Mâk 14

Ghe kɔn fə̀mbɛ̀ an tuw kə Yɛso

(Mat 26:15; Lûk 22:12; Dzn 11:45-53)

1 # Ksm 12:1-27 À fə̀ lo mò à dòʼòdòʼò ko ntsuʼu m bə̀ghà to ghe e zə zə kə̀ Zəŋso naaŋ ko àsùghò zə kə Kəbɛ kəla mbvùŋ buw a te, tuw u təfɔ̀e wə̀ n tsùghù dòʼò tsùghu ghèe ghê dèekə̀làŋ alekɔ̀n fə̀mbɛ̀ an tuw kə Yɛso, aŋghəa ghe lô alenyɛʼɛ̄ kwū wə̄n a te ləmkə̀ləm, ghe wi. 2Ghe ŋ kòom nùghù dzɛ̀ tsùghù enyəa, “A ka wə̄n kwu dzə̀ an nə̀gha e kəzə̄, ghî à lo nughùuŋ kɔʼɔ̄ â ndə̀m kò.”

Wìzən ù lì tsoʼso Yɛso am Bɛtanì

(Mat 26:6-13; Dzn 12:18)

3 # Lûk 7:37, 38 À n lo mo Yɛso zə̌a an ndughu alô Sǎemòn, ghùw ù tə̀tsùghò ù lì an nàʼà fə Bɛtānì. Wìzən ù lì n nyə̀ wò fughu â tòo fə àlàbastà fò à kɔ kə mvʉ̄ kə̀ ləə̄m kə̀ li ko a te ghe ghəŋlo am fə̀ghà kə̀ li ghe tɔŋlo enyəa à lò nâad#14:3 Nâad: Nâad zən lo ŋgòʼ è vʉ n lə̀mlo n li mò.: Ù ŋ wi tsughu tôo fə te fo, kwə̀lè tsùghù vʉ n lə̀mlo n te mò an tuw kə Yɛso. 4Ghî à li ghə n tsə̂əm kə̀a fughu aŋ ghùe e ghee an nəghàan m pfʉ̌a mò enyəa, “Ghe vʉ mən pfʉ̄sō nyà màʼà tsùghù aŋ kwò à? 5Ghe mô bə̀n lò nû alefèe an ndə̀mà tə ukʉ̄a, a fughu kua u te wo â ghì à laa gho.” Ghe ŋge saʼ wə̄n an ghəa a te gho.

6Yɛso m fəŋso dzɛ̀ a ghee enyəa, “Zə̀gha nlǒ wə̄n, ghɛ̌ wə̄n fəmso aŋ kwò à? Ù ghə̌əŋ ghə̀a è dzûŋ zò â mùghò. 7#Lwa 15:11 Ghɛ̀ lo tsò lò tsəgha ko ghɛ̀ à ghê ghì à laa gho nəgha tə dzə̀m, ghɛ̀ ke e lo aleghə̂əŋ ghə̀a è dzûŋ zò a zəŋò ghee nəgha zəla ghɛ̀ tsəm. Yia a bughò mugho, sɛ̀ lo dzeŋe yò tsəghà dzə̂ a dzə̀m. 8Ù ŋ ghəəŋ ghəa zəla ù mò ki aleghəŋlo am vʉ məla ù kwə̀lè zîi wo a zəŋò mùghò aletsoʼō naŋā tsughu mugho a te, â mùghò alenyəa ndûw alo eshìa. 9M̀ fɛ kùu dzàa wò nù â ghɛ̀, am fwàʼ kə̀ dzûŋ kəla nughò wən fwâʼ tsughu ghè kò, abugho ghe naʼn ko a ghɛ làbəlà è Kə̀zə̀ è dzùŋ zən; ghe n zə̀əŋ tùghù zən e wə̄n.”

Dzudàs boo alefèe fughu Yɛso

(Mat 26:14-16; Lûk 22:36)

10Dzudàs Eskàlìot, tsə̀ndə̄ghā e mɔ̀ʼ an tsə̀təndə̄ghā tə Yɛso tə̀n èghəm à ghè tò tə bə̀ghà n nùghù nùghù ndùw alô tuw u təfɔ̀e wò, alendùw fêe fughu Yɛso. 11A m bùghò ghe zuw tsughu shwaʼ u Dzudàs wò, ghe mo è boo alo e duʼnlo, daŋso boo naŋa tsughu enyəa ghe lo fughuu nǔ wə̄n â kua wo. Ù fi dəghàan tsùghù nû alekə̄ŋ tə dziī alenìi fughuu tsəghàa ndûw Yɛso.

Yɛso zə fʉghàzəa u zə kə̀ zəŋso naaŋ ko ghèe ghê tsə̀təndə̄ghā tə wə̄n to

(Mat 26:17-25; Lûk 22:7-14, 21-23; Dzn 13:21-30)

12An tsuʼu sûesʉ wo aŋ zə kə Kəbɛ kəla mbvùŋ buw a te, tɔ̂ɔŋ tsuʼ fəla ghe sâa tsʉ u ndzì u zə kə̀ Zəŋso naaŋ ko a te, tsə̀təndə̄ghā tə Yɛso tə m bvʉ â wə̄n enyəa, “Ghù lə̀ghàa enyəa a ndûw biān naŋâ luʼū kə̀ ghɛ ko â ghù alendùw zə zə kə̀ zəŋso naaŋ kən fùghù à?”

13Ù n daŋso tum tsughu tsə̀təndə̄ghā tə wə̄n tə bə̀ghà, dzɛ̀ â ghee enyəa, “Ghɛ̀ nyə nduw enaʼ, ghɛ̀ so nduw kpeen tsughu ghɛ̀ à ghê ghùw mò ù bòʼò kèlê tom kə mmùghu. Nùghu ndùw nlò a bàâ wə̄n. 14Ndughu zəla ù sò nyəā nduw a te, ndǔw nlǒ fughu ghɛ̀ dzɛ â mughu ù ndughu ù te enyəa, ‘Wàdè dzɛ̀ enyəa, “Dzughu e ndughu zəla ghàʼ à ghê tsə̀təndə̄ghā taŋa tə so e doʼo zə zə kə̀ Zəŋso naaŋ ko a te zɛ̂ɛ a?” 15Ù sò dêe ndûw ghɛ̀ â dzughu e ndughu è ne zo edzūŋ an ndùghù è kɔ̀ʼɔ daŋso mo fʉgha u lo tən a te, bian naŋa tsughu nlò fʉgha u kəzə̄ wo fughu.

16Tsə̀təndə̄ghā tə wə̄n ti n daŋso nùghù nyə̀ ndùw ènàʼ, nyoʼn ndùw kòʼ ndùw sùghò àghəa aŋ ghəa ghəla Yɛso mò teso. Ghe m bian naŋa tsùghù sùghò ghəa a zə kə Zəŋso naaŋ kə te ko fughu.

17A m bùghò an nə̀gha è guŋso zo, Yɛso m bùghò ghèe ghê tsə̀təndə̄ghā tə wə̄n tì èghəm à ghè tò tə bə̀ghà. 18#Sms 41:9Ghəa ghe sô doʼ an, zəa, Yɛso n dzɛ̀ â ghee enyəa, “Kùmkùm, M̀ fɛ kùu dzàa wò nù â ghɛ̀, ghùw wɛʼɛ u mɔ̀ʼ sò fèen fùghuu mùghò, ghùw mò ghàʼ à wə̄n dzeŋe zəa à dzə̀m.”

19Ghue zə m kpuw lɔŋe tsughu tsə̀təndə̄ghā tə wə̄n enyə an shwaʼ u wə̄n, ghe ŋ kaʼ tsughu alebvʉ̄ fə mɔ̀ʼ fə̀ mɔ̀ʼ â wə̄n, chìa mo enyəa, “À sò yia lo mugho a?”

20Yɛso m bɛ̀lɛ̀ ndùw ghee enyəa, “À lǒ ghùw u mɔ̀ʼ an tuw wɛʼɛ wə̄n èghəm à ghè ghò a bə̀ghà. Ghùw mò ghàʼ à wə̄n zəa dzəəŋ səa kɔʼɔ alo kəkāŋ kə mɔ̀ʼ. 21Wɛ̀ ù Ghùw kì ko nû alenùghù aŋ ghəa ghe fə tɔm naŋā kùu ndùw wə̄n; à kǔuwn lò enyəa ghùw wəla ù sò fêen fughuu wə̄n, ù lo ŋgee zūuw ŋgōʼ. À mò so e laam lǒ dzɔ̀ abugho ghe fə tâʼkè dɔ̂ɔ dzə ghùw ù te.”

Mughu ù te bughòo kùun tə̀ zəa to enyəa ghe e moʼn wə̄n a te

(Mat 26:26-30; Lûk 22:14-20; 1Kò 11:23-25)

22Ghəa ghe sô zəā, Yɛso n nì kɔ̀ʼ kəbɛ, fughu kɔʼ kəzɔ̀ŋlò â Zə̀ kò, boʼn fùghù ndùw â tsə̀təndə̄ghā tə wə̄n to, dzɛ̀ â ghee enyəa, “Nǐ nlò, zən lò gwən e ughùe zaŋā.” 23Ù n nì kɔ̀ʼ sùghò wùa, a m bùghò ù fughu kɔʼ sugho zɔ̀ɔŋ kò, ù m fùghù ndùw â ghee, ghe a dzə̀m m mʉ kaaŋ wò a te. 24#Ksm 24:8; Dzl 31:31-34 Ù ŋ kòom dzɛ̀ kpèʼe tsughu â ghee enyəa, “Tən lò kâŋ tə ŋkāa taŋa ghe kwə̂n fughu wo â ndə̀m è àghì aletsughū tsəlā tsughu Kàa ŋ Kə̀zə̀. 25M̀ fɛ kùu dzàa wò nù â ghɛ̀, Ŋ̀ kê kòom mʉ̀ yo lʉ̀ mən fɛ sɛ̀, à gɔ̀ʼɔ̀ ko tsuʼ fəla Ǹ lo mʉā lʉ̀ m fughu mò a te am fɔ̀e u Kəzə̀.”

26Ghe n daŋso zom kɔʼ ndzàŋ zə̀ ŋ̀kɔ̀ʼso â Zə̀ kò, nùghù kɔ̀ʼ ndùw aŋ Kwàʼ u tə̀ Olèf.

Yɛso dzɛ̀ enyəa Pità sò tǔu màʼn nǔ ghee

(Mat 26:31-35; Lûk 22:31-34; Dzn 13:36-38)

27 # Zâk 13:7 Yɛso n dzɛ̀ â ghee enyəa, “Ghɛ̀ ghən à dzə̀m lo tīi zə̀ghàan nù mugho, bòʼ ghe tɔm naŋa enyəa, ‘Ǹ lo zàʼà tsùghuu bàʼàtə̀ndzì, ndzì tə̀ lo daŋso tiī sɛ̂ɛ tsughu.’ 28#Mat 28:16 Yìa à kuūwn lô enyəa, abugho ghe lo nî nughù kɔʼ mugho alo evʉ̄, Ǹ lô ghɛ̀ ndûw lə̌əm ndùw aŋ Galèlîi.”

29Pìta mo â wə̄n enyəa, “Abugho ghee a dzə̀m ti zəghàa ko ghû, Ŋ̀ kuuwn yò dzə̂ alezə̀ghàa ghù.”

30Yɛso n dzɛ̀ â wə̄n enyəa, “Na Ǹ tɔʼɔ̀ dzâa wô â ghǔ a Pità, â nùumbvʉ alekɔʼɔ̄ tɔ̄ŋ tənəghā tə bə̀ghà nɛ â tsuʼ wo, à sò lǒ mò ghǔ m mùghò tue màʼà tənəghā tə tə̄ghā.”

31Pìta n tùghùsò dzɛ̀ kpèʼe ndùw â wən enyəa, “Abugho à bùʼ lô ko evʉ, to M̀ kpuw ghàʼ à ghù.” Tsə̀təndə̄ghā tə̀ li ti m bɔ̄ɔm dzɛ̀ sùghò ghəa è mɔʼɔ̄ zo.

Yɛso gɔ̀ŋlò aŋ Gɛ̀tsɛ̀manè

(Mat 26:36-46; Lûk 22:39-46)

32Ghe n ndùw tɛ̀ tsùghu an lùʼu kə̀ li ko ghe fə̀ tɔŋlo enyəa à lǒ Gɛ̀tsɛ̀manè; Yɛso daŋso dzɛ̀ tsùghù â tsə̀təndə̄ghā tə wə̄n to enyəa, “Dòʼo tsughu nlò fɛ, Ǹ ndûw gɔ̂ɔŋ wô.” 33Ù n nì kɔ̀ʼ Pìta, nì kɔ̀ʼ Dzɛ̂ms, àsùghò Dzɔ̌n, nùghù ndùw ghèe ghee. Ù n ndùw kaʼ tsughu alemūŋē, lò sugho am bàŋ kəfə̂ŋ. 34Ù n dzɛ̀ â ghee enyəa, “Tuw kaŋa kə lo aletsughūu nyə̄ bòʼ muŋe zəla e lo am fə̂ŋ zaŋa, dòʼo tsughu nlò fɛ, ghɛ̀ è tseē tsughuu luʼū to.”

35Ù n zə̀ghàa tsùghu ghee nyà nùghù dànlò è nduw, nyaʼa pfʉɔ ndùw ùsʉ a ghūu, gɔ̀ɔŋ tsùghù enyəa abugho dzì mò lo to tsû wən mô zɔŋɔ̄ zəghàa ghee. 36Ù n daŋso dzɛ̀ sə̀ wò enyəa, “Bàba, Tsele waŋā, â ghù, ghəa ghə̀n à dzə̀m lò nû alesə̄, nǐi nùghù mbùŋ kən an tuw kaŋā. Ghəəŋ tsughu aŋ ghəa ghəla ghù ləghaa, à yò dzə̂ aŋ ghəa ghəla Ǹ ləghaa.” 37Yɛso n ndùw bùghò èbàm bùghò kòʼ wò ghê Pità mo ghe bwii nù, bvʉ â Pità enyəa, “Sǎemòn ghɛ̀ bwii nù à, ghɛ̀ mô yò aledòʼò tsûuŋ tsughu edzuŋ an tàm è èzuuw e mɔ̀ʼ ko a? 38Tiso kɔʼ nlò tuw ko edzūŋ, ghɛ̀ è gɔɔ̄ŋ nduw enyəa ghəa è li e lô bughò tsoō ghɛ. Ŋ̀ kwo nû enyəa ghɛ̀ ki nû moʼn zò aleghəŋlo èghəa, ghue zɛʼɛ zəa e kuūwn bughuu ghaʼā.”

39Ù ŋ kòom nùghù ndùw alendùw gɔŋlò, kə̀a kwèen kô ghəa è mɔʼɔ̄ zəla ù mò bûʼ dzɛ̂ dzə. 40Ù n ndùw bùghò kpèʼe ko mo ghe yia bwiī, nu mgbii tə mò ŋge lo ghee alo asə̄. Ghe ŋ kwo yo ghəa zəla ghe lô aledzɛ̀ â wə̄n.

41Ù ŋ kòom ndùw è bùghò alekɔʼɔ̄ sə tə nəgha tə təghā, bùghò bvʉ̀ â ghee enyəa, “Ghɛ̀ naam bwii ko nù à, zʉ̀ʉn ko ghɛ̀ â ghue zo a? Zə m kpē êzə̀! Nəgha e te zə m kpē. Ghê ŋ Wɛ̀ ù Ghùw fêe fùghù sə̀ ndùw aŋ ghu kə ghì à biigh ko. 42Nùghu kɔʼ nlò sɛ̀ nughù. Kòʼô, ghùw wəla ù fèe fughu mugho m lò fɛ.”

Ghe Kwu Yɛso

(Mat 26:47-56; Lûk 22:47-53; Dzn 18:3-12)

43Ghəa Yɛso naām kə̂a ghəa gho èzə̀, ghe mo e koʼo Dzudàs, tsə̀ndə̄ghā an tsə̀təndə̄ghā tə wə̄n ten èghəm à ghè tò tə bə̀ghà, ù səŋ teē wo, ghèe ghê nɔ̀e kə aghì kò. Ghe ŋ ki təkɔ̄ àsùghò kasəŋgùʼ, mò à ghee tum sə̀ wò tuw u təfɔ̀e, ghê dèekə̀làŋ à tsoʼ to. 44An lo ezə̀ mo ghùw wəla ù so e fêe fughu wə̄n mâa fughu naŋa ghee â tsə̌a enyəa, “Ghùw wəla Ǹ sô ndûw maāŋ ndûw ghue zo ghàʼ à wə̄n, à lǒ ghùw ù te, kwu nlǒ wə̄n, ghɛ̀ ni nughu mò ghɛ̀ tɔʼɔ̀ chìin nù.”

45Ghəa Dzudàs səŋ teē wo, ù ŋ kɔʼ daŋso ndùw ko a vʉ̀a Yɛso, dzɛ̀ tsùghù enyəa, “Wàdè!” Ù n daŋso maaŋ kele ndùw wə̄n. 46Ghe n daŋso nì kɔ̌ʼ Yɛso, kwu tughuso tsughu wə̄n. 47Ghùw aŋ ghì ghəla ghe fə̀ kuʼù ti ghèe ghee n daŋso sɔ̀ŋ kɔ̀ʼ kɔ è wə̄n, chʉ̀ɛ màʼà ndùw tuūŋ kə kɔ̀ɔ fə fɔ̀e è nē a te. 48Yɛso n nùghù bvʉ̀ ndùw â ghee enyəa, “To ghɛ̀ fɛ sə̀ wò â kɔ to à mbàŋ tò alebùghò kwu mugho tò Ǹ lo ghùwtsɔ̀ŋɔ à? 49#Lûk 19:47; 21:37 Sɛ̀ mò lo tsəgha a dzə̀m am Ndughu è Kə̀zə̀ è ne tsuʼu n tsùʼu Ǹ zoʼn ghî gho a fughu, ghɛ̀ ŋ kè kwu mugho. Yìa à sò lô enyəa ghəa ghən ki nû alesə̄ aleluesō tsughu fəgha kəla ghe tɔm naŋā am Mwàʼsò kə Kəzə̀.”

50Tsə̀təndə̄ghā tə wə̄n tə dzə̀m n daŋso nùghù zə̀ghàa tàʼà tsùghu wə̄n, nùghù tìnlo è tsughu.

51Wɛ ù nùu ù lì, mò ù dzə̀là kèlê ndzʉ tə̀ dzùŋ tò a zəŋo ughùe m bwîi ndùw a bàâ Yɛso, ghe n nùghù kwu kɔʼ wə̄n, 52ù n tsɔ̀ʼ zə̀ghàa tàʼà ndùw ndzʉ tə te to, tì nùghù ndùw à ghue ù zum wo.

Ghe nî ndùw Yɛso aŋ Kaŋsì

(Mat 26:57-68; Lûk 22:54-55, 63-71; Dzn 18:13-14, 19-24)

53Ghe n daŋso nì ndùw Yɛso an ndughu alô fɔ̀e è nē, mò tuw u təfɔ̀e a dzə̀m ghə̀ m fughu zûuŋ dòʼò, à tsoʼ to tə dzə̀m, àsùghò ghê dèekə̀làŋ. 54À n lo mo Pità mâa nya fughu tsughu gha ko, nyɛʼɛ bùghòo ko èbàm, bùghò nyə̀ wò am be kə fɔ̀e è nē, nyə̀ dòʼò ndùw ghèe ghêe ghì chiīn gho, kàʼ ndùw wən ù zʉɛɛ wo. 55Tuw u təfɔ̀e vʉ̀, à ghì ghəla ghe mò lo aŋ kaŋsì e dzə̀m ŋ kəŋo ghəa zəla ghe so e nɔɔ naŋa ndûw a zəŋò Yɛso enyəa ghe wi wə̄n; ghe ŋ ŋgəmso kə̀ŋ èke. 56Ndə̀mà to aghì tə̀ n nughùun kàʼnlo àgha a zəŋò wə̄n, gha a ghee a te ghə m buʼù bōom dzəəŋ yo.

57Ghî à li ghə n nughùun těen kɔʼɔ ŋgaam kaʼa wò tùghùtùghù tə agha a zəŋò Yɛso enyəa, 58#Dzn 2:19 “Ghàʼ mò zuw wə̄n ù dzɛ̀ enyəa, ‘Ǹ lo gbɛ̀lɛ̀ màʼn tsùghûu Ndùghèkə̀zə̀ è nē an Yɛlusālɛ̀m, zəla à fə̀ bɔm ghùw, Ǹ lo bɔɔ̄ səā kɔʼ è nughù alo n tsuʼu n təgha, mò ghe kâ bɔ̀m dzə̀ aŋ ghu.’ ” 59Shwaʼ u ghee u te wə n naam boom dzəəŋ ko yo.

60Fɔ̀e è ne fi daŋso nùghù těe kɔʼ nû an sə kə ghee bvʉ â Yɛso enyəa, “Ghù bɛ̀lɛ̀ yò ghəa zo a? Ghən lò ghəa à ghɛ gho ghe kwuū ghû ènyə à tè à?”

61Yɛso ŋ kuuwn zuuw ko mɔŋ, bɛ̀lɛ̀ yò ghəa zo. Fɔ̀e è ne ŋ kòom bvʉ kpeʼe ndùw â wə̄n enyəa, “À lò ghû Mɛ̀sayà ù tè à, wɛ̀ ù Zə̀ kə̀la a kɔʼso a?”

62 # Dan 7:13 Yɛso n daŋso nùghù dzɛ̀ sə̀ wò enyəa, “À lò mugho; ghɛ̀ lo nāam kòʼò Wɛ̀ ù Ghùw ù te ù dòʼ aŋ kwē ù təma u ghùw wəla ù ki Dwaʼa wo, mò vʉ̀a ù bùghǒo am mbàʼ.” 63Fɔ̀e è ne ŋ kwù sùʼ bàa tsùghu dàla è wə̄n, wən à mughu, daŋso bvʉ tsughu enyəa, “A kôom lə̀ghaa kpeʼê ghì à teso gho aŋ kwò à? 64#Lɛv 24:16 Ghɛ̀ n zuw sûwnlò e wə̄n zo, ghɛ̀ êzəŋ dzɛ̂ èndūghō a?” Ghee a dzə̀m n dzeŋe dzɛ̀ ko enyəa ù m kpè alekpūw. 65Ghî à li gho fughu ŋ kàʼ ndùw aletsə̄nlō ntəgha a zəŋò Yɛso, bɔ̀lɔ̀ nǎaŋ tsughuu sə a wə̄n, ghe n zàʼ tsùghu sʉ u wə̄n alo kətsʉ̌a, dzàa ndùw wə̄n enyəa, “Dzǎa wô ghùw wəla ù zàʼ ghû, ghù sò nyɔ̂ʼ lo a ghùwshʉ̀ghà.” Sùghugòʼ tə̀ n nì sə̀ghàan kǎaŋ sùghò wə̄n alo ushwɛɛ.

Pità tùe màʼà Yɛso

(Mat 26:69-75; Lûk 22:56-62; Dzn 18:15-18, 25-27)

66Ghəa Pità naām doʼ êzə̀ am mbɛ̀, kɔ̂ɔ fə̀ zən fə̀ li fo aŋ kɔ̀ɔ m fɔ̀e è nē mi n ndùw è bugho; 67ghəa ù koʼ ndûw Pità zʉɛɛ̄ wən wo, ù n tɔ̀ʼ fwè wə̄n, dzɛ̀ tsùghù enyəa, “Ghù mò lò sugho ghɛ̀ à Yɛso, ghùw Nazalɛ̀t ù vʉ̂.”

68Pità mo è məghanlo, dzɛ̀ â kɔ̀ɔ fi fo enyəa, “Ŋ̀ kwo yo, M̀ buʼù tsǒo zuuwkɛ̄lɛ̄ sùghò yò fəgha chìa ghù kə̌a ghè kò.” Ù ŋ daŋso nùghù tsə̀ghà sə̀ ndùw a fǔumbɛ̀. Nùumbvʉ n daŋso nùghù tɔ̀ŋ è kɔʼ.

69Kɔ̂ɔ fi fə ŋ kòom kòʼ kpèʼe tsughu Pità, kàʼ aledzɛ̀ â ghì yia ghe mò kuʼù ti fughu enyəa, “Ghùw wən lo ghùw ù ghee.” 70Pità n naam tue ko nù.

A mo e tsûuŋ ko enyə, ghî a te ghə n dzɛ̀ kpèʼe tsughu â Pità enyəa, “Kùmkùm, ghù wən lo ghùw ù ghee, tɔŋlo enyəa ghù lǒ ghùw ù Galèlîi.”

71Pità mo è tue, kàʼ aletsɔ̀ɔm ghue u wə̄n, kɛ̀nlò àghəa an tuw kə wə̄n, dzàa tsùghùu enyəa, “M̀ bûʼ kwò yo ghùw vʉ̀a ghɛ̀ dzaā fì.”

72Nùumbvʉ n nùghù tɔŋ kpeʼe è kɔʼ aleghəə̄ŋ tsughu tənəghā tə bə̀ghà. Pità fi daŋso nùghù tɛ̀mòʼn tsùghù nû ghəa ghəla Yɛso mò dzɛ â wə̄n enyəa, “Tò nùumbvʉ e tɔŋ tənəghā tə bə̀ghà, à sò lǒ mò ghǔ m mùghò tue màʼà tənəghā tə təgha.” Ghəa ù tɛ̀môʼn tsughu ghəa ghən gho, ù m gbə̄n tsughu edî, mbùŋlò è di.

Currently Selected:

Mâk 14: agq

Highlight

Copy