LUCAS 11

Taita Diosta mañanata Jesús yachachishcami

(Mt 6.9-15; 7.7-11)

1Chai q'uipami Jesusca Diosta mañacurca. Pai ña tucuchijpica paipaj yachacujcunamanta shujca:

–Mandaj Jesús, ñucanchijtapish Taita Diosta mañanata yachachi. Bautizaj Juanpish paipaj yachacujcunataca Taita Diosta mañanata yachachircami– nirca.

2Chaimi Jesusca cashna nirca:

–Cancuna mañashpaca cashna ninguichij:

“Jahua pachapi caj ñucanchij Yaya, cambaj jucha illaj shutitaca, alli nishca cachun.

Can mandana punlla ña chayamuchun.

Ima shinami jahua pachapi can munashcata ruracun, shinallataj cai pachapipish can munashcata rurachun.

3Ñucanchij punllanta micunata cunanpish cuhuai.

4Ima shinami shujtajcuna ñucanchijta ima mana allita rurashcacunata perdonanchij, shinallataj ñucanchij juchacunatapish perdonapai.

Ima mana allipi urmachun, ama saquihuangui.

Tucui millaimanta huaquichihuangui” –nircami.

5Jesusca caitapishmi nirca:

–Maijan cancuna alli rijsishcata charishpaca, chaupi tuta paipaj huasiman rishpaca: “Amigo, quimsa tandata fiyachi. 6Ñucahuan shuj alli apanacujmi carumanta cunanlla chayamun. Paimanmi imata mana carai tucuni” ningachari. 7Ucuman cajca caishujtaca: “Ama p'iñachichu, pungupish ñamari huichcashca. Ñucapish huahuacunahuan ñami dormicuni. Canman cungapajca mana jatari tucunichu” ningachari. 8Chashna nicushpapish ama ashtahuan p'iñachichun jatarishpa tucui imalla mañashcata cunmanmi. Mana paihuan apanacuj cashcamantachu chashna ruranman. Ashtahuanpish mana saquirishpa mañacujllapimi chashna ruranman. 9Chaimanta cashnami nini: Diostaca mañacuichijlla, paica cungami. Mashcacuichijlla, japinguichijmi. Huasiyuj nicuichijlla paica pascangami. 10Maijanpish mañajca, chasquinmi. Mashcajpish, japinmi. Huasiyuj nijpish, pascajpica yaicunmi.

11¿Maijan yayataj tandata cancunapaj huahua mañajpica, rumita cunguichijman? Chalhuata mañajpipish ¿culebratachu cunguichijman? 12Shinallataj lulunta mañajpica ¿escorpiontachu cunguichijman? 13Cancunaca mana allicuna cashpapish, cancunapaj huahuacunamanca imatapish allitamari cunguichij. ¿Manachu jahua pachapi caj cancunapaj Yayacarin jucha illaj Espirituta cuhuai nishpa mañajcunamanca cungalla?– nircami.

Jesustaca diablo japishcami cangui nishcami

(Mt 12.22-30; Mr 3.19-27)

14Chai q'uipami Jesusca mana rimajta ruraj supaita shuj runamanta llujshichirca. Supaita llujshichijpica, mana rimaj runaca rimarcallami. Chaipi cajcuna chaita ricushpaca achcatami mancharircacuna. 15Ashtahuanpish chaipi cajcunamanta maijancunaca:

–Caica supaicunata mandaj Beelzebú diablohuan cashpamari, supaicunataca llujshichin– nircacunami.

16Shujtajcunaca Jesús imapi pandarijpica, juchachingapaj nishpami, jahua pachamanta cashpaca milagrota rurashpa ricuchi nircacuna.

17Jesusca paicuna ima shina yuyacujta yachashpami cashna nirca:

–Maijan llajtapi mandajcunapurallataj p'iñanacushpa chaupirijpica, paicuna mandacushcaca chingarinmanllami. Shinallataj huasi ucupi causajcunapurapish quiquinpurallataj p'iñanacujpica chingarinmanllami. 18Chai shinallataj Satanaspish paicunapurallataj chaupirinacujpica pai mandacushcaca chingarinmanllami. “Beelzebuhuan cashpamari, supaicunataca llujshichin” nishcamantami chashna nini. 19Ñucataca Beelzebú diablohuan cashcamantami, supaicunata llujshichin ninguichijmi. Cancunapaj yachacujcunaca ¿pihuan cashpataj supaicunata llujshichin? Supaicunata paicuna llujshichishpaca, ñucaca Diosmanta cashcata, cancunaca pandaricushcatami ricuchin. 20Ashtahuanpish ñucaca Diospaj maquihuanmi, supaicunataca llujshichini. Ñuca chashna rurashpaca, Dios mandana cancunapajman ña chayamucushcatami ricuchini.

21C'ari c'ari runa alli allichirishca macanacunatapish maquipi charirashpa paipaj huasita chaparacujpica, ima huaquichishcapish tiyacunllami. 22Chashna cajpipish paita yalli c'ari c'ari runa shamushpaca, pai shunguta churashpa charicushca macanacunatapish quichushpa tucui imalla charishcacunatapish apashpaca, paihuan cajcunahuanmi chaupinacunman.

23Maijanpish ñucahuan mana shujlla cajca, ñucata p'iñajmi. Maijanpish mana ñucahuan tucushpa tandachijca, ñuca tandachisha nishcatapish urata janajta cachashpa chingachijmi.

Mapayachij espíritu cutin tigrashcami

(Mt 12.43-45)

24“Mapayachij espíritu runamanta llujshishpaca, shitashca pambacunatami samarinata mashcashpa purin. Samarinata mana japishpaca: “Ñaupa ñuca causacushcallamantaj cutin tigrashalla” nishpami tigran. 25Ña tigrashpaca, p'ichashca allichishca chushajlla huasi ucu shinatami chai runataca ricun. 26Chashna cajta ricushpaca, paita yalli millai canchis supaicunata pushashpami, chai runaman yaicushpa causancuna. Chaimantami chai runaca ñaupa ima shina cashcatapish yalli millai tucun” nircami.

Cushijlla cajcunami

27Jesús chaicunata nicujpirajmi, chaipi cajcunapaj chaupimanta shuj huarmica:

–¡Canta huachashpa chuchuchishpa huiñachij huarmica, cushichishcami canga!– nishpami caparirca.

28Shina nijpi Jesusca:

–¡Diospaj Shimita uyashpa cazujcunami, ashtahuan cushichishcacuna!– nirca.

Millai runacuna Jesusta milagrota rurai nishcami

(Mt 12.38-42)

29Achcacuna ashtahuan tandanacumujpimi Jesusca cashna nirca:

“Cai punllapi causajcunaca, millaicunami. Paicunaca milagrota rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna. 30Jonasca, Ninivepi causajcunapajca pi mana chashna tucushcata ricunami tucurca. Chai shinallatajmi Runa Aichayujpish cai punllapi causajcunapajca, pi mana chashna tucushcata ricuna tucunga. 31Imalla rurashcata Taita Dios ricuchi punllapica, ura llajtata jatun mandaj huarmimi cunan cai punllapi causajcunataca mana allitamari rurashcanguichij ningapaj shamunga. Chai huarmica ñaupa mandaj Salomón yachaisapa cajpimi, pai yachachishcata uyangapaj caru llajtamanta shamurca. Riquichij, caipica Salomontapish yallimari tiyan. 32Imalla rurashcata Taita Dios ricuchi punllapica, cunan cai punllapi causajcunataca Ninivepi causajcunami mana allitamari rurashcanguichij ningapaj shamungacuna. Ninivepi causajcunaca Jonás huillajpimi, paicuna juchayuj cashcamanta Taita Diosman cutirircacuna. Riquichij, caipica Jonastapish yallimari huillacuni.

Ñahuica cuerpopaj luzmi

(Mt 6.22-23)

33Luzta japichishpaca, pacallapi churangapaj, cajón ucupi churangapajca pi mana japichinchu. Ashtahuanpish huasi ucuman yaicujcuna achijllapi yaicuchunmi lámpara tiyanapi churan. 34Ñahuica cuerpopaj luzmi. Cambaj ñahui alli cajpica, tucui cuerpomi achijlla canga. Ashtahuanpish cambaj ñahui mana alli cajpica, cambaj tucui cuerpomi amsapi canga. 35Alli yuyaihuan cangui. Canpi tiyaj luz ñataj amsayanman. 36Cambaj tucui cuerpo luzhuan junda cajpica ima amsa mana tiyangachu. Ima shinami lámpara pai achij nishcahuan achijyachin, chai shinallatajmi tucui cuerpo achijlla canga” nircami.

Mandashcacuna ima nisha nishcata yachachijcunatapish fariseocunatapish Jesús rimashcami

(Mt 23.1-36; Mr 12.38-40; Lc 20.45-47)

37Jesús tucui parlashca q'uipami shuj fariseo runaca paipaj huasipi micunaman jacupai nijpi, Jesusca chaiman rishpa huasiman yaicushpa micungapaj tiyarirca. 38Maquita mana maillashpa micuj tiyarijpi chai fariseo mancharijpimi, 39Mandaj Jesusca:

–Fariseocuna cancunaca vasotapish, platotapish jahuallatami maillanguichij. Ashtahuanpish ucu shunguca, shuhuana, imatapish mana allita rurana yuyaihuan jundami canguichij. 40¡Yuyai illajcuna! ¿Manachu jahuatapish, ucutapish Taita Diosllataj rurarca? 41Tucui imalla charishcamanta huajchacunaman cuna cashcata cujcunaca, chuyacunami canguichij.

42Fariseocuna ¡aij cancunalla! Mentata, rudata, chagrapi p'ucushca tucui laya granocunata chungamanta shujta cujcunami canguichij. Ashtahuanpish cashcata ruranata, Taita Diosta c'uyanataca mana yuyaringuichijchu. Taita Diosman cunatapish mana saquishpami, chai mandashcacunataraj rurana carcanguichij.

43Fariseocuna ¡aij cancunalla! Sinagogacunapipish, puntapi tiyarinatami munanguichij. Plazacunapipish, allillachu cangui nichunmi munanguichij.

44Mandashcacunata quillcajcuna, fariseocuna, mishqui shimi jayaj shungucuna ¡aij, cancunalla! Cancunaca huañushcata pambashca jutcu shinami canguichij. Chai jahuata purijcunaca, ucupi ima tiyashcataca mana yachancunachu– nirca.

45Chaipica Mandashcacuna ima nisha nishcata yachachijcunapuramanta shujca:

–Yachachij, can chashna nishpaca, ñucanchijtapishmari jatun llaquirinata rimangui– nirca.

46Chaimi Jesusca:

–Mandashcacuna ima nisha nishcata yachachijcuna ¡aij cancunalla! Runacunamanca mana apari tucuipajtami apachinguichij. Ashtahuanpish cancunaca, shuj dedollahuanpish mana tuparinguichijchu.

47Cancunapaj ñaupa yayacunallataj huañuchishca profetacunata pambashca jahuapi pircashpa sumajyachijcuna ¡aij cancunalla! 48Chashna rurashpaca, cancunapaj ñaupa yayacuna rurashcatami alli nishcata ricuchinguichij. Profetacunataca paicunami huañuchircacuna. Cancunaca chai jahuapi pircashpa sumajyachijcunami canguichij.

49Chaimantami Taita Diosca tucuita yachaj cashpa: “Profetacunatapish, apostolcunatapish ñucaca cachashami. Paicunamanta maijancunataca huañuchingacunami, shujtajcunataca catirashpami llaquichingacuna” nirca. 50Cai pacha callarimanta tucui profetacunata huañuchishca yahuarmantaca, cunan punlla causaj cancunatami Taita Diosca llaquichinga. 51Abelta huañuchishca yahuarmanta, Zacariasta huañuchishca yahuarcamami, cunan punlla causaj cancunata Taita Diosca llaquichinga. Chaica chashnatajmi. Zacariastaca Taita Diospaj huasihuan, altarhuan chaupipimi huañuchirca.

52Mandashcacuna ima nisha nishcata yachachijcuna ¡aij cancunalla! Taita Diosmanta yachana yuyaitaca huichcashpami cancunaca mana yachashun nircanguichij. Cancunallataj mana yachashun nij cashpami, shujtajcuna yachashun nijpipish mana saquinguichij– nircami.

53Chaipica Mandashcacunata quillcajcunapish, fariseocunapish achcata p'iñarishpami, Jesustaca achcata rimarichun caita chaita tapushpa p'iñachi callarircacuna. 54Ima mana allita rimajpica juchachinata japingapajmi chashna tapurcacuna.

Currently Selected:

LUCAS 11: QCHI04

Highlight

Copy