JUAN 6

Pichca huaranga gentecunaman carashcami

(Mt 14.13-21; Mr 6.30-44; Lc 9.10-17)

1Chai q'uipaca Jesusca, Galilea cucha ch'imba lado urimanmi rirca. Chai cucha urica Tiberias shutimi carca. 2Pi mana alliyachipaj unguihuan cajcunata Jesús alliyachijta ricushcamantami achcacuna paita catishpa rircacuna. 3Chaipimi Jesusca shuj urcuman huichiyashpa, paipaj yachacujcunandij chaipi tiyarirca. 4Judiocunapaj Pascua fiestami ña chayamucurca. 5Jesusca achcacuna paipajman shamucujta ricushpami, Felipetaca:

–Cai tucuicunaman carangapajca ¿maipitaj tandataca randishun?– nirca.

6Ashtahuanpish ima nijta uyangapajllami chashnaca nirca. Jesusca, paillataj imata rurana cashcataca ñami yacharca. 7Chaipimi Felipeca:

–Ishqui patsaj denariocunahuan randishca tandapish, mirga mirgallapish mana pajtangachu– nirca.

8Yachacujcunapuramanta Simón Pedropaj huauqui Andresmi cashna nirca:

9–Caipi shuj huambrami pichca cebada tandata, ishqui chalhuandij charicun. Chaillaca cai tucuicunapajca ¿imataj pajtangari?– nijpimi,

10Jesusca:

–Tucuicunata quinrilla siririchun mandai– nirca.

Chaipica achca bulluj pambami carca. Chaipimi pichca huaranga shina c'aricuna quinrilla sirirircacuna. 11Jesusca chai tandata japishpa Taita Diosta pagui nishpaca, yachacujcunamanmi chaupishpa chaupishpa curca. Paicunaca, tucui chaipi cajcunamanmi cararcacuna. Chashnallatajmi chalhuatapish chaupishpa chaupishpa curca. Mana nijtami cararcacuna. 12Ña mana nijta micujpimi, paipaj yachacujcunataca:

–Ama ima chingarichun, puchushcacunataca tandachichij– nirca.

13Chai pichca cebada tandallamanta micujcunaca mana nijta micujpica puchushcacunataca, chunga ishqui canasta jundatami tandarcacuna. 14Chai runacunaca, pi mana rurai tucuipajta Jesús rurajta ricushpami:

–Caica cai pachaman shamuna cashca Profetatajmari– nircacuna.

15Ashtahuanpish paitaca, jatun Mandajta rurangapaj huaicashpa shamushun ninacujtami Jesusca yacharca. Chaimantami pailla cutin jahua urcuman rirca.

Yacu jahuata Jesús purishcami

(Mt 14.22-27; Mr 6.45-52)

16Ña tutayamucujpimi, paipaj yachacujcunaca cuchaman uriyamushpaca, 17Capernaumman cuchata ch'imbangapaj barcopi yaicurcacuna. Ñami amsayashca carca, Jesusca manaraj paicunapajman shamushcachu carca. 18Ña ch'imbacujpica achca huaira jatarishpami cucha yacutaca caiman chaiman shitacurca. 19Paicunaca cunan pichca, mana cashpaca sujta kilometrollata rishcapimi, yacu jahuata purishpa barcoman Jesús c'uchuyacujta ricushpa mancharircacuna. 20Jesusca paicunataca:

–Ñucamari cani. Ama mancharichijchu– nijpimi,

21cushicushpa, paitaca barcoman yaicuchircacuna. Chaimantaca, paicuna maiman ricushcamanca utcami chayagrircacuna.

Gentecuna Jesusta mashcashcami

22Cayandij punllaca cucha ch'imbanijpi saquirijcunaca:

–Caina chishica shuj barcollami caipi carca. Jesusca chai barcopica mana paipaj yachacujcunahuan yaicurcachu. Chai barcopica yachacujcunallami rirca– ninacurcacunami. 23Ashtahuanpish maipimi Mandaj Jesús Taita Diosta pagui nishpa tandata cararca chai cuchullamanmi Tiberias pueblomanta shujtaj barcocuna chayamushca carca. 24Jesuspish, paipaj yachacujcunapish mana chaipi cajta ricushpami, paicunaca barcocunapi yaicushcahuan Jesusta mashcangapaj Capernaumman rircacuna.

Jesusca causaita cuj tandami

25Cuchata ch'imbashpa Jesushuan tupashpaca:

–Rabí, ¿ima horataj caimanca chayamurcangui?– nishpa tapujpimi,

26Jesusca:

–Pi mana rurai tucuipajta ñuca rurajta ricushcamantaca, mana mashcanguichijchu. Ashtahuanpish tandata mana nijta micushcallamantami mashcacunguichij. Chaica chashnatajmi. 27Chingarijlla micunataca ama mashcaichijchu, ashtahuanpish mana tucurij huiñai causaipaj micunata mashcaichij. Chaitaca, Runa Aichayujmi cancunamanca cunga. Chaita cuj cachunca, Dios Yayami churarca– nircami.

28Chashna nijpica:

–Shinashpaca, Taita Dios rurai nishcacunata rurangapajca ¿imatataj rurana canchij?– nijpi,

29Jesusca:

–Runa Aichayujtaca Taita Dios cachashca cashcata crinami. Chaimi Taita Diospajta ruranaca– nirca.

30Shina nijpica cashnami nircacuna:

–Ñucanchij canta cringapajca ¿ima milagrota ruraiyari? Chaita ricushpa cringapaj. 31Ñucanchij ñaupa yayacunaca shitashca pambapica, maná tandatami micushcacuna. Chaitaca Quillcachishcapica: “Jahua pachamanta caj tandatami cararca” ninmi– nircacunami.

32Chaimi Jesusca:

–Moisesca mana jahua pachamanta tandatachu curca. Ashtahuanpish ñuca Yayamari cancunamanca jahua pachamantataj caj tandata cun. Chaica chashnatajmi. 33Taita Dios cushca tandatajca, jahua pachamantami shamun. Paimi cai pachapi causajcunamanca causaita cun– nijpimi,

34–Mandaj Jesús, chai tandata punllanta ñucanchijman carai– nircacuna.

35Chaimi Jesusca:

–Causaita cuj tandaca ñucami cani. Pipish ñucapajman shamushpa crijca manataj yaricachingachu, manataj yacunachingachu. 36Ña nishca shinallataj ñucata ricushpapish, mana cringuichijchu. 37Ñuca Yaya agllashcacunallami ñucapajmanca shamunga. Ñucapajman shamujtaca mana tigrachishpa cachashachu. 38Ñucaca jahua pachamantaca, mana ñuca munaita rurangapaj shamurcanichu. Ashtahuanpish ñucata cachaj Yayapaj munaita rurangapajmi shamurcani. 39Ñucata cachaj Yayaca, pai agllashpa cushcacunataca shujllatapish chingachichunca mana munanchu. Ashtahuanpish shamuj punllapi causachichunmi munan. 40Ñucata cachaj Yayapaj munaica caimi: Maijanpish Churita ricushpa paita crijca, huiñai causaita charichunmi munan. Tucuri punllapica ñucami paicunataca causachisha– nircami.

41Jesustaca: “Jahua pachamanta shamushca tandami cani” nishcamantami judiocunaca huashalla rimashpa, 42cashna nircacuna:

–Caica ¿manachu Josepaj churi Jesús? Paipaj yaya mamatapish ñucanchijca rijsinchijmi. ¿Ima nishpataj cunanca: “Jahua pachamantami shamurcani” ninchu imamí?– nircacuna.

43Chaimi Jesusca:

–Huashalla parlanacunataca ña saquichij. 44Ñucata cachaj Yaya mana pushamujpica, ñucapajmanca pi mana shamui tucunchu. Paicunataca tucuri punllapica causachishami. 45Profetacunata Quillcachishcapica: “Taita Diosmi tucuicunata yachachinga” ninmi. Chashna nishca shinallatajmi ñuca Yayata uyashpa, pai yachachishcata yachajcunaca tucuicuna ñucata cringacuna. 46Taita Diostaca, pi mana ricushcachu. Pai cachajpi shamuj, ñucallami paitaca ricurcani. 47Pipish ñucata crijca, huiñai causaita charintajmi. Chaica chashnatajmi. 48Huiñai causaita cuj tandaca ñucami cani. 49Cancunapaj ñaupa yayacunaca, shitashca pambapica maná shuti tandatami micurcacuna. Chaita micushpapish huañurcallacunami. 50Cai tandaca jahua pachamanta shamushcami. Maijanpish chai tandata micujca mana huañungachu. 51Jahua pachamanta shamuj causaiyuj tandaca ñucami cani. Maijanpish cai tandata micujca huiñaitami causanga. Ñuca carana tandaca, ñuca aichami. Chaitaca cai pachapi causajcuna huiñai causaita charichunmi, ñucallataj curisha– nircami.

52Chaimi judiocunaca:

–Caica, ¿Ima shinataj paipaj quiquin aichataca ñucanchij micuchunca carangari?– nishpami, paicunapura rimanacurcacuna.

53Chaimi Jesusca:

–Runa Aichayujpaj aichata mana micushpa, paipaj yahuarta mana ubyashpaca, cancunaca huiñai causaitaca mana charinguichijchu. Chaica chashnatajmi. 54Maijanpish ñuca aichata micujca, ñuca yahuarta ubyajca, huiñai causaitami charin. Paicunataca tucuri punllapica causachishami. 55Ñuca aichami micunatajca, ñuca yahuarmi ubyanatajca. 56Maijanpish ñuca aichata micujca, ñuca yahuarta ubyajca ñucahuanmi, ñucapish paihuanmi cani. 57Ñucata cachaj Yayaca causaiyujmi. Paimantami ñucaca causani. Chashnallatajmi maijanpish ñuca aichata micujca, ñucamanta huiñai causaita charinga. 58Cai tandaca jahua pachamanta shamushcami. Cancunapaj ñaupa yayacuna micushca maná shuti tanda shinallaca mana canchu. Paicunaca chaita micushpapish huañurcallacunami. Cai tandata micujca, huiñaitami causanga– nircami.

59Caicunataca, Capernaúm pueblopi caj sinagogapi yachachishpami Jesusca chashna nirca.

Huiñai causaita cuj shimicunami

60Jesús chashna nijta achca paita catijcuna uyashpaca:

–Cai yachachishcaca sinchimari. ¿Pitaj uyasha ningari?– nircacunami.

61Jesusca paita catijcuna chashna huashalla rimanacucujta yachashpami:

–¿Ñaja cancunata yachachishcachu p'iñachin? 62Runa Aichayujtaca ñaupaman pai maipi cashcaman cutin huichiyajta ricushpacarin ¿imatashi ninguichij? 63Taita Diospaj Espiritumi causaita cujca, aichaca causaitaca mana cunchu. Cancunaman ñuca huillashca shimicunaca causaita cuj Espiritumi. 64Chashna huillajpipish cancunamanta maijancunaca manaraj cringuichijchu– nircami. (Jesusca callarimantami maijanlla mana crij cashcata, pi paita japichina cashcatapish yacharca).

65Chaita yachashpami cashna nirca:

–Cancunamanca ñuca Yaya crina yuyaita mana cujpica, pipish ñucapajmanca mana shamui tucunchu nircani– nircami.

66Chai punllamantami paipaj yachacujcunaca achcacuna huashaman tigrashpa, ña mana paihuan purircacuna. 67Chaimi Jesusca, chunga ishqui yachacujcunataca:

–¿Cancunapishchu ñucata shitashpa rishun ninguichij?– nijpi,

68Simón Pedroca:

–Mandaj Jesús ¿pipajmantaj rishunri? Canmari huiñai causaita cuj shimicunataca charingui. 69Ñucanchijca cantaca causaj Taita Diospaj Churi cashcatami crinchij. Cristo cashcatapish yachanchijmi– nirca.

70Chaimi Jesusca:

–Ñucaca cancunataca, chunga ishquitamari agllarcani. Ashtahuanpish cancunamanta shujca diablomari– nirca.

71Simonpaj churi Judas Iscariotetami chashnaca nirca. Paimi Jesustaca japichina carca. Paica chunga ishqui yachacujcunamanta shujmi carca.

Currently Selected:

JUAN 6: QCHI04

Highlight

Copy