GÉNESIS 26
26
Gerar pueblopi Isaac cashcami
1Chai punllacunapica, Isaac causacun llajtapica, paipaj yaya Abraham causacui punllacunapi jatun yaricai tiyashca shinallatajmi jatun yaricai tiyarca. Chaimi Isaacca filisteocunata jatun mandaj Abimelec causacun Gerar puebloman rirca. 2Chaipi cajpi Mandaj Dios ricurishpami Isaactaca: “Egiptomanca ama uriyangui. Ashtahuanpish ñuca ricuchishca llajtapi causai. 3Chai llajtapica ashacamalla causangui. Ñucami canhuanca casha. Tucui ima allicunatapish cushami. Ashtahuanpish canman, cambaj huahua huahuacunamanmi tucui chai llajtacunataca cusha. Chashna rurashpami, cambaj yaya Abrahamman cushatajmi nishcataca pajtachisha. 4Cambaj huahua huahuacunataca jahua pacha luzerocunata shina yallitaj achcata mirachishpami, tucui chai llajtacunataca cambaj huahua huahuacunaman cusha. Cambaj huahua huahuacunamantami tucui llajtacuna alli nishca canga. 5Cambaj yaya Abraham ñuca rimashcata uyashpa ima shina causana shinataj causashcamanta, ñuca quillcachishcacunata, chaitataj pajtachichun nishcacunata, ñuca mandashcacunata cazushcamantami chashna rurasha” nircami.
6Isaacca, Gerar pueblopimi causarca. 7Chaipi cajpimi, chaipi causaj gentecunaca Rebecaca cambaj huarmichu nishpa tapujpi, paica: “Ñuca panimi” nirca. Paica: “Ñuca huarmimi” nijpica chaipi causaj gentecuna Rebecamanta paita huañuchinata manchashcamantami chashna nirca. Rebecaca sumaj ñahui huarmimi carca.
8Ashtahuanpish chaipi ña unita causacushpami shuj punllaca cashna tucurca. Isaacca paipaj huarmi Rebecata llambushpa sumajta c'uyacujtami, filisteocunata jatun mandaj Abimelecca paipaj huasi ventanamanta ricurca. 9Chaipimi Abimelecca Isaacta cayashpaca:
–Paica cambaj huarmimari cashca. ¿Ima nishpataj ñuca panillami nircangui?– nijpi Isaacca:
–Ñuca huarmita quichungapajca, ñucata huañuchingacunamari yuyashpami chashna nircani– nirca.
10Abimelecca:
–¿Ima nishpataj canca ñucanchijtaca chashna rurarcanguiyari? Can chashna umashcamanta cai pueblopi causajcuna maijanpish cambaj huarmihuan dormishca cajpica, canmari ñucanchijtaca juchallichinguiman carca– nircami.
11Shina nishpami, Abimelecca, tucui chai pueblopi causajcunataca:
–Maijanpish cai runata, mana cashpaca paipaj huarmita p'iñachijca huañungatajmi– nishpa manchachirca.
12Isaacca chai llajtapica, achca granotami tarpurca. Chai huataca Mandaj Dios alli p'ucuchijpimi, cada sacomanta patsaj sacota tandarca. 13Chashnami Isaacca tucui imapipish alli llujshishpa achcata charij tucurca. Tucuicunata yalli tucungacamami charijyashpa catirca. 14Paica ovejacunatapish, vacacunatapish achca canllacunata, paipajta rurajcunatapish achcacunatami charirca. Chaimi filisteocunaca Isaactaca envidiarcacuna. 15Isaacpaj yaya Abraham causai punllapi paipajta rurajcuna allashpa rurashca pugyucunatami filisteocunaca allpata jundachishpa chingachishca carca. 16Abimelecca, Isaactaca:
–Canca tucui ñucanchijta yalli charijmi tucushcangui. Cunanca cai ñucanchij llajtamanta llujshishpa ri– nirca.
17Isaac chaimanta rishpaca, Gerar pueblo c'uchullapi caj pambaman rishpami, carpa huasicunata shayachishpa chaipi causarca. 18Chaipi causacushpami, Isaacca paipaj yaya Abraham rurachishca pugyucunata Abraham huañushca q'uipa filisteocuna chingachishcataca cutinllataj allachishpa, chai pugyucunataca paipaj yaya shutichishca shuticunallatataj shutichirca. 19Isaacpajta rurajcunaca chai pambapi pugyucunata rurangapaj allacushpami, t'imburishpa llujshicuj achca yacuta japircacuna. 20Chai yacuta quichunacushpami, Gerarpi causajcunapaj michijcunahuan, Isaacpaj michijcunahuanca: “Ñucanchij yacumi” nishpa p'iñanacurcacuna. Chai pugyuta mitsanacushpa p'iñanacushcamantami Isaacca chai pugyutaca: “Esekta” shutichirca. 21Chai q'uipapish Isaacpajta rurajcunaca shujtaj pugyutami allarcacuna. Chai pugyumantapish cutinllataj p'iñanacucujpimi, Isaacca chai pugyutaca: “Sitnata” shutichirca. 22Isaacca chaimantapish rishpaca, shujtaj pugyutami allachirca. Chai pugyumantaca pi mana imata nijpimi: “Chai pugyutaca Rehobotta” shutichirca. Mandaj Diosmari ñucanchijmanca ashtahuan mirachin. Chaimanta cunanca: “Cai llajtapica achcatamari charijyashun” nishpami chashna shutichirca.
23Chaimantaca Beersebamanmi huichiyarca. 24Chai tutami Mandaj Diosca Isaacman ricurishpaca:
“Ñucaca cambaj yaya Abrahampaj Taita Diosmi cani.
Ñuca canhuan cashcamanta ama manchaichu.
Cantaca alli cashca cachun nishami.
Cambaj huahua huahuacunataca achcatami mirachisha.
Ñucapajta ruraj Abrahamta c'uyashcamantami chashna rurasha” nircami.
25Isaacca chaipipish shuj altarta rurashpami, Mandaj Diosta mañarca. Paipajpish carpa huasita shayachircami. Isaacpajta rurajcunapish shuj pugyutami chaipi allarcacuna.
Isaacpish Abimelecpish mana p'iñanacushpa causanata ari ninacushcami
26Shuj punllami Abimelecca Gerar pueblomanta Isaac maipi canman shamurca. Paihuanca paiman alli yuyaita cuj Ahuzatpish, paipaj soldadocunata mandaj Ficolpishmi shamurca. 27Chaimi Isaacca:
–Cancunapurapi causacujta ñucata p'iñashpa llujshichishpa cachashca jahuaca ¿imapajtaj ñucapajman shamunguiyari?– nirca.
28Shina nijpimi, paicunaca:
–Ñucanchijca Mandaj Dios canhuan cajtami ricunchij. Cunanca canhuan ñucanchijhuan shuj ruranatami ari ninacushun ninchij. Chai ari ninacunaca caimi: 29Ñucanchijca cantaca imata mana p'iñachircanchijchu. Ashtahuanpish ñucanchijca cambaj allitami rurarcanchij. Can llujshimucujpipish sumajta rishca cangui nishpami cacharcanchij. Chaimanta cunanca canpish ñucanchijpajca ima millaita ama rurapanguichu. Canca Mandaj Dios alli nishcamari cangui– nircacunami.
30Chaipimi Isaacca sumaj micuita rurashpa paicunahuan micurca ubyarca. 31Cayandij tutamanta utcata jatarishpaca Isaacpish, Abimelecpish ishquindijmanta chaitataj pajtachinatami ari ninacurca. Isaac caya minchacama nijpica, caishujcunapish Isaactaca sumajtami caya minchacama nishpa rircacuna.
32Chai punllallatajmi Isaacpajta rurajcunaca paipajman shamushpaca, pugyuta rurangapaj allacushcapica: “Ñami yacuta japinchij” nircacuna. 33Isaacca chai pugyutaca: “Seba” shutitami shutichirca. Chaimi chai pueblopish cunan punllacama Beerseba shuti. 34Esauca chuscu chunga huatayuj cashpami, heteo Beeripaj ushushi Judittapish, heteo Elonpaj ushushi Basemattapish paipaj huarmi cachun japirca. 35Chai ishqui huarmicunamantaca Isaacpish, Rebecapish llaquitami apacurcacuna.
Currently Selected:
GÉNESIS 26: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
