GÉNESIS 28
28
1Chaimi Isaacca, Jacobta cayashpa alli cashca cachun nishpa mandashpaca: “Cai Canaán llajtapi causajcunapaj ushushicunataca cambaj huarmi cachunca amataj japinguichu. 2Cunanca Padan-arampi caj cambaj mamapaj yaya Betuelpaj huasiman ri. Chaipica cambaj mamapaj turi Labanpaj ushushicunamanta maijantapish cambaj huarmi cachun japingui. 3Pailla Tucuita Rurai Tucuj Taita Dios, canmanca achca allicunata cuchun. Cambaj huahuacunatapish yallitaj achcata mirachichun. Yallitaj achcacuna tucungacama mirachichun. 4Abrahamta alli cashca cachun nishcallatataj canmanpish, cambaj huahua huahuacunamanpish cuchun. Taita Dios Abrahamman cushca cunan ñucanchij causacun llajtataca chashnami quiquin allpataj tucungacama doñoyashpa catingacuna” nircami.
5Chashna Isaac Jacobta Padan-aramman cachajpimi, paica arameo Betuelpaj churi Labanpaj huasiman rirca. Labanca Jacobpaj, Esaupaj mama Rebecapaj turimi carca.
6Esauca paipaj huauqui Jacobta yaya Isaac alli cashca cachun nishpa Padan-aramman rishpa, chaipi paipaj huarmi cachun huarmita japichun cachashcata, chaiman cachacushpaca: “Cai Canaanpi causajcunapaj ushushicunataca cambaj huarmi cachunca amataj japinguichu” nishpa cachashcatami yacharca. 7Esauca Jacobtaca paipaj yaya mama mandashcata cazushpa Padan-arampi causanaman rijta ricushpami, 8Canaanpi causajcunapaj ushushicunamantaca paipaj yaya Isaacca mana cushicui cashcata yacharca. 9Chaimi Esauca cananea huarmicunata charishca jahuapish Abrahampaj churi Ismaelpajman rishpa, paipaj ushushi Mahalatta paipaj huarmi cachun japirca. Mahalatca Nebaiotpaj panimi carca.
Bet-elpi Jacobman Taita Dios ricurishcami
10Jacobca Beersebamanta llujshishpaca, Haranmanmi rirca. 11Chaiman ricushpaca shuj pambaman chayashpami chaipi dormirca. Inti huashicushpa ña tutayashcamantami paica chai pambapi siricuj rumicunamanta shuj rumita japishpa saunashpa chaipi dormirca. 12Paica, pambamanta jahua pachacama shuj jatun escalera paipaj c'uchupi shayacujta, chai escalerapica Taita Diospaj angelcuna huichiyacujta uriyacujtami muscurca. 13Mandaj Taita Diosca chai escalera punta jahuallamantatajmi: “Ñucaca cambaj abuelo Abrahampaj, cambaj yaya Isaacpaj Mandaj Taita Diosmi cani. Can siricun llajtataca canmanpish, cambaj huahua huahuacunamanpishmi cusha. 14Cambaj huahua huahuacunaca, ñutu allpa shinami canga. Inti llujshin ladomantaca, inti huashicun ladocama, janaj ladomantaca, ura ladocamami mirarishpa causangacuna. Canmanta, cambaj huahua huahuacunamantami tucui cai pachapi causajcunaca alli nishca cangacuna. 15Ñucaca canhuanmi cani. Can maiman rijpipish ñucami pushasha. Cantaca cai llajtallamantajmi tigrachimusha. Canman imata cusha nishcataca cushatajmi. Cantaca manataj saquishachu” nijtami muscurca.
16Jacobca dormicushcamanta rijcharishpaca: “Mandaj Diosca caipimari cashca. Ñucaca chaitaca manamari yacharcanichu” nircami. 17Paica achcata mancharishpa caparirishpami: “¡Cai pambaca jatun mancharinamari! ¡Taita Diospaj huasipish, jahua pacha pungupish caipimari cashca!” nirca.
18Jacobca cayandij tutamanta utcata jatarishpami, pai saunashca rumitaca Taita Diospajlla cashcata ricunapaj cachun nishpa huichiman shayachishpa aceiteta churarca. 19Ñaupamanca chai puebloca, Luz shuti cashca cajpipish, Jacobca chaitaca, Bet-el shutitami shutichirca.
20Chaipimi Jacobca Mandaj Diosman cuna tucushpa cashna nirca: “Taita Dios ñucahuan rishpa, cunan ñuca maiman ricunpi tucuipi cuidashpa, micunatapish carashpa, churanatapish cushpa, 21ñuca yayapaj huasiman sumajta tigrachishpatajca ñuca Mandaj Taita Diosmi canga. 22Taita Dios caipi cashcata ricuchij cachun ñuca caipi churashca rumi tiyacunpish, Taita Diospaj huasimi canga. Tucui imallata Dios ñucaman cushcacunamantapish, chungamanta shujta ch'icanchishpa cucushallami” nircami.
Currently Selected:
GÉNESIS 28: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
