Matìo 20
20
Kwə̀ən kə ushwaʼ kə ghì a kəfwàʼ an sum
1“Fɔ̂e u kəwālā u lo tǒ ghùw ù lì ù fə̀ gbən sə tsughu alendùw kəŋ ghî à kəfwàʼ enyəa ghe soʼō fwâʼ an sum u wə̄n. 2Ghəa ghe boō naŋā tsughu fəgha kəla ù ki aletsə̄ ghee a te alo fətsūʼ, ù n tùm sòʼ ndùw ghee an sum u wə̄n. 3An tàm tə ezuuw tɛ̀ndzughu a gbə̀làgbə̀là to, ù ŋ kòom sə̀ è ndùw, ndùw kòʼ tsùghù aghî ghe laŋà lô kaŋlō am fwàan wə enaʼ 4ù n dzɛ̀ â ghee enyəa, Soʼ fwàʼa sùghò nlò an sum waŋā, Ǹ sô tsə̌a nù ghɛ â fəgha kəla kə kwuū ghəa zo. Ghe n sòʼ ndùw è sugho. 5An zùuw è kɔʼɔ teme zo, ù n sə kpeʼe è nduw, kòom bùghò sə kpeʼe ndùw an tàm tə ezūuw tə təgha an zùuw è bəŋo zo, səa ghəəŋ kô ghəa è mɔʼɔ̄ zo. 6An tàm tə ezūuw tə tɛ̀ an nə̀ghà è guŋsò zò, ù n sə kpeʼe è ndùw, ndùw kòʼ kpèʼe ndùw àghì ghe ti kaŋlō; ù m bvʉ tsughu â ghee enyəa, ‘À lǒ kwò ghɛ̀ bughò laŋà teēn zeē ndûw fɛ kənughùnùghù a?’ 7Ghe n dzɛ̀ â wə̄n enyəa, ‘À lǒ bòʼ ghùw kà ghàʼ alo kəfwàʼ nî.’ Ù n dzɛ̀ â ghee enyəa, ‘Soʼ fwàʼa sùghò nlò an sum waŋā.’
8 #
Lɛv 19:13; Lwa 24:15 A m bùghò nəgha è kwəla e kpe tsughu, mughu ù ùsum n dzɛ̄ â ghùw wəla ù lɛɛ̄n ghî a kəfwàʼ ghò enyəa, ‘Tɔŋɔ tsughu ghî a kəfwàʼ ghò ghù tsə ghee. Zǐi tsughu a zəŋò ghì ghəla ghe mô soʼ nyə gûŋsò wo, ghù è kɔʼɔ nduw.’ 9Ghî ghəla ghe mô ni ghee alo kəfwàʼ an tàm tə ezūuw tə tɛ̀ an nə̀gha è guŋsò zò, chìa n nîi ndùw ko kua u fətsuʼ. 10A m bùghò ghî ghəla ghe mô soʼ nyə esə̄ ndûw bugho, ghe n chîi ko tùʼ enyəa ghe sô nìi ndə̀mà tə ukʉ̄a, ghe n nì ndùw sùghò kua u fətsuʼ, kua u fətsuʼ. 11Ghəa ghe nî kɔʼ kua u ghee wo, ghe ŋ kàʼ ndùw alesaʼ mughu ù usum ù te, 12dzàa tsùghùu enyəa, ‘Ghî ghə ebàm ghən fwâʼ ko an tàm zə̀ èzuuw e mɔ̀ʼ, ghǎʼ yia tsughu zeē fɛ̀ alo kəfwàʼ am bòobò kə tsə̂ kən, ghù vʉ̀a ghù bùghò tsə dzəə̄ŋ wo ghàʼ à ghee eghəla.’
13Mughu ù sum vʉ kuuwn bɛ̀lɛ̀ tsùghu ko ghùw ù ghee u mɔ̀ʼ enyəa, ‘Kòʼo ghùw waŋa, Ŋ̀ kâ ghɛ̀ tsê dzə̀, yìa n so a mô bǒo naŋa fəgha kəla Ŋ̀ ki aletsə̄ ghɛ a te alo fətsūʼ a? 14Nǐ nlò kua wɛʼɛ wo ghɛ̀ nughu e zɛʼɛ zo, à tsə̀m tsùghù mugho enyəa Ŋ̀ ki aletsə ghɛ̀ à ghê ghì ghə ebàm ghən eghəla. 15À lò enyəa Ŋ̀ yo aleghə̂əŋ ghəa zəla Ǹ tsəm tsughu aŋ kua waŋa a? Ŋkāa ghɛ̀ mʉʉn nù enyəa M̀ mwaʼà nù à?’ ”
16 #
Mat 19:30; Mâk 10:31; Lûk 13:30 Yɛso n tsughu tsən tsughu enyəa, “Ghî ghəla ghe lô bam ko lo bùghòo dòʼn kə̀sə, ghəla ghe lô se ko kê bughò doʼò kə̀bam.”
Yɛso kə̀a kpèʼê ghəa ghe evʉ a wə̄n
(Mâk 10:32-34; Lûk 18:31-34)
17A m bùghò Yɛso nùghù tsughu enyea e kɔʼɔ ndùw an Yɛ̀lusalɛ̀m, ù n ghəəŋ tsughu enyəa tsə̀təndə̄ghā tə wə̄n tən èghəm à ghè tò tə bə̀ghà kuʼsō doʼò wô ghèe ghee, ù n nyɛʼɛ dzɛ̀ â ghee enyəa, 18“Kòʼô nlò, sɛ̀ fɛ kɔʼɔ ndùw an Yɛ̀lusalɛ̀m: a fughu, ghe lo nìi fùghuu ndùw Wɛ̀ ù Ghùw â tuw u təfɔ̀e wò ghèe ghê dèekə̀làŋ, ghe lo fughuu tsughu kədaʼa enyəa ghe wiī maʼà wə̄n. 19Ghe lo daŋso fughuu tsəghà ndûw wə̄n â Tòʼò zò ghe lo sûuwn wə̄n, ghe bu wən alo təkwùu, ghe daŋso nîi təghàa kɔʼ wə̄n, Zə̀ kə̀ lo zôo nughù kɔʼ wə̄n alo evʉ̄ bugho tsuʼu m kê kpe tsughu n təgha.”
Fəgha kəla zə̂awɛ̀ bvʉ
(Mâk 10:35-45)
20Wi ù Zɛ̀bɛ̀dêe n sə̀ kɔʼ wò a vʉ̀a Yɛso ghèe ghê wɛ a wə̄n à nûu ghə̀n à bə̀ghà tɔɔŋ Dzɛ̂ms ghèe Dzɔ̌n, sə kɔʼ nyaʼa ndùw a tsəlà wə̄n, nɔ̀e ndùw wə̄n â yòsò zò. 21Yɛso m bvʉ â wə̄n enyəa, “Ghù lə̀ghaa kə̀ kwò à?”
Ù dzɛ̀ â wən enyəa, “Dzǎa naŋa tsughu enyəa abugho ghù kè lo də̀ŋ kò, wɛ ghaŋā à nûu ghə̀n à bə̀ghà ke dōʼ ghɛ̀ à ghee, u mɔ̀ʼ aŋ kwe wʉ̂a ù təma wo, u mɔ̀ʼ alô ù kwû wò.” 22Yɛso m fwə̀n bɛ̀lɛ̀ tsùghu ghee enyəa, “Ghɛ̀ kwò yo fəgha kə̀là ghɛ̀ bvʉā ghè kò. Ghɛ̀ lò nû alezūw ŋgoʼ zəla Ŋ̀ ki alezuw a?”
Ghe mo â wə̄n enyəa, “Òo, ghàʼ lo nû.” 23Ù n dzɛ̀ â ghee enyəa, “To ghɛ̀ zuw ŋgoʼ zaŋā, alekuūwn doʼò aŋ kwe waŋa u təma wo ŋkāa ù kwû wò, à yò mugho aledzɛ̀. Luʼū tən kuuwn lɛ̂ɛn ghì ghəla Bəghà fəghaan naŋā â ghee.” 24A m bùghò tsə̀təndə̄ghā tə wə̄n tə̀ li tə̀n èghəm zuw tsughu ghəa yi gho, ghe m pfʉso n nə̀ghà a zəŋò waazə̂ à li yi a bə̀ghà. 25#Lûk 22:25, 26Yɛso fi tɔŋɔ tsughu nu tsə̀təndə̄ghā tə wə̄n to tə dzə̀m dzɛ̀ â ghee enyəa, “Ghɛ̀ kwo enyəa dwə̀ŋ u mbī u kɔʼ nyaʼa an tuw u ghì a ghee, ghî a ghee à ne yia dêe dwaʼa wo a zəŋò ghee. 26#Mat 23:11; Mâk 9:35; Lûk 22:26E lo yò dzə̂ êzə̀ am bvʉa zɛʼɛ̄, ghùw wəla ù so e doʼò ghùw ù nè am bvʉa zɛʼɛ̄ ki aledòʼò tsughu ghùw ù kə̀ fwàʼ â ghì à li ghən a dzə̀m. 27Ghùw wəla ù so e doʼò sughò kə̀sə am bvʉa zɛʼɛ̄ ki aledòʼò tsughu kɔ̂ɔ fɛʼɛ. 28E fɛ lò sugho tò aŋghəa Wɛ̀ ù ghùw fə̀ bughò enyəa ù e fwə̂ən fwaʼā â ghì ghò, à yò dzə̂ enyəa ghî ghə̀ è fwaʼa â wə̄n, àsùghò enyəa ù fughuu ndûw tuw kə wə̄n alezuū sə tuw u ndə̀m è àghì.”
Yɛso ghə̌əŋ ghì à foō gho a bə̀ghà enyəa ghe kôʼ tə̀luʼū
(Mâk 10:46-52; Lûk 18:35-43)
29A m bùghò Yɛso zə̀ghàa tsughu Yɛ̀lekò, saʼ kə aghì kə̀ n tə̀ŋɔ̀ nùghù ndùw a bǎà wə̄n. 30A mo e kôʼ ghì à foō à li gho a bə̀ghà ghe mò doʼ fughu aŋ kwàn u dziī ŋ kaʼ tsughu bɔ̀ŋ m bùʼn mò aŋghəa ghe zuw tsughu enyəa Yɛso tsə̀ghàa nù; ghe n dzâa tsùghùu enyəa, “Kwuso se zo a zəŋò ghàʼ a, wɛ̀ ù Dɛvìd!”
31Ghî ghə̀ ŋ kee ndùw ghee enyəa ghe zuūw doʼò mɔŋ; ghe ŋ kôom fə̀ghaan ŋgee buʼn səa kɔʼɔ mbɔ̀ŋ enyəa, “Wɛ̀ ù Dɛvìd, Mughùbè, kwuso se zo a zɔŋò ghàʼ!”
32A m bùghò Yɛso zuw tsughu, ù n têe è tsughu, tɔŋɔ tsughu ghee, bvʉ â ghee enyəa, “Ghɛ̀ ləghaa enyəa Ŋ̀ ghəŋlo ênzə̂n â ghɛ̀ a?”
33Ghe n dzɛ̀ enyəa, “Mughùbè, ghàʼ ləghaa enyəa ghù ghəəŋ tsughu ghàʼ è koʼō luʼu to.”
34Yɛso ŋ kwuso tsughu ese, mɔ̀m tsùghù sə a ghee, ghe n daŋso kàʼ ndùw luʼū tə̀ koʼō to, ghe n nùghùu ndùw a bàâ wə̄n.
Currently Selected:
Matìo 20: agq
Highlight
Share
Copy
Want to have your highlights saved across all your devices? Sign up or sign in
