Mâk 15

Ghe nî wò Yɛso à vʉ̀a Paelɛ̀t

(Mat 27:11, 12-14; Lûk 23:15; Dzn 18:28-38)

1Ghəa tsuʼ u zuw tsughu, tuw u təfɔ̀e ghèe ghê dèekə̀làŋ, àsùghò tsoʼ to ŋ kwu tsughu kədzəŋe ghèe ghê ghì a kaŋsì ghò a dzə̀m, nì kùm tsùghù Yɛso alo tətsāʼ, nì ndùw wə̄n a vʉ̀a Paelɛ̀t (Gɔvə̀nɛ̀ ù Lumà). 2Paelɛ̀t m bvʉ â wə̄n enyəa, “À lò ghu Də̀ŋ kə tə Dzûu kò à?”

Yɛso m bɛ̀lɛ̀ tsùghù enyəa, “Ghù dzɛ̀ èzə̀.”

3Tuw u təfɔ̀e wə̀ n tso kwu tsughu wə̄n fughu enyə an ndə̀màndəmà tə aghəa. 4Paelɛ̀t ŋ kòom dàŋso nùghù bvʉ kpeʼe ndùw â wə̄n enyəa, “Ghù kì yo ghəa è bɛlɛ̄ zo a? Kòʼo to ndə̀mà tə aghəa təla ghe kwuū ghu a tè à.”

5Tuw kə m kpuw Paelɛ̀t ghəa Yɛso dòʼŋ ke bɛlɛ̀ nduŋlò èghəa.

Ghe tsəghàsò kə̀làŋ enyəa ghe wi Yɛso

(Mat 27:15-26; Lûk 23:13-25; Dzn 18:39—19:16)

6À fə lo bughōo kə enaʼ kə ghee enyəa, abugho an nə̀ghà è kəzə̄, Paelɛ̀t ŋ ki aletsʉā zəghàa səā wô ghùw ndùghùtsaʼ u mɔ̀ʼ wəla naʼ e ləghaa. 7Bàlabâ fə̀ lo sugho nû aŋ ghê tùghùkə̀tuw ghəla ghe fə̀ lo a fughu an ndùghùtsāʼ enyəa ghe fə̀ wi ghùw alo kəndə̀m. 8Naʼ zə ŋ kàʼ ndùw alekɔʼɔ̄ ndûw a vʉ̀a Paelɛ̀t, dzàa ndùw â wə̄n enyəa ù ghəə̄ŋ nduw aŋghəa ù bùʼù ghəə̄ŋ tsəghà dzə. 9Paelɛ̀t m bvʉ â ghee enyəa, “Ghɛ̀ ləghaa enyəa Ǹ tsʉā zʉghàa səā wô ghɛ̀ â Də̀ŋ kə Tə̀dzûu ko a?” 10À n lo mò ù ŋ kele enyəa tuw u təfɔ̀e ù mô Yɛso â ghee tso kwu fughu wo ko bòʼ ghe mò ki mʉ̌ʉn ko a zəŋò wə̄n. 11Tuw u təfɔ̀e wə̀ nùghù tsùʼ sòʼ kɔ̀ʼ aghî enyəa ghe dzâa ndûw â Paelɛ̀t enyəa ù kuūwn zəghà səā wô ghee â Bàlabâs. 12Paelɛ̀t n daŋso bvʉ tsughu â ghee enyəa, “Ŋ̀ kuūwn dzə̂ èndugho â ghùw wəla ghɛ̀ tɔŋlo enyəa à lǒ Də̀ŋ kə Tə̀dzûu lo a?”

13Nɔ̂e kə aghì chi ŋ waʼn m buʼn sə kɔʼ mbɔ̂ŋ enyəa, “Tə̀ghaa wə̄n.”

14Paelɛ̀t m bvʉ â ghee enyəa, “Hô! ù bòʼò bǒon kə̀ kwò?”

Ghe ŋ kòom kǔuwn fə̀ghaan tughu sə kɔʼ â dzə̀ tò enyəa, “Tə̀ghaa wə̄n.”

15A m bùghò Paelɛ̀t sò ləghaa aleghəə̄ŋ tsughu enyəa nɔ̂e kə aghì chi kə doʼò tsughu kədzûŋ, ù n tsʉ̀ fùghù sə̀ ndùw Bàlabâ â ghee, kuuwn nì fùghù ndùw Yɛso enyəa ghe dɛ̂ɛn tsughu alo ekwùu, ghe ndûw təghàa.

Sùghugòʼ tə̀ sûuwn Yɛso

(Mat 27:27-31; Dzn 19:23)

16Sùghugòʼ tə̀ n nì nùghù nyə̀ ndùw wə̄n am bē kə mbɛ̀ kò a lô Paelɛ̀t, nyə tɔŋɔ zùuŋ tsùghù ghue e ghee, 17daŋso nì wò dàla è kə̀də̀ŋ dzə̀là tsùghù a zəŋò wə̄n, nyə̀m kɔ̀ʼ sùghò mbɛ kə təmgbē, dzə̀là tsùghù an tuw kə wə̄n. 18Ghe ŋ kāʼ tsughu wə̄n aletɔŋlo, dzàa tsùghùu enyəa, “Mbɛ̀ɛ, Də̀ŋ kə Tə̀dzûu!” 19Ghe n nughùun və̌ən tsughûu tuw kə wə̄n alo ekwùu, tsənlo ntə̀ghà a zəŋò wə̄n, nùghùun nyǎʼn tsughuu a ghuu a vʉ̀a wə̄n enyəa ghe təma wə̄n â kəma mò. 20A m bùghò ghe ndôʼ sɔʼsò mɛʼɛ̀ tsughu wə̄n, ghe n shwɛ̀lɛ̀ nùghù kɔ̌ʼ dàla è kə̀də̀ŋ zə̀, nì dzə̀là tsùghu ndzʉ tə wə̄n ebàm a zəŋò wə̄n, daŋso nùghù nì nùghù sə̀ ndùw wə̄n alendùw təghàa.

Ghe təghàa Yɛso

(Mat 27:32-44; Lûk 23:26-43; Dzn 19:17-27)

21 # Lum 16:13 Ghe ŋ ŋgāam kwu tsughu ghùw ù Sìlɛ̂n ù lì ghe mò tɔŋlo enyəa à lò Sǎemòn, mò ù nùghù wò â ŋgwəla gho, enyəa ù bòʼò dǎaŋ kə Yɛso. (Sǎemòn wən fə̀ lo tselè Àlɛ̀ʼsandà ghèe Lufùs). 22Ghe m bùghò â Yɛso an lùʼu kə̀ li ko ghe tɔŋlo enyəa à lò Golgōtà (e moʼò tsughuu enyəa à lò luʼū kə kaŋ kə kətūw). 23Ghe n nì fùghù wò wə̄n â lʉ̀ mò mo ghe n dzàn ghə ŋkàʼ à li gho nyûʼ dzə̌əŋ kɔʼ a te ghe tɔŋlo enyəa à lò mâel enyəa ù mʉ; ù ŋ kè kuūwn mʉ̄. 24#Sms 22:18 Ghe n daŋso nì tə̀ghàa kɔ̌ʼ wə̄n, nì dzùghùun tsùghu ndzʉ tə wə̄n aŋ ghùe e ghee, mo ghe təm tsughu bòʼ alekəŋo kele kɔʼ bâʼ kə təndzʉ kə̀là chìa ki alekele. 25Ghe fə̌ wə̄n təghāa kɔʼ tǒ aŋ nə̀ghà tə ezūuw tɛ̀ndzughu â gbə̀làgbə̀là tò. 26Ghe n tɔm naŋa kɔʼ ghəa zəla ù bonlō fughu alo kədàŋlo an tuw kə wə̄n enyəa, “Də̀ŋ kə Tə̀dzûu kə te ko.” 27#Èzy 53:12Ghe mo e təghàan wə̄n, tə̀ghàa dzə̌əŋ kɔʼ ghèe ghêe ghìitsɔŋɔ à li gho a bə̀ghà, u mɔ̀ʼ aŋ kwe u wə̄n ù təma wo, u mɔ̀ʼ alo ù kwû wò. 28[Zə n lueso tsughu lâŋ kə shwāʼ wəla mwàʼsò kə Kəzə̀ kə̀ dzɛ̂ tsughu enyəa, “Ghe n nì taŋ dzəəŋ ndùw wə̄n aŋ kɔ̀n kə ghì à biigh ghəla ghe naāŋ yô lâŋ kò.”]

29 # Sms 22:7; 109:25; Mâk 14:58; Dzn 2:19 Ghî ghə̀ n tsəghàa nèʼe ndùw ùtuw â wə̄n, sùuwn dàŋà tsə̀ghà sùghò wə̄n enyəa, “Hàʼalɛ̄! Ghù wəla ghù mò lô alesàʼà maʼà tsughu Ndùghèkə̀zə̀ è nē an Yɛsālɛ̀m, ghù bəgha kɔʼ ebàm alo ntsūʼ n təgha, 30bəghasə̄ tsughu ghue wʉ̀a wò, ghù sə tsughu wo fi alo kə dàŋlo!”

31Tuw u təfɔ̀e ghèe ghê ghì à deē kə làŋ ghə m bɔɔm tə̄mā sùghò wə̄n â nduw êzə̀, dzàa tsùghuu aŋ ghùe e ghee enyəa, “Ù maā ghî à li a bəghasə̄, vʉ̀a ù yò alebəghaasə u wə̄n wo ughue. 32Na tò Bəghambī ù te, Də̀ŋ kə Ezə̀lɛ̂ səā tsughuu wô alo kədàŋlo to a koʼò tsughu, a daŋso boō fughu ndûw â wə̄n.”

Ghî ghəla ghe mò təghàa naŋā dzəə̄ŋ kɔʼ ghèe ghê Yɛso n sûuwn ndùw sùghò wə̄n.

Vʉ e Yɛso

(Mat 27:45-56; Lûk 23:44-49; Dzn 19:28-30)

33Â nùutsə̀ ènyə, ləm kə n nùghù bvʉ̀ tsùghù tə luʼū tə̀ dzə̀m, dòʼò tàm tə ezūuw tə təgha. 34#Sms 22:1 An tàm tə ezūuw tə təgha Yɛso n nùghù dì sə kɔʼ an dzə̂ è tughu enyəa, “Ɛlɔ̌i, Ɛlɔ̌i, lɛma sàbachtānì?” Mo e môʼn tsùghùu enyəa, “Zə̀ kaŋa ko, Zə̀ kaŋa ko, ghù mùghò ènyə màʼà naŋatàʼà kwò à?”

35A m bùghò ghî à li ghəla ghe mô kuʼù lo fughu êzə̀ zuw ndûw ghəa yì gho, ghe dzɛ̀ enyəa, “Zuw ghɛ a, u vʉa ù tɔŋlo Èlaedzà.” 36#Sms 69:21 Ghùw ù ghee u mɔ̀ʼ n nyə̀ŋ ndùw nì tsùm kɔ̌ʼ lʉ̀ n lǐ mò an zə̀ghàdzùghù, mo ghe tɔ̂ɔŋ lʉ̀ n te mò enyəa à lò vinɛ̄gà, tsuʼ kɔʼ alo fəmbàŋ, fùghù ndùw â wə̄n enyəa ù mʉ, dzàa tsùghùu enyəa, “Zənlô to a kôʼ enyəa Èlaedzà sò bùghò nìi sə̌a tsughuu wò nǔ wə̄n à.”

37Yɛso n daŋso kè dì sə̀ wò an dzə̂ è tughu, daŋso mìa kɔ̀ʼ è wo.

38 # Ksm 26:31-33 Vʉa e zəa e mò lo an tɔ̄ʼ zə m gbə̀n bàa sə̀ tsùghù wò alo ugbà u bʉ̀ghà, alekaʼa tsughu edzūŋ tsùghù tɛ̀ wò etsə̄n. 39A m bùghò komndzūghū ù tə̀sùghugòʼ wəla ù mò ti lɛɛn ndùw wə̄n, kōʼ dzì zəla Yɛso kpuw a te, ù dzɛ̀ enyəa, “Ghùw wən mò kuūm lo Wɛ ù Kə̀zə̀.”

40 # Lûk 8:2, 3 Yîzən à li ghə n lo a fughu, ti alo kədɛ̀, lɛ̂ɛn wò ghəa yì. Yîzən a te a mò lo, Mèle Màgdàlɛ̂n, Mèle (zə̂ Dzɛ̂ms, wɛ̂ɛtùghu ù Dzosɛ̀s), àsùghò Sàlomɛ̀. 41Ghəa Yɛso fə̀ lo aŋ Galèlîi, yîzən ghən m bwîi kàŋlo a bàâ wə̄n, yòsò kǎaŋ wə̄n. Ghe n daŋso bùghò nùghù kɔ̀ʼ wò ghèe ghee an Yɛ̀lusalɛ̀m à ndə̀m è yìzən à li gho.

Ghe tsəla Yɛso

(Mat 27:57-61; Lûk 23:50-56; Dzn 19:38-42)

42A m bùghò an nə̀gha è gûŋsò zò, ghəa à fə̀ lô tsuʼ fə̀ ndzuūŋ naaŋ fə ufʉgha fo, tɔ̂ɔŋ tsuʼ fəla Tsuʼntsə̄ u ghee u bvʉ̂a bwiī a te, 43Dzùghùsî, ghùw ù Àlìmatìa ù lì, n dzə̀n tsùghu fə̀ŋ, ndùw kòʼ ndùw Paelɛ̀t, ndùw nɔ̀e ndùw gwən e Yɛso enyəa e ndûw tsəla. Dzùghùsî wə̄n fə̀ lô ghùw ù kaŋsì mo ghe tsəŋo nu wə̄n, mò ù lə̌əm tsə̀ghà sùghò fɔ̀e u Kəzə̀. 44Dzughu zə n zūm Paelɛ̀t alezūw enyəa Yɛso fɛ lo mò ù ghaam m kpuw. Ù n tɔŋɔ tsughu komndzūghū ù tə̀sùghugòʼ vʉ̀, bvʉ â wə̄n enyəa Yɛso yia kpuw dzə̀ nǔ ŋkāa. 45A m bùghò ù zuw tsughu aŋ ghùu ghùw sùghugòʼ vʉ enyəa Yɛso mâa kpùw, ù n dzɛ̀ â Dzùghùsî enyəa ù nìi ndûw gwən e te zo. 46Dzùghùsî n zue kɔʼ kəwùabâŋ, a m bùghò ù nì sə tsughu wo gwən e Yɛso zò, ù n nyəme kɔʼ wə̄n aŋ wùabâŋ kə te ko, nì nyə̀ŋsò nyə̀ ndùw gwən e te zo alo eshìa ghe guw nyə̄ ndûw alo kənɛ̄. Ù n bəŋso wò faŋkwu kə etīa kə̀ li ko, dzʉ̀a nàŋa wò fu wə eshìa u te wo a te. 47Mèle Màgdàlɛ̂n, àsùghò Mèle ù lì wən tɔɔ zə̂ Dzosɛ̀s, ŋ kòʼ nàŋa tsughu luʼū kəla ghe tsəlā Yɛso a te.

Currently Selected:

Mâk 15: agq

Highlight

Copy