GÉNESIS 5
5
Adanpaj huahua huahuacunami
(1 Cr 1.1-4)
1Adanpaj huahua huahua callari yayacunapaj shuticunata quillcashcaca caicunami:
Taita Diosca runata ruracui punllaca, paiman rijchajtami rurarca. 2Taita Diosca c'arita huarmita rurashpaca, paicunata rurashca punllallatajmi Adán shutita shutichishpa alli cashca cachun nirca.
3Adanca, 130 huatayuj cashpami paiman rijchaj, paitajlla shuj c'ari huahuata charirca. Chai huahuataca Settami shutichirca. 4Set churita charishca punllamantaca Adanca, 800 huatacunahuanmi causarcaraj. Churicunatapish ushushicunatapish charircarajmi. 5Adanca tucuimantaca, 930 huatacunata causashpami huañurca.
6Setca, 105 huatayuj cashpami, Enós shuti churita charirca. 7Enós churita charishca punllamantaca, 807 huatacunahuanmi Setca causarcaraj. Churicunatapish ushushicunatapish charircarajmi. 8Setca tucuimantaca, 912 huatata causashpami huañurca.
9Enosca iscun chunga huatayuj cashpami Cainán shuti churita charirca. 10Cainán churita charishca punllamantaca Enosca, 815 huatacunahuanmi causarcaraj. Churicunatapish ushushicunatapish charircarajmi. 11Enosca tucuimantaca, 905 huatata causashpami huañurca.
12Cainanca canchis chunga huatayuj cashpami, Mahalaleel shuti churita charirca. 13Mahalaleel churita charishca punllamantaca Cainanca, 840 huatacunahuanmi causarcaraj. Churicunatapish ushushicunatapish charircarajmi. 14Cainanca tucuimantaca, 910 huatata causashpami huañurca.
15Mahalaleelca sujta chunga pichca huatayuj cashpami Jared shuti churita charirca. 16Jared churita charishca punllamantaca Mahalaleelca, 830 huatacunahuanmi causarcaraj. Churicunatapish ushushicunatapish charircarajmi. 17Mahalaleelca tucuimantaca, 895 huatata causashpami huañurca.
18Jaredca, 162 huatayuj cashpami, Enoc shuti churita charirca. 19Enoc churita charishca punllamantaca Jaredca, 800 huatacunahuanmi causarcaraj. Churicunatapish ushushicunatapish charircarajmi. 20Jaredca tucuimantaca, 962 huatata causashpami huañurca.
21Enocca sujta chunga pichca huatayuj cashpami, Matusalén shuti churita charirca. 22Enocca, Matusalén churita charishca punllamantaca, 300 huatacunahuanmi Taita Dioshuan purirca. Churicunatapish ushushicunatapish charircarajmi. 23Enocca tucuimantaca, 365 huatacunatami causarca. 24Enocca Taita Dioshuanmi purirca. Taita Dios apajpimi paica ñapish chingarircalla.
25Matusalenca, 187 huatayuj cashpami, Lamec shuti churita charirca. 26Lamec churita charishca punllamantaca, Matusalenca 782 huatacunahuanmi causarcaraj. Churicunatapish ushushicunatapish charircarajmi. 27Matusalenca tucuimantaca, 969 huatata causashpami huañurca.
28Lamecca, 182 huatayuj cashpami, shuj c'ari huahuata charirca. 29Chai huahuataca: “Mandaj Dios allpata mana alli nishcamanta, ñucanchij maquihuan allpapi imata rurashpapish sinchita trabajashpa llaquita apacunmantaca cai huahuami samachinga” nishpami, Noé shutita shutichirca. 30Lamecca Noé churita charishca punllamantaca, 595 huatacunahuanmi causarcaraj. Churicunatapish ushushicunatapish charircarajmi. 31Lamecca tucuimantaca, 777 huatacunata causashpami huañurca.
32Noeca, 500 huatacunayuj cashpami Sem, Cam, Jafet shuti churicunata charirca.
Currently Selected:
GÉNESIS 5: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
