LUCAS 20

Jesusca mandajmi

(Mt 21.23-27; Mr 11.27-33)

1Shuj punlla Jesús Taita Diospaj huasipi yachachishpa alli huillaita huillacujpimi, curacunata pushajcuna, mandashcacunata quillcajcuna, cunaj yuyajcunapish chayamurcacuna. 2Paicunaca:

–Huillaiyari, ¿pi mandajpitaj chashna rurangui? ¿Pitaj chashna rurachun, cantaca mandarca?– nishpa tapujpimi, 3Jesusca:

–Ñucapish cancunata shuj tapunata tapusha. 4Bautizaj Juan bautizachunca Taita Dioschu, runacunachu ¿pitaj cachashca canga?– nirca.

5Chaimi paicunapura parlanacushpaca:

–“Juantaca Taita Dios cachashcami” nijpica: “Shinashpaca ¿ima nishpataj pai huillashcataca mana crircanguichij?” ningami. 6“Runacunallami Juantaca cacharca” nijpipish tucuicuna Juantaca Taita Dios cachashca profeta cashcata yachashcamantaca ñucanchijtarajmi rumicunahuan shitangacuna– ninacushpami, 7–Pi cachashcata mana yachanchijchu– nircacuna. 8Chaimi Jesusca:

–Ñucapish pi mandajpi chashna ruracushcataca mana huillashachu– nirca.

Millai chagrajcunamanta yuyachishpa parlashcami

(Mt 21.33-44; Mr 12.1-11)

9Chai q'uipa yachachi callarishpaca Jesusca cai yuyachij parlotami cashna parlarca: “Shuj runami uvas chagrata tarpushpaca, chagrajcunaman arrendachishpa, achca huatacunapaj chaimanta rirca. 10Uvascunata pallana punlla ña chayamujpica, pai japina cashcata chasquimuchunmi chagrajcunapajman shuj servijta cacharca. Ashtahuanpish chagrajcunaca chai servijtaca macashpami, chushaj maquillata tigrachishpa cacharcacuna. 11Cutinmi shujtaj servijta cacharca. Chai servijtapish paicunaca c'amishpa, macashpami chushaj maquillatataj tigrachishpa cacharca. 12Ishquipaj q'uipapish cutinmi shujtaj servijta cacharca. Chai servijtapish paicunaca chugrichishpami, llujshichishpa cacharcacuna.

13Chaimi chagrayuj amoca: “¿Imatataj rurashari? Ñuca c'uyashca churita cachasha. Paita ricushpaca, cazungacunapishchari” nirca. 14Chai churita ricushpacarin chagrajcunaca: “Caimari paipaj churi. Cai tucuitaca paimari japinga. Pai japinataca ñucanchij japingapaj shamuichij, huañuchishunchij” nishpa rimanacushpaca, 15uvas chagramanta llujshichishpami canllaman paitaca huañuchircacuna. Chashna rurajcunataca chagrayuj amoca ¿imatashi ruranga? 16Allpayuj shamushpaca chai chagrajcunata huañuchishpami, allpataca shujtajcunaman cunga” nirca.

Paicuna chaita uyashpaca:

–¡Ñucanchij chashna tucuchunca Taita Dios ama saquichun!– nircacunami.

17Ashtahuanpish Jesusca, paicunata ricushpaca:

–Quillcachishcapica:

“Huasita shayachijcuna yanganchishpa shitashca rumillatajmi, callaripi churana rumi tucushca” ninmi.

Chashna nishcataca ¿imatataj yuyanguichij?

18Chai rumi jahuapi tucui urmajcunaca p'aquiringami. Maijanpaj jahuapi chai rumi urmashpapish ñutungami– nircami.

Tributomanta tapushcami

(Mt 21.45-46; 22.15-22; Mr 12.12-17)

19Curacunata pushajcuna, mandashcacunata quillcajcunapish paicunata uyachishpa, chai yuyachij parlota Jesús parlashcata entendishpami, cunantaj ima shinapish japishun nircacuna. Ashtahuanpish chaipi cajcunatami mancharcacuna.

20Chaimantami ima mana allita nijpica, juchachishpa chai llajtata mandajman huillashpa japichishunpishchari yuyashpa, yachangapaj alli tapucuj shina Jesusta tapuchun runacunata cacharcacuna. 21Paicuna Jesuspajman chayashpaca:

–Yachachij, canca imatapish ima shina cashcatataj yachachijmi cangui. Taita Diosta ima shina cazunatapish chaitataj yachachijmi cangui. Pita mana manchashpa paicunapi alli ricuringa raicullaca mana yachachijchu cangui. 22¿Cesarmanca tributotaca cushunchu manachu cushun?– nircacunami.

23Ashtahuanpish Jesusca, paicuna mana alli yuyaihuan cashcata yachashpami:

–¿Ima nishpataj ñucataca umashun nicunguichij? 24Cullquita ricuchichij. ¿Pipaj ñahuitaj, pipaj shutitaj caipica tiyacun?– nijpica:

–Cesarpajmi– nircacunami.

25Chaimi Jesusca:

–Shinashpaca Cesarpajtaca, Cesarman cuichij. Taita Diospajtaca Taita Diosman cuichij– nirca.

26Tucuicunapaj ñaupajpi imata tapujpipish, ima juchachinata mana nishpa alli cutichijpimi mancharishpa upalla saquirircacuna.

Huañushcacuna causarinamanta tapushcami

(Mt 22.23-33; Mr 12.18-27)

27Chai q'uipami huañushcacunaca mana causaringachu nij saduceocuna Jesusta tapunaman shamushpaca, 28cashna nircacuna:

–Yachachij “Maijan cashpapish huahuacunata manaraj charishpa huañujpica, huañujpaj huauquillataj chai viuda huarmihuan cazarashpa huauquipaj randi huahuacunata charichun” nishpami Moisesca quillcashca. 29Chai shinallatajmi canchis huauquindijcuna tiyarca: Punta huauquimi cazararca. Paica huahuacunata manaraj charishpami huañurca. 30Chaimantami q'uipa huauquica chai viuda huarmihuan cazararca. Paipish huahuacunata manaraj charishpami huañurca. 31Ishquipaj q'uipa huauquipish chai huarmihuan cazarashpaca, manaraj huahuacunata charishpallatajmi huañurca. Canchis huauquindijtajmi manaraj huahuacunayuj tucushpa huañurcacuna. 32Tucuicunapaj q'uipaca, huarmipish huañurcami. 33Huañushcacuna causarimui punllapica canchis huauquindijtaj chai huarmihuan cazarashcamantaca ¿maijanpajshi chai huarmica canga?– nircacunami.

34Chaimi Jesusca:

–Cunan cai causaillapimi cazaranaca tiyan. 35Ashtahuanpish shamuj causaipi causanataj cajcuna causarishpaca, mana cazarangacunachu, cazarachinapish mana tiyangachu. 36Paicunaca mana huañungacunachu. Angelcuna shinamari canga. Taita Dios causachishcamanta paipaj huahuacunamari canga. 37Zarza yurapi nina rupacuj ricurishpaca Moisesmanca Jatun Diosca cashnami nishca: Ñucaca Abrahampaj, Isaacpaj, Jacobpaj Taita Diosmi cani nishcami. Chashna nishpaca huañushcacuna causarina cashcatami Taita Diosca Moisesman huillashca. 38Taita Diosca mana huañushcacunapaj Dioschu, ashtahuanpish causajcunapaj Taita Diosmari. Paipaj ñaupajpica tucuicunami causajcuna– nircami.

39Mandashcacunata quillcajcunamanta maijancunaca Jesustaca:

–Yachachij, allitamari ningui– nishpaca, 40imata ashtahuan mana tapui tucurcacunachu.

¿Cristoca pipaj Churitaj?

(Mt 22.41-46; Mr 12.35-37)

41Paicuna mana ashtahuan tapujpimi Jesusca:

–¿Ima nishpataj Cristotaca, Davidpaj Churimi nincuna? 42Davidllatajmi Salmos libropica cashna nin:

“Jatun Diosca ñucata Mandajtaca:

Ñuca alli ladoman tiyari,

43canta p'iñajcunata cambaj chaqui sarunapi churangacama” ninmi.

44Davidllataj ñucata Mandaj nijpica, ¿ima shinataj paipaj churica cangari?– nircami.

Mandashcacunata quillcajcunata Jesús rimashcami

(Mt 23.1-36; Mr 12.38-40; Lc 11.37-54)

45Tucui chaipi cajcuna uyacujpimi Jesusca paipaj yachacujcunataca cashna nirca:

46–Mandashcacunata quillcajcuna shina canamanta huaquichiringuichij. Paicunaca pambata p'ichacujta churashpa purinatami munancuna. Plazacunapipish, allillachu cangui nishca canatami munancuna. Sinagogacunapipish, mai jatun micuicunapipish puntapi tiyarinatami munancuna. 47Paicunaca viudacunapaj huasicunatapish quichushpa millpujcunami. Alli ricuringaraicuca unitami Taita Diosta mañaj tucuncuna. Chashna rurajcunataca yallitaj jatunta llaquichishcami canga– nircami.

Currently Selected:

LUCAS 20: QCHI04

Highlight

Copy