Luk 21

Ghɛy ghɛy ɛyfô nə wiy-nkfə

(Mak 12.41-44)

1Jesus mak ɛshiɛ è yɛn ka ghɛ əmkaa viin tefoo ə ghen se kekaŋe kɛ ndaa-ɛykokse. 2Əb yɛn sɛy ka wiy-nkfə əblee, nɛ lu wele ketan chemsen ɛshiɛ əbkaa ɛbaa se kekaŋ fo. 3Əb me suuy ge: Mɛ suuye əbluuy se ghɛn ge, wiy-nkfə wɛ luun wele ketan vin lu nɛ əb fó è chia kɛ wel əbjim foon. 4Wel əbjim ke bɛse fefafa ɛ məme əbdione foo, dî əbvii vin ka chèmè luun wele ketan lɛ, kfəte kebam ə wen è fo, nɛ shi mɛy-mɛy ə wen dì.

Əbchəyte əbliy wɛ̂ kenləysene

(Mat 24.1-2; Mak 13.1-2)

5Ghon-ɛyfɛl nə wen ɛlee se bensen ɛtiy ghɛ ɛ́ nè bomen ndaa-ɛykokse so gese nɛ̀ əbfua əbjuŋe əblee wɛ ghele nè foon se Feyine, Jesus me suuy ge: 6Əbliye gwiye wɛ̀ ɛ́ nɛ̂y sakte ndaa-ɛykokse yin yɛ ghɛne nəmlen, é ɛytiy ɛylee jia yɛ nyiŋ ɛ ɛylee ketuu.

7Ghene bif se wen ge: Ndinte, əbnəə vine naa gan ɛ leghɛ? Əbchəyte wɛ əb naa din ge əbnəə vin shi se gan, lu əb kɛ?

8Jesus fise ge: Ghɛn yɛ toknen fɛ wel náà lɛɛse ghɛn. Ghele naa fəy se ɛydio è lɛɛse ghel nɛ̀ ɛyghel ə yome suuye ge: Lu mɛ mboyse, gese suuye ge: Əbliye kwɛnmen. Ghàà ghɛn naa yiote se ghene. 9Ghɛne náà yio ge ɛyghoŋe lu, gese nɛ̀ ge ghele bo yionen wiy, ghàà ghɛn yɛ fan. Əbnəə vine lu se naa se gan, dî nɛ báà se lu ge mbi se mɛye kɛn se əbliy.

10Əb me gese suuy se ghene ge: Ghel ɛylak ɛylee náà yɛ noo ghel ɛylak ɛylee, nɛ̀ əbfon ghene ghel ə wen təme ɛyghoŋ ghene ghe əbfon əblee ghene ghel ə wene. 11Ntiɛ naa yɛ shiken ketaan ketaan, nɛ̀ jeŋ ghene teyafe yuyte ghel ɛ əblik əblik. Əbchəyte əbnəə əbchio əbyúméné náà yɛnsen ɛ ɛyyio se fanse ghel. 12Nɛ əbnəə vine geese gan lu nɛ ɛ́ nɛ̂y koo ghɛn è nyable so, è sak ghɛn ɛ ngayse ɛyjem è tinse se nchak. Ɛ́ nɛ̂y liɛ ghɛn é ghɛn teem ɛ tefone ghene ghɛ ɛysake ɛyshiɛ bek mɛ.#21.12 Bek mɛ: Lu əblame Gleek nɛ ɛ́ nyak ge: Bek ɛyghel ə yom. 13Kine nɛ̂y yɛ lu nsan yɛ ghɛne chia ɛ ten è fekte kenəə ə Feyin se ghene. 14Ghɛn ghal tetem ə tɛn è jia yɛ kwaate ge ghɛn sɛ nɛ̂y suuy gee ghɛ ɛytiy ə nsak-a? 15Bek ge mɛ náà fo ghɛn nɛ giɛse ɛytof, é mbanen ə sɛne jia yɛ lu kekwɛnten se tunse kenəə kɛ ghɛne suuyen. 16Ghel ghɛ ɛ́ naa fo ghɛn se mbanen ə sɛne lu ɛbaa ə ghɛn ghene ɛnoo ə ghɛne, nɛ̀ ghone-noo ə ghɛne, nɛ̀ ghele ndaa nə ghɛne gese nɛ̀ sun ə sɛne. Ghene náà nɛɛy ɛ́ koo ghɛn ɛlee è yuytê. 17Ghel ɛjime náà yɛ bane ghɛn bek mɛ. 18Dî nɛ nəŋ ketuu ɛymok nə wel se ghɛne jia yî lɛy se nkan. 19Ghɛn teem yi ketaan, é ghɛn naa kiile ɛyboy.

Jesus fekte ka ɛ́ náà sakte Jolesalem

(Mat 24.15-21; Mak 13.14-19)

20Ghɛne naa yɛn nɛ ghɛ ɛyghoŋe gim Jolesalem è kaale è tas ghɛn yɛ ke ge shi əbliy wɛ ɛ́ sakte fo. 21Ke náà gan di, é ghel ghɛ ɛ́ luun ɛ Judea nyiŋke, è kok se kfənse, é ghɛ ɛ́ luun ɛ ntɛk fo fəyke, é ghɛ ɛ́ luun ɛ ntɛkse jia ndu fo. 22Mɛ suuy lɛ bek ge əbliye tene nɛ̂y yɛ lu əbliy wɛ Feyine mak ngɛk se Islael se nɛɛy ge əbnəə wɛ ɛ́ nè nyakenmen ɛ wen ə ŋwaale kwɛn. 23Ke yi yɛ bef se əbkiy ghɛ ɛ́ luun nɛ̀ əmlɛɛme gese se əbkiy ghɛ ɛ́ kiin ghon ɛbole ɛ keleŋ əbliy fo. Feyine nɛ̂y yafse ɛytem se wel əbjim ɛ Islael é ghel ɛjim ɛ ketuu ntiɛ yɛn ngɛk ɛytaa. 24Ɛ́ naa gwɛte ɛlee gwɛten, è koote ɛlee è vii se nchak ɛ əbtum əbchine. Ghel əbtume naa nəkse Jolesalem se chin ka əbliye ghene nɛ̂y kwɛn.

Ɛygwiye Wanwel

(Mat 24.29-31; Mak 13.24-27)

25Ɛ́ náà loo lu ɛ əbliy fo, é əbnəə əbbɛɛmene gan se chuy, nɛ̀ njoŋ gese nɛ̀ əmjesme. Telak tejim ɛ ketuu ntiɛ náà yɛ ki ngɛkse, nɛ̀ wel əbjim fane jii yɛ jio se ghakene dəmken gese loolee. 26Ghele náà yɛ fan, chiŋe bek ge ghene kwaate ge əbnəə əbtaa shi se gan ɛ mbi bek ge ɛ́ nɛy yɛ lu dî nɛ Feyine shike əbfua wɛ əb luun ɛ ɛyyio. 27Ɛ́ me yɛn nɛ Wanwel gwiye ɛ məme mbàkse nɛ̀ əbtaawe gese nɛ̀ əbghaakee. 28Ghɛne naa yɛn ka əbnəə vin kɛɛten se gan, ghɛn teem è lose əbtuu ə wɛn bek ge Feyin shi se tene ghɛn.

Ghɛn yɛ Toknen

(Mat 24.32-35; Mak 13.28-31)

29Jesus me maa ngan yin se ghene ge: Ghɛn kiy kegvəm gese nɛ̀ əmkak əmlee. 30Ghɛne yɛn nɛ əm se tooke, ghɛn me keele ge ɛyghuu shi se guo. 31Lu ghɛɛ-ghɛɛ ka ghɛne náà yɛn əbnəə vin nɛ əb se gane ghɛn me keele ge əbliy ɛysak nə Feyine se baksene. 32Mɛ suuy əbluuy se ghɛn ge, ghele ghɛ́ ntem fɛne jia naa kuo è mɛy nɛ əbnəə vin əbjime báà gan. 33Ɛyyio ghene ntiɛ náà mɛy dî é giɛse ə some jia naa shiken. 34Ghɛn toknen, buu dì, é tetem ə tɛne lun nɛ əbnəə ka ɛyyiɛ yɛ ŋaŋe, ɛynəə, nɛ̀ nkwaatese ɛychii yɛ́ fɛne, é kechii tene náà koo ghɛn ka ketâm dì. 35Mɛ suuy lɛ bek ge ke naa gwiy ka ketâm kɛ ke koo wel əbjim ɛ ketuu ntiɛ. 36Ghɛn yɛ lu kebaaten əbliy əbjim jeme ge Feyine boyse ghɛn se əbnəə ghan, é ghɛn nɛy yɛ lu kekwɛnten se teem ɛyshiɛ nə Wanwel. 37Jesus se dinte əbnəə se ghele ɛ ndaa-ɛykokse əbchii əbjim, loo lu ɛ likfəəy əb lòò è kok se chii ɛ kfən kekoo Olif. 38Nè loo lu ɛ bvəse bvəse, ghel ɛjim kaale ɛ ndaa-ɛykokse se yɛ yiote se wen.

Currently Selected:

Luk 21: oku

Highlight

Copy