LUCAS 8

Jesuspajta ruraj huarmicunami

1Chai q'uipami Jesusca tucui pueblocunapi, muyundij llajtacunapipish, Dios mandagrin alli huillaita huillashpa purirca. Chunga ishqui yachacujcunapish, 2millai espiritucuna japishcacunata, ima ungüihuan cajcunatapish alliyachishca maijan huarmicunapishmi Jesushuanca rirca. Chai huarmicunapurapica, canchis supaicunata llujshichishca Magdalamanta Mariapish, 3Mandaj Herodespaj mayordomo Chuza runapaj huarmi Juanapish, Susanapish, shujtaj achca huarmicunapishmi paicuna imalla charishcacunahuan ayudarcacuna.

Tarpujmanta yuyachij parlomi

(Mt 13.1-15, 18-23; Mr 4.1-20)

4Mai pueblocunamantapish achcacuna Jesuspajman tandanacumujpimi, yuyachij parlota parlashpa cashna nirca:

5“Tarpuj runa muyuta tarpunaman llujshishpa muyuta shitacujpica, asha muyuca ñanpi urmajpi sarurcacunami, pajarocunapish shamushpa micurcacunami. 6Asha muyuca rumipimi urmarca. Huiñashca q'uipaca nuyu illashcamanta chaquirircallami. 7Asha muyuca casha chaupipimi urmarca. Cashacunandij huiñashpa cashacuna llapijpimi mana granorca. 8Asha muyuca alli allpapimi urmarca. Chaipica alli huiñashpami, shuj muyullamanta patsajta p'ucurca” nishpaca: “Maijanpish uyanapaj rinrinta charijca, tucui yuyaihuan uyachun” nishpami sinchita rimarca.

9Chaimi Jesuspaj yachacujcunaca:

–Cai yuyachij parloca ¿imatataj nisha nin?– nishpa tapujpi, 10Jesusca cashna nirca:

–Taita Dios mandagrin pi mana yachashca pacalla cajtaca, paillatajmari cancunamanca yachachishca. Ashtahuanpish shujtajcunamanca yuyachij parlocunallahuanmi imatapish yachachicuni. Paicunaca ricushpapish mana ricushca shinami tucun. Uyashpapish mana uyashca shinallatajmi tucun.

11Yuyachij parloca caitami nisha nin: Muyuca Taita Diospaj Shimimi. 12Lluchu ñan shinaca huillashca Shimita uyajcunami. Paicuna uyashca shimita ama crishpa, ama quishpirichunmi diablo shamushpa paicunapaj shungumanta anchuchin. 13Rumi shinaca huillashca Shimita uyashcahuan cushicushpa chasquijcunami. Shina cashpapish sapi mana ucujta cashcamanta paicuna crishcataca ashacamallami catin. Crij cashcamanta llaquicuna shamujpica saquirinllacunami. 14Cashalla allpa shinaca huillashca Shimita uyajcunami. Ashtahuanpish uyashpa rishca q'uipaca, cai pachapaj munaicuna, charijyana munaicuna, aichata cushichina munaicuna tapajpimi, paicunapaj causaipica imata mana granon. 15Ashtahuanpish alli allpa shinaca, tucui shunguhuan, tucui munaihuan huillashca Shimita uyashpa, mana cungarishpa chaitataj rurashpa granoshcata ricuchijcunami.

Lamparamanta yuyachij parlomi

(Mr 4.21-25)

16Luzta japichishpaca cajón ucupi, cama ucupi churangapajca pi mana japichinchu. Ashtahuanpish huasi ucuman yaicujcuna achijllapi yaicuchunmi lámpara tiyanapi churan. 17Shina cajpica ima mana pacalla canapajchu. Pi mana yachashcaca mana cangachu. Tucuicunapaj ñaupajpi ricuringatajmi. 18Riquichij, imata uyashcataca yuyaipi charinguichij. Chaita charirajmanca, ashtahuanmi cunga. Mana charirajmanca pai charisha nicushcatapish quichungami– nircami.

Jesuspaj mamapish huauquicunapish

(Mt 12.46-50; Mr 3.31-35)

19Chaipi cajpimi Jesuspaj mamapish, huauquicunapish paipajman shamurcacuna. Achca gentecuna chaipi cashcamantami, paipajmanca mana c'uchuyai tucurcacuna. 20Chaita ricujcunaca:

–Cambaj mama, cambaj huauquicunamari canhuan parlashun nishpa canllapi shuyacuncuna– nijpimi, 21Jesusca:

–Taita Diospaj Shimita uyashpa cazujcunami ñuca mama, ñuca huauquicunaca– nirca.

Huairandij tamyata Jesús jarcashcami

(Mt 8.23-27; Mr 4.35-41)

22Shuj punllami Jesusca paipaj yachacujcunandij, barcoman yaicushpaca:

–Cai cucha ch'imbanijman jacuchij– nishpa rircacuna. 23Cuchata ch'imbacujpimi, Jesusca dormirirca. Chai cuchapica, huairandij tamya ñapish jatarijpimi, yacuca barcopi jundai callarijpi llaqui tucugrircacuna. 24Chaimi yachacujcuna Jesuspajman c'uchuyashpaca:

–¡Yachachij, Yachachij huañugrinchijmari!– nishpa rijchachircacuna.

Pai rijcharishpaca, huairatapish, yacutapish casijlla tucuichij nishpa sinchita rimajpica, casijlla tucurcallami.

25Chaimi Jesusca:

–¿Ima nishpataj mana cringuichij?– nijpi, paicunaca chujchushpa mancharishpaca, caishuj chaishuj:

–Cai runaca ¿pitagari? huairapish, yacupish pai mandajpica cazunllamari– ninacurcacuna.

Supai japishca gadareno runami

(Mt 8.28-34; Mr 5.1-20)

26Chaimantaca Galilea llajta ch'imbapura cucha uripi caj gadarenocunapaj llajtamanmi chayarcacuna. 27Jesús chaiman chayashpa barcomanta uriyajpica, chai pueblomanta shuj runami paihuan tupaj shamurca. Chai runaca supaicuna japishca cashpami, achca huatacunata churanatapish mana churarishca, huasipipish mana causashpa, panteoncunallapi causaj carca. 28Jesusta chai runa ricushpaca, paipaj ñaupajpi urmashpami:

–Jahua pachapi caj Taita Diospaj Churi Jesús ¿imatataj nij shamungui? Ama ñucata llaquichihuaichu– nishpami sinchita caparirca.

29(Jesusca millai espiritutaca chai runamanta llujshichunmi mandarca. Millai espirituca chai runataca uni huatacunata mandacujpimi, paitaca cadenacunahuan huatashpa, grillo nishca fierrocunahuanpish canichijcuna carca. Ashtahuanpish cadenacunatapish p'itishpami, mai shitashca pambacunamanpish supaicunaca apajlla carca.) 30Jesusca chai runataca:

–¿Ima shutitaj cangui?– nishpa tapujpimi paica:

–Legionmi cani– nirca.

Achca supaicuna yaicushca cashpami chashnaca nirca. 31Chai supaicunaca ucujta jutcumanca ama cachahuaichu nishpami rogarircacuna. 32Chai chaininijlla urcupica, canlla achca c'uchicunami micucurca. Supaicunaca chai cuchicunapi yaicungapaj saquihuai nijpimi, Jesusca richun saquircalla. 33Supaicuna chai runamanta llujshishpa cuchicunapi yaicujpimi, chai canlla cuchicunaca c'aca quinrita singushpa cuchapi huashicushpa huañurcacuna.

34Cuchicunata michijcunaca, achcata mancharishpami pueblopi, llajtacunapipish imalla tucushcata huillarcacuna. 35Chaita uyajcunaca ima tucushcata ricungapajmi shamurcacuna. Paicuna Jesuspajman shamushpaca, supaicunata llujshichishca runataca, alli yuyaiyuj churanacunatapish churarishca, Jesuspaj ñaupajpi tiyacujta ricushpaca achcatami mancharircacuna. 36Chaita ricujcunaca supai japishca runata ima shina alliyachishcatami tucuicunaman parlarcacuna. 37Chaita uyashpaca tucui chai muyundij llajtamanta rij gadarenocunami achcata mancharishpa, Jesustaca caimanta ripailla nijpi Jesusca, barcopi yaicushcahuan tigrashpa rirca. 38Supaicunata llujshichishca runaca ñucatapish canhuan pushahuai nishpami Jesustaca rogarirca. Ashtahuanpish Jesusca, cayacama nishpaca:

39–Cambaj huasiman rilla. Taita Dios canta achcata c'uyashpa alliyachishcata tucuita parlagri– nijpimi chai runaca, Jesús paita ima shina alliyachishcataca, tucui pueblopi causajcunaman huillashpa rirca.

Jairopaj ushushipish Jesuspaj churanapi tuparij huarmipish

(Mt 9.18-26; Mr 5.21-43)

40Jesús ña cutin tigramujpica, tucuicuna paita shuyacushcamantami, achcata cushicushpa tuparcacuna. 41Jesús chaipi cajpica sinagogapi pushaj Jairo shuti runa shamushpami, Jesuspaj ñaupajpi cungurishpa ñuca huasiman jacu nishpa rogarca. 42Paica ancha ungushca huañunalla, chunga ishqui huatayuj shujlla ushushitami charirca.

Jesús chaiman ricujpica, achcacunami llapirinacui caticurcacuna.

43Chaicunapurapica, chunga ishqui huatata yahuar cachariricuj llaquita apacuj shuj huarmipishmi carca. Paica jambij doctorcunapajman rishpapish manataj alliyashpami tucui charishcacunallata tucuchirca. Paitaca, pi mana alliyachi tucurcachu. 44Chai huarmica Jesuspaj huasha ladota allijlla shamushpami, Jesuspaj churana puntapi tuparirca. Churana puntapi tuparincami yahuar cachariricushcaca chaquirirca. 45Chaimi Jesusca:

–¿Pitaj ñucapi tuparinchu imamí?– nijpi tucui chaipi cajcunaca pi mana tuparinchijchu ninacujpi Pedropish, paihuan cajcunapish:

–Yachachij, cai tucuicuna t'angarinacushpa llapirinacucushca jahuachu: “¿Pitaj ñucapi tuparinchu ningui imamí?”– nircacuna.

46Chaimi Jesusca:

–Alliyachina poder ñucamanta llujshijpimi, maijantajshi ñucapi tuparishcata yachani– nirca.

47Chai huarmica pacalla alliyashpalla mana saquiri tucushpami shamushcahuan Jesuspaj ñaupajpi manchaihuan chujchushpa cungurishpa, imapaj tuparishcata, chai churanapi tuparinca alliyashcatapish chai tucuicunapaj ñaupajpi huillarca. 48Chaimi Jesusca:

–Huahua canca crishcamantami alliyachishca cangui. Sumajta causagrilla– nirca.

49Jesús rimacujpirajmi, sinagogapi pushajpaj huasimanta shuj shamushpaca:

–Cambaj ushushica ñami huañun. Yachachijtaca ama ashtahuan p'iñachichu, saquilla– nirca.

50Chaita Jesús uyashpaca:

–Ama manchaichu, alliyachina cashcata crilla– nirca.

51Jairopaj huasiman ña chayashpaca, pita mana yaicuchishpami, Jesusca Pedrondij, Jacobondij, Juandij chai huahuapaj yaya mamandijlla yaicurcacuna. 52Tucuicunami paimantaca, achcata llaquirishpa huacacurcacuna. Chaimi Jesusca:

–Ama huacaichijchu, huambraca mana huañushcachu, ashtahuanpish dormicunllami– nirca.

53Chaipica chai huambra huañushcataj cashcata yachashcamantami asircacuna. 54Ashtahuanpish Jesusca maquimanta japishpa sinchita rimashpami:

–¡Huambra, jatari!– nijpi, 55espíritu tigrajpica jatarircallami. Chaimi Jesusca, micunata caraichij nishpa mandarca. 56Paipaj yaya mamaca achcatami mancharircacuna. Ashtahuanpish Jesusca, cashna alliyachishcataca pajta piman huillanguichijman nircami.

Currently Selected:

LUCAS 8: QCHI04

Highlight

Copy