Jn 11

Ɛykuo ə Lazalus

1Wel əblee nè lô se yafe ɛ ntɛke Betani nɛ ɛ́ toŋte ge Lazalus. Betani nè lu ntɛke ghe Mɛɛle ghene wan-no ə wene Malta. 2Mɛɛle vin nè lu wel wɛ əb nè yiosen ɛvəə ə Báàba Jesus nɛ̀ keyióséne keləm kejuŋe è fikse nɛ̀ nəŋse ketuu nə wene. Nè lu wán-no ə wene Lazalus wɛ əb nè yafen. 3Jɛmtese wen shine tinse ntum se Jesus ge: Báàba, sun ə yiɛ yɛ wɛ̀ koŋen naa se ŋaŋe yafe.

4Jesus yio ntum yin è suuy ge: Ɛyyaf yine báà se lu yɛ́ ɛykuo. Ɛy lu kɛn se nɛɛy ge ɛ́ yɛn ka əbtaawe Feyine luun, è yɛ foo ɛykokse se wan ə Feyin.

5Jesus nè lô se koŋe Malta ghene wan-no ə wene Mɛɛle, nɛ̀ Lazalus. 6Se lu ka əb nè yion ge Lazaluse yafe, è me gok ghaa əb nè luun se əbchii əbbua, 7è nɛy me suuy se ghon-ɛyfɛl nə wene ge: Ghɛsen kase ndu se Judea.

8Ghon-ɛyfɛl nə wene bif se wen ge: Ndinte, əbtəme bɛɛy ghàà diaf ka ghele Juuse nè kɛŋen se yuytê wɛ̀ nɛ̀ ɛtiye, wɛ̀ kase se nduu fo lɛɛy?

9Jesus fise ge: Chuyse lɛ wiy nɛ̀ nchuy njio-sebaa ɛyvəm-a? Naa ndɛ wɛ əb jɛ́len nɛ̀ nchuy lu nɛ lòó əb jia diamten, bek ka əb yɛne ɛybane yɛ̂ mbi fɛne. 10Dî nɛ əb jɛle nɛ̀ ntəke, ə́b diamten bek ka ɛybane wiyen. 11Jesus suuy dì è gese suuy ge: Bɛ ə wɛsen Lazalus buunemen, nɛ mɛ ndu è yɛm wen.

12Ghon-ɛyfɛl nə wene fise ge: Báàba, loo lu ge əb buune fene əb nɛ̂y bonen.

13Jesus nè suuy nɛ lu ge Lazalus kuomen, dî ghene sɛy yio ge əb buune buunen. 14Əb me loote suuy se ghene ge: Lazalus kuomen; 15dî nɛ mɛ saŋle ge mɛ kè báà se lu fo bek ghɛn, ka ghɛne fo ɛytem se mɛ; ghɛsen ndu yì è yɛn wen.

16Ntomas wɛ ɛ́ nè toŋten sɛy ge: Wan se ghɛ ɛbaa, me suuy se ghon-ɛyfɛl ɛlee ge: Ghɛsen ɛjim ndu ghɛsen nɛ̀ ndinte è kuo fo.

Jesus lu wel wɛ əb losen ghel se ɛykuo

17Jesus nɛy chin fo è yɛn ge shi əbchii əbkɛɛk ka ɛ́ nè gvəəmen Lazalus. 18Betani nè baksene se Jolesalem, kɛn ka tetaŋ tebaa dì. 19Ghele Juuse nè lô gwiy se ɛydio se cham ɛykuo wan-no Malta ghene Mɛɛle nɛ̂ yin.

20Malta yio ge Jesuse gwiye, è fəy se bɛy se fiisene wen, Mɛɛle gok kɛ wene ɛ ndaa. 21Malta se yɛne gwiye nɛ̀ Jesus, è suuy se wen ge: Báàba, wɛ̀ ne boy se yɛ lu fɛn, fene wan-no ə wom ne báà kuo. 22Dî nɛ mɛ ke ge lòó Feyine fó naa ghɛ se wɛ̀ kɛ wɛ̀ bifen ɛ leenen.

23Jesus suuy se Malta ge: Wan-no ə viɛ é kase loole se ɛykuo.

24Malta fise ge: Mɛ ke ge əb náà loole se ɛykuo ɛ kechii kenləysen kɛ wel əbjime loolen.

25Jesus suuy se wen ge: Lu mɛ wɛ mɛ losen ghel se ɛykuo gese foo ɛychii. Naa ndɛ wɛ əb foon ɛytem se mɛ, ka əb cheme yî kuo, lu nɛ əb yɛ ki ɛychii. 26Nɛ naa ndɛ wɛ əb chiin nɛ əb fo ɛytem se mɛ jia yî kuo. Wɛ̀ lɛ lu nɛ wɛ̀ bééme kii nɛ̂ kine-a?

27Malta fise ge: Ɛɛne Báàba. Mɛ lu nɛ mɛ beeme ge wɛ̀ lu Vi wɛ Feyine nè Yiosen, wán ə Feyin, wɛ əb nè luun se gwiy ɛ mbi fɛn.

Jesus diy

28Malta suuy di, è me ndu è chəmten se wan-no ə wene Mɛɛle ge: Ndinte lu fɛn nɛ əb suuy ge wɛ̀ gwiy. 29Mɛɛle yio dî, è loole kaŋ ɛymok è ndu se yɛne wen. 30Nè lu dî nɛ Jesus bɛɛy ghàà lii se məme ntɛk, nɛ əb bo bɛɛy bene fɛ Malta kè yɛnen wen. 31Ghele Juus ghɛ ɛ́ nè luun ɛ ndaa ghene ghe Mɛɛle, chəmsen wen yɛn ka əb tumen è loole è fəy, è me se nduu ɛ wen ɛybam, kwaate ge əb nduu əbghun ɛysɛy se yɛ diy fo.

32Mɛɛle ndu è yɛn Jesus, è təm ɛləy ɛ wen ɛyshiɛ è suuy ge: Báàba, wɛ̀ ne boy se yɛ lu fɛn, fene wan-no ə wom ne báà kuo.

33Jesus yɛn ka Mɛɛle diyen nɛ ghele Juus ghɛ ɛ́ kè gwiyen ɛ wen ɛybam diynen sɛy, ke kum ɛytem ə wen, è fo ngɛk se wen se ŋaŋ. 34Əb bif se ghene ge: Ghɛn ne gvəəme wen ghááy?

Ghene fise ge: Báàba, gwiye è yɛn.

35Jesus diy.

36Ghele yɛn è suuy ge: Ghɛn yɛn jii yɛ əb nè koŋen wen ɛ ten!

37Ghel ɛlee suuy ge lɛ ne lòó wel wɛ əb nè yiasen ɛshiɛ kenfefe jia nɛɛy ge ghàà əb kuo-a?

Jesus lose Lazalus se ɛykuo

38Kenəə tene gese kum ɛytem ə Jesus naa se ŋaŋ, əb ndu əbchio ɛysɛy. Ɛ́ nè chuf ɛysɛye ten nɛ lu ɛyghok, è chite nɛ̀ ɛytiye. 39Jesus suuy ge: Ghɛn chakse ɛytiy yi se əbchio ɛysɛy.

Malta wɛ wán-no wel əbkuon suuy ge: Báàba, ɛ́ yɛ lu nɛ əb se ləme. Shi əbchii əbkɛɛk ka ɛ́ nè gvəəmen wen.

40Jesus suuy se wen ge: Mɛ lɛ kè báà suuy se wɛ̀ ge wɛ̀ fo ɛytem se mɛ, é wɛ̀ nɛ̂y yɛn əbtaawe Feyin-a? 41Ghene chakse ɛytiy yi. Jesus kiy ɛyyio è suuy ge: Mɛ bɛ́ɛ̀lè wɛ̀ Bay ka wɛ̀ yion se mɛ. 42Mɛ ke ge wɛ̀ lóó wɛ̀ yɛ yiote mɛ əbliy əbjim. Mɛ suuye kine bek ghel ghɛ ɛ́ luun fɛn, ka ghene fó ɛytem se wɛ̀, è beeme ge nè tum wɛ̀ mɛ. 43Əb suuy di, è me jaŋ ɛ giɛ ɛytaa ge: Lazalus, fəy è gwiy! 44Wel əbkuon vi fəy è gwiy, nɛ ɛ́ lim ɛghoo ə wen nɛ̀ ɛvəə ə wene nɛ̀ əbnsake ndəyse, è gese bal ɛykek ə wen nɛ̂ əbwaŋe ndəyse. Jesus suuy se ghene ge: Ghɛn yayte wen é əb yɛ ndu.

Ɛ́ siyse se yuye Jesus

(Mat 26.1-5; Mak 14.1-2; Luk 22.1-2)

45Ghel se ɛydio ghɛ ɛ́ nè gwiyen se chame ɛykuo se ghe Mɛɛle yɛn kenəə kɛ Jesus nè momen, è me fo ɛytem se wen. 46Ghene ɛlee loo kɛ ghene è ndu se ghele kenone Falisee, è fekte kenəə kɛ Jesus kè nɛɛyen. 47Ghele kenone Falisee ghene ghele mbiy se ghɛ́ ntaŋlee konen ghene ghele ndaa nsake è suuy ge: Ghɛsene jɛl lɛɛy? Yɛn əbnəə əbchio əbyúméné wɛ wel vine feken! 48Ghɛsen loo lu è vəse ge əb yɛ nɛɛy ndu kɛn nɛ̀ əbnəə vine, é wel əbjim fo ɛytem se wen, é ghele Lûm nɛ̂y gwiy è sak ndaa-ɛykokse nə ghɛsen gese nɛ̀ ketume kɛ́sene.

49Wel əblee ɛ ghene məm wɛ ɛ́ nè toŋten ge Kaiafas, wɛ nè luun ketuu se ghɛ́ ntaŋlee ɛ nguk fô suuy ge: Ghɛn lu əbyuŋ. 50Ghɛne báà se ke ge ke jofe se ghɛn ge wel nɛ̂ vin əbmok kuo ɛ kelik nə ghele chia ka ɛ́ bese ketum kejim-a? 51Əb nè báà se suuy di se wene ngeŋ. Ka əb nè luun ketuu se ghɛ́ ntaŋlee ɛ nguk fô, lu nɛ əb nè teefe nɛ lu ntum ə Feyin ge Jesus nɛ̂y kuo se boyse ghele Juus. 52Ke nè báà se lu ge Jesus nè kuo kɛn bek ghene. Əb nè lu se kuo se chintene ghele Feyin ghɛ ɛ́ saaken ɛ mbi.

53Se kɛ̀ɛ̀tè se kechii fo, ghɛ́ mbiy nə ghele Juuse me se kɛŋe jii yɛ ɛ́ yúy Jesus ɛ ten. 54Jesus jia gese se jɛle ɛ dɛɛne ɛ Judea. Əb nè lô ndu ɛ kelik nɛ ke baksene se əbkwak əbyume, è se chii ɛ ntɛk ɛylee nɛ ɛ́ toŋte ge Eflem, ghene ghon-ɛyfɛl nə wene.

55Əbliy ɛyyiɛ Kechii Ɛyboyse, nɛy loo kwɛn ghel se ɛydio lòò ɛ ntɛkse è kok ɛ Jolesalem se lanse ngeŋse ghen ka ɛysake ghene kɛŋen, nɛ kechii keghakene gee se kwɛn. 56Ghene ndu di, è se kɛŋe Jesus, è loo konen ɛ ndaa-ɛykokse è se kante se ghene ngeŋse ge: Ghɛne kwaate gee ghɛ? Əb lɛ gwiy ɛyyiɛ kechii kin-a? 57Nè lu dî nɛ ghele mbiye se ghɛ́ ntaŋlee ghene ghele kenone Falisee fomen ɛysak ge naa ndɛ yɛn ghaa Jesus luun, əb din ɛ́ koo.

Currently Selected:

Jn 11: oku

Highlight

Copy

Want to have your highlights saved across all your devices? Sign up or sign in

©CABTAL, 2012

Learn More About Ŋwaale Feyin; Kelek Kefɛɛ