Luk 7

Ɛybeeme wele Mbiy Ɛyghoŋ

(Mat 8.5-13)

1Jesus nɛy mɛyse əbnəə əbjim wɛ əb nè suuyen se ghel ghii, è lii ndu ɛ Kabanaum. 2Wele mbiy ɛyghoŋe wɛ̂ Lûm əblee, wɛ əb nè luun ɛ Kabanaum nè lô se ki wel ɛyfɛl nə wen, koŋe wen naa se ŋaŋ. Wel ɛyfɛl vi naa fɛy ɛyyaf è se noo se kuo. 3Wele mbiy ɛyghoŋ vi yio kum Jesus, è me tum chɛɛ sɛ ɛylake Judea selee ge ghene ndu è beŋte wen ge əb gwiy è chuk wel ɛyfɛl nə yi. 4Ghene ndu se Jesus è se buke ɛghoo nɛ̀ ɛyteme, suuy ge: Wel vin lu kekwɛnten ka lòó wɛ̀ giamten wen, 5bek ge əb nè koŋmen ɛylak ə yɛ́s è bàklè ngay ɛyjem se ghɛs.

6Jesus ghene ghene me lòò è se nduu, è loo bɛɛte ndaa ə wel ɛyghoŋ vi, əb me tum sunse wen ge ghene ndu è teefe se Jesus ge: Báàba, ghàà yɛ ghiyte gwiy bek ge mɛ báà se lu kekwɛnten ka wɛ̀ lii se mɛ ndaa. 7Ghɛy kenəə kɛ ke kè nɛɛyen mɛ yɛn ge mɛ wiy kekwɛnten se gwiy se wɛ̀. Suŋnen kɛn suŋnen é wel ɛyfɛl nə mɛ bonen. 8Mɛ lu sɛ̂y wel əblee wɛ əb luun ɛ ɛyshaa ɛysak, nɛ ghel ɛyghoŋ ɛlee lu ɛyshaa ɛysak nə mɛ, nɛ mɛ suuy se vin ge: Ndu fɛɛy, é əb ndu, è suuy se vii ge: Gwiye fɛn, é əb gwiy, è suuy se wel ɛyfɛl nə mɛ ge: Nɛɛy kine, əb nɛɛy.

9Jesus yio kii nɛ̂ kine è se lu nɛ̀ əbchíò əbyúméné, è me benle è suuy se feliɛ wel fɛ fe nè gwiyen ɛ wen ɛybam ge: Mɛ suuy se ghɛn ge chèmè lu Islael fene mɛ bɛɛy ghàà yɛn ɛynkii wel wɛ əb foon ɛytem se Feyine ka wel vin. 10Ghele ntum ghii loo fiile se wel ɛyghoŋ vi ndaa è me yɛn nɛ wel əbfɛlen vi bonenmen.

Jesus lose wán wiy ə nkfə se ɛykuo

11Se moote Jesus lòò è se nduu ɛ ntɛk nɛ ɛ́ toŋte ge Nain, ghene ghon-ɛyfɛl nə wene, nɛ feliɛ wele gwiye ɛ wen ɛybam. 12Se lu ka Jesus bɛɛten əbchio kefafe kɛ́ ntɛk foo, ɛ leghɛ è me yɛn nɛ ɛ́ bɛɛy ɛygvəne wel è se nduu se gvəəme. Nè lu wán əbluumen se wene nyii wen nyiŋ, nɛ̀ no ə wen lu wiy ə nkfə. Nè lu dî nɛ ngose wele loo ntɛk fô è se gwiye ɛ wen ɛybam. 13Báàba yɛn əbvii vi è koosen ɛysen se wen naa se ŋaŋ, è suuy se wen ge: Ghàà se diy. 14È me chia ndu è kum kenkɛy, ghel ghɛ ɛ́ nè bɛɛyen me teem, əb suuy ge: Wándɛ nsum, mɛ suuy se wɛ̀ ge: Wɛ̀ loole! 15Wel əbkuon vi me loole è diom, è kɛɛte se suŋnen. Jesus me kase fo wen se no ə wen.

16Ɛyfane koo ghel ɛjim naa se ŋaŋ, ghene se kokse Feyin suuye ge: Wele ntum əbtaa nə Feyine lu nɛ əb fəy ɛ ghɛsene məm, nɛ Feyine lu nɛ fe gwiy se giamten ghel ə wen. 17Sakghɛ kum kenəə kɛ Jesus nè nɛɛyen kin me kal ɛylake Judea ɛyjim gese nɛ̀ əbtum wɛ əb báksen.

Jesus ghene Joon Nfoo Moo

(Mat 11.2-19)

18Se lu ka ghon-ɛyfɛl nə Joon nè fiɛlenmen əbnəə vin əbjim se wen, əb me jaŋ ɛlee ɛbaa, 19è tum ge, ghene ndu è bif se Báàba ge: Lu wɛ̀ wel wɛ ɛ́ chiyten moo ghɛs yɛ chiyte wel əbchin-a? 20Ghene ndu, è yɛn Jesus, è suuy se wen ge: Joon Nfoo Moo tum ghɛs ge ghɛs bif se wɛ̀ ge: Lu wɛ̀ wel wɛ ɛ́ chiyten moo ghɛs yɛ chiyte wel əbchin-a?

21Nè lu kɛn əbliy fô nɛ Jesus chuke tenkii teyaf nə ghele se ɛydio, jume əbyioy əbbee, gese yiase ɛshiɛ əbnfef. 22Jesus me fise se ghele ntum ghii ge: Ghɛn kase ndu se Joon è fekte əbnəə wɛ ghɛn yɛnen è gese yio. Əmnfefe se yɛne əblik, nɛ̀ ɛkɛblene jɛle, nɛ̀ ghɛ ɛ́ yafen nɛ̀ kensaase bonene, nɛ̀ əbchichii yio əbnəə, nɛ̀ ghel ghɛ ɛ́ kuonmen kase loole se ɛykuo, nɛ̀ ghele ghɛ́ nchɛke nchɛke kiile sakghɛ əbjuŋ. 23Nɛ ke lu kejuŋ se vi di wɛ əb báà se maanen mɛ. 24Ghele ntum nə Joon ghii lòò, Jesus me se suŋnene se ngose wel yi kum Joon ge: Ghɛn nè ndu ɛ əbkwak əbyume se yɛne ghɛ? Ghɛn nè ndu se yɛne əbgii ka əbfiɛfe shiksen-a? 25Ghɛn nè ndu naa fo se yɛne ghɛ? Wel nɛ əb laf kejuŋ-a? Ɛngaŋ, ghel ghɛ ɛ́ lafen kejuŋ gese chii ɛ kedɛŋe sɛɛ lu nɛ lu ɛ ntokse. 26Ghɛn nè ndu fo naa se yɛne ghɛ, se yɛne ntum ə Feyin-a? Ɛɛn, mɛ suuy se ghɛn ge əb lu wel nɛ əb chia ntum ə Feyin. 27Lu wel wɛ ɛ́ nè nyakenmen ɛ ŋwaale-Feyine kum wen ge:

“Yɛn-a! Mɛ náà tinse wele ntum nə mɛ ɛ wɛ̀ mbiy,

é əb gwiy è siyse jii yɛ wɛ̀ chia ɛ ten.”

28Mɛ suuy se ghɛn ge wel nè bɛɛy ghàà yɛ lu ɛ mbi fɛn wɛ əb chian Joon, dî nɛ wel wɛ əb layten è ləysen ɛ kelik əbfon nə Feyine lu nɛ əb ko chia Joon.

29Ghel ghii ɛjim, naa nɛ̀ ghel ɛyfii shile yio əbnəə wɛ Jesus nè suuyen, è bente. Nè lu ghel ghɛ ɛ́ nè beemen ge Feyine lu ɛ titiy, nɛ gese lu ghel ghɛ Joon nè foonmen moo se ghene. 30Dî nɛ ghele kenone Falisee gese nɛ̀ ghel ghɛ ɛ́ nè dinten tesak ə Moses nè lô tunse kenəə kɛ Feyine nè siysen kin kum ghene, bek ge ghene nè báà beeme ge Joon fó moo se ghene.

31Jesus gese se kante ge: Kefaa kɛ lòó mɛ feksen ghele ghɛ́ ntem fɛn so lu ghɛ? Ghene lu ka ghɛ-ɛ? 32Ghene lu ka ghon ɛtɛlɛɛ ghɛ ɛ́ yesen ɛ kelik əbwɛy jaŋe suuy se wel nɛ̀ wel ge:

Ghɛs toŋmen ndoŋ ge ghɛn bin,

ghɛne báà bin.

Ghɛse mak giɛ ɛykuo ge ghɛn diy,

ghɛne báà diy.

33Nè lu ka Joon Nfoo Moo nè gwiyen è se bame əbfua-əbyíɛ́ne gese jii əmnduk, ghɛn se suuy ge əb ki ɛyfim. 34Wanwel gwiy kɛ́ wene è se yíɛ́ gese nəə, ghɛne me se suuy ge: Yɛn chamenchi, nɛ̀ ɛyshiɛ əmnduk vii, lu sun ə ghel ɛyfii shile gese nɛ̀ ghele mbee! 35Dî nɛ nchiinen ə ghel ɛjim ghɛ ɛ́ beemen ɛytof ə Feyine dine ge ɛy lu ɛ titiy.

Əbvii mbeese yiósé Jesus

36Wele kenone Falisee əblee nè lô jaŋ Jesus se əbfua-əbyíɛ́ne, Jesus ndu ɛ wen ə ndaa, è diom se yɛ yiɛ. 37Əbvii əblee wɛ nè luun wele mbee ɛ ntɛk fo yio ge Jesuse yíɛ́ ɛ wele kenone Falisee vi ɛ ndaa, è me liɛ febel, nɛ keyióséne keləm kejuŋe lu ɛ ten è ndu so fo, 38è lii è teem ɛ Jesus ɛybam, è se diye nɛ əmnshiɛ mə wen səəke ɛ Jesus ɛvəə. Əb nɛy me ngvəkte è se fikse ɛvəə ə Jesus nɛ̀ nəŋse ketuu nə wene, nəmlee, gese yiose nɛ̀ keyiósén keləm kejuŋe kii.

39Wele kenone Falisee wɛ əb kè jaŋen Jesus yɛn di, è suuy ɛ wen əblɛɛ ge: Wel vine báà se lu wele ntum nə Feyine, buu dì fene əb kè lô keele ge ɛynkii əbvii wɛ əb kumen yi vin lu wele mbee. 40Jesus suuy se wen ge: Simon, mɛ ki kenəə se suuy se wɛ̀. Əb me fise ge: Ndinte, mɛ yiotee.

41Jesus me fiɛl ge: Wel nè lô foose ghel ɛbaa nɛ̀ əbkaa. Əb nè foose əblee nɛ̀ ɛshiɛ əbkaa kekas ɛyviɛ ɛytan, è foose əblee nɛ̀ əmmtanme. 42Ɛykaa yi ghak ghene se lak, wele ten me suuy ge yi buusemen ge ghaa ghene se lak. Se ghel ghɛ ɛbaa ghine, wɛ̀ kwaate ge wel wɛ lòó əb yɛ koŋe ba əbkaa vi naa se ŋaŋ lu əb kɛ?

43Simon fise ge: Mɛ kwaate ge lòó yɛ lu wel wɛ ɛ́ nè buusen ɛykaa ɛydione se wen. Jesus me suuy ge: Wɛ̀ chio ɛ titiy. 44Jesus kase è kiy əbvii vi è suuy se Simon ge: Wɛ̀ yɛne əbvii vin-a? Mɛ kè lii ɛ wɛ̀ ndaa, wɛ̀ jia fo moo ge mɛ suu ɛvəə ə ghom so, dî əbvii vine suu ɛvəə ə ghom nɛ̀ əmnshiɛ mə wen è fikse nɛ̀ nəŋse ketuu nə wene. 45Wɛ̀ kè báà bam mɛ se nəmle ge mɛ gwiy kejuŋ, dî nɛ se kɛ̀ɛ̀tè ka mɛ kè liin ɛ wɛ̀ ə ndaa əbvii vine báà buu se yɛ nəmle ɛvəə ə ghom. 46Wɛ̀ chèmè kè báà yiose ketuu ə kom nɛ̀ əmngvəlme, dî nɛ əbvii vine yokmen ɛvəə ə ghom nɛ̀ keyióséne keləm kejuŋe. 47Mɛ me se suuy se wɛ̀ ge: Ɛykoŋ ɛyghakene yɛ əb dinen se mɛ yine chiote ge ɛ́ lɛysemen mbeese wen sɛ se luun naa se ɛydio. Dî nɛ naa ndɛ wɛ ɛ́ lɛysen se wen se ɛylay lu kɛn ka ɛykoŋ ə wene luun se Feyine sɛ̂y se ɛylay.

48Jesus me suuy se əbvii vi ge: Mɛ lɛysemen mbee ə shiɛ. 49Ghel ghɛ ghene ghene nè yiɛn me se kante se ghene ngeŋse ge: Vin lu ndɛ wɛ əb me lɛyse mbeese? 50Jesus ləysen, è suuy se əbvii vi ge: Ɛybeeme ə yiɛ boysemen wɛ̀, jɛle kejuŋ.

Currently Selected:

Luk 7: oku

Highlight

Copy