Lûk 15
15
Ndzì zəla ghe fə̀ dzyə̂nlo
(Mat 18:12-14)
1 #
Lûk 5:29, 30 A fə bugho tsuʼ ù li wo, ghê dzə̀akə̀mwàʼsò n dzeŋe wò a vʉ̀a Yɛso àsùghò ghî à biigh à li gho alebùghò zyə̂ən shwaʼ u wə̄n. 2Ghê Dèekə̀làŋ ŋ kaʼ tsughu ghèe ghê Falàsîi tò alenyuūŋ sāʼ Yɛso enyəa, “Bəghà wən ŋgɔ̂ɔm ghì à biigh gho, zəa dzəəŋ sùghò ghèe ghee.”
3Yɛso ŋ kuuwn kwə̀ən tsʉ̀ ndùw ghee enyəa, 4“À lò ndugho am bvʉa zɛʼɛ̄ ù lò alekī bɔm fə tə ndzì fò a, vʉ̀a ù dzə̀ən kê tsughu e mɔ̀ʼ a te, dòʼŋkè zəghàa taʼà tsughu ghə̀m n lì mən tɛ̀ndzūghū à ghè tǒ tɛ̀ndzūghū alo e bəghaa, nùghù ndùw tèlè kə̀ŋ kòʼ wò dzə̀ zə̀n è mìa â? 5Mò ù ŋ kòʼ, ù ghɛ̀ɛn ghɔ̀ kɔ̀ʼ am mbòʼ, kwə̀n wò à ghè zò. 6Ù m bùghò daŋso nàʼà tsùghù fən a wə̄n ghèe ghê kɔn u wə̄n wo, dzɛ̀ enyəa, ‘Mùghò ŋ kǒʼ ndzì zaŋa zəla mùgho mò dzə̂nlo, bùghò nlò to sɛ̀ duʼnlo.’ 7À lò sugho êzə̀, aŋghəa Ǹ dzâa wô fɛ â ghɛ̀ enyəa à kè lò duʼnlo è nêene zo alo kəwālā abugho ghùw ù bǐigh u mɔ̀ʼ kuuwn kɔʼ fə̀ŋ è wə̄n tsə̀ghàtàʼà ghì à dzûŋ ghən ŋghəm tɛ̀ndzūghū à ghè ghǒ tɛ̀ndzūghū ghe moʼò enyəa ghe lo ghî à dzûŋ ghò, ghe kôom yô alekuūwn fə̀ŋ tə ghee to.”
Kwə̀ən kə shwaʼ aŋ kua u fəŋgɔ̀ʼ wəla u fə̀ miā
8Yɛso ŋ kwə̀ən dzɛ̀ kpèʼe ndùw â ghì a Falàsîi ghò àsùghò ghì à biigh yi enyəa, “Kàa à lǒ wìzən ù ghɛ̌ wò ù lò aleki kua u ŋgɔ̀ʼ wò eghə̄m a, vʉa u mîa tsughu u mɔ̀ʼ, vʉ̀a ù dòʼŋkè dâa tsughu lâm a, zè kǎaŋ wò chìndùghu a, tɔ̀ʼ fùʼ tsùghù təluʼū enyəa e telè kəŋo koʼò tsughùu nù a? 9À m bùghò ù kòʼ tsughu, ù n nàʼà tsùghù fən a wə̄n ghèe ghê kɔn u wə̄n wo, dzɛ̀ â ghee enyəa, ‘Bùgho nlò sɛ̀ duʼnlo, nu mùgho ŋ kua u fəŋgɔ̀ʼ waŋa wəla u mò miā kəŋ kòʼ.’ 10M̀ fɛ dzàa wò nù â ghɛ̀ enyəa à bɔ̌ɔm lò sugho êzə̀ Tsə̀təndə̄ghā tə Kəzə̀ tə̀ duʼnlo abugho ghùw ù bǐigh u mɔ̀ʼ ti kuūwn kɔʼ am bòo tə wə̄n.”
Kwə̀ən kə ushwaʼ aŋ wɛ wəla ù fə̀ nyəŋ lāʼ
11Yɛso ŋ kwə̀ən dzɛ̀ kpèʼe ndùw â ghì Falàsîi yi gho ghèe ghê ghì à biigh yi enyəa, “Bəghà ù lì fə̀ lo nû, ù fə̀ ki wɛ a wə̄n à nûu ghò a bə̀ghà. 12Ù èbàm wən n dzɛ̀ â tsele an tsuʼ fə̀ li fo enyəa, ‘Tsele waŋa, fughu nùghu wò tuʼ zaŋa zo am fʉgha wəla ghàʼ kê ki alezə am fʉgha wʉ̂a.’ Ghùw vʉ n dzùghù tsùghù sùghò fʉgha u wə̄n an tuw u ghee vʉ̀ ù bʉ̀ghà, fùghù ndùw u wɛ ù ebàm vʉ wo. 13Tsuʼu mə̀ n tsə̀ghà tsughu ko n sòʼ ènyə, wɛ vʉ ŋ kùum tsùghù fʉgha u wə̄n u dzə̀m, nùghù ndùw an lɔʼkədzam, ndùw zə̀ sàŋ tsùghù fʉgha u wə̄n u te wo a fughu am fùw kə emùghù. 14A m bùghò ù zə sàŋ mɛʼɛ̀ tsughu fʉgha u wə̄n u te wo dzə̀m, dzə̀ŋ è lì n nyə fughu alo enaʼ mò è tɔ̀ŋɔ ndɔ̄ŋ. À n lo êzə̀ mò ù kòom ki yo fəgha kə li ko kə doʼò â wə̄n enyə a kə lo kə wə̄n ko. 15Ù fi ndûw kàʼ nû alefwàʼ a tsəlà ghùw ù enaʼ ù li fughu a naʼ e te zo. Ghùw vʉ n tùm ndùw wə̄n an sum enyəa ù è tsʉa kwə̀lebʉ̄ghā u wə̄n wo. 16Ù m buʼù mbùuŋ kèe ko enyəa to e mô zə̌a fʉ̀ghàzəa u kəkwə̀lebʉ̄ghā, ghùw m bûʼ yò bən sughò alefughu wə̄n â fəgha ko 17A m bùghò tɔ u wə̄n u kwən nyə̄ wo, ù mo enyəa, ‘Ghî a kəfwàʼ a bəghà yia a zəā kuūw, bùʼù nǎaŋ səa sùghò ù li wo, yìa Ŋ̀ kuūwn lô fɛ ŋgòʼò kpǔuw ndùw dzə̀ŋ à! 18Ǹ zəghàan nù, Ǹ ndûw èbàm a vʉ̀a bə̀ghà, Ǹ dzɛ̂ â wə̄n enyəa, Tsele waŋā, mùghò ŋ ghəəŋ bonlo â Zə̀ kò àsùghò â ghù; 19Ŋ̀ kâ bùʼ kòom kɔ̀ʼkpè to ghe etaŋ mugho aŋ kɔ̀n kə wɛ ghə̂a. Nǐi naŋa mugho tò luʼū wəla kɔ̂ɔ fə̀ghà fə̀ lo a te.’
20Ù n daŋso zə̀ghàa è tsughu, nùghù ndùw a lùʼu ù nduūw wo ebàm alô tsele. Aŋghəa ù səgha sə wo alo kədɛ̀, tsele n lɔʼso kòʼ ndùw wə̄n, kwuso èse, è nyəŋ, ndùw bvʉ̀ mǎaŋ kele wɛ. 21Wɛ vʉ mo â tsele enyəa, ‘Tsele waŋā, mùghò ŋ ghəəŋ bo zo an sə kə̂a àsùghò an sə kə Kəzə̀. Ŋ̀ kâ kòom kɔ̀ʼkpè to ghe etaŋ mugho aŋ kɔ̀n kə wɛ̄ ghə̂a.’ 22Tsele m fwə̀n dzɛ̀ ndùw â kɔ̀ɔ ŋ wə̄n mò enyəa, ‘Mba nǐi wò nlò dàla zəla è dzɔ̀ buʼ, ghɛ̀ təm tsughu a zəŋò wə̄n, ghɛ̀ dzəla tsughu sugho wə̄n â tee fo aŋ ghu kə wə̄n, ghɛ̀ dzəla kɔʼ sugho wə̄n â gùw tò alo aghùw. 23Ghɛ̀ daŋso ni kɔʼ nùumbɔ̀ŋ è kǎa zə̀, ghɛ̀ ghəəŋ nduw zə zo a te, to sɛ̀ zə, a e duʼnlo; 24nu wɛ waŋā wə̄n fɛ̀ lǒ tò ù mò kpuw nû, vʉ̀a ù kòom kɔʼsə̄ alo evʉ̄, ù mafə̄ lâʼ mìa yia a kôom kôʼ tsughu wə̄n.’ Zə kə fi daŋso zìi tsùghù nû êzə̀.
25À n lo êzə̀ mò wɛ ù sûesʉ wən mô nǎam lò aŋ ŋgwə̄n, a m bùghò ù kuʼso wô be ko aŋghəa ù kwəlā wo, ù n zuw fʉgha ù bəla u kuū. 26Ù n tɔŋɔ tsughu kɔ̂ɔ fə tsēlē fə̄ mɔ̀ʼ, bvʉ â wə̄n enyəa, ‘À tsə̀ghàa kə̀ kwò fɛ à?’ 27Kɔ̂ɔ fi n dzɛ̀ enyəa, ‘Wàazùghù ŋ kwən nyə ebàm, tsùghò vʉ̀a ù wi tsughu nùumbɔ̀ŋ ù kǎa ù vʉ̂ enyəa e nda kòʼ wɛ ù wə̄n mò ù lò â ghue ù tughu wo.’ 28Wɛ ù sûesʉ vʉ m pfʉso mìasò ndùw ùnʉ̀ghà enyə, tue daŋso alenyə alo kəbe. Tsele n tsə̀ghà sə̀ è wo, buʼ kəghu â wə̄n. 29Wɛ vʉ n dzɛ̀ â tsele enyəa, ‘Yìa Ǹ fwâʼ tsɛlɛ̀ fɛ â ghù an ndə̀m è tə̀nùu, kè tsoō tsughòsò koʼò sughò làŋ kə̀a; ghù kaam tso nì kòʼ wò ko tsʉa u dzə wo enyəa Ǹ dan a te ghàʼ à ghê fən ghaŋā gho. 30Yia a bugho wɛ wʉ̀a wən ndûw bugho, ghù vʉ̀a ghù bòʼò wi fughu tsughu nùumbɔ̀ŋ è kǎa â wə̄n; mò ù m fʉgha wʉ̀a ù ndûw sàaŋ màʼà tsùghu ghèe ghê kpàlà wò.’ 31Tsele n daŋso dzɛ̀ â wə̄n enyəa, ‘Ŋ wɛ̄, ghàʼ à ghù fɛ lo tsəgha ko a dzə̀m, fʉgha waŋa u dzə̀m à kì ghû. 32E dzɔ̂ɔ nù enyəa to sɛ̀ mô zə, a duʼnlo, tɔŋlo enyəa wàazùghù fɛ lo tò ù fə̀ kpuw nû, vʉ̀a ù kòom zôo wô ebàm. Ù maā lâʼ mìa, yia a kôom koʼ wə̄n ebàm.’”
Currently Selected:
Lûk 15: agq
Highlight
Share
Copy
Want to have your highlights saved across all your devices? Sign up or sign in
