cachachun nircani” nircami.
21Chaimi Pedroca, Cornelio cachashca runacunapajman uriyashpaca:
–Ñucami cancuna mashcacunca cani. ¿Imapajchari cancunaca shamurcanguichij?– nijpi,
22paicunaca:
–Ñucanchijca patsaj soldadocunata mandaj Cornelio cachajpimi shamunchij. Paica Taita Diosta manchaj, cashcata rurajmi. Paica judiocuna alli nishcami causan. Paimanmi jucha illaj ángel ricurishpaca: “Pedrota cambaj huasiman pushanaman cachai, pai imalla huillashcata alli uyangui” nishcami– nircacunami.
23Chaimi Pedroca paicunata pai pozacun huasiman yaicuchishpaca chai tutaca chaipi pacarichirca. Cayandij punlla Pedro paicunahuan rijpica, Jope pueblopi causaj maijan crijcunapishmi paicunahuan rirca.
24Chai cayandij punllaca, Cesareamanmi chayarcacuna. Cornelioca paipaj familiacunata, amigocunatapish tandachishpami shuyacushca carca. 25Corneliopaj huasiman Pedro chayajpica, Cornelioca tupanaman llujshishpaca Pedrota adorangapaj, 26cungurijpimi Pedroca:
–Jatari, ñucapish can shinallataj runallami cani– nishpa jatarichirca.
27Shina nishpa parlanacuihuan huasi ucuman yaicushpaca, achcacuna tandanacushca cajtami ricurca. 28Chaimi Pedroca paicunataca:
–Judiocunaca, mana judiocunahuanca mapayanamanta mana tandanacuna, mana c'uchuyanallapish cashcataca cancunallataj yachanguichijmi. Ñucanchijca cancunataca yanga runacunalla cashcata yuyashpa causacujpimi Taita Diosca: “Canca pitapish millananmi, mapami nishpaca ama ningui” nishpa ricuchishpa huillarca. 29Chaimantami ñucaca can cachashca runacuna chayajpica, imata mana nishpa shamuni. Ñucataca ¿imapajtaj cayarcangui?– nijpimi,
30Cornelioca:
–Ñami chuscu punlla tucun. Ñucaca cunan shinallataj chishimi quimsa horas shinata manaraj micushpa ñuca huasipi Taita Diosta mañacurcani. Chaipimi achij nicuj churanata churashca runa ñuca ñaupajpi ricurishpa, 31cashna nirca: “Cornelio, can mañashcataca Taita Diosca uyashcami. Huajchacunaman can cushcacunatapish Taita Diosca ricushcami. 32Cunanca Pedro nishca Simonta Jope pueblomanta pushanaman cachai. Paica carata ñutujllata ruraj Simonpaj huasipimi pozacun. Chai huasica mama cucha c'uchupimi. Chai Pedro shamushpami can imalla rurana cashcataca huillanga” nircami. 33Chaimantami ñucaca canta pushanaman cacharcani. Allitajchari shamurcangui. Ñucanchijman Taita Dios imallata huillachun nishcata huillailla. Ñucanchijca chaita uyangapajmi Taita Diospaj ñaupajpi caipi canchij– nircami.
Corneliopaj huasipi Pedro huillashcami
34Chaipi Pedro huillai callarishpaca cashnami nirca:
–Pi cashpapish Taita Diospaj ñaupajpica tucuicuna chai shinallataj cashcatami cunantajca yachani. 35Maijan llajtapi causaj cashpapish Taita Diosta manchashpa allita rurajtami Taita Diosca alli nin. 36Taita Diosca shuj huillanatami israelcunamanca cacharca. Chaica Jesucristomanta sumaj causaita charina cashcata huillanami. Paica tucuicunata Mandajmi. 37Chai huillaica Juan bautizarinami nishpa huillashca q'uipa Galileamanta callarishpa, tucui Judeata ima shinalla huashan huashan yacharishcataca cancunallataj yachanguichijmi. 38Paica Nazaretmanta Jesusmi. Paitami Taita Diosca jucha illaj Espirituta cushpa, tucuita rurai tucuj cachun churarca. Taita Dios paihuan cajpimi, diablo llaquichicushcacunataca tucuicunata alliyachishpa, achca allicunata rurashpa purirca. 39Ñucanchijca Judea llajtapi, Jerusalenpipish Jesús tucui imalla rurashcacunata ricushcata huillajcunami canchij. Paitaca caspipi huarcushpami huañuchircacuna. 40Huañuchijpipish Taita Diosca paitaca quimsa punllapi causachishpami ñucanchijman ricurichun saquirca. 41Mana tucuicunaman ricurircachu. Tucui imallata ricushcata huillachun Taita Dios ñaupaman agllashca ñucanchijllamanmi ricurirca. Huañushcacunapaj chaupimanta causarishca q'uipaca, ñucanchijca paihuanmi micurcanchij, ubyarcanchij. 42Chaipimi Jesusca tucuicunaman huillachun mandarca. Causajcunapajpish huañushcacunapajpish Jesustaca juez cachunmi Taita Diosca churarca nishpa huillachunpishmi mandarca. 43Profetacunapish Jesusmanta huillashpaca, paita crijcunallatami juchacunata perdonanga nishpami tucuicunallataj huillarcacuna– nircami.
Mana israelcunapish jucha illaj Espirituta chasquishcami
44Pedro chashna huillacujpirajmi, jucha illaj Espirituca huillashcata tucui uyacujcunapaj jahuaman shamurca. 45Circuncisionta rurashca crijcunami Pedrohuanca shamushcacuna carca. Paicunaca mana judiocunapaj jahuamanpish, jucha illaj Espíritu shamujta ricushpaca yallitaj mancharircacuna. 46Shujtaj rimaicunapi rimashpa, Taita Diosta jatunyachicujta uyashpami mancharircacuna. 47Chaimi Pedroca:
–Paicunapish ñucanchij shinallatajmari jucha illaj Espirituta chasquincuna. Paicuna yacupi ama bautizarichunca ¿pitaj jarcangari?– nijpimi,
48Pedroca:
–Mandaj Jesuspaj shutipi paicunata bautizaichij– nishpa mandarca. Chaimantaca asha punllacunacama paicunahuan saquirichunmi Pedrotaca rogarcacuna.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.