Jn 10

Ngan kum nchiy-bvəyse

1Jesus suuy ge: Mɛ suuy əbluuy se ghɛn ge wel wɛ əb báà lii ɛ kengɛye bvəyse jii əbchio kengɛy, è sɛy chia kok kengɛy è lii əmchin, lu əbchoŋ gese lu wel wɛ əb yuyen ghel fii əbfua. 2Wel wɛ əb liin nɛ lu jii əbchio kengɛy lu nchiy-bvəyse. 3Wel wɛ əb chiyen əbchio kengɛy lóó əb dise nɛ lu se wen, bvəyse wene yɛ yio giɛ ə wen, əb me yɛ jaŋe ghene ɛyghel ɛyghel me liɛ fəy so. 4Əb fəyse sejim, əb me yɛ nduu ɛ mbiy, nɛ se gwiye ɛ wen ɛybam, bek ge se ke giɛ wen. 5Lòó se jia yɛ nduu ɛ wel əbchin ɛybam. Lòó se yɛ nyiŋe wen nyiŋen bek ge se báà se ke giɛ ə wen.

6Jesus nè maa ngan yin se ghene, ghene cheme jia keele kenəə kɛ əb kɛŋen se suuy se ghene.

Jesus lu nchiy-bvəyse ɛyjuŋ

7Jesus me gese suuy se ghene ge: Mɛ suuy əbluuy se ghɛn ge mɛ lu əbchio kengɛy wɛ bvəyse chian ɛ ten. 8Ghel ɛjim ghɛ ɛ́ nè gwiyen se mbiy se mɛ lu ɛchoŋ gese lu ghɛ ɛ́ yuyen ghel fii əbfua, dî bvəyse jia yio ghene. 9Mɛ lu əbchio ə kengɛy, nɛ naa ndɛ chia jii ɛ mɛ əbghun è lii əb boy, è yɛ lii gese fəye kejuŋ kiile ɛyyiɛ. 10Əbchoŋe loo əb yɛ gwiy kɛn se choŋ, se yuy, gese nɛ se bese. Mɛ gwiy se nɛɛy ge ghene kiile ɛychii, è yɛ loote chii kejuŋ.

11Mɛ lu nchiy-bvəyse ɛyjuŋ. Nchiy-bvəyse ɛyjuŋe sɛɛ lu kebaaten se kuo bek bvəyse wen. 12Wel wɛ ɛ́ laken wen laken, wɛ báà se lu loote nchiy-bvəyse, nɛ gese ki wiy wen bvəyse, yɛne báá nɛ ɛy gwiye, əb me nyiŋ è vəse bvəyse. Baa me koo bvəyse, è saŋse selee saŋsen. 13Wel wɛ ɛ́ laken laken nyiŋe dì, bek ka ɛ́ lak kɛn wen laken, nɛ əb ki wiy shii se bvəyse. 14Mɛ lu nchiy-bvəyse ɛyjuŋ. Mɛ ke bvəy ə som, nɛ bvəy ə some ke mɛ, 15kɛn ka ba ə wom keen mɛ, nɛ mɛ ke wen. Mɛ lu kebaaten se kuo bek bvəy ə som. 16Mɛ ki sɛy bvəy selee sɛ se bɛɛy ghàà yɛ lu ɛ ngoo fɛn. Mɛ lu se baaté seghene se gwiy so. Se nɛ̂y yɛ yio giɛ ə yom, me lu ngoo ɛymok, ki nchiy-bvəyse ɛymok.

17Baye koŋe mɛ bek ge mɛ lu nɛ mɛ fó ɛychii ə yom, ka mɛ nɛ̂y kase kiile. 18Wel wiy wɛ lòó əb fii ɛychii ə yom se mɛ. Foo mɛ se mɛ ngeŋ. Mɛ ki əbtaawe se fo ɛychii ə yom, nɛ mɛ gese ki əbtaawe se fii ɛybam. Lu ka ba ə wom làmen ge mɛ nɛɛy.

19Əbngiabsene gese fəy ɛ ghele Juus ghii məm bek kesuŋnene Jesus. 20Ghel se ɛydio se suuye ge: Əb ki ɛyfim! Əb jake jaken! Ghɛne yióté kenəə kɛ əb suuyen bek ghɛ?

21Ghel ɛlee se suuye ge: Wel ɛyfim lòó əb jia yɛ suŋnen ɛ jii ghan. Lɛ lòó wel ɛyfim yiase ɛshiɛ ə kenfef-a?

Ghele Juuse maa Jesus

22Nè lu əbliye kenton, nɛ ɛ́ yiɛ kechii kɛ ɛ́ nè kuumen ka ɛ́ nè kasen dise ndaa-ɛykokse ɛ Jolesalem. 23Jesus se ghanle ɛ kebaa ə ndaa kɛ ɛ́ nè toŋten ge kɛ Solomon, ɛ ndaa-ɛykokse. 24Ghele Juuse me kaame ɛ wen ɛybee, è bif se wen ge: Wɛ̀ kɛŋe ge ghɛs yɛ lu nɛ̀ ɛymaanene se chin lɛɛy? Loo lu nɛ wɛ̀ lu Vi wɛ Feyine nè Yiosen, wɛ̀ suuy se ghɛs kelaanen.

25Jesus fise ge: Mɛ suuymen, dî ghɛne jia fo ɛytem. Əbnəə wɛ mɛ nɛɛy ɛ əbtaawe nə ba ə wom dine wel wɛ luun mɛ; 26dî ghɛne jia fo ɛytem se mɛ bek ka ghɛne báà se lu ɛ ngoo bvəyse nə mɛ. 27Bvəy ə some yio giɛ ə yom. Mɛ ke ghene, nɛ ghene jumte mɛ. 28Mɛ foo ɛychii yɛ ɛy jia yî mɛy se ghene, nɛ ghene jia yî kuo. Lòó wel jia dzək ghene se mɛ keghoo. 29Ba ə wom wɛ əb foon ghene se mɛ chia kefaa kejim, nɛ lòó wel jia dzək ghene se wene keghoo. 30Ghɛse ba ə wom lu kefaa kemok.

31Ghele Juus ghii gese biŋte ɛtiy se təmle Jesus so. 32Əb suuy se ghene ge: Mɛ nɛɛymen əbnəə əbjuŋe se ɛydio ɛ ghɛne məm wɛ Bay nè foon ge mɛ nɛɛy. Ghɛne kɛŋe se təmle mɛ nɛ̀ ɛtiye bek ke kɛ?

33Ghene fise ge: Ghɛse báà se kɛŋe se təmle wɛ̀ nɛ lu bek kenəə kejuŋe. Ghɛse təmle bek ka wɛ̀ besen ɛyghel ə Feyin. Wɛ̀ lu kɛn wel, dî kɛŋe se yɛ liɛ ge wɛ̀ lu Feyin.

34Jesus fise ge: Ɛ́ nyak ɛ ghɛne ŋwaale tesak ge Feyine nè suuy ge: Ghɛn lu əmnyin. 35Ghɛsen ke ge kenəə kɛ ŋwaale-Feyine suuyen lu əbluuy, nɛ lòó ke jia kubsen; nɛ Feyine nè lô toŋte ghel ghi ghɛ giɛ ə Feyin nè gwiyen se ghene, ge əmnyin. 36Mɛ se lu naa wel wɛ Bay nè siysen è tum ɛ mbi fɛn. Ghɛn se suuy ge mɛ tɛyle Feyin bek ka mɛ suuyen ge mɛ lu wán ə Feyin lɛɛy? 37Ghàà ghɛn fó ɛytem se mɛ ɛ lefɛ ghɛn yɛnen ge mɛ báà se nɛɛy əbnəə wɛ Ba ə wom kɛŋen ge mɛ yɛ nɛɛy. 38Ka mɛ nɛɛyen əbnəə vin, nɛ ghɛn chèmè foo wiy ɛytem se mɛ, ghɛn ko fo ɛytem se əbnəə wɛ mɛ nɛɛyen, ka ghɛne keele se əbluuy ge Ba ə wom lu ɛ məm nə mɛ nɛ mɛ lu ɛ məm nə wen.

39Ghene gese se mome ge ɛ́ koo Jesus, əb me fii əbghun.

40Əb me gese lòò è diaŋ jio Joldan, è ndu se ghaa Joon nè yî fóon moo, è me se lu fo. 41Ghele se gwiye yɛne wen fo se ɛydio, suuye ge: Joon nè báà nɛɛy əbnəə əbchio əbyúméné, dî nɛ kenəə kejim kɛ əb nè suuyen kum wel vin lu əbluuy. 42Ghel se ɛydio me fo ɛytem se Jesus ɛ kelik fo.

Currently Selected:

Jn 10: oku

Highlight

Copy

Want to have your highlights saved across all your devices? Sign up or sign in

©CABTAL, 2012

Learn More About Ŋwaale Feyin; Kelek Kefɛɛ