Matìo 24
24
Yɛso dzɛ̀ aŋghəa Ndùghù è Kə̀zə̀ e kê saʼnlo a te
(Mâk 13:12; Lûk 21:5-6)
1Aŋghəa Yɛso zə̀ghàa tsughu Ndùghù è Kə̀zə̀ e ne nùghùun ndùw, tsə̀təndə̄ghā tə wə̄n tə ŋ kəŋo wò a vʉ̀a wə̄n, dè ndùw wə̄n â dzɔ̀ɔdzɔ̀ tə təndughu təla tə lo am be kə̀ ne ko. 2Ù m fwə̀n nùghù dzɛ̀ tsughu â ghee enyəa, “Ghɛ̀ sô bəla koʼò fɛ, tia è li e yo fɛ am bʉgha u təndughu wə̄n e lo kôom nyaʼ tsəgha am bala e wə̄n; a dzə̀m lo tsughuu a ghueetsə̄.”
Utsû àsùghò alendzaŋso àghì
(Mâk 13:3-13; Lûk 21:7-19)
3A m bùghò Yɛso dòʼ aŋ kwàʼ u tə̀ Olèf, tsə̀təndə̄ghā tə wə̄n tə n tsɔ̀ŋ bùghò kòʼ wò wə̄n, bvʉ â wə̄n enyəa, “Mò à, ghəa ghən lô bala kə nîi a zə̀n, à lǒ tsə̌a è ghɛ zò è kè dêe tsughuu enyəa nəgha zəghà è koōm bugho ebàm zə̀ m kpe a, asùghò enyəa mbī fɛ so mîa a?”
4Yɛso n daŋso bɛ̀lɛ̀ tsùghu ghee enyəa, “Nì nlò nəgha zo, ghùw lò sêe məŋso ghɛ. 5Nu ndə̀mà tə aghì tə̀ lo ndùw bùghòo fɛ, ghe e dzaā wo enyəa ghe lo mugho. Chìa e ke dzaā tsughuu enyəa, ‘À lò mugho Kə̀lestò ù te.’ Ghe kê sêe məŋsō tsughu ndə̀mà tə aghì. 6Tsaā tə ke kuʼū kuu kaaŋ ko enyə am bùghù tɛʼɛ̄, ghɛ̀ lo e zūuw sugho làbəlà è tsaā təla ghî à kuʼù təma kaŋlo àsùghò təla tə lɔʼso kûu wo. Lo dzə̀la tsughu ko nlò fə̂ŋ tò; nu ghəa ghən ki nû alesə, à kè fi kuuwn kaam yò dzə̂ enyəa mbī s o e mîa. 7Nu naʼà tə̀ ke e buu kaaŋ ŋgè kò aŋ ghùe e ghee, dwə̀ŋ u tənàʼà wə̀ e ke zughū kaŋlo alo eghùe, dzə̀ŋ kè nyə alo enaʼ, bɔ̀ŋ e ke bɛlɛ maʼn kaaŋ luʼu to. 8Mo ghəa ghə̀n à dzə̀m fi tsô nǎam lò ko tò wɛ lô zeʼē chuūw tsughuu wìzən abugho ù də̀ghàan tsughu sôʼ zò.
9 #
Mat 10:22
Ghe lo daŋso kaʼā tsughu, ghe e kwuun fughuu nduw ghɛ enyəa ghe ndzaŋso, ghe winlo; mbī zən è dzə̀m e kè baā ghɛ enyəa so à lò ghəa zāŋā. 10Ndəmà tə aghì tə̀ kê tiī zəghàa tsughu mugho, ghe lo e ki ghòʼ kò aŋ ghue e ghee, ghe e ke feēn fughuu sugho ghue e ghee zo. 11Ndə̀mà tə ghǐishʉ̀ghà tə agha tə kê nughù səghàan səa kɔʼ, ghe sêe məŋsō tsughu ndə̀mà tə aghì. 12Ghəa à biigh a kê dûuw tsəghàa tsughu tə luʼū, ghî ghə̀ e ke koōm tɔʼɔ̄ ləghaa yo waazə̀ ghò. 13#Mat 10:22 Ghùw wəla ù kuūwn kùum kɔlɔ tsugh fə̀ŋ ndùw tɛ̀ è nduw kê zə kətuw. 14Ghe lo naʼà tsughu làbəlà è dzùŋ zə̀n â nàʼà mə̀n n dzə̀m n dzə̀m, to ghî ghən à dzə̀m zuūw, sěe mbī lo daŋso bughò mîanlo.”
Fɛ̀ɛn kə eghəa kə̀ kɛɛn kə ughùe kò
(Mâk 13:14-23; Lûk 21:20-24)
15 #
Dan 9:27; 11:31; 12:11 “Ghɛ̀ kê kôʼ fɛ̀ɛn kə kəfəgha kə̀ kɛɛn kə ughùe ko kə̀ ti an lùʼu kə̀ baa ko aŋghəa ghùwshʉ̀ghà Danìa fə̀ dzɛ̂ naŋa. (Â ghùw wəla ù tɔɔ̄ŋ ghəa a te gho: e tɔʼ lo alezuūwkɛlɛ̂ ghəa a te gho). 16Ghɛ̀ yìa ghɛ̀ lo an Dzùdîa, ghɛ̀ ki aletiī kɔʼ alo təkàʼà. 17#Lûk 17:31 Ghùw wəla ù lò an tuw kə ndughu kə wə̄n, ù ka kôom lɛ̀so sə̀ tsùghù wò dzə̀ enyəa e se tsughuu nî fəgha kə̀ li ko an ndughu. 18Ghùw wəla ù lò an usum ka kôom lɛ̀so kwə̀n nì zěe sùgho ndzʉ̄ to. 19An tsuʼu n te mò, yîzən a nə̀ghà mə̀ awɛ, àsùghò ghəla ghe nyɔŋso wɛ gho, ghe kê lò an tsù! 20E gɔɔ̄ŋ tsughuu kɔ Zə̀ kò enyəa ghù lò so e tii nùghùnlò mo a lo an Ndzɔŋ zə̀ è təfʉ̀ghàdzughù ŋkāa mò à lò Tsuʼntsə̄ u Tə̀dzûu. 21#Dan 12:1; Edê 7:14 Nu ŋgòʼ è ùtsù wəla u kê lo, u kaām bûʼ dòʼò kòʼ tsə̀ghà aŋghəa mbī fə̀ kaʼ tsughu bùghò sə kɔʼ nɛ, ŋgòʼ è ùtsù u te u kê kòom sə̀ kòʼ sùghò yò. 22Abugho Zə̀ kə̀ mô tâʼkè ghəə̄ŋ tsughu enyəa tî kə te kə ka lo dòʼò dàan ndùw, ghùw mɔʼɔ̄ mô yò alezə̄ kətuw; Zə̀ kə̀ lô tsùʼù mən fɛ gbôo kə̂a tsughuu wô bòʼ ghì a wə̄n ghəla ù tsɔʼ kɔʼ.
23Abugho ghùw kè dzɛ̂ â ghɛ̀ an tì kə te ko enyəa, ‘Kòʼo nlò, Kə̀lestò ù te wəlà!’ Ŋkāa enyəa, ‘U vʉ̂a a fî!’ E kwo ghɛ̀ lô so e boom fughuu nù. 24Tɔŋlo enyəa, Kə̀lestò tə agha tə lo səa kɔʼɔ nù, àsùghò ghǐishùghà ghə agha gho, ghe e deē tsə̌a tə̀ fɛɛ̄n to, à sə̀ghà mò, enyəa abugho dzì lǒ, ghe buʼù sêe məŋsō ghì ghəla Zə̀ kə̀ tsɔʼ kɔʼ. 25Zuw nlò ghɛ a! Mùghò n dzɛ̀ zìi nàŋa wò â ghɛ̀ tò nəgha e te zə e buʼù bùghò.
26 #
Lûk 17:23, 24 À fi lo enyəa, abugho ghùw dzɛ̀ â ghɛ̀ enyəa, ‘Kòʼo nlò, ù lò aŋ ŋgwə̄n — kà nlò a fughu ndûw.’ Mo ghe dzɛ̂ enyəa, ‘Ù nàn dòʼò fɛ — kà nlò zuw.’ 27Bughò e Wɛ̀ ù Ghùw kê bɔ̌ɔm lò ko an ndɛ tǒ ghuuw e lô mwâa ŋgəaa wô wala ko kə dzə̀m, alekaʼā nughùu tsughu an tsə kə̀ səa ko m bùghò tsə̀ghà kùm wò an tsə kə̀ bəŋo ko.
28 #
Lûk 17:37
Abugho fəgha kə kpuw doʼò alo kəlùʼu, dzʉghadzʉgha wə ŋ ghə̂aa kǎaŋ ko fughu.”
Bughò e Wɛ̀ ù Ghùw
(Mâk 13:24-27; Lûk 21:25-28)
29 #
Èzy 13:10; Dzw 2:10, 31; 3:15; Edê 6:12;
Èzy 13:10; Ɛ̀zi 32:7; Dzw 2:10; 3:15;
Èzy 34:4; Edê 6:13 “Abugho tsû vʉa an tì chi kê so e daŋso tsughuu bughuu tsughuu nù, tsə̀ è ke koōm tughuu yo, ndzɔŋ e ke kôom baŋa sugho yo, sə̀ghàbəlà ŋ kê tsɔʼn tsughuu wô alo kəwālā, fʉgha wən ù dzə̀m alo kəwālā kê nughù noʼò kaāŋ wô. 30#Dan 7:13; Zâk 12:10-14; Edê 1:7 Tsə̌a è Wɛ̀ ù ghùw kè daŋso dêe səā wô alo kəwālā, ghî à kê daŋso dîin kaaŋ wô an nàʼà mə̀n n dzə̀m n dzə̀m abugho ghe kê koʼ aŋghəa Wɛ̀ ù ghùw bùghoo a te am mbàʼ è kəwala an dwaʼa u wə̄n àsùghò an nsəghanyəgha ŋ Kə̀zə̀ n ne mò. 31Ghe lo daŋso tɔŋɔ nyəā ndûw mbuwlì, ù kè tuū səā wô tsə̀təndə̄ghā tə kə Kəzə̀ tə wə̄n aŋ kàlà tə mbī tən tə̀ chìakò enyəa ghe zûuŋ kaāŋ wô ghì a wə̄n ghəla ù tsɔʼ naŋā kaŋlō an lùʼù tən tə̀ dzə̀m.”
Tsʉ̂ e kàʼ fə Fîg
(Mâk 13:28-31; Lûk 21:29-33)
32“Ghɛ̀ zoʼn kɔʼ nlò ghəa zo aŋ kàʼ fə fîʼ: bugho fə̄ zûuw wo, ghɛ̀ ŋ daŋso kele tsughu enyəa ghuuw e so e tsughuu kwə̄n. 33À lò sugho eghəla abugho ghɛ̀ kê koʼ ghəa ghəla Ǹ dzɛ̀ â ghɛ̀ nìi bala ko, à fi lo enyəa Wɛ̀ ù Ghùw ŋ kuʼso. Ù lò a fǔ u mbɛ̀. 34M̀ fɛ kùu dzàa wò nù â ghɛ̀ enyəa, sɛ̀ a nɛ ghən lo tsə̀ghà mɛ̀ʼɛ̀ yò mo ghəa ghən kâ bala kə nî. 35Wala kə kê tsə̀ghàa mìan nù, àsùghò ghueekətsə̄ ko, shwaʼ waŋā u kê kǔuwn mìa kòʼ yò.”
Ghùw mɔʼɔ̄ kwo naŋa yo tsuʼ u te wo ŋkāa nəgha a te zo
(Mâk 13:32-37; Lûk 17:26-30, 34-36)
36“Ghùw mɔʼɔ̄ kwo naŋa yo tsuʼ u te wo ŋkāa nəgha e te zəla Wɛ ù Ghùw lo bughōo a te — ghuūghùe u Wɛ ù wə̄n ù nùu, ŋkāa tsə̀təndə̄ghā tə Kəzə̀ tə̀ kwo naŋa sugho yo. À bɔ̌ɔm kwo ko Tsele ù te. 37#Dzs 6:5-8 Wɛ̀ ù Ghùw kè bɔ̌ɔm bùghòo ko tò ghəa ghəla a fə̀ nî bəla an tì kə Nôa. 38An tì kə te ko, â fʉ̀ghàdzughù tə̀ è bughò sə, ghî a fə̀ zuʼso ko alezə̄, mʉa ndùw ùfʉgha, nyəa ndùw àyi, boom ndùw ànum, bùghò tɛ̀ wò tsuʼ wəla Nôa fə̀ nyə kɔʼ a te alo kəkwə̀n#24:38 ŋgɔ̀ʼɔ̀ kə kəkwə̀n mo ghe bɛ ŋguuŋ kɔʼ alo ŋkàʼ.. 39#Dzs 7:6-24Ghe kâ dɔ̀m kèle zìi enyəa fʉ̀ghàdzùghù tə̀ lo bùghò sə̌a nù, tə leŋe ghee. À kè bɔ̌ɔm lò sugho êzə̀ abugho Wɛ̀ ù Ghùw kè bughōo. 40A kê bugho an tsuʼ u te wo, ghî à ke lo a bə̀ghà an usum, ghe kê nîi nughù kɔʼ u mɔ̀ʼ, ghe naŋā taʼà tsughu ù lì. 41Yîzən ghə e ke lo sugho a bə̀ghà ghe gwuūn sò ghò, ghe kê nîi kɔʼ sughò ù mɔ̀ʼ, ghe naŋā taʼà tsughu ù lì.
42Nì nlò ghôom zò, tɔŋlo enyəa ghɛ̀ kwo naŋa yo tsuʼ wəla Mughùbè wɛʼɛ lo bughōo a te. 43#Lûk 12:39, 40 Ghɛ̀ kele tsughu enyəa, abugho mughù ndughu mô lo alekele nəgha zəla ghùwtsɔ̀ŋɔ lô alebùghò a te â tsuʼ wo, tò ù kà sə e mgbii e dɔ̂m kà, to ù bèe teē kɔʼɔ ko ghùwtsɔ̀ŋɔ ù te enyəa lò bughò gbɛlɛ̀ nyəā wo ndughu è wə̄n. 44À fi lo enyəa, e kwo ghɛ̀ lô nîizə̂a koʼò sughò ghue zɛʼɛ zo; nu Wɛ̀ ù Ghùw kè bùghòo an nə̀gha zəla ghɛ̀ kwo naŋā yo.”
Kɔ̂ɔ fə̀ dzûŋ fò àsùghò fə̀ biigh fo
(Lûk 12:41-48)
45“À kǔuwn lò kɔ̂ɔ fə̀ dzûŋ fə̀ ghɛ fo, mo fə tɔɔ sùghò nù a? À lo kɔ̂ɔ fəla mughùbè ù wə̄n nî naŋā tsughu enyəa fə è lɛɛn ndughu è wə̄n a, àsùghò kɔ̀ɔ n li mən alefughuu ghee â fʉ̀ghàzəa wò an nə̀gha zəla ghe ki alezəa a te. 46Dzɔ̀ lò â kɔ̂ɔ fə te fo abugho a mughùbè u wə̄n ndûw kwəlāa nyəā wo, ù m bùghò kòʼ wò mò kɔ̂ɔ fi fə fwaʼà fəgha kəla kə lo ghè kò. 47Kùmkùm, aŋghəa Ǹ dzâa wô fɛ â ghɛ̀, Mughu ù te lo naaŋ wə̄n ù è lɛɛn fʉgha u wə̄n wo u dzə̀m. 48Abugho à lǒ fə̀ biigh fo, fə n dzɛ̂ tsughu am fə̂ŋ è wən enyəa, ‘Mughùbè waŋā lo lōʼn nù a beē.’ 49Ù n də̀ghàan ndûw alebuu waazə̂ ghə ŋkɔ̀ɔ ghò à li ghən, ù n zəa, mʉa kala ghèe ghê ghì à kala gho. 50Mughùbè ù wə̄n lo tsôo gbəla səā kɔʼɔ ko an nə̀gha è li zo, an tsuʼ ù li wo mò kɔ̂ɔ fə te fə kwo naŋa yo. 51Mughùbè ù wə̄n ù te lo bughò dêe kûu ndûw wə̄n â mùlùŋ, ù ghəəŋ tsughu wə̄n, ù è zuuw ŋgōʼ zəla ghî a kə̀bàŋàdzə̀m à zuūw, a fia ghî à tɔʼɔ̀ dîi nəə̄ŋ ndûw ènyə, pfʉa sùghò àsɔŋ.”
Currently Selected:
Matìo 24: agq
Highlight
Share
Copy
Want to have your highlights saved across all your devices? Sign up or sign in
